1. Ix bajtzan jluʼ que keʼ kviaja juntl maj tuʼj desyert, ojoʼxa tuj tjawatz kʼij atxaxtzanju. Ix obeta ix kapaya nimca bis tuj desyert; ix tzaj keʼ kcʼwaʼla cyiʼj kxuʼjala atzo.

2. Per maʼxixke cʼiwlbil tzaj tkʼoʼn Kajaw keya, que noktzan tuʼnj ojoʼc cwentana tuʼn chaʼx chibaj tuj desyert, ix atzanke kxuʼjal nimxix tʼaʼl cyim tuʼn cyankʼinke cyal, ix nim cyipan oc, ictzan, icx tzaʼnke xinak; ix keʼtzan apaj betan cyuʼn ix ntiʼx ijaw yolan.

3. Cyjaʼtzan tten nnoʼc kqueʼyana que ilx tiʼj tuʼn kel twitzke tmandamyent Dios. Ix katzan ma txi cycʼuʼnke cycʼwaʼl xinak ajke tmandamyent Dios, jaca tzaj kʼoʼn cyipan ix cywa, ix jaca til tib ti tuʼn tteʼn tuʼn cyel twitz aj otok cheʼx samaʼn tiʼj; cyjaʼtzan, tzaj tkʼoʼn Kajaw aj at tocnen keya mientras otena tuj desyert.

4. Ix otena nimca abkʼi atzo, ictzan, wajxak abʼkʼi otena tuj desyert.

5. Ix opona tuj tnam “Nimxix” (Abundancia) tbi tuʼn tlaj nim twitz awal tuj ix nim tʼal cab; ix bʼant tten cyakil jluʼ tuʼn Kajaw tuʼn miʼn kcyima. Ix kila mar, aj oc kkʼoʼna tbi “Irreántum”, aj “nim a” t-xilen.

6. Ix bajtzan jluʼ que cuʼ kkʼoʼna kjaya tziʼ mar; ix otok ko cyʼixbaya tuʼn bis ixke ploj, ictzan, nimca aj milayx baj ktzʼibana cyakilxe, purxix txubtxaj ojoʼca taj kpona tziʼ play te mar; ix oc kkʼoʼna tbi tnam “Nimxix” (Abundancia), tuʼnju nim twitz tawal at.

7. Ix bajtzanjluʼ taj ntena nim kʼij tuj tnam te Abundancia, ul twiʼ Kajaw wiʼja ix tma: Weʼctza ix txiʼya twiʼ witz, nchin jaw weʼya ix nchinxa twiʼ witz, intxocana tiʼj Kajaw.

8. Ix bajtzan jluʼ, tzaj yolan Kajaw wucʼala ntmaʼntok: Cbantel jun barc tuʼna icx tzaʼn cxel nyecʼana teya, tuʼntzan txi wiʼna ke t-xjalila tibaj aʼ.

9. Ix xi nmaʼne: Kajaw, ¿jatuma tuʼn tcanet cʼuxl aj at tocnen weya tuʼn tbant macbil tuʼn tjaw barc, ax ictzaʼn binchaban oc tzaj tyecʼana weya?

10. Ix bajtzan que tzaj tmaʼn Kajaw jatuma tuʼn nxiʼya jayolte cʼuxl tuʼn cybantke nmacbila.

11. Ix bajtzan que, wekin Nefi, bant jun xupbil kʼakʼ wuʼne tuʼn tjaw cʼant chʼintl; tbajlentzan bantke xupbil kʼakʼ tuʼn tocnen te cʼantl txkantl, oc npejcyʼaʼna caba xak, jun tiʼj juntl, tuʼn tetz kʼakʼ tiʼj.

12. Porque atzanju, naʼntok tzaj tzokpiʼn Kajaw nim kʼakʼ tuj kbeya tuj desyert, porque tma: Cxeʼl nbinchaʼna cynebebila pur cʼocʼj tuʼn miʼn tjax cytxicoʼna.

13. Ax ic atzan kina jun tkan spicʼan tuj desyert; ix cbajel nbinchaʼna be cywitza, per ilx tiʼj tuʼn txi cycʼuʼnake nmandamyenta. Cyjaʼtzan, ka ma txi cycʼujlaʼnake nmandamyenta, chixeʼl wiʼna tuj txʼotxʼ tziʼyanmaj, ix cxeʼl cybiʼna que a kina ochinx samante cyeya tuj txʼotxʼ tziʼyanmaj.

14. Ictzan, ax tma Kajaw: Oc cypona tuj txʼotxʼ tziʼyanmaj, cxeʼl cybiʼna que akina, aj Kajaw, Dios kina; ix aj kine, Kajaw, ijeʼx ncoʼpana tuʼn mi cynaja; ictzaʼn, akina inetz kʼin te cyeya tuj tnam te Jerusalén.

15. Cyjaʼtzan, kine, Nefi, oc nkʼoʼna il tiʼj tuʼn txi cʼujletke tmandamyent Kajaw; ix xi nkʼoʼna ocsabl cye wermaniya tuʼn cyoc te baʼn xjal ix tuʼn cybant nim cosas cyuʼn.

16. Ix bajtzan jluʼ bantke macbil tuʼn cʼuxl aj otok bʼant tiʼ xak.

17. Ix taj txi cyqueʼyanke wermaniya cyjaʼtok tbant jun barc wuʼne, ijoʼc ten yolil wiʼja, ncymaʼntok: Loc kermana; nxi t-xiʼman que tuʼn jlu jaca bant jun barc bix jaca tzicyʼx tuj nimak aʼ luʼ.

18. Cyjaʼtzan tten ijoʼc lipan wermaniya tucʼ yol wiʼja, ix ntiʼ cyajbe tuʼn cyakʼnan porque ntiʼ ocx tuj cywiʼ ka jaca bʼant jun barc wuʼne; ix ntiʼ tuʼn tocx tuj cywiʼ ka otok nbiya tkanil te Kajaw.

19. Ix jaʼlo bajtzan jluʼ que a kine, Nefi, pur bis inoʼca, tuʼn tlaj cyiw cyanma ix toc cyqueʼyan cyjaʼtok woc tena bisal, txubtxaj oc cyanma, ix pur txubtxajke tuʼn nlaja, cyma: Baʼn kuʼna nti tuʼn tbant jun barc tuʼna, baʼn kuʼna que mixl jwisjo tuʼn tbantke nimak akʼuntl tuʼna.

20. Merax axa ictzan kmane, que nxiʼ tkʼon tib tuʼn tlaj tnachal nxiʼ t-xiʼman tanma; ictzan, oʼ ketz tiʼn tuj tnam Jerusalén; ix pur tuj tzʼapetna oko beta nimca abkʼi tuj desyert; ix ochi akʼnanke kxuʼjala, icx taj yab xjaltak iteʼ ix otzul kcʼwaʼla cyiʼj tuj desyert, ochicyʼixba wena per ntiʼ icyim. Baʼn cye tuj cywitz biʼxtok inaj taj naʼntok cyetz tuj Jerusalén, que tuʼn cycyʼixba cyuʼnke bis luʼ.

21. Lutzan luʼ, okotena nimca abkʼi tuj desyert; ix tuʼnju tiemp ktenlena tuj oʼwtla ko ankʼina cyiʼj ktxʼotxʼaya ix tiʼj ktanmiya tuʼn kmana; ictzan, ix purtla txubtxaj koʼya.

22. Ix baʼn kuʼna, ajkexjal iteʼ tuj Jerusalén baʼnke, porque xi cycʼuʼnke tmandamyent ix t-ximbatz Kajaw, ictzan, ix purtla txubtxaj koʼya.

23. Ix bajtzan jluʼ kine, Nefi, inx yolana cyjaluʼ: ¿Chichi cyeya ajke kman, que atzan cycʼwaʼl Israelju, icolpajla tuj cykʼabke Egipcios, tzaʼnj ntiʼwt xi cybiʼnke tyol Kajaw?

24. Ictzan, ¿Chichiwtla que ijeʼtzla tjakʼ manda, nokat ntiʼ xi tsamaʼn Kajaw te Moisés tuʼn cycolpaj tiʼj?

25. Baʼn cyuʼna ajke tcʼwaʼl Israel iteʼ tjakʼ manda, tucʼ nimca cyiktz ix cytarey; cyjaʼtzan, baʼn cyuʼna, que txubtxaj cynanta tej cyetz librke tjakʼ manda.

26. Ax icxju, bʼaʼn cyuʼna que otzicʼ tiʼn Moisés mandamyent te Kajaw tuʼn tbant jun akʼunt luʼ tuʼn; ix tuʼntzan tyol bʼaj tpaʼn Mar Rojo, cyaj ten tuj tzkij ix iicyʼixtzan bʼet bix ntiʼ i acʼj tuʼn aʼ.

27. Bʼaʼn cyuʼna ajke egipcios soldad te Faraón, bix icyim tjaʼ Mar Rojo aj cyocx.

28. Ax icx bʼaʼn cyuʼna, ajke tcʼwaʼl Israel iwaʼn tiʼj maná tbi tuj desyert.

29. Ictzan, ax bʼaʼn cyuʼna aj Moisés, tuʼn tyol ix tipumal Dios at tiʼj, oc tpejan tiʼ xak ix etz aʼ tuj tuʼntzan cycʼanke tcʼwaʼl Israel tiʼj.

30. Ix nyaʼ oʼcx kʼiʼn ke, xiʼ nejna Kajaw, cyDios ix Colpil cye cywitz, ncheʼx kʼiʼn kʼijl ix nxiʼ kʼoʼn spicyʼan cye te konicʼan, ix nbantok tuʼn nicʼxca ke jaca pon jun xjal tiʼj tuʼn tikʼ tiʼn, cyiwxix más cyanma, cuʼ naj ximbatz ix iyolan ploj yol tiʼj Moisés ix tiʼj aj axix toclen itzʼj Dios.

31. Ix bajtzan jluʼ ax tzaʼnx ten tyol, icuʼ tilpaj; ix ax tzaʼnx ten tyol xi nej cywitz; ix ax tzaʼnx ten tyol bʼant cyakil cosas te cye; ix ntiʼ bʼant más tuʼn aj nyaʼ tyol.

32. Ix tajtzan cyicʼx tuj niʼm aʼ Jordán, tzaj tkʼoʼn Kajaw cyipan tuʼn tetz cyxoʼnke najal tuj tnam, ictzan, tuʼn cyel sputan ocxa cycuʼ tilpaj.

33. Ix jaʼlo, ¿Chichi cyeya ajke xjal te tnam aju, aj iteʼ tuj txʼotxʼ tziʼyanmaj, ix ijeʼtz xoʼn cyuʼn kman, chichi cyeya kapa baʼn xjalke? Lutzan luʼ, cxeʼl nmaʼne cyeya, que nyaʼ baʼn xjalke.

34. ¿Chi cyximbatza que cyʼiwlaʼn majke kman cywitzke xjal teʼ tuj tnam, nokat luʼxix xjalke? Cxeʼl nmaʼne cyeya que miʼn.

35. Lutzan luʼ, nim tajbil Kajaw tiʼj cyakilke chibjal junx, ix alcye aj baʼn xjal tzul cʼiwlaʼn tuʼn Dios. Per lutzan luʼ, ajke xjal te tuj tnam luʼ otok tzʼel cyicʼan tyolbil Dios, ix otok choc te ploj xjal; ix cyakil at tkʼoj Dios, toc cyiʼj. Ix ntiʼ xi tcʼiwlaʼn Dios cytxʼotxʼ, ix xi tcʼiwlaʼn te cye kman. Ictzan, xiʼ tcʼiwlante cye ploj tuʼn cykʼuchat, bix xi tcʼiwlaʼn cye kman tuʼn ticʼ cyiʼn cyipumal tiʼj.

36. Lutzan luʼ obant txʼotxʼ tuʼn Kajaw tuʼn cyankʼinke xjal twitz; ix obant tecyeke tcʼwaʼl tuʼn tel cyetzan.

37. Ix njaw tjyoʼnke xjal baʼn, ix nbaj tkʼuchanke ploj xjal.

38. Ncheʼx tsamaʼnke baʼn xjal tuj kʼinan txʼotxʼ ix nbaj tkʼuchanke ploj xjal, ix nti xi tcʼiwlaʼn txʼotxʼ tuʼn cylaj.

39. Ncawin max ma jawnix tuj cyaʼj, porque atzan ke tnajbil; ix aj txʼotxʼ luʼ, atzan tuʼn cyajlanke tkan twitz.

40. Ix nim tajbil cyiʼjke nxi cyniman tiʼj Dios. Lutzan luʼ, nim tajbil cyiʼj kman, ix bant tiʼj jun cyyol, ictzan, tucʼ Abrahán, Isaac, ix Jacob; ix ul tiʼj tcʼuʼj aj cyyol otok bant, ix ijeʼtz tiʼn tuj tnam Egipto.

41. I eʼx kʼiʼn tuj desyert tuʼn t-var, tuʼnj cyiwax cyanma ictzaʼn cyeya bant cyuʼna; aj pur bisxix ijoʼc tuʼn Kajaw tuʼn tlaj twitz cyil. Ix xi tsamoʼnke labaj ikan kʼakʼ cyuʼn ix baʼn chi purn. Ix taj cyoc txʼaʼn, tzaj kʼoʼn cyromey tuʼn cybant; ix ntiʼtl más tuʼn tcyil. Ix cyjuʼtzan jluʼ ix tachj, nimcake inaj.

42. Ix cyiw octl cyanma juʼn maj, ix xiʼ cymaʼn ploj cosas tiʼj Moisés icx tiʼj Dios. Simbargo baʼn cyuʼna que tuʼnju tipumal matijxix cywitz txkantl ijeʼx kʼiʼn tuj txʼotxʼ tziʼyanmaj.

43. Ix jaʼlo, tbajlen cyakil jluʼ, ma pon tiemp aj ma chi bantke ploj; ictzan, ma chicʼ tibaj cyplojal ix ntiʼ baʼn wuʼne ka tuj kʼij luʼ chi bel kʼuchan tuʼn Dios. Porque baʼn wuʼne que ax toc tzul tkʼijlal oc cycuʼ kʼuchj, nicʼxca juʼnke chixeʼl kʼiʼn pres.

44. Cyjaʼtzan, otzaj tsamaʼn Kajaw mane, tuʼn t-xiʼ tuj desyert; ix atzanke judiy xjal cyajbil tuʼn tcuʼ cybiyoʼn; ictzan, ax icx cyeya cyajbila tuʼn tcuʼ cybiyoʼna. Cyjaʼtzan pur biyol kʼucʼal keya ictzaʼn ake.

45. Chʼix tbant ploj cyuʼna, ix cheb nnul tiʼj cycʼuʼja tiʼj Kajaw aj Dios. Opa cyila jun tsanjelal Dios oyolan; ictzan, ocybiya twiʼ juʼn maj; ix oyolan tucʼ jun chiʼ tyol per otok naj cyximbatza, cyjaʼtzan ntiʼ cynaya tyol; cyjaʼtzan, yolan tuʼnju twiʼ ictzan tkan kʼancyok aj o luʼlan txʼotxʼ tuʼn chʼixtok tuʼn tel tilpaj.

46. Ix baʼn cyuʼna que tuʼn tipumal tyol aj at tipumal tibaj cyakil jaca cuʼ naj txʼotxʼ tuʼn; ictzan, tuʼn tipumal tyol jaca cuʼ ttzacsan ke lugar te pur xak nim tjaw, pur chaʼx cʼul chkʼajlaj, ix ke lugar, chkʼlaj jaca cyaj te witz tuʼn. ¿Ti kuʼntzan pur cyiw cyanmiya?

47. Tuʼn cylaja paʼmaj wanmiya tuʼn cʼixblenn; ix cʼixbil taʼ wanmiya, porque ntzaj nxoblala jaca cheʼx xoʼna te jumajx. Lutzan luʼ, nojna kina tuʼn Xewbaj te Dios cyjaʼtzan ntiʼ tipun nximlala.

48. Ix bajtzan que taj nxi yolana cye cyjaluʼ, nim ijaw kʼojl wucʼala, ix cyajbe tuʼn nxi cyxoʼna tuj mar. Per taj cyul lakʼeʼ ntxlaja tuʼn ncuʼ cytzyuʼna, inx yolina cye, cyjaluʼ: Tuj tbi Dios aj ponin tiʼj, cxeʼl nmaʼne cyeya tuʼn miʼn woc cytzyuʼne, porque nojna kina tuʼn tipumal Dios, icxpa cyakil nchibjala, alcye jun ma cuʼ tkʼoʼn tkʼab wibaja, cocl tzkij ictzaʼn jun tkan cjoʼn tzkij; ix ctel twitz txʼotxʼ. Ictzaʼn jun ntiʼx twitz tipumal Dios, tuʼntzanj tuʼn Dios cocl tkʼon tyab.

49. Ix bajtzan jluʼ akine, Nefi, xiʼ nmaʼne cye tuʼn miʼn cyjaw lipan tucʼ yol tiʼj cyman; ic ntiʼ tuʼn tcuʼ cyxcʼayan cyib tiʼj cyakʼan, porque tuʼn Dios intzaj tkʼamaʼn tuʼn tbant jun barc.

50. Ix xi nmaʼne cye: “Ka tuʼn Dios ma chin tzaj tsamaʼn tuʼn cybant cyakilke cosas, jaca bant wuʼna. Ka ma tzaj tmaʼn wey tuʼn t-xiʼ nmaʼna tej aʼluʼ: Kʼoʼn oc tiba te txʼotxʼ oc cocl icju; ixka ic ma nma, ictzl cteʼlju.

51. Cyjaʼtzan, at nim tipumal Kajaw, ix obant nimcake binchben nim tipumal cyxolke cycʼwaʼl xinak, ¿titzan kuʼn miʼn chincub txnakʼtzaʼn tuʼn tbant jun barc?”

52. Ix bajtzan jluʼ akine Nefi, xi nmaʼne nim cosas cyeke wermaniya, cyjaʼtzan tten icyaj tzacj ix ntiʼ tuʼn cyoc ten kʼojlel wiʼja; mix mix tuʼn woc cymacon tuʼn twi cykʼab, mix tuʼn toc cykʼoʼn cykʼab wiʼja cygann tuj nimca kij. Ix ntiʼ chʼin tuʼn tbant luʼ cyuʼn tuʼn t-xoʼblal tuʼn cyoc tzkij nwitza tuʼntzanj pur maʼxix Xewbaj Dios; ix ictzan otok nakʼnan cyiʼj.

53. Ix bajtzan que oʼ tzaj tmaʼn Kajaw weya: Nukpinx tkʼaba cyibajke termaniya ix milaytzan tzkij cyximlal twitza; per chi cbajel nchtoʼna cyiʼj, chi Kajaw; ix cbantel wuʼne tuʼntzan cybinta que akine Kajaw aj cyDios.

54. Ix bajtzan, xi nnukpiʼn nkʼaba cyiʼj wermaniya, ix ntiʼ ijoʼc tzkij nwitza. Per el tchtoʼn Kajaw ax o tzaʼwax tyol.

55. Ix cyma: Jaʼlo baʼnxix kuʼna que a Kajaw at tucʼala, pues cxeʼl knimna que atzan tipumal Kajaw aj matzeʼl tchtoʼn kiʼja. Bix i cub ke txe nkana tuʼn wocx cyxon weya. Per mintí cyaj nkʼona tuʼn tbant ju cyuʼn. Ix xi nmaʼna cye: Akine cyermaniya chʼin; cyjaʼtzan xoʼncxa Kajaw aj Dios, ix cyxoʼncxa cymana tuʼntzan maʼxix tuj cykʼija twitz txʼotxʼ que a Dios tzul kʼonte cyeya.