Ania ti Aramidek No Malpasko ti Bukod a Panagdur-as?

Ti panangileppas iti programa iti Bukod a Panagdur-as ket maysa a napateg unay nga addang iti panangpapigsa iti pammatim ken panagsagana para kadagiti katulagan iti templo. Nasursuromon no kasano ti agaramid kadagiti panagkumit, mangipatungpal kadagitoy, ken mangireport ti panagdur-asmo. Nasken nga agtultuloy daytoy a proseso bayat ti panagtalinaedmo iti dalan nga agturong iti templo ken agtultuloy a mangpadur-as kadagiti kababalin a mangtulongto kenka iti unos ti panagbiagmo. Mabalinmo nga ituloy ti panagdur-asmo babaen ti panangitrabahom a manggun-od iti Honor Bee wenno babaen ti panangirugim manen iti Bukod a Panagdur-as.

Agtrabaho a Manggun-od iti Honor Bee

Ti Honor Bee charm ket napnuan pakasaritaan a naited kadagiti agtutubo a babbai a nagtallugod a nagaramid iti ad-adu pay ngem iti naidawat a kasapulan. Tapno maituloymo ti panagdur-asmo, mabalinmo nga itrabaho a gun-oden ti Honor Bee a kadua ti medalionmo iti Pammigbig iti Agtutubo a Kinababai. Mabalinmo nga itrabaho a gun-oden ti Honor Bee charm kalpasan ti panangileppasmo iti agpada kadagiti sumaganad a naidawat a kasapulan.

1. Basaem manen ti Libro ni Mormon. Ti naipaugali nga inaldaw a panagadal iti nasantuan a kasuratan ket mangpapigsanto iti pammatim ken mangtulong kenka nga umawat iti bukod a pammaregta ken pannarabay iti unos ti panagbiagmo. No agbasaka iti uray laeng lima a minuto iti inaldaw, maileppasmo ti sibubukel a Libro ni Mormon iti makatawen.

2. Agserbika kadagiti dadduma iti dagup ti 40 nga oras. It lugar a mabalin, sumagmamano kadagitoy nga oras ket mabubos koma iti panangisuro iti sabali pay nga agtutubo a babai iti Bukod a Panagdur-asna. Nasken a maaramid daytoy babaen ti panangiturong ti panguluen ti Young Women iti ward wenno branch. Bayat ti panangtulongmo iti sabali pay nga agtutubo a babai, mabalin a kayatmo nga:

   • Agbalin a gayyemna.

   • Agbalin a maysa a pagwadan ti nalinteg nga anak a babai ti Dios.

   • Allukoyen isuna nga agtrabaho a kaduana dagiti nagannak kenkuana iti panangpili kadagiti maitutop a padas ken proyekto nga ik-ikkan pateg.

   • Tulongan isuna a mangipatungpal kadagiti padas ken proyekto nga ik-ikkan pateg.

   • Tulongan isuna a mangisurat kadagiti padas ken proyekto nga ik-ikkan pateg.

   • Tulongan isuna a makaawat kadagiti pagbatayan ti ebanghelio nga isursuro dagiti padas ken proyekto nga ik-ikkan pateg.

   • Allukoyen isuna a mangbasa iti Libro ni Mormon, ket ilawlawag kenkuana no ania ti basbasaenna.

   • Allukoyen isuna a mangibinglay kadagiti padas ken proyekto nga ik-ikkan pateg iti pamiliana.

Rugiam Manen ti Bukod a Panagdur-as

Mabalinmo nga irugi manen ti sibubukel a Bukod a Panagdur-as ken itrabahom a gun-oden ti maikadua a medalion ti Pammigbig iti Agtutubo a Kinababai [Young Womanhood Recognition].