2. Bantay Sinai (Horeb) ken Langalang ti Sinai

Tuktok ti Jebel Musa (Bantay ni Moises) dagiti makita a bantay. Adda ti sumagmamano a mabalin a lugar para iti Bantay Sinai. Maysa kadagiti maaw-awat a lugar ket ti Jebel Musa.

Dagiti Napapateg a Pasamak: Nagparang ti Dios ken ni Moises ket intedna kenkuana ti Sangapulo a Bilin (Ex. 19–20). Nakita ken nakisao iti Dios da Moises, Aaron, dua nga annak a lallaki ni Aaron, ken 70 a panglakayen (Ex. 24:9–12). Inikkan ti Dios ni Moises kadagiti pangiturong a mangbangon iti tabernakulo (Ex. 25–28; 30–31). Nagdaydayaw dagiti Israelita iti bimmalitok a baka nga inyallukoyda nga aramiden ni Aaron (Ex. 32:1–8). Iti daytoy a daga ti nagturongan ni Propeta Elias iti panaglibasna manipud iti Tanap ti Jezreel, a nagindegan ni Reyna Jezebel (1 Ari 19:1–18). Ditoy pay ti nakisaritaan ni Propeta Elias iti Dios (1 Ari 19:8–19).