Naragsak nga Isasangbay iti Bukod a Panagdur-as

Maysaka a maipatpateg nga anak a babai ti Nailangitan nga Ama, a naisagana nga umay iti daga iti daytoy naituding a panawen para iti sagrado ken nagloriaan a panggep. Addaanka iti maysa a nangayed a pagrebbengan a mangusar iti pigsa ken inpluwensiam para iti pagsayaatan. Binendisionannaka ti managayat a Nailangitan nga Amam kadagiti talento ken kabaelan a makatulongto kenka a mangipatungpal iti nadiosan a misionmo. Bayat ti panangsursurom nga umawat ken agtignay babaen kadagiti ik-ikkan pateg ti Young Women iti biagmo, maipaugalinto kenka ti panagkararag, panagadal iti nasantuan a kasuratan, panagtungpal kadagiti bilin, ken panagserbi iti dadduma. Dagitoy nga aginaldaw a bukodmo nga ugali ket mangpapigsanto iti pammatim ken pammaneknekmo ken ni Jesucristo. Dagitoy pay ti mangipalubosto kenka a mangbigbig ken mangpadur-as kadagiti naidumduma a sagutmo.

Kanayon nga usarem ti impluwensiam a mangitag-ay ken mangbendision iti pamiliam, kadagiti dadduma pay nga agtutubo a babbai, ken dagiti agtutubo a lallaki a pakipulpulapolam. Dayawem ti kinababai, itandudom ti priesthood, ken ipategmo ti napudno a kinaina ken kinaama.

Bayat ti pannakiramanmo iti Bukod a Panagdur-as, makitiponka iti rinibribu a dadduma pay nga agtutubo a babbai nga agkagkagumaan nga umasideg ken ni Cristo ken “agtakder a saksi ti Dios iti amin a kanito, ken iti amin a banag, ken iti amin a lugar” (Mosiah 18:9). Agpabalakadka kadagiti nagannak kenka, ket sikakararag a piliem dagiti panggep a tun-oyen a mangtulongto kenka a mangpadur-as kadagiti napintas a kababalinmo a kas babai, mangpapigsa iti pammaneknekmo, ken mangragpat iti nadiosan a kabaelam. Usarem a nainsiriban ti panawenmo iti Young Women babaen ti panagsaganam nga umawat kadagiti sagrado nga ordinansa iti templo, tapno agbalinkanto a napudno nga asawa ken ina, ken tapno mapapigsam ti pagtaengan ken kaamaam.

Ti Umuna a Panguluen