1 Xcʼulvachitej cʼa chi e janíla chique ri ruvinakul ri Nefi quimolon quiʼ chirij ri lokʼolej nimajay richin ri Ajaf, ri cʼo chiriʼ chupan ri ruvachʼulef rubinian Janíla Nivachin. Ri vinakiʼ riʼ can janíla vi niquikukaʼ y niquimey quiʼ y niquicʼutulaʼ quiʼ chiquivech rijeʼ, roma ri meyel y nimalej jalatajic ri xcʼulvachitej chiquicojol.

2 Chuckaʼ cʼa rijeʼ yetzijon chirij ri Jesucristo achojchij yatajinek vi can ri retal ri rucamic.

3 Xcʼulvachitej cʼa, chi tok rijeʼ yetzijolon chiquivech, ja cʼariʼ tok xcacʼaxaj jun chʼabel, achiʼel vi xa chicaj petenek vi. Ja cʼariʼ tok cʼulaʼ xetzuʼun vi, roma man xkʼax ta chiquivech rijeʼ ri chʼabel ri xcacʼaxaj. Ri chʼabel riʼ man kolokic ta, ni man cof ta. Man riqʼuin vi cʼariʼ, re chʼuchʼujilej chʼabel reʼ xapon, cʼa pa quicʼuʼx checonojel ri xeʼacʼaxan. Ja cʼareʼ xbanon chique chi chijun quichʼacul xcʼaracʼot. Ja re chʼabel reʼ xapon, cʼa pa cánima y xukʼakʼaj ri quicʼuʼx.

4 Xcʼulvachitej cʼa chi xcacʼaxaj ri chʼabel jun bey chic, y xa man xkʼax ta chic chiquivech.

5 Pa rox mul xcacʼaxaj jun bey chic ri chʼabel. Cʼa cʼariʼ, xquiyaʼ quixiquin chiracʼaxaxic, y ri runakʼ quivech xquichojmij pa rubey acuchi nibecʼulun vi pe ri chʼabel. Ja cʼariʼ tok choj chicaj yetzuʼun vi akʼanij, roma can chiriʼ vi petenek vi ri chʼabel.

6 Vaveʼ cʼa, pa rox mul xkʼax chiquivech rijeʼ ri chʼabel ri xcacʼaxaj, y quereʼ xubij chique:

7 Ja cʼareʼ ri Nucʼajol Nulokʼokʼen. Riqʼuin rijaʼ nucukuban viʼ y riqʼuin rijaʼ nuyaʼon rucʼojlemal ri nubiʼ. Jacʼa rijaʼ, tivacʼaxaj.

8 Xcʼulvachitej cʼa chi tok reʼ xkʼax chiquivech rijeʼ, xetzuʼun akʼanij chicaj jun bey chic. Ja cʼariʼ tok xquitzʼet jun Achin ri nikaka pe chicaj. Rucusan cʼa jun rutziak loʼxloʼx. Xkaka pe y xpaʼeʼ pa quinicʼajal rijeʼ. Checonojel ri e cʼo chiriʼ, xa ja rijaʼ quitzuluben apon, y manjun cʼa nitiquir ta nujek ri ruchiʼ, ni ta chiquivech rijeʼ, richin ta niquicʼutuj achique nicʼulvachitej. Roma rijeʼ niquichʼob chi xa jun takonaxel ri xucʼut ri chiquivech.

9 Xcʼulvachitej cʼa chi rijaʼ xuyuk ri rukʼaʼ y xchʼo chique ri vinakiʼ. Quereʼ xubij:

10 Titzuʼ pe, ja yin in Jesucristo, ri quijiquibalon pe ri e yaʼol lokʼolej rutzijol chi cʼo chi yipe na chuvachʼulef.

11 Can kitzij vi, ja yin ri rusakil y ri rucʼaslen ri ruvachʼulef. In kumuvinek cʼa pe chupan ri qʼueyilej kumbel ri ruyaʼon ri Tataʼixel chuve, y nuyaʼon cʼa rukʼij ri Tataʼixel, roma xincʼul cʼa pe chuvij yin ronojel ri mac quichin ri e cʼo chuvachʼulef. Riqʼuin cʼareʼ, nubanon cʼa ronojel ri rurayibal ri Tataʼixel riqʼuin ronojel, cʼa pa tok rutiquiribel pe.

12 Cʼa cʼariʼ, tok ri Jesús xubij yan re chʼabel reʼ, checonojel ri quimolon quiʼ chiriʼ xetzak ka pa ri ulef. Chiriʼ cʼa, tok xokaʼ chiquicʼuʼx chi kʼalajirisan vi can chiquivech rijeʼ chi ri Cristo cʼo chi nucʼut riʼ chiquivech, chirij tok xjoteʼ yan chicaj.

13 Xcʼulvachitej cʼa, chi ri Ajaf xchʼo chic jun bey chique y quereʼ xubij:

14 Quixyacatej cʼa y quixámpe viqʼuin, richin queriʼ yixtiquir cʼa nijuʼ ri ikʼaʼ chupan ri ruva nucʼuʼx y chukaʼ richin nichapalaʼ cʼa ri quetal ri bajixel tak chʼichʼ pa nukʼaʼ y pa vaken, richin queriʼ nivetamaj cʼa chi ja yin ri in Dios richin chijun ruvachʼulef, y chi xicamisex cʼa, roma ri quimac ri e cʼo chuvachʼulef.

15 Xcʼulvachitej cʼa chi chiquijujunal ri quimolon quiʼ chiriʼ xejeleyaj apon, y xquijulaʼ ri quikʼaʼ chupan ri ruva rucʼuʼx y xquichapalaʼ ri quetal ri bajixel tak chʼichʼ pa rukʼaʼ y pa raken. Can queriʼ xquibanalaʼ chiquijununal, cʼa tok xekʼax checonojel. Cʼa cʼariʼ, xquitzʼet cʼa riqʼuin runakʼ quivech rijeʼ, y xquichapalaʼ riqʼuin ri quikʼaʼ, y xquetamaj chi can kitzij vi, y xquijiquibaʼ chi can ja vi rijaʼ achojchij quitzʼiban vi can ri e yaʼol lokʼolej rutzijol chi can cʼo vi chi nipe.

16 Tok checonojel xejel riqʼuin rijaʼ, y can je vi rijeʼ xetzʼeton richin, jariʼ tok checonojel pa jun chʼabel xquibij:

17 ¡Osana! ¡Nim ruva rukʼij ri rubiʼ ri Dios Nej Cʼo Akʼanij! Ja cʼariʼ tok rijeʼ xexuqueʼ cʼa riqʼuin ri raken ri Jesus y xquiyaʼ rukʼij.

18 Xcʼulvachitej cʼa chi ri Jesús xroyoj ri Nefi, (rijaʼ cʼo chiquicojol ri molaj vinakiʼ riʼ), y xubij chire chi tijel apon riqʼuin.

19 Xyacatej cʼa el ri Nefi y xjel apon riqʼuin. Rijaʼ xuqueʼ ka chuvech ri Ajaf y xutzʼubaj ri raken.

20 Ri Ajaf xubij chire chi tiyacatej. Xyacatej cʼa rijaʼ y xpaʼeʼ apon chuvech.

21 Que cʼareʼ xubij ri Ajaf chire: Ninyaʼ cʼa ri uchukʼaʼ chave rat richin yeʼakasaj chuxeʼ yaʼ re vinakiʼ reʼ tok xquijoteʼ el jun bey chic chicaj.

22 Chukaʼ ri Ajaf xeroyoj chʼakaʼ chic achiʼaʼ y xchoʼo quiqʼuin, achiʼel cʼa xuben riqʼuin ri Nefi. Chukaʼ xuyaʼ ri uchukʼaʼ chique richin niquiben ri kasanic chuxeʼ yaʼ. Quereʼ xubij chique: Jareʼ ri rubanic ri kasanic chuxeʼ yaʼ ri xtiben y man chek quixtojojen cʼa chic chiʼicojol rix.

23 Can kitzij ninbij chive chi quereʼ cʼa xtiben chire ri kasanic chuxeʼ yaʼ riqʼuin ri vinek ri xtitzolin pe rucʼuʼx chupan ri mac y ri xtrajoʼ xtikasex chuxeʼ yaʼ pa nubiʼ yin roma ri ichʼabel rix. Que cʼareʼ xtiben chire: xquixkaka ka y xquixpaʼeʼ chupan ri yaʼ y pa nubiʼ yin xtikasaj cʼa chuxeʼ yaʼ.

24 Cʼa cʼariʼ, xqueʼivoyoj chiquijujunal riqʼuin ri quibiʼ y ja cʼa reʼ ri chʼabel xtibij:

25 Roma cʼa yaʼon can chuve ri kʼatbel tzij roma ri Jesucristo, yin yatinkasaj chuxeʼ yaʼ, pa rubiʼ ri Tataʼixel y ri Cʼajolaxel y ri Lokʼolej Uxlabixel. Amen.

26 Cʼa cʼariʼ, xqueʼikasaj cʼa chuxeʼ ri yaʼ y cʼariʼ, xquixel pe chic chupan ri yaʼ.

27 Que cʼariʼ xtiben chire ri kasanic chuxeʼ yaʼ pa nubiʼ. Roma vacami can kitzij cʼa ninbij chive chi ri Tataʼixel y ri Cʼajolaxel y ri Uxlabixel xa e junan. Ja yin in riqʼuin ri Tataʼixel, y ri Tataʼixel ja rijaʼ viqʼuin yin, y ri Tataʼixel y yin xa oj junan.

28 Riqʼuin cʼa ronojel ri xinbij chive chi cʼo chi niben, que cʼariʼ xtiben chire ri kasanic chuxeʼ ya. Manjun cʼa chic titojoj chiʼicojol rix, achiʼel cʼa ri ibanalon can, ni man ta cʼa xquixtojojen chic chiʼicojol rix pa ruviʼ ri nutijonic, achiʼel ri ibanalon pe ojer.

29 Roma can kitzij, y kitzij ninbij chive, chi ri vinek ri ucʼuayon richin ri uxlabel richin ri tojojenic, riʼ xa man vichin ta yin. Riʼ xa richin ri itzel vinek, roma xa can ja vi rijaʼ ri tataʼaj richin ri tojojenic y nukʼakʼaj ri cánima ri achiʼaʼ richin yetojojen chiquicojol rije riqʼuin oyoval.

30 Tivetamaj cʼa chi xa man nutijonic ta yin richin ninsiloj ri cánima ri achiʼaʼ riqʼuin oyoval chiquicojol ka rijeʼ. Ri nutijonic yin jacʼa xa richin niqʼuis ta ronojel reʼ.

31 Vacami cʼa, can kitzij, y kitzij ninbij chive chi xtinkʼalajirisaj cʼa chivech ri nutijonic.

32 Ja cʼareʼ ri nutijonic yin, y re tijonic reʼ jareʼ ri ruyaʼon pe ri Tataʼixel chuve, y yin yijiquiban chirij ri Tataʼixel y ri Tataʼixel nijiquiban chuvij yin, y ri Uxlabixel nijiquiban chirij ri Tataʼixel y chukaʼ chuvij yin. Yin ninjiquibaʼ chi ri Tataʼixel ja rijaʼ nibin chique conojel ri achiʼaʼ pa conojel tak cʼojlibel chi titzolin pe quicʼuʼx y quinquinimaj yin.

33 Achique cʼa ri xquirunimaj yin y xtikasex cʼa chuxeʼ yaʼ, jariʼ ri xticolotej. Checonojel cʼariʼ xtiquichinaj ri rajavaren ri Dios.

34 Achique cʼa ri man xquirunimaj ta yin y man xtikasex ta chupan yaʼ, riʼ can xtetzelex vi.

35 Can kitzij, y kitzij ninbij chive chi jareʼ ri nutijonic ri ninjiquibaʼ cʼa pe riqʼuin ri Tataʼixel. Ri vinek ri yirunimaj yin, chukaʼ nunimaj ri Tataʼixel, y chire cʼa ri vinek riʼ ri Tataʼixel xtijiquiban chuvij yin. Jareʼ xa roma can xtukʼejelaʼ vi riqʼuin kʼakʼ y riqʼuin ri Uxlabixel.

36 Que cʼariʼ ri Tataʼixel xtijiquiban chuvij yin, y ri Uxlabixel xtijiquiban chirij ri Tatʼixel y chukaʼ chuvij yin, roma ri Tataʼixel y yin y ri Uxlabixel can oj junan vi.

37 Chukaʼ ninbij cʼa chive chi cʼo chi nitzolin pe icʼuʼx y yixoc achiʼel ta jun ti alcʼual y yixkasex chuxeʼ ya pa nubiʼ yin, o can manjun vi banel richin xtivil ronojel reʼ.

38 Jun bey chic ninbij chive chi cʼo chi nitzolin pe icʼuʼx y yixkasex ka chuxeʼ yaʼ pa nubiʼ yin y yixoc achiʼel ta jun ti alcʼual, o can manjun vi banel richin xtivichinaj ri rajavaren ri Dios.

39 Can kitzij, kitzij ninbij chive chi jareʼ ri nutijonic yin, y ri vinakiʼ ri niquitiquibaʼ quiʼ pa ruviʼ ronojel reʼ, ja cʼariʼ ri xquetiquiban pa ruviʼ ri nuxeʼel, y ri ruchiʼ ri xibalbay man xtichʼacon ta chiquij rijeʼ.

40 Achique ri xtikʼalajirisan cʼa janíla chic chuvech reʼ o xa nrelesaj el jubaʼ riqʼuin, y xtubij chi jariʼ ri nutijonic yin, riʼ xa rutakon ri etzelal, y xa man rutiquiban ta riʼ pa ruviʼ ri nuxeʼel. Xa rutiquiban riʼ pa ruviʼ sanayiʼ, y roma cʼariʼ ri ruchiʼ ri xibalbay can jakel vi chic richin nucʼul rijaʼ, tok xtipe ri yaʼ pa ruviʼ re ruvachʼulef, y tok ri cakʼikʼ xtupojlaʼ ri riqʼuin.

41 Riqʼuin cʼareʼ, quixbiyin cʼa chiquicojol re vinakiʼ re, y tikʼalajirisaj cʼa re chʼabel xenbilaʼ, chuvech chijun re ruvachʼulef.