Ti Canaan Kadagiti Panawen ti Daan a Tulag

Dan (Lais) Nagaramid ni Jeroboam iti sinan-urbon a balitok a pagdaydayawan ti Akin-amianan a Pagarian (1 Ari 12:26–33). Ti Dan ti akin-abagatan a beddeng ti nagkauna nga Israel.

Bantay Carmelo Kinarit ni Propeta Elias dagiti saserdote ni Baal ket pinagtudona (1 Ari 18:17–40).

Megiddo Lugar ti adu a gubat (Uk. 4:13–16; 5:19; 2 Cron. 35:20–23; 2 Ari 23:29). Nangaramid ni Solomon iti panagpupulong tapno mabuangay ti Megiddo (1 Ari 9:15). Nasugatan ni Ari Josias ti Juda iti pannakidangadangna ken ni Faraon Necao ti Egipto (2 Ari 23:29–30). Iti Maikadua a Yaay ti Apo, maipatungpalto ti dakkel ken maudi a gubat iti Tanap ti Jezreel a kas paset ti gubat ti Armagedon (Joel 3:14; Apoc. 16:16; 19:11–21). Ti nagan nga Armagedon naadaw ti Griego iti Hebreo a Har Megiddon, wenno Bantay ti Megido.

Jezreel Ti nagan ti siudad iti kadakkelan ken kadam-egan a tanap ti Israel nga addaan iti kasta met a nagan. Ditoy a nangbangon iti maysa a palasio dagiti ari ti Akin-amianan a Pagarian (2 Sam. 2:8–9; 1 Ari 21:1–2). Ditoy a nagindeg ken natay ti nadangkes a Reyna Jezabel (1 Ari 21; 2 Ari 9:30).

Betsan Ditoy a sinango ti Israel dagiti Cananeo (Jos. 17:12–16). Naibitin ti bangkay ni Saul kadagiti bakud daytoy a kastilio (1 Sam. 31:10–13).

Dotan Inlako dagiti kakabsatna ni Jose iti pannakaadipen (Gen. 37:17, 28; 45:4). Naaddaan iti parmata ni Eliseo iti bantay a napno kadagiti kabalio ken luglugan (2 Ari 6:12–17).

Samaria Ti kabisera ti Akin-amianan a Pagarian (1 Ari 16:24–29). Nangbangon ni Ari Ahab iti templo ken ni Baal (1 Ari 16:32–33). Nagserbi da Propeta Elias ken Eliseo (1 Ari 18:2; 2 Ari 6:19–20). Idi 721 S.C. pinarmek daytoy dagiti taga-Asiria, a nanggibus iti pannakatiliw dagiti 10 a tribu (2 Ari 18:9–10).

Siquem Nangbangon ni Abraham iti maysa nga altar (Gen. 12:6–7). Nagindeg ni Jacob iti asideg ditoy. Pinapatay da Simeon ken Levi ti amin a lallaki iti daytoy a siudad (Gen. 34:25). Ti panangallukoy ni Josue nga “agpilikayo…ita nga aldaw” iti panagserbi iti Dios ket naDagiti Aramid iti Siquem (Jos. 24:15). Ditoy nga impasdek ni Jeroboam ti umuna a kabisera ti Akin-amianan a Pagarian (1 Ari 12).

Bantay Ebal ken Bantay Gerizim Biningay ni Josue ti Israel kadagitoy dua a bantay—naiwaragawag dagiti bendision ti linteg manipud iti Bantay Gerizim, idinto ta nayebkas dagiti panagilunod manipud iti Bantay Ebal (Jos. 8:33). Idi agangay nangbangon dagiti taga-Samaria iti templo iti Gerizim (2 Ari 17:32–33).

Penuel (Peniel) Ditoy a nakigubat ni Jacob iti nagpatnag iti mensahero ti Apo (Gen. 32:24–32). Dinadael ni Gideon ti maysa a kastilio ti Midian (Uk. 8:5, 8–9).

Joppe Nagtalaw ni Jonas manipud ditoy a napan iti Tarsis tapno liklikanna ti panagmisionna iti Nineve (Jonas 1:1–3).

Silo Bayat ti panawen dagiti Uk-ukom, ditoy a masarakan ti kabisera ti Israel ken ti tabernakulo (1 Sam. 4:3–4).

Betel (Luz) Ditoy a simmina ni Abraham manipud ken ni Lot (Gen. 13:1–11) ken naaddaan iti parmata (Gen. 13; Abr. 2:19–20). Naaddaan ni Jacob iti parmata maipapan iti agdan a dumanon iti langit (Gen. 28:10–22). Ditoy a masarakan ti tabernakulo iti maysa a panawen (Uk. 20:26–28). Nangbangon ni Jeroboam iti sinan-urbon a balitok a pagdaydayawan ti Akin-amianan a Pagarian (1 Ari 12:26–33).

Gabaon Ditoy a sinikapan dagiti Heveos ni Josue iti maysa a tulag (Jos. 9). Nangato pay laeng ti init idi nangabak ni Josue iti gubat (Jos. 10:2–13). Daytoy pay ti di nagbayag a disso ti tabernakulo (1 Cron. 16:39).

Gaza, Asdod, Askelon, Ekron, Gat (ti lima a siudad dagiti Filisteos) Manipud kadagitoy a siudad masansan a nakigubat dagiti Filisteos iti Israel.

Betlehem Naitanem ni Raquel iti asideg ditoy (Gen. 35:19). Nagindeg ditoy da Ruth ken Booz (Ruth 1:1–2; 2:1, 4). Naawagan daytoy iti siudad ni David (Lucas 2:4).

Hebron Ditoy a nagindeg da Abraham (Gen. 13:18), Isaac, Jacob (Gen. 35:27), David (2 Sam. 2:1–4), ken Absalom (2 Sam.15:10). Daytoy ti immuna a kabisera ti Juda iti panangituray ni Ari David (2 Sam. 2:11). Makunkuna a naitanem ditoy iti rukib ti Macpela da Abraham, Sara, Isaac, Rebeca, Jacob, ken Lea (Gen. 23:17–20; 49:31, 33).

Engedi Inlemmengan ni David ni Saul ket inispalna ti biag ni Saul (1 Sam. 23:29; 24:1–22).

Gerar Ditoy a nagindeg da Abraham ken Isaac iti maysa a panawen (Gen. 20–22; 26).

Beerseba Ditoy a nagkali iti bubon ni Abraham ken nakitulag ken ni Abimelec (Gen. 21:31). Nakita ni Isaac ti Apo (Gen. 26:17, 23–24), ket ditoy a nagnaed ni Jacob (Gen. 35:10; 46:1).

Sodoma ken Gomorra Pinili ni Lot ti agindeg iti Sodoma (Gen. 13:11–12; 14:12). Dinadael ti Dios ti Sodoma ken Gomorra gapu iti kinadangkes (Gen. 19:24–26). Idi agangay inaramat ni Jesus dagitoy a siudad a kas simbolo ti kinadangkes (Mat. 10:15).