1. Jaʼlo wajbila tuʼn cybintaya, que taj tbaj yolan nmane Lehi, tiʼj cbajel yajxa, xiʼ yolan Kajaw juntl maj tucʼal, cyjaʼw que nya baʼn tuʼn t-xi tiʼn Lehi ke tfamilya tjunalx tuj desyert; sino que tuʼn tcanet cyxuʼjalke tcʼwaʼl tuʼn tten cycʼwaʼl yolal tiʼj Kajaw tuj txʼotxʼ tziʼyanmaj.

2. Ix bajtzan que tzaj tmaʼn tuʼn kaj meltzʼaje kine ixke wermaniya tuj txʼotxʼ te Jerusalén, tuʼn txi kiʼna Ismael tucʼx tfamilye tuj desyert.

3. Ix bajtzan que, akine, Nefi, ixke wermaniya ojoʼxa juntl maj tuj desyert tuʼn kxiʼya tuj Jerusalén.

4. Taj kpona tja Ismael, lutzan luʼ, baʼnxix ocʼameta tuʼn que cyjaʼtzan xi kmaʼnake tyol Kajaw Dios te.

5. Ix cyeʼyax oc tanma Ismael ix tucʼx tja tuʼn Kajaw; cyjaʼtzan jluʼ itzaj kucʼla tuj desyert tja kmane.

6. Ix myentras nkobeta tuj desyert, lutzan luʼ que Lamán ix Lemuel, ke cab tmeʼjal, ixke cab tcyʼajal Ismael ixke cyfamilya ijoʼc lipan kiʼja, mas byen wiʼja, Nefi, tiʼj Sam ix tiʼj Ismael, ix t-xuʼjl ixke oxa tmeʼjal.

7. Ix bajtzan que, tuj cytxʼujwiʼyal cyajbeʼ tuʼn cyaʼjal ok tuj tnam te Jerusalén.

8. Atzan wekin, Nefi, bisca tina tuʼnju tcyiwl cyanma, inx yolna te Lamán tucʼax Lemuel, cyjaluʼ: Lutzan luʼ, akiye ntzicya ¿tikuʼn cyiw cyanmiye, bix moẍ cywitze tuʼn mi tel cynicyʼa tiʼj, que ilxix tiʼj, que aj kine cyitzʼane tuʼn cybaj ncaʼwana ix tuʼn t-xiʼ nkʼoʼna yecʼbil cyeye?

9. ¿Tikuʼn naʼnx txi cybiʼna tyol Kajaw?

10. ¿Tikuʼn icju aj otzʼel tiʼj cycʼuʼja aj ka oʼ cyila jun ángel te Kajaw?

11. Ictzan, ix ¿tikuʼn otzel tiʼj cycʼuʼja ajke maʼxix cosas obant tuʼn Kajaw teke tuʼntzan kcolpaj tuj tkaʼb Labán, ix baʼntok tuʼn cycanet ke storya?

12. Ictzan, ix ¿tikuʼn oʼ tzʼel tiʼj cycʼuʼja ka at tipumal Kajaw tuʼn cybant cyakil cosas te cycʼwaʼlke xinak, según aj tajbil ka at cyocslabl tiʼj? Ictzantenju, kocx baʼn xjal tiʼj.

13. Tuʼntzanj baʼnxix koʼ tiʼj, oc ckikʼal aj txʼotxʼ tziʼyanmaj; ix jaca cyila tuj jun temp tzul, que oc cjapanelx tyol Dios tiʼj aj tuʼn tcuʼ kʼuchj Jerusalén; porque cyakil aj otma Kajaw tiʼj tuʼn tcuʼ kʼuchat, oc cbajelx icju.

14. Pwes lutzan luʼ, aj Xeʼwbaj te Kajaw milay cyaj ten cyucʼal; porque otzʼel cyicʼanke profetas ix otzʼocx cykʼoʼn Jeremías tuj tzeʼ. Ix cyajbil tuʼn tcuʼ cybiyoʼn nmane, nokx tuʼn tex ok tuj tnam cyuʼn.

15. Cyjaʼtzan nxi nmaʼne cyeye que ka at cyajbila tuʼn cyaj meltzʼaja juntl maj tuj Jerusalén, oc chi cymela cyucʼal. Cyjaʼtzan ka cyajbila tuʼn cyaja tuj tnam; ix tuʼn txi cycʼujlaʼna ajke yol nchin yolana tiʼj; ixka ma chexa, chcymela cyucʼal; porque cyjaʼtzan ntzaj tmaʼn T-xew Kajaw weya tuʼn nyoline cyeya.

16. Ix bajtzan, taj txi nmaʼne a kine Nefi ajke yol luʼ cye wermaniya, ijaw kʼojlke wucʼala. Ix itzaj wiʼja, porque oxix chi jaw kʼoj ix incuʼ cybiyoʼn, ix inbaj cycʼaloʼn tuʼn sakbak tuʼntzan ncyaj coʼlna tuj desyert tuʼntzan nxi choʼna cyuʼnke txʼuʼj jil.

17. Bajtzan que, nxiʼ nkaʼnna te Kajaw, cyjaʼw: ¡Kajaw, tzanx tten wocslabla at tiʼja, chin tcolpima tuj cykʼabke wermaniya; ictzan, kʼantza wipana tuʼn cycuʼ tzakj sakbak luʼ aj cʼloʼn kina cyuʼn!

18. Ix tajtzan txi nmaʼne ke yol aju, lutzan luʼ, ke sakbak ijeʼl tiʼj nkʼaba ix cyiʼjke nkana ix incuʼ tena cywitzke wermaniya inx yolana cyucʼal juntl maj.

19. Ix bajtzan que ijaw kʼojl wucʼala juntl maj ix cyajbe tuʼn ncuʼ cytzyuʼn; per lutzan luʼ, jun tmeʼjal Ismael, ictzan, ix ttxuʼ ix jun tcyʼajal Ismael, iyolan cyucʼalke wermaniya cyjuʼtzan tten baʼnxix oc cyanma, ix iweʼtzan tuʼn miʼn ncuʼ biyoʼna cyuʼn.

20. Bajtzan, pur bis icyaj tuʼnju ploj xjal ke, cub cybecyʼbiliʼn cywitz nwitza, ncymaʼntok tuʼn txi nnajsaʼna cyil tej otok baj cye wiʼja.

21. Ix bajtzan que, xi nnajsaʼna cyil tuʼn jun baʼn xjal kina tiʼj cyakil aj otok baj wiʼja cyuʼn, ix maʼxixke consej xi nkʼoʼna cye tuʼn txi cykanaʼn te Kajaw aju Dios tuʼn ttzaj tnajsaʼn cyil. Ix bajtzan que icx oc cyuʼnjo. Cybajlentzan nan Dios, oc betan kuʼna juntl maj max tuʼn kxiʼya tja kmana.

22. Ix bajtzan que, ocuxa tja kmane; ix tajtzan kpona tja kmana, kina, cyucʼaxke wermaniya ixke tfamilya Ismael, nimx xi cykʼoʼn chjonta te Kajaw aju cyDios; ix xi cykʼoʼnke oʼybil.