1. Nbajlentzan yolana tucʼ Kajaw, bajtzan que akine Nefi inaʼjala tja nmane.

2. Ix bajtzan que ntzaj yolan wucʼala, cyjaʼw: lutzan luʼ, otzʼoc jun nwitzicʼe, que tzaj tkʼamaʼn Kajaw wecyʼ que aya bixke termaniya tuʼn cyaja tuj tnam Jerusalén.

3. Tuʼnj ate Labán kʼilteke storya cye Judiy, icxtzanke storya cyeka ojtxa xjal; ix cycubke cywitz sleʼw cʼuxl te bronce.

4. Tuʼntzunju otzaj tmaʼn Kajaw que cyucʼ ke termaniya tuʼn cyxiʼya tja Labán tuʼn cycanetke storya tuʼn ttzaj cyiʼna tzaluʼ tuj desyert.

5. Ix lutzan luʼ, ke termaniya nchi yolan wiʼja que aj nxiʼ nkanna cyeya cyiw taʼ tiʼjjo, per nya kine nchin kanne tiʼj, sino que tmandar Dios.

6. Cyjaʼtzan jluʼ txiya ncʼwaʼl, oc c-onal Kman tiʼja porque ntiʼ teya nyolan.

7. Ix kine, Nefi, xiʼ ntzakʼweʼn nmane: Chinxela ix cbantel aj otzaj tmaʼn Kajaw Dios wey, porque baʼn wuʼne que ntiʼ tuʼn t-xiʼ tkʼoʼn mijun mandamyent cyeke cycʼwaʼl xjal ka miyaʼ bann jun cybe tuʼn cyel twitz aj otok txiʼ kʼamaʼn cye tuʼn tbant cyuʼn.

8. Ix bajtzan que cyaj ten nmane tuj txubtxaj taj tbintakej yol ajo, porque el tnicyʼ tiʼj que otak chin baj cyʼiwlaʼn tuʼn Kajaw.

9. Cyjaʼtzan ten, ajke wermaniya ix kine, tucʼ kjaya, ojoʼx beta tuj desyert tuʼn kxiʼya tuj tnam Jerusalén.

10. Ix bajtzan que, taj kpona tuj Jerusalén, ojoʼc tena kanal te jun tucʼ juntl.

11. Ix oc tuj swert kuʼna alcye tuʼn t-xiʼ tja Labán. Ix bajtzan, a Lamán camban, ix xiʼ tja Labán ix yolan tucʼal tutzʼke twitz tja.

12. Ix xi tkaʼnan te Labán ajke storya aj cycubke cywitz sleʼw cʼuxl te bronce aj at atorya tiʼj tankʼibil nmane cyuj.

13. Ix lutzan luʼ, baj que nimx jaw kʼojl Labán, ix etz tlajoʼn Lamán; ix ntiʼ i jeʼx tkʼoʼnke storya. Entons xi tmaʼn: Lutzan luʼ, elekʼa ix cbel nbiyoʼna.

14. Per el ok Lamán, ix tzaj tmaʼn keya aj otok baj te Labán. Entons ojoʼc tena bisal, ix chʼixtok cyajke wermaniya tucʼ nmane max tuj desyert.

15. Per lutzan luʼ, xiʼ nmaʼne cye: Itzʼ Kajaw, ictzaʼnke itzʼkoʼ, miʼn kaʼjal tucʼkman ka naʼntok kel twitz aj okotzaj samaʼn tiʼj.

16. Cyjuʼtzanjluʼ, baʼnxix koc tuʼn cyxi kcʼuʼn tmandamyent Kajaw. Koʼ tuj ttxʼotxʼ kman, lutzan luʼ cyaj tkʼoʼn oro, plata ix cyakil cosas tkʼinamabil; ix obant cyakil jluʼ tuʼn, tuʼn cyocx t-xoʼnke tmandar Kajaw.

17. Porque biʼn tuʼn que cbel kʼuchan Jerusalén tuʼn tlaj ploj nbʼant cyuʼn tnam.

18. Lutzan luʼ, o tzʼel cyicʼan cyyol profeta. Cyjaʼtzan, nokat ax cyaj ten nmana tuj tnam taj t-xi kʼamaʼn te tuʼn tetz tuj, ax oʼwtla cyim. Que cyjaʼtzan ilx tiʼj tuʼn tetz tuj tnam.

19. Ix lutzan luʼ tajbil Dios tuj tnabil tuʼn kcyikʼke storya tuʼntzan cyxiʼ kcʼuʼn te cye kcʼwaʼl aj cyyol kman.

20. Ictzaʼnke yol ochetz tuj cytziʼ cyakilke profetas sakxix tiʼj cyanma, que ajo oʼ tzaj kʼiʼn cye tuʼn Xewbaj ix tuʼn tipumal Dios, atxax tzajke twitz txʼotxʼ, hasta tuj k-kʼijlal jaʼlo.

21. Ix bajtzan que cyjatzn taj cyocxix nkʼakʼan wermaniya tuʼn cyoc te baʼn xjal tuʼn t-xi cycʼuʼn tmandamyent Dios.

22. Ix bajtzan que ojoʼxa tuj ktxʼotxʼaya tzaj tkʼoʼn kmane ix jaw ksicʼoʼna k-oriya, plata ix cyakil cosas te kkʼinmabila.

23. Tbajlentzan kchmoʼna ajke cosas ajo, o aʼjala juntl maj tja Labán.

24. Kocxlena jatuma taʼ Labán, bajtzan que xiʼ kkaʼnna tuʼn ttzaj tkʼoʼnke storya cycuʼb cywitzke sleʼw cʼuxl te bronce, tuʼntzan tlaj ajo xiʼ koʼyana k-oriya, plata ix cyakil cosas kkʼinamabʼila.

25. Ix bajtzan que, taj tilonte que nimca keya kcosas kʼiʼn, oc tlabʼin Labán; tuʼntzn tlajjo ojeʼtz lajoʼna tuʼn ix xiʼ tsamaʼn tmajan tuʼn kcʼub biyoʼna, tuʼntzan tcamban cyiʼj kkʼinmabʼla.

26. Bajtzanque, ojeʼl oka cywitzke tmajan ix cyajx kcoʼlan kcosiya, aj icyaj tuj tkʼab Labán.

27. Ix ojoʼx oka tuj desyert mix tiʼ cub kiʼja cyuʼn tmajan Labán, ix xiʼ kewan kiba tuj tpaxl jun picy.

28. Ix bajtzan que jaw kʼojl Lamán wucʼale ax icx tucʼl nmane, icx baj tuʼn Lemuel, porque xiʼ tbiʼn tyol Lamán. Cyjaʼtzanjluʼ, nimxix ploj yol tzaj cymaʼn Lamán tucʼix Lemuel keya, aj koʼya itzʼinbaj cyuʼn, ix ojoʼc biyoʼna tuʼnju tka tzeʼ.

29. Matok nko biyonjtza tuʼn tkʼab tzeʼ, lutzan luʼ, ncub let jun ángel te Kajaw cywitz, ix xi tmaʼn cye cyjaʼw: ¿Titzn kuʼn noc cybiyoʼna cyitzʼina tuʼn tkʼab tzeʼ? ¿Ntiʼ patzan bʼiʼn cyuʼna que tuʼn Kajaw o jaw tsicʼoʼn te jun wiʼxlal cyeya tlaj ploj xjal keʼya? Lutzan luʼ, chajalel juntl majtla tuj Jerusalén ix cxel kʼoʼn Labán tuj cykʼaba tuʼn Kajaw.

30. Ix tbajlentzan tmaʼn ángel ajo kucʼala nnicyʼ.

31. Tcuʼlentzan naj ángel, ijoʼc ten Lamán tucʼx Lemuel yolil juntl maj tiʼj, cyjaʼw: ¿Ti tten tuʼn ttzaj tkʼoʼn Kajaw Labán tuj kkʼaʼb? Lutzan luʼ, jun xinak nim tipumal, ix jaca tzʼoc ten samal cye cincuent, ictzanju, ix jacpa cuʼ cincuent tuʼn. ¿Tikuʼn nyaʼ awt koʼ tuʼn?