1. Ix bajtzan que, tbajlentzan kbetan tuj desyert jatuma taʼ kmane, lutzan luʼ, nojxix tuʼn tzalajbil; ax icx ntxuʼye, Saríah, pur txubtxaj oc, porque otok bisan nim tuʼn klaja.

2. Chitzan ka otok ku cyima tuj desyert, ix otok tzʼoc lipan nim tiʼj nmane, aj oc kʼoʼn tpaj tuʼnju bʼaʼn til tilbilalke cosas, cyjaʼw: Aya matzʼetz kʼinte keya tuj ktxʼotxʼa ix tzʼinanke ncʼwaʼla ix ku cymel ke tuj desyert.

3. Ix cyjuʼtzan tuʼmal oc lipan ntxuʼye tiʼj nmane.

4. Otok tzʼaj ttzakʼweʼn nmane cyjaʼw: Loʼn wuʼne que baʼn twila tuj tilbilal, ntiʼwt wilake cosas te Dios tuj jun witzicyʼ ntiʼwtla owila t-xtalbil Kajaw, ix intenwtlaya tuj Jerusalén cyucʼxke wermaniya tuʼn ncyima cyucʼal.

5. Per lutzan luʼ, oʼ wikʼe jun txʼotxʼ tziʼyanmaj ix nimx nchin tzalaja cyiʼjke cosas aju, ictzan, ix loʼn wuʼne que chi colpajel ncʼwaʼla tuʼn Kajaw tuj tkʼab Labán, ix chajatz maktzʼuʼn juntlmaj ktxlaj tuj desyert.

6. Ix tuʼntzanke yol luʼ oc ten nmane xmoxal tiʼj ntxuʼya, tuʼn key klaj, myentras nkoʼxt tuj desyert tuʼn kcanna tuj tnam te Jerusalén tuʼn tkikʼe ajke storya cye judiy.

7. Ix taj kaj meltzʼaja tja nmane, nimxix inoj tuʼn cytzalajibʼil; ix biʼx kʼajen tcʼuʼj ntxuʼya.

8. Ix yolante ntxuʼya, cyjaʼw: Baʼn wuʼne jaʼlo que ma tma Kajaw te nchmila tuʼn t-xi tuj desyert; ictzan, ax baʼn wuʼne que ma choc tcwentan Kajaw ke wala; maʼ chi colpaj tuʼn tuj tkʼab Labán ix ma txi kʼoʼn cyipumal tuʼn cybʼant taj ma txi kʼamaʼn cye tuʼn tbant cyuʼn. Ix ictzan tmaju.

9. Ix bajtzan que, pur txubtxajke, cub cypatan jun oybil ix xiʼ cykʼoʼn jun chjonta Kajaw tuc jun oyaj. Nchi kʼontzan chjonte te Dios te Israel.

10. Tbajlentzan cykʼoʼn chjonte te Dios te Israel, jaw tiʼn nmane Lehi ajke storya tzʼiban cywitz sleʼw cʼuxl te bronce, ix baj tqueʼyan tej ttzajlen keʼ.

11. Ix tiltzan que ax tcuʼx tuj ajke uʼj te Moisés, ix akatzanjo ncymaʼntok tiʼj storya tzaʼn bant txʼotxʼ, ix tiʼj jwe Adán ix Eva, ajke tnejal kman.

12. Ax icxke storya cyiʼj judiy atxax tzajlen keʼ cy-xeʼchl hasta tuj ttzajlen keʼ twiʼxanil Sedecías aj rey te Judá.

13. Ax icxke baj cykʼamaʼn profetas jun tyempca atxax aj ttzajlen keʼ twiʼxanil Sedecías, ix nimke tpacbal jun tyempca tuʼn Jeremías.

14. Ix bajtzan que, ax canet tuʼn nmane aj storya cyiʼj tman ojtxa xjal cycuʼx cywitz sleʼw cʼuxl te bronce, cyjaʼtzan tbinta que tzajna tiyijil tiʼj José, ictzan, aj José, tcʼwaʼl Jacob, aj xi cʼayan tuj Egipto ix aj colpaj tuʼn tkʼab Kajaw tuʼntzan cycolpaj tuʼn weʼyaj tiʼj ke tman, aj Jacob ix cyakilke ite tja.

15. Icx icolpaj tjakʼ moybil ix ijeʼtz kʼiʼn tuj Egipto tuʼnx Dios aj otak cwentu cyiʼj.

16. Cyjaʼtzan canet storya cyeke ojtxa xjal tuʼn nmane Lehi. Icx te Labán ax tzajna tiyijil José, ix cyjuʼtzan que akʼa tucʼaxke tman otok txi cycʼuʼnke storya.

17. Ix tajtzan til nmane cyakilke cosas ajo, nimx noj tucʼ Xewbaj ix oc ten yolal te tiʼjke t-xeʼchal.

18. Xiʼ tmaʼntok que ajke sleʼw cʼuxl te bronce cyxiʼ cyuj cyakilke nasyon, familye, cyucʼalke juʼncx chiyolan ix cyuj cyakilke tnam chul yajxa.

19. Ix cyjaʼtzan tma que ajke sleʼw cʼuxl mi jtoj tuʼn cycuʼ naj, mix aj oc tlakʼeʼ tiemp milay tuʼn tel tcʼaʼ. Ix tma nimca cosas tiʼj tzul yajxa.

20. Maxatzn we nman tucʼax kine xiʼ kcʼuʼne ajke mandamyent tzaj tkʼoʼn Kajaw keya.

21. Ix otoktzan kikʼa ajke storya aj otok ko tzaj tsamaʼn Kajaw tiʼj, ix bajtzan kqueʼyana ka ntiʼ tpaltl, luʼxixke nim kajbil tiʼj; ictzan, maxix jun t-xilen tuj kwitza, jaca txi kcʼuʼnake tmandamyent Kajaw te cye kcʼwaʼla.

22. Cyjaʼtzan tuj nim baʼn tuʼn ma txi kiʼna kucʼala myentras nko beta tuj desyert asta ocxa kpona tuj txʼotxʼ tziʼyanmaj.