8. Jerusalem

Buya nga agpaamianan. Adda iti tengnga ti ladawan ti altar dagiti Muslim a nagatep iti balitok, a maawagan iti Nagtimbukel nga Atep a Bato. Nagrukbab dagiti Judio idi un-unana kadagiti templo a masarakan ditoy. Linakub ti pader iti asideg ti Nagtimbukel nga Atep a Bato ti daan a siudad ti Jerusalem. Adda iti kanawan ti bakud ti Tanap ti Kidron. Adda iti adayo a kanawan ti Bantay ti Olibo. Iti amianan, iti labes ti Nagtimbukel nga Atep a Bato, ti mabalin a lugar ti Golgota, wenno Kalbario.

Dagiti Napapateg a Pasamak: Naawagan ti Jerusalem iti Salem idi un-unana (Sal. 76:2). Nagbayad ni Abraham iti apagkapullo ken ni Melchizedek (Gen. 14:18–20). Napan ni Abraham tapno isakripisiona ni Isaac (Gen. 22:2–14). Inagaw ni Ari David ti Jerusalem manipud kadagiti Jebuseos (2 Sam. 5:4–9). Nangpatakder ni Ari Solomon iti templo (1 Ari 6–7). Pimmanaw ni Lehi tapno mapan iti naikari a daga (1 Ne. 1:4; 2). Nagserbi ti Mangisalakan, sinubbotna dagiti basoltayo, ket nagungar (Mat. 21–28). Kas iti impadto ti Mangisalakan, nadadael ti Jerusalem kalpasan laeng ti ipapatayna (JS—M 1:3–20). Marautto ti Jerusalem kadagiti maudi nga aldaw (Eze. 38–39; Joel 2–3; Apoc. 11; 16). Agparangto ditoy ti Mangisalakan sakbay laeng ti Maikadua a Yaay (Zac. 12–14; DkK 45:48–53). (Kitaen iti Pangiwanwan iti Nasantuan a Kasuratan, “Jerusalem,” “Salem.”)