Agtutubo
Pammati

Pammati

Ti pammati saan a ti kaadda ti naan-anay a pannakaammo kadagiti banag; ngarud no adda pammatim mangnamnamaka iti banag a saan a makita, ngem pudno (Alma 32:21).

Anaknak a babai ti Nailangitan nga Ama, a mangipatpateg kaniak. Adda pammatik iti agnanayon a planona, a maisentro ken ni Jesucristo, a Mangisalakanko.

Dagiti Naidawat a Kasapulan a Padas nga Ik-ikkan Pateg

Leppasem ti sumaganad a tallo a naidawat a kasapulan a padas nga ik-ikkan pateg. Papirmaam ken paikkam iti petsa iti naganak kenka wenno lidermo ti tunggal padas kalpasan a malpasmo.

  1. Ti umuna a pagbatayan ti ebanghelio ket pammati ken ni Apo Jesucristo. Adalem ti maipapan iti pammati manipud kadagiti nasantuan a kasuratan ken sisibiag a propeta. Basaem ti Hebreo 11; Alma 32:17–43; Ether 12:6–22; kenJoseph Smith—Pakasaritaan 1:11–20. Basaem ti dua a bitla iti sapasap a komperensia maipapan iti pammati. Aramatem ti bukodmo a pammati babaen ti panangpatalinaedmo iti ugali a managkararag iti biagmo. Irugim babaen ti panangisaom a kanayon kadagiti binigat ken rinabii a kararagmo. Kalpasan ti tallo a lawas a panangsurotmo iti daytoy a pagtuladan, ilawlawagmo iti maysa a naganak wenno dadaulo no ania ti nasursurom maipapan iti pammati ken no kasano a pinapigsa ti inaldaw a bukodmo a panagkararag ti pammatim. Iti diurnalmo isuratmo dagiti riknam maipapan iti pammati ken kararag.

  2. Takuatem dagiti pagbatayan ti pammati nga insuro dagiti inna dagiti agtutubo a lallaki a mannakigubat ni Helaman. Basaem ti Alma 56:45–48 ken 57:21. Subliam nga adalen no ania ti ibagbaga ti “Ti Kaamaan: Maysa a Waragawag iti Lubong” (kitaen iti panid 101) maipapan iti akem ti maysa nga ina. Kaduam ti maysa nga ina, lelang, wenno lider, ilawlawagmo dagiti kababalin a kasapulan ti maysa a babai tapno maisuro dagiti ubbing tapno maaddaanda iti pammati ken mangibatay kadagiti pangngeddengda kadagiti kinapudno ti ebanghelio. Kasano a matulongannaka dagitoy a pagbatayan iti biagmo ita ken matulongannaka nga agsagana tapno agbalin a napudno a babai, asawa, ken ina? Isuratmo dagiti kapanunotam ken riknam iti diurnalmo.

  3. Ti panagbiag kadagiti pagbatayan ti ebanghelio ket agkasapulan iti pammati. Basaem ti maipapan iti pammati iti Bible Dictionary wenno True to the Faith.Ti pammati iti Mangisalakan a ni Jesucristo ket mangiturong iti panagtignay. Mangpilika iti maysa a pagbatayan a kas iti kararag, apagkapullo, panagayuno, panagbabawi, wenno panangngilin a nasantuan iti aldaw ti Sabbath. Iti bukodmo a pagtaengan wenno sabali a disso, planuem ken idatagmo ti maysa nga adalen iti family home evening maipapan iti no kasano a makatulong ti pammati kenka nga agbiag iti dayta a pagbatayan ti ebanghelio. No mabalin, kiddawem iti maysa a miembro ti pamilia nga ibinglayna ti maysa a padas a nangpapigsa iti pammatina. Ibinglaymo met dagiti bukodmo a padas. Iti diurnalmo isuratmo ti maysa kadagidiay a padas ket iladawanmo dagiti panagriknam maipapan iti pammati.

Dagiti Mainayon a Padas nga Ik-ikkan Pateg

Leppasem dagiti tallo mainayon a padas nga ik-ikkan pateg. Mabalinmo a pilien manipud kadagiti sumaganad a pagpilian wenno isuratmo agingga iti dua a bukodmo. Nasken nga anamongan ti naganak kenka wenno lidermo dagiti insuratmo a mismo sakbay a mangrugika. Papirmaam ken paikkam iti petsa iti naganak kenka wenno lidermo ti tunggal padas kalpasan a malpasmo.

  1. Agsursuroka iti ad-adu pay maipapan iti sakramento. Basaem ti maipapan iti Maudi a Pangrabii Mateo 26:26–28; Marcos 14:22–24; ken Lucas 22:17–20. Mangparnuayka iti maysa a pagtuladan iti panagutob bayat ti sakramento babaen ti panagdengngeg a nasayaat kadagiti himno ken kararag ti sakramento. Panunotem no apay a makiranudtayo iti tinapay ken danum. Kalpasan ti tallo a lawas a panangsurotmo iti daytoy a pagtuladan, isuratmo iti diurnalmo ti sumagmamano kadagiti kari nga aramidem bayat ti pannakiranudmo iti sakramento ken pananglaglagipmo kadagiti katulagam idi nagbuniagka ken no ania ti aramidem tapno matungpalmo dagidiay a kari. Isuratmo iti diurnalmo no kasano a pinapigsan ti pannakaawatmo kadagitoy a kari ti pammatim iti Mangisalakan.

  2. Padur-asem ti pannakaawatmo maipapan iti Pannubbot ni Jesucristo babaen ti panangbasa iti Isaias 53:3–12; Juan 3:16–17; Taga-Roma 5; 2 Nephi 9:6–7, 21–26; Alma 7:11–13; 34:8–17; ken Doktrina ken Katulagan 19:15–20. Iti diurnalmo isuratmo dagiti panagriknam maipapan iti Mangisalakan ken no ania ti naaramidnan para kenka. Iburaymo dagiti panagriknam iti maysa a miting ti panagpaneknek.

  3. Padur-asem ti pannakaawatmo maipapan iti plano ti pannakaisalakan. Mairaman kadagiti pagadawan iti panagadal ti 1 Taga-Corinto 15:22; Apocalipsis 12:7–9; 2 Nephi 9:1–28; 11:4–7; Doktrina ken Katulagan 76:50–113; 93:33–34; Moises 4:1–4; ken Abraham 3:24–27. Mangidrowing wenno mangalaka iti maysa a ladawan a mangipakita iti plano ti pannakaisalakan, agraman ti panagbiag sakbay daytoy a biag, pannakayanak, biag iti daga, pannakatay, panangukom, ken biag kalpasan ti panangukom. Iti panangusar iti daytoy a ladawan, ilawlawagmo ti plano ti pannakaisalakan iti klasem, pamiliam, wenno maysa a gayyem. Ilawlawagmo no kasano a ti pannakaammo iti plano ket aringanna dagiti tignaymo, tulongannaka a makaawat iti kinasiasinom, ken napapigsanan ti pammatim.

  4. Binilinnatayo ti Apo nga agbayad iti apagkapullo. Basaem ti Doktrina ken Katulagan 119 ken Malakias3:8–12. Gapu ta ti panagtungpal iti linteg ti panagayuno ket pammaneknek iti pammatim, agbayadka iti naan-anay nga apagkapullo. Kalpasan ti tallo a bulan, isuratmo iti diurnalmo no kasano a nakatulong ti panagbayadmo iti apagkapullo iti panagdur-as ti pammatim. Ilistam dagiti parabur iti biagmo, agpada a dakkel ken bassit, a simmangbay gapu iti pammatim iti pagbatayan ti apagkapullo.

Dagiti Bukod a Padas nga Ik-ikkan Pateg

Proyekto nga Ik-ikkan Pateg

Kalpasan a naileppasmon ti innem a padas nga ik-ikkan pateg, mangpartuatka iti maysa a proyekto a mangtulongto kenka a mangsanay iti nasursurom. Nasken a maysa daytoy a napateg nga aramid a mangbubosto iti uray sangapulo laeng nga oras a mangileppas. Sikakararag a dawatem ti pannarabay ti Espiritu Santo tapno pumili iti maysa a napateg a proyekto.

Paanamongam iti naganak kenka wenno lidermo ti proyekto sakbay a mangrugika. Mangisuratka iti ebalwasion [evaluation] kalpasan ti panangileppasmo. Adda iti baba dagiti sumagmamano a kapanunotan para iti maysa a proyekto nga ik-ikkan pateg.

  • Yulom ti “Ti Sibibiag a Cristo” (kitaen iti panid 102). Bayat ti panangaramidmo, ibilangmo ti impluwensia ti Mangisalakan iti biagmo ken no kasano a napapigsan ti pammatim Kenkuana. Sanayem ti mangsurot iti pagwadan ti Mangisalakan.

  • Basaem ti Alma 32:28–43. Panunotem ti pammati a kas maysa a bukel bayat ti panangtulongmo a mangmula, mangtaripato, ken mangapit iti maysa a minuyongan ti natnateng. Isuratmo iti diurnalmo no kasano a mataraonam, mataripatom, ken mapapigsam ti pammatim.

  • Dumar-ayka iti klase ti pakasaritaan ti pamilia [family history] iti ward wenno branchyo. Agummongka kadagiti adda nga estoria dagiti kabagiam wenno dadduma pay a nangipakitan iti pammati, wenno kaumanmo dagiti miembro ti pamilia wenno dadduma pay ket isuratmo dagiti estoriada.

  • Iladawanmo ti bendision ti pammati babaen ti panagsurat iti orihinal nga estoria, daniw, wenno kanta wenno babaen ti panangileppas iti maysa a proyekto iti ladawan ti arte [visual arts] a mangipakita iti pammatim ken ni Jesucristo.

Ti proyektok ket:

Ti planok a mangipatungpal iti proyektok ket:

Pannakaanamongna

Napattapatta a petsa ti pannakaileppas

Ti ebalwasionko iti proyekto ket (iramanmo no kasano ti nariknam ken no kasano a dimmur-as ti pannakaawatmo maipapan iti pammati):

Pirma ti naganak wenno lider

Petsa

Oras a nabubos