26. Cesarea Filipos

Masarakan daytoy nga ubbog iti sakaanan ti Bantay Hermon. Maysa kadagiti paggapuan ti danum ti Karayan Jordan. Nangbangon ditoy iti siudad ni Herodes Felipe, a nagturay iti daytoy a lugar, kas pagdaydayaw ken ni Cesar (ti emperadorna) ken iti bagina; sigud a naawagan ti siudad iti Panias ket maawagan itan iti Banias wenno Cesarea Filipos.

Napateg a Pasamak: Nagkikita ti Mangisalakan ken dagiti disipulona iti Cesarea Filipos. Ditoy ti nangipakdaaran ni Pedro a ti Mangisalakan “ti Cristo, ti Anak ti sibibiag a Dios.” Inkari ngarud ti Mangisalakan ken ni Pedro “dagiti tulbek ti pagarian ti langit” (Mat. 16:13–20).