Saguday

Ti natalugadingan a babai asino ti makasarak? ta ti pategna nangatngato ngem rubrubi Provervio 31:10).

Agsaganaakto a sumrek iti templo ken agtalinaedak a natarnaw ken maikari.

Maibatayto dagiti panunot ken tignayko kadagiti nangato a pagrukodan ti nasayaat a kababalin.

Dagiti Kasapulan a Padas nga Ik-ikkan Pateg

Leppasem dagiti sumaganad nga uppat a naidawat a kasapulan a padas nga ik-ikkan pateg. Papirmaam ken paikkam iti petsa iti naganak kenka wenno lidermo ti tunggal padas kalpasan a malpasmo.

Ti saguday ket maysa a pagtuladan ti panunot ken tignay a maibatay kadagiti nangato a pagrukodan ti nasayaat a kababalin. Iramanna ti kinadalus ti dayaw ken kinatarnaw. Ti bileg nga agparsua iti mortal a biag ket maysa a natan-ok a bileg ti Dios nga intedna kadagiti annakna. Imbilinna a mausar laeng daytoy a bileg iti nagbaetan ti maysa a lalaki ken maysa a babai, a nagkallaysa a mayannurot iti linteg kas agassawa. Adalem ti kaipapanan ti kinadalus ti dayaw ken saguday babaen ti panangbasam iti Jacob 2:28; “Ti Kaamaan: Maysa a Waragawag ti Lubong” (kitaen iti panid 101); ken iti benneg maipapan iti kinadalus iti seks iti For the Strength of Youth.Basaem pay ti maikasangapulo-ket-tallo a Pagannurotan ti Pammati ken ti Dagiti Proverbio 31:10–31. Iti diurnalmo, isuratmo dagiti naikari a bandision ti panagbalin a nadalus ken natarnaw iti seks ken ti panagkumitmo nga agbalin a nadalus iti dayaw.
Ti nainsagudayan a panagbiag “iti amin a panawen ken iti amin a banag, ken iti amin a lugar” ket mangpaikari kenka iti kanayon a panangkadkadua kenka ti Espiritu Santo. No mabuniagan ken makumpirmaanka, maited kenka iti sagut ti Espiritu Santo tapno mangtarabay kenka iti amin nga aspeto ti biagmo. Gapu ta saan nga agtalinaed ti Espiritu Santo kadagiti narugit a tabernakulo, kasapulan ti panagbiag a nainsagudayan para iti kaadda ti panangkadkadua ti Espiritu Santo ken panangawat kadagiti bendison dagiti ordinansa iti templo. Basaem dagiti sumaganad a reperensia iti nasantuan a kasuratan ket lasinem dagiti naikari a bendision: Juan 14:26–27; 15:26; 2 Nephi 32:1–5; ken Doktrina ken Katulagan 45:57–59; 88:3–4; 121:45–46. Iti diurnalmo, isuratmo no ania ti nasursurom, ken isuratmo ti maipapan iti maysa a panawen a nakariknaam ti pannarabay ti Espiritu Santo.
Agsaganaka tapno agbalin a maikari a sumrek iti templo ken makiraman kadagiti ordinansa iti templo. Basaem ti maika-5 a kapitulo ti Alma. Agaramidka iti listaan dagiti saludsod ni Alma. Sungbatam dagiti saludsod para iti bagim, ken ilistam dagiti banag a kabaelam nga aramiden ken aramidemto tapno maisaganam ti bagim nga agbalin a natarnaw ken maikari a sumrek iti templo ken umawat iti amin a bendision nga inkari ti Nailangitan nga Amatayo kadagiti ay-ayatenna nga annak a babbai.
Gapu ta ay-ayatennaka ti Mangisalakan ken intedna ti biagna para kenka, makapagbabawika. Ti panagbabawi ket maysa nga aramid ti pammati ken ni Jesucristo. Basaem ti Moroni 10:32–33, ti libro ni Enos, ken ti benneg maipapan iti panagbabawi iti Para iti Pigsa dagiti Agtutubo. Ti panangsubbot a sakripisio ti Mangisalakan ket namagbalin a posible kenka tapno mapakawan kadagiti basbasolmo. Basaem dagiti kararag iti sakramento iti Doktrina ken Katulagan 20:77, 79. Ikeddengmo ti makiranud a sikakari iti sakramento iti tunggal lawas ket punnuem ti bagim kadagiti nainsagudayan nga aramid a mangyeg kenka iti naespirituan a bileg. Bayat ti panangaramidmo iti daytoy, dumakkelka a napigpigsa iti kabaelam a mangsupring iti sulisog, agtungpal kadagiti bilin, ken agbalin nga ad-adda pay a kas ken ni Jesucristo. Ikeddengmo no ania ti maaramidmo iti inaldaw tapno agtalinaedka a natarnaw ken maikari, ket isuratmo ti planom iti diurnalmo.

Proyekto nga Ik-ikkan Pateg

Mabalinmo a rugian daytoy a naidawat a kasapulan a proyeko nga ik-ikkan pateg iti ania man nga oras.

Pinili ti Mangisalakan ti agbiag a nainsagudayan. Surotem ti balakadna nga “agadalkayo kaniak” DkK 19:23) babaen ti panagbasa iti intero a Libro ni Mormon: Mainayon a Pammaneknek ken ni Jesucristo. Yarigmo dagiti nasantuan a kasuratan iti biag ken kasasaadmo. Bayat ti panangbasam, isuratmo a kanayon dagiti kapanunotam iti diurnalmo. Kitaem ti pagwadan ti Mangisalakan. Ania ti inaramidna ken dagiti simmurot Kenkuana tapno agbiagda iti nainsagudayan a panagbiag? Iti panangileppasmo ti panagbasam, isuratmo ti pammaneknekmo.

“Imbagak kadagiti kakabsat a ti Libro ni Mormon ti kalintegan a libro ditoy daga, ket isu ti pagbatayan ti pammatitayo, ket as-asideg ti tao iti Dios babaen ti panangsurotna kadagiti linaonna, ngem iti sabali a libro” (Joseph Smith, iti pakauna iti Libro ni Mormon).

Ti Pammaneknekko maipapan iti Libro ni Mormon

“Ket inton awatenyo dagitoy a banag, igunamgunamko a dawatenyo iti Dios, ti Agnanayon nga Ama, iti nagan ni Cristo, no saan a pudno dagitoy a banag; ket no naimpusuan ti idadawatyo, ken addaan iti pudno a panggep, ken addaan iti pammati ken ni Cristo, iparangarangna ti kinapudnona kadakayo, babaen ti pannakabalin ti Espiritu Santo” (Moroni 10:4).

Pirma ti naganak wenno lider

Petsa

Dagiti oras a nabubos