Ti Lubong ti Daan a Tulag

Bantay Ararat Ti kannawidan a lugar a nakaisadsadan ti daong ni Noe (Gen. 8:4). Saan nga ammo ti eksakto a disso.

Ur Umuna a nagindegan ni Abraham, a dandani biktima ti panangisakripisio iti tao, nakitana ti anghel ni Jehova, ken naawatna ti Urim ken Tummim (Gen. 11:28–12:1; Abr. 1; 3:1). (Kitaen met ti mabalin a pangsandi a lugar para iti Ur iti akin-amianan a Mesopotamia.)

Babilon, Babel (Sinar) Immuna a nagindegan ni Cus, ti anak ni Ham, ken nagindegan ni Nimrod. Lugar a nagtaudan dagiti Jaredita iti panawen ti Torre ti Babel kadagiti tanap ti Senar. Idi agangay nagbalin a probinsia a kabisera ti Babilonia ken pagtaengan dagiti ari ti Babilonia, a pakairamanan ni Nabocodonosor a nangala iti adu a Judio nga adipen iti daytoy a siudad kalpasan ti pannakadadael ti Jerusalem (587 S.C.). Nagtalinaed dagiti Hudio iti pannakaadipen iti Babilon iti uneg ti 70 a tawen agingga iti panawen ni Ari Siro, a nangpalugod kadagiti Judio a nagsubli iti Jerusalem tapno bangonenda manen ti templo. Nagindeg met ditoy ni Daniel a propeta iti babaen ti panagturay da Nabocodonosor, Belsasar, ken Dario I (Gen. 10:10; 11:1–9; 2 Ari 24–25; Jer. 27:1–29:10; Eze. 1:1; Dan. 1–12; Omni 1:22; Ether 1:33–43).

Susan (Susa) Kabisera a siudad ti Imperio ti Persia iti babaen dagiti panagturay da Dario I (Dario a Naindaklan), Xerxes, (Asuero), ken Artaxerxes. Nagindegan ni Reyna Ester, a ti tured ken pammatina ti nangisalakan kadagiti Judio. Nagserbi ditoy ni Daniel ken idi agangay ni Nehemias (Neh. 1:1; 2:1; Est. 1:1; Dan. 8:2).

Tanap ti Dura Naitappuak da Sidrac, Misac, ken Abdenago iti hurno a sumsumged ken dumardarang idi nagkedkedda nga agdaydayaw iti imahen a balitok nga inDagiti Aramid ni Nabocodonosor; tinaginayon ida ti Anak ti Dios, ket rimmuarda a naggapu iti hurno a dida nadangran (Dan. 3).

Asiria Ti Asur ti umuna a kabisera ti Asiria, a sinaruno ti Nineve. Pinarmek dagiti agturay iti Asiria a da Salmaneser V ken Sargon II ti Akin-amianan a Pagarian ti Israel ket intalawna nga inadipen dagiti 10 a tribu idi 721 S.C. (2 Ari 14–15, 17–19). Ti Asiria ti nagpeggadan ti Juda agingga idi 612 S.C., idi pinarmek ti Babilon ti Asiria.

Nineve Ti kabisera ti Asiria. Dinarup ti Asiria ti daga ti Juda bayat ti panagturay ni Ezekias ken ti panagserbi ni propeta Isaias. Ti Jerusalem, ti kabisera a siudad ti Juda, ket datdatlag a naisalakan idi kinabil iti kampilan ti anghel dagiti 185,000 a soldado ti Asiria (2 Ari 19:32–37). Imbaga ti Apo ken ni propeta Jonas nga awaganna daytoy a siudad nga agbabawida (Jonas 1:2; 3:1–4).

Haran Nagindeg ni Abraham ditoy iti maysa a panawen sakbay a napan iti Canaan. Nagtalinaed ditoy ti ama ken kabsat ni Abraham. Naggapu ditoy a lugar ni Rebeca (asawa ni Isaac), ken da Raquel, Lea, Bilha, ken Zilpa (assawa ni Jacob) (Gen. 11:31–32; 24:10; 29:4–6; Abr. 2:4–5).

Carcemis Inabak ni Nabocodonosor ni Faraon Necao, a naggibusan ti bileg ti Egipto iti Canaan (2 Cron. 35:20–36:6).

Sidon Binangon ni Sidon, apoko ni Ham, daytoy a siudad, ken ti akin-amianan unay a siudad ti Canaan (Gen. 10:15–20). Daytoy ti pagtaengan ni Jezabel, a nangyam-ammo iti panagdaydayaw iti Baal iti Israel (1 Ari 16:30–33).

Tiro Napateg daytoy a pagnegosioan ken pagsangladan nga ili iti Siria. Nangipatulod ni Hiram ti Tiro iti kaykayo a parwa ken balitok ken trabahador a mangtulong ken Solomon iti panangbangon iti templona (1 Ari 5:1–10, 18; 9:11).

Damasco Insalakan ni Abraham ni Lot iti asideg ditoy. Daytoy ti kangrunaan a siudad ti Siria. Bayat ti panagturay ni Ari David, pinarmek dagiti Israelita ti siudad. Pinulotan ni Propeta Elias ni Hazael nga agbalin nga ari ti Damasco (Gen. 14:14–15; 2 Sam. 8:5–6; 1 Ari 19:15).

Canaan Naited daytoy a daga ken ni Abraham ken dagiti annakna para iti agnanayon a panagtagikua (Gen. 17:8).

Bantay Sinai (Horeb) Kinasao ti Apo ni Moises manipud iti kayo a bassit nga umap-apuy (Ex. 3:1–2). Naited ken ni Moises ti Linteg ken ti Sangapulo a Bilin (Ex. 19–20). Kinasao ti Apo ni Propeta Elias iti naalumanay, bassit a timek (1 Ari 19:8–12).

Ezion-geber Nangbangon ni Ari Solomon iti “bunggoy dagiti sasakayan” iti Ezion-geber (1 Ari 9:26). Nalabit iti daytoy a pagsangladan, ti reyna ti Sheba, kalpasan ti pannakadamagna iti panaglatak ni Solomon, bimmaba a kumita kenkuana (1 Ari 10:1–13).

Egipto Nagbaniaga ni Abraham ditoy gapu iti nakaro a panagbisin iti Ur (Abr. 2:1, 21). Imbaga ti Apo ken ni Abraham nga isurona kadagiti Egipcios no ania ti naipalgak kenkuana (Abr. 3:15). Inlako dagiti kakabsatna ni Jose iti pannakaadipen (Gen. 37:28). Nagbalin ni Jose nga agturay iti balay ni Potipar ditoy. Naipupok isuna iti pagbaludan. Impatarusna ti tagtagainep ti Faraon ket naikkan iti saad ti turay iti Egipto. Nagtitipon a sangkamaysa ni Jose ken dagiti kakabsatna. Immakar ditoy ni Jacob ken ti kaamaanna (Gen. 39–46). Nagnaed dagiti annak ti Israel iti Gosen bayat ti sumagmamano nga aldaw a panagtalinaedda iti Egipto (Gen. 47:6).

Immadu dagiti Israelita “ket wimmadwadda iti kasta unay”; impan dagiti Egipcios ida iti pannakaadipen (Ex. 1:7–14). Kalpasan ti agsasaruno a didigra pinalubosan ti Faraon a pumanaw ti Israel iti Egipto (Ex. 12:31–41). Naipan ni Jeremias iti Egipto (Jer. 43:4–7).

Captor (Creta) Ti nagkauna a daga dagiti taga-Minoa.