Agtutubo
Integridad

Integridad

Agingga a matayak diakto ikkaten kaniak ti kinatarnawko (Job 27:5).

Ugaliekto ti agbalin a nadayaw tapno mayannurotko dagiti tignayko iti pannakaammok iti umno ken biddut.

Dagiti Naidawat a Kasapulan a Padas nga Ik-ikkan Pateg

Leppasem dagiti sumaganad a tallo a kasapulan a padas nga ik-ikkan pateg. Papirmaam ken paikkam iti petsa iti naganak kenka wenno lidermo ti tunggal padas kalpasan a malpasmo.

  1. Ti integridad ket ti kinatallugod ken panagtarigagay nga agbiagtayo babaen kadagiti pammati ken pagrukodantayo. Basaem ti Moroni 10:30–33 ket panunotem no ania ti kayat a sawen ti “tallikudanyo ti amin a saan a nadiosan.” Basaem ti polieto a Para iti Pigsa dagiti Agtutubo. Panunotem no kasano a maigidiat dagiti pagrukodan ti Apo kadagiti pagrukodan ti lubong. Isuratmo iti diurnalmo dagiti maitutop a pagrukodan para iti galad, panagkawes, panagsasao, kasta met iti literatura, pelikula, telebision, Internet, musika, celfon, ken dadduma pay a media. Isuratmo pay ti planom nga agtalinaed a nadalus iti moralidad ken maikari a dumar-ay iti templo. Kalpasan ti panagtungpalmo kadagiti pagrukodan iti uray makabulan laeng, isuratmo dagiti panagriknam iti diurnalmo ket ituloymo ti agtungpal iti panagkumitmo.

  2. Mangaramidka iti bukod a panangamiris iti bukodmo nga integridad. Saludsodem iti bagim dagiti sumaganad: Liklikak kadi ti tsismis, di mayannatup nga ang-angaw, panagsapata ken panagtabbaaw, ken panagtagtagilag-an maipapan kadagiti sagrado a pagsasaritaan? Naan-anayak kadi a napudno, nadalus iti dayaw, saan a naulbod, mapagpannurayan, ken mapagtalkan iti aramidko iti pagadalan ken iti dadduma pay nga aktibidad? Agkararagka iti inaldaw para iti pigsa ken para iti pannarabay ti Espiritu Santo tapno tulongannaka nga agbiag nga addaan integridad. Isuratmo iti diurnalmo dagiti banag a maaramidmo tapno mapadur-as ti bukodmo nga integridad ken uray maysa laeng a baro nga ugali a kayatmo a padur-asen.

  3. Ti Mangisalakan ti naan-anay a pagwadan ti integridad. Inaramidna no ania ti inkarina iti Amana nga aramidenna. Basaem ti 3 Nephi 11:10–11. Adalem ti panagbiag dagiti dadduma pay a tao kadagiti nasantuan a kasuratan a nagbiag nga addaan integridad. Basaem ti Genesis 39; ti libro ni Ester; Job 2:3; 27:3–6; Daniel 3 ken 6; Dagiti Aramid 26; Doktrina ken Katulagan 124:15; ken Joseph Smith—Pakasaritaan 1:21–25. Iti diurnalmo ammuem dagiti wagas a nangipakitaan dagitoy a tao iti integridad. Panunotem ti maysa a panawen a naaddaanka iti tured a nangipakita iti integridad, nangruna idi saan a nalaka wenno nalatak daytoy. Ibinglaymo ti padasmo ken dagiti panagriknam maipapan iti daytoy iti miting ti panagpaneknek wenno adalen wenno iti maysa a naganak wenno lider.

Dagiti Mainayon a Padas nga Ik-ikkan Pateg

Leppasem dagiti tallo a mainayon a padas nga ik-ikkan pateg. Mabalinmo a pilien manipud kadagiti sumaganad a pagpilian wenno isuratmo agingga iti dua a bukodmo. Nasken nga anamongan ti naganak kenka wenno lidermo dagiti insuratmo a mismo sakbay a mangrugika. Papirmaam ken paikkam iti petsa iti naganak kenka wenno lidermo ti tunggal padas kalpasan a malpasmo.

  1. Kitaem ti balikas nga integridad iti diksionario. Kaumanmo ni nanangmo, ni lelangmo, wenno ti sabali pay a babai a raraemem maipapan iti pannakaawat ken panangyaplikarna iti balikas. Mangaramidka iti listaan dagiti wagas a pakayannurotam kadagiti tignaymo iti pannakaammom iti umno ken biddut, ket isuratmo iti diurnalmo no ania ti kayat a sawen kenka ti maaddaan iti integridad.

  2. Sursuruem ti maipapan iti panagtakder a saksi. Basaem ti Mosiah 18:9. Kalpasanna isuratmo iti diurnalmo no kasano a mabalinmo a mismo ti “agtakder a [saksi] ti Dios iti amin a kanito ken iti amin a banag, ken iti amin a lugar.” Mangpilika iti bukod nga ugali a kasapulam a padur-asen tapno makapagbalinka a maysa a nasaysayaat a pagwadan. Padur-asem ti integridad iti biagmo bayat ti panangsanaymo iti baro nga ugali iti uneg ti tallo a lawas. Isuratmo ti panagdur-asmo iti diurnalmo.

  3. Ti panagbiag iti linteg ti panagayuno ket maysa a gundaway tapno maipakita ti integridad. Iti maysa a naituding a Domingo a panagayuno, manglanganka a mangan ken uminum iti dua nga agsaruno a pannangan ket agabuloyka iti daton iti panagayuno ti pamiliayo. Maaddaanka iti nalawag a panggep iti panunotmo bayat ti panagayunom. Mabalinmo nga agayuno para iti masakit a gayyem, tapno maparmek ti dakes nga ugali, tapno magun-od ti naisangsangayan a bendision para iti bagim wenno iti maysa a tao, wenno tapno mangted iti panagyaman. Rugiam ken gibusam ti panagayunom iti maysa a kararag.

  4. Ilistam dagiti isyu, ayo, ken parikut a mangpakapsut iti pamilia. Basaem ti mensahe ti Umuna a Panguluen iti panid 1 daytoy a libro, “Ti Kaamaan: Maysa a Waragawag iti Lubong” (kitaen iti panid 101), ken iti benneg maipapan iti kaamaan iti Para iti Pigsa dagiti Agtutubo. Kalpasanna sukisokem kadagiti magasin ti Simbaan ti balakad dagiti kankanunongantayo a propeta, mammadto, ken mammaltiing. Isuratmo iti diurnalmo ti planom a mangpapigsa iti agdama a pamiliam ken dagiti ik-ikkan pateg ken kannawidan a kayatmo nga ipasdek iti masakbayan a pamiliam.

Dagiti Bukod a Padas nga Ik-ikkan Pateg

Proyekto nga Ik-ikkan Pateg

Kalpasan a naileppasmo dagiti innem a padas nga ik-ikkan pateg iti integridad, mangpartuatka iti maysa a proyekto a mangtulongto kenka a mangsanay iti nasursurom. Nasken a maysa daytoy a napateg nga aramid a mangbubosto iti uray sangapulo laeng nga oras a mangileppas. Sikakararag a dawatem ti pannarabay ti Espiritu Santo tapno pumili iti maysa a napateg a proyekto.

Paanamongam iti naganak kenka wenno lidermo ti proyekto sakbay a mangrugika. Mangisuratka iti ebalwasion kalpasan ti panangileppasmo. Iti baba dagiti sumagmamamno a kapanunotan para iti maysa a padas nga ik-ikkan pateg.

  • Isuratmo dagiti pagarigan dagiti wagas a nangipakitaan dagiti miembro ti pamilia iti kababalin ti integridad iti biagda.

  • Ti kaadda ti integridad kaipapananna ti panagtungpalmo kadagiti panagkumitmo. Ammuem ken tungpalem dagiti inkumitmo kadagiti dadduma bayat ti pannakiramanmo a kas maysa a miembro ti timpuyog wenno organisasion wenno iti saad iti panangidaulo iti pagadalam wenno komunidadmo.

  • Iti panangusarmo iti 1 Timoteo 4:12 a kas pangiwanwanmo, mangbukel ken mangaramidka iti maysa nga aktibidad a mangtulongto a mangsanay kenka iti panagbalinmo “a maysa a pagwadan dagiti mamati.”

  • Ti panagaramid ken panagtungpal kadagiti katulagan iti templo ket agkasapulan iti integridad. Agsaganaka a mangaramid kadagiti katulagan iti templo babaen ti panangaramid ken panangaruatmo iti maysa a kawes a mayannurot kadagiti pagrukodan ti disente a kawes a kas nailawlawag iti polieto a. Para iti Pigsa dagiti Agtutubo ken kadagiti balikas dagiti sibibiag a propeta.

  • Kadagiti bitla nga inted dagiti General Authority, sukisokem dagiti topiko maipapan iti integridad ken kinapudno. Sursuruem no apay a napateg unay dagitoy a pagbatayan iti pagragsakam ken panagsaganam iti templo. Mangaramidka iti maysa a banag (kas iti maysa a retrato, libro dagiti adaw, wenno maysa a nabordaan a banag) a mangipalagipto kenka iti inaldaw maipapan iti panagkumitmo nga agbalin a napudno ken pudno iti amin a gundaway ken maam-ammoka iti bukodmo nga integridad.

Ti proyektok ket:

Ti planok a mangaramid iti proyektok ket:

Pannakaanamongna

Napattapatta a petsa ti pannakaileppas

Ti ebalwasionko iti proyekto ket (iramanmo no kasano ti panagriknam ken no kasano a dimmur-as ti pannakaawatmo iti integridad):

Pirma ti naganak wenno lider

Petsa

Dagiti oras a nabubos

Iprenta