1. Ix bajtzan que nbajlen yolana cyeke wermaniya, lutzan luʼ que tzaj cymaʼn weya: Aya otzaj kʼamanta cyiwxix cosas keya, más ictzaʼn aj jaca kapama.

2. Aj ntzakʼweʼna que baʼn wuʼna aj otok txi nyolana cyiw cyiʼjke ploj xjal, según aj axix tok t-xiʼlen; ix que nchin colina tiʼj twitz cyilke baʼn xjal, ix otok txi nmaʼne nyola que chi jawal nim tuj mancbil kʼij max tuj tnajbil Dios; aju ncnet axix toc cyiw t-xilen cyuʼnke ajpaj, porque nim taʼw nnoʼc cyiʼj.

3. Cyjaʼtzan ten, akiye wermaniya, nokat pur baʼn akiya ix cyajbila tuʼn toc cybintaya ix tuʼn txi cycʼuʼjlaʼna, tuʼntzan cybeta tuj jikan twitz Dios, miʼn chi yoline tiʼj ax toc, ncymaʼntok que nchin kʼamana cyiw cosas cyiʼja.

4. Ix bajtzan jluʼ wekin Nefi, cyiwxixke ocsabil xiʼ nkʼoʼna cyeke wermaniya tuʼn txi cycʼujlaʼnke tmandamyent Kajaw.

5. Ix bajtzan que, cub cybecyʼbiliʼn cywitz twitz Kajaw, cyjuʼtzan nimxix ntzalajbila tzaj tuʼn cybet-xix tuj tbe xtis.

6. Cyakilke cosas luʼ ikʼunjtz ix ibant ix nnankʼintak nmane tja ma chkʼajlaj aj oc tbi tuʼn aj te Lemuel.

7. Ix bajtzan que a kine Nefi, oc te nxuʼjala jun tmeʼjal Ismael; ax icxke wermaniya imojeʼ tucʼke tmeʼjal Ismael, jaw tiʼn Zoram aj más matij cyxol.

8. Cyjaʼtzan el nmana twitz cyakilke mandamyent tzaj tkʼoʼn Kajaw te. Ix atzan wekin Nefi, otok tzaj cyʼiwlaʼnxix kina tuʼn Kajaw.

9. Ix bajtzan que tzaj yolan Kajaw te nmane tuj konicʼan, ntmaʼntok que tuʼn t-xiʼ tbet te juntl kʼij tuj desyert.

10. Ix baj que taj tjaw weʼ nmane ix taj tetz tuj tja tuj juntl kʼij, nimxix jaw seʼcʼpaj taj toc tqueʼyan jun xwac tten te yecʼbil be tcub twitz txʼotxʼ puro brons puro tbanil, ix tuju tcuʼx caba bak, juntzan nchʼicyan tij alcye be tuʼn t-xi kiʼna tuj desyert.

11. Ix bajtzan que, jaw kchmoʼne cyakil aj tuʼn t-xiʼ kiʼna tuj desyert, ix chʼintl knebebla otok tzaj tkʼoʼn Kajaw keya ix jaw kchmoʼna ke iyaj te cyakil cʼloj tuʼn txi kiʼna tuj desyert.

12. Ix bajtzan, que icʼ kiʼn kjaya te xbalan ix nkoʼxa tuj desyert nkiʼxa tuj niʼman Lamán.

13. Ix tuj cyaja kʼij ojoʼc lapeʼya tiʼj jun be tuj sudest, ix cuʼ kkʼoʼna kjaya juntl maj, ix oc kkʼoʼna tbi lugar te Sházer.

14. Ix bajtzan que, tucʼ k-arco ixke kflecha ojoʼxa canil tuj desyert, tuʼntzan tten cynebebil kfamilye. Ix tajtzan tcanet kuʼna, o ajtzan juntl maj cyucʼ kfamilye tuj desyert aj lugar nnoʼc Sházer. Ix ojoʼxa betal juntl maj tuj desyert, ax be xi kiʼna lepchix koʼya tiʼj ke tuj piẍn tbanal txʼotxʼ te desyert aj tmojon tib tucʼ Mar Rojo.

15. Ix bajtzan que, obeta nimca kʼij nku cambana tiʼj tuj be aj jun baʼn tnebejs te keya cyuʼnke k-arco ixke kflecha, xak ix ule.

16. Ix lepchix kxiʼya tiʼj ntmaʼn xwac t-xilen aj yecʼil be atzan jluʼ ojoʼx tiʼn tuj piẍn tbanal txʼotxʼ te desyert.

17. Ix tajtzan kbeta nimca kʼij, cuʼ kkʼona kjaya xbalan jun tyemp tuʼntzan kajlana ix tuʼn kcambana cyiʼj cynebebil kfamilya.

18. Ix bajtzan que a kine Nefi, taj wetza cambil, cuʼ tzakj n-arco te acer pur finn; ix lutzan luʼ, ijaw kʼojlke wermaniya wucʼala tuʼn tlaj otok naj n-arco, porque ntiʼxtzan knebebla cnet.

19. Ix bajtzan que, o aʼjale cyucʼ kfamilye per ntiʼx nebebil kʼiʼn kuʼna ix pur sicnajke tuʼn betan, nimx icyʼixba tuʼn tlaj ntiʼx wabj.

20. Ix baj que Lamán ix Lemuel, ictzanke tcʼwaʼl Ismael, nchoc ten yolal nim tuʼn tlaj cycyʼixbajil bix taʼw cyiʼj tuj desyert; ix tucʼxpa nmane oc ten yolil tiʼj Kajaw aj Dios, ictzan, cyakilke iteʼ tuj bis cyjuʼtzan nim iyolan tiʼj Kajaw.

21. Ix bajtzan, que a kina Nefi, bis inoca cyucʼalke wermaniya, tuʼn tlaj otok naj n-arco; ix como otok tzʼel tipan cy-arc, ictzan, ix ntiʼx ocambana tiʼj knebebla.

22. Ix bajtzan que a kine Nefi, inyolana nim cye wermaniya porque otak cyiwax juntl maj cyanma, asta tuʼn cyjaw lipan tiʼj Kajaw CyDios.

23. Ix bajtzan que akine, Nefi bʼant jun arco tzeʼ wuʼne ix jun flech jikan tzeʼ. Ix banntzan ntena tucʼ j-ajo ix jun ule ixke xak, xiʼ nkʼamaʼna te nmane: ¿Jatum baʼn nxiʼya jayol knebebl?

24. Ix bajtzan, ncub tbecyʼbiliʼn twitz, porque nimxix ijoʼc baʼn xjal tuʼnke nyola; tuʼnj otok txi nmaʼna nimca cosas tuʼn cyakil tipan wanmaya.

25. Ix baj tzan que nyolan Kajaw tzaj tkʼajkʼajel twi tucʼ nmane; ix axix toc baj icʼleʼn tuʼn tlaj jaw lipan tiʼj Kajaw, tuʼntzanju nim tbis tzaj.

26. Ix bajtzan que tzaj tmaʼn Kajaw te: Queʼyancxa xwac t-xilen ix schʼinjawa ke cosas tzʼibanmaj twitz.

27. Ix tajtzn til nmane ke cosas tzʼibanmaj twitz xwac t-xilen, jaw xob ix jaw luʼlin ax icxke wermaniya ixke tcʼwaʼl Ismael ixke kxuʼjile.

28. Ix bajtzan que, akine Nefi, wila ajke bak cycuʼx twitz xwac t-xilen, nchi yucẍ según kocslabil, ktzalajibla ix cwentban te kuʼna.

29. Ix tcub cywitzke, jun tzʼibil acʼaj aj wen tschʼinjtz, aj ntzaj tkʼoʼn kximbatza tzaʼn tuʼn kxiʼya tiʼj tbe Kajaw; ix tzʼibanmaj ix nbaj tcambiaran tiʼj juʼnmaj, ax tzaʼnx kocslabla ix ktzalajajibla nxi kkʼoʼna tiʼj; ix cyjaʼtzan kila que cyuʼn ke cosas pur nuch jaca bʼant nimca cosas matij tuʼn Kajaw.

30. Ix bajtzan que akine, Nefi, injaxa max twiʼ montanya según ntkʼamanta xwac t-xilen.

31. Ix bajtzan que icuʼb txʼuʼj jil wuʼne, cyjaʼtzan canet cynebebil nfamilye.

32. Ix bajtzan, que inaʼjala tuj kjaya cyucʼxke jil otok chi cub wuʼne; ix taj txi cyqueʼyan que otok chin cambana tiʼj knebebla ¡purxix maʼ jun cytzalajbil tzaj! Ix bajtzan que cub cybecyʼbiliʼn cywitz twitz Kajaw ix xiʼ cykʼon chjonte.

33. Ix bajtzan que juntl maj kbeya, obeta tuj tumal jatuma obeta tnejal maj. Ix taj kbeta nimca kʼij, cuʼ kkʼoʼna kjaya juntl maj tuʼn kcyaj tena jun tyemp.

34. Ix bajtzan jluʼ, que cyim Ismael, ix ax cuʼx makuʼn tuj lugar Nahom tbi.

35. Ix nimxix i okʼ tmeʼjal Ismael, nimxix taʼw oc cyiʼj tuʼn tlaj cyman tuj desyert. Ix ijoʼc lipan tiʼj nmane tuʼn tlaj otok chetz kʼiʼn tuj tnam te Jerusalén, xiʼ cyyol cyjaʼw: maʼ cyim kmane, ictzan, ix atzan keya nkobeta tuj desyert que ntiʼx baʼn kuʼna jatuma cyjaʼ kxiʼya, nkapaʼna weʼyj, cʼaj nim sictleʼn ix nimca kbisa; ix octzan tbaj cyakil jluʼ, ko cymela tuʼn weʼyj tuj desyert.

36. Ictzan tten iyolan tiʼj nmane ix wiʼja; ix cyajbe tuʼn cyaj meltzʼaj tuj Jerusalén.

37. Ix Oʼ tmaʼn Lamán te Lemuel icx te cye tcʼwaʼl Ismael; Lutzan luʼ, kbiyonc kman ix tucʼax kermana Nefi, aj ma tzʼoc tkʼon tiʼb te wiʼxlal ixte xnakʼtzalke, o termana matij.

38. Jaʼlo chitzan que oyolan Kajaw tucʼl, ix que oʼ tzicyʼ tiʼn tonbilke t-angel Dios. Pero baʼnke kuʼn que nok nnicʼan yol. Ix ntzaj tmaʼn cyakilke cosas luʼ, ix nbant txkantl cosas tuʼn nok tuʼn list tuʼn kcub tslaʼjan, balo nt-xima tuʼn kxi tiʼn tuj jun desyert mi kskiʼn; ix oc kxi tiʼn, tajbil tuʼn toc te krey bix wiʼxan ke según tzaʼn tajbil. Ix cyjaʼtzan aj wermaniya Lamán jawxix kʼojl cyanma tiʼj kʼoj.

39. Ix bajtzan que xiʼ Kajaw kucʼala; ictzan, xiʼ tmaʼn Kajaw nimca tyol, ix xi tmaʼn cyiw tyol cyeke wermaniya. Ix tajtzan cybaj icʼleʼn tuʼn tyol Kajaw, cuʼ tzʼak cyloʼch ix ajtz jolpaj tiʼ cyanma tiʼj il; cyjaʼtzan, otzaj tcʼiwlaʼn Kajaw juntl maj tuʼn knebena tuʼn miʼn kcyima.