Bukod a Pateg

Laglagipenyo a napateg dagiti kararua iti imatang ti Dios (DkK 18:10).

Addaanak iti awan patinggana a pateg iti bukodko a nadiosan a mision, nga ikagumaakto nga ipatungpal.

Dagiti Naidawat a Kasapulan a Padas nga Ik-ikkan Pateg

Leppasem dagiti sumaganad a tallo a naidawat a kasapulan a padas nga ik-ikkan pateg. Papirmaam ken paikkam iti petsa iti naganak kenka wenno lidermo ti tunggal padas kalpasan a malpasmo.

Anaknaka a babai ti Nailangitan nga Ama, a makaam-ammo kenka ken mangipatpateg kenka. Basaem ti Salmo 8:4–6; Jeremias 1:5; Juan 13:34; Doktrina ken Katulagan 18:10; Abraham 3:22–23; ken Joseph Smith—Pakasaritaan 1:1–20. Isuratmo iti diurnalmo no kasano nga isuro kenka dagitoy a nasantuan a kasuratan nga am-ammonaka ti Nailangitan nga Ama, ipatpategnaka, ken maseknan kenka.
Adalem ti maipapan iti kinapateg dagiti bendision ti patriarka babaen ti panangadal maipapan kadagitoy iti True to the Faith ken kadagiti kallabes a bitla iti sapasap a komperensia. Ammuem no apay a mait-itedda ken asino ti mabalin a mangted kadagitoy. Ilawlawagmo iti maysa a naganak wenno dadaulo ti Simbaan no kasano nga agsaganaka nga umawat iti bendison ti patriarka ken no kasano a maisuronaka daytoy maipapan iti pategmo ken kinasiasinom ken agbalin a tarabay iti unos ti biagmo. No saanmo pay a naawat ti bendisionmo, agsaganaka nga umawat iti daytoy.
Basaem ti Doktrina ken Katulagan 18:10 ken 121:4. Aramidem ti amin a kabaelam a mangparegta iti dadduma ket iparikam kadakuada a napategda. Inaldaw iti uneg ti dua a lawas siputam dagiti napintas a kababalin ken nasayaat a galad dagiti dadduma. Bigbigem dagitoy babaen ti panangyebkas wenno iti panangisurat. Iti diurnalmo isuratmo no ania ti nasursurom maipapan ti pateg dagiti tao ken no kasano a dumakkel ti bukodmo a panagtalek no paregtaem dagiti dadduma.

Dagiti Mainayon a Padas nga Ik-ikkan Pateg

Leppasem ti tallo a mainayon a padas nga ik-ikkan pateg. Mabalinmo a pilien manipud kadagiti sumaganad a pagpilian wenno isurat agingga iti dua a bukodmo. Nasken nga anamongan ti naganak kenka wenno lidermo dagiti insuratmo a mismo sakbay a mangrugika. Papirmaam ken paikkam iti petsa iti naganak kenka wenno lidermo ti tunggal padas kalpasan a malpasmo.

Agsagsaganaka itan tapno mangipatungpal iti maysa a naisangsangayan a misionmo iti daga. Basaem ti Doktrina ken Katulagan 88:119. Iti diurnalmo mangaramidka iti listaan dagiti namnamaem ken arapaapmo para iti masakbayan a pagtaengam, pamiliam, ken edukasionmo ken sumagmamano a napapateg a banag a kayatmo a tun-oyen iti biagmo, agraman ti panagbalin a maysa nga asawa ken ina. Kalpasanna mangisuratka iti plano a mangtulongto kenka a manggun-od kadagiti panggepmo a tun-oyen. Ibinglaymo daytoy a plano iti maysa a miembro ti pamilia, lider, wenno gayyem.
Makiramanka iti maysa a pabuya iti sala, bitla, musika, wenno drama iti pagadalan, iti komunidadmo, wenno iti simbaan. Kasano a nangpapigsa iti riknam iti bukod a pateg ken panagtalek iti bagi ti pannakiramanmo iti daytoy nga aktibidad? Isuratmo dagiti kapanunotam iti diurnalmo.
No makiramanka iti family history [pakasaritaan ti pamilia], masursurom a maawatan ti kinasiasinom ken bukodmo a pateg. Sarungkaram dagiti sibibiag a kabagiam tapno ammuem ti ad-adu pay nga impormasion maipapan iti pakasaritaan ti pamiliayo agingga a mabalin. Kalpasanna leppasem ti maysa a tsart ti kapuonan [pedigree chart] ti pamiliam ket ilistam dagiti ordinansa iti templo a naileppasen para iti tunggal tao.
Inikkannaka ti Nailangitan nga Ama kadagiti naisangsangayan a sagut. Basaem ti 1 Taga-Corinto 12:4–12; 13; Moroni 7:12–13; 10:8–18; ken Doktrina ken Katulagan 46:11–26. Kiddawem iti maysa a miembro ti pamilia, maysa a lider ti Young Women, ken maysa a gayyem a mangisurat kadagiti nasayaat a kababalin nga inted kenka ti Apo. Ilistam dagiti sagutmo iti diurnalmo, ken isuratmo no kasano nga ituloymo a padur-asen dagitoy a sagut ken usarem dagitoy tapno makapagserbi iti pamilia ken kadagiti dadduma.

Dagiti Bukod a Padas nga Ik-ikkan Pateg

Proyekto nga Ik-ikkan Pateg

Kalpasan a maileppasmo dagiti innem a padas nga ik-ikkan pateg iti bukod a pateg, mangpartuatka iti maysa a proyekto a mangtulongto kenka a mangsanay iti nasursurom. Nasken a maysa daytoy a napateg nga aramid a mangbubosto iti uray sangapulo laeng nga oras a mangileppas. Sikakararag a dawatem ti pannarabay ti Espiritu Santo tapno pumili iti maysa a napateg a proyekto.

Paanamongam iti naganak kenka wenno lidermo ti proyekto sakbay a mangrugika. Mangisuratka iti ebalwasion kalpasan ti panangileppasmo. Adda iti baba dagiti sumagmamano a kapanunotan para iti maysa a proyekto nga ik-ikkan pateg.

Addaanka iti naidumduma ken nadiosan a mision nga aramiden iti daga ket naparaburanka kadagiti talento a mangipatungpal iti daytoy a mision. Bayat ti panangileppasmo iti maysa kadagiti sumaganad a proyekto, masaksiamto ti pateg ken naited a tulong dagiti dadduma ken kasta met a makitamto ti impluwensiam kadagiti biag dagiti dadduma. Ipeksam ti panagyamanmo kadagiti nakipagtrabahuam, ket isuratmo dagiti padasmo iti diurnalmo.

Tiponem ti bukodmo a pakasaritaan wenno pakasaritaan ti pamilia nga usarem dagiti naisurat iti diurnalmo, ladawan, ken napapateg a papeles.
Ibinglaymo ti maysa kadagiti sagutmo babaen ti panangisurom wenno panangtiutormo iti maysa a tao iti maysa nga asignatura iti akademiko, musika, ay-ayam, wenno maysa a paglaingan iti arte.
Mangaramidka iti maysa a proyekto a mangpadur-as iti kasasaad ti panagbiag ti maysa a tao nga agkasapulan.
Mangiturong wenno makiramanka iti maysa a koro dagiti agtutubo, maysa a drama, pabuya iti talento, wenno eksibit ti arte.
Mangsursuroka iti maysa a paglaingan a dawdawaten dagiti agpatrabaho a makatulong kenka iti agdama wenno iti masakbayan a pagtrabahuan.

Ti proyektok ket:

Ti planok a mangaramid iti proyektok ket:

Pannakaanamongna

Napattapatta a petsa ti pannakaileppas

Ti ebalwasionko iti proyekto ket (iramanmo no kasano ti panagriknam ken no kasano a dimmur-as ti pannakaawatmo iti bukod a pateg):

Pirma ti naganak wenno lider

Petsa

Dagiti oras a nabubos