1 Vacami cʼa, can kitzij ninbij chive chi re chʼabel reʼ xqueʼapon quiqʼuin ri Gentiliʼ achiʼel rubin can ri Ajaf. Jariʼ xtiicʼulvachitej tok rijaʼ riqʼuin ri utzilej runojibal, nukʼijuj chi can rucʼamon vi chi nicʼulvachitej. Ja cʼariʼ tok xtivetamaj chi najin che kʼajirinen ri cʼulanen tzij ri rubanon can ri Tataʼixel quiqʼuin ri ralcʼual ri Israel. Xquicʼul quiʼ ri quitzij chi xquetzolin cʼa chupan ri ruvachʼulef ri quichinan can.

2 Xtivetamaj chukaʼ chi can xquekʼajer vi checonojel ri ruchʼabel ri Ajaf, ri e quichʼabalin can ri chʼajchʼojilej e yaʼol lokʼolej rutzijol. Roma cʼariʼ, man rucʼamon ta chic nibij chi ri Ajaf cʼa niyaloj nipe quiqʼuin ri ralcʼual ri Israel.

3 Man rucʼamon ta chukaʼ chi cʼa ninojij na pan ivánima, chi xa manek rejkalen ri chʼabel e tzijon can. Roma can kitzij vi chi ri Ajaf man xtumestaj ta ri cʼulanen tzij ri xuben can quiqʼuin ri ruvinak ri e rujayul ri Israel.

4 Tok nitzʼet cʼa chi re tzijonic reʼ nicʼulvachitej chiʼicojol, man rucʼamon ta chic chi cʼa yeʼixovaj na ri rubanobal ri Ajaf. Roma cʼariʼ, ri rutzaqʼuibal ri rukʼatoj tzij xa cʼo chic pa rajquikʼaʼ. Can kitzij vi cʼa, chi vi cʼa yeʼixovaj na ri rubanobal rijaʼ chupan ri kʼij ri, can xtuben vi chi ri tzaqʼuibel riʼ yixrukʼiʼ chaʼnin.

5 ¡Joʼoc ruvech ri nixovan ri rubanobal ri Ajaf! ¡Joʼoc cʼa ruvech ri nixutun ri Cristo y ri rubanobal!

6 Kitzij cʼa, chi joʼoc ruvech ri nuxutuj ri rukʼalajirisanic ri Ajaf, y nubij chi ri Ajaf xa man nisamej ta chic riqʼuin ri kʼalajirisanic, y ruyaʼic lokʼolej rutzijol, y ri lokʼolej sipanic, y ri chʼabel, y ri cʼachojirisabel, y riqʼuin ri ruchukʼaʼ ri Uxlabixel.

7 Chupan ri kʼij riʼ, xquecʼojeʼ ri yetzijon xa richin yechʼacon. Joʼoc ruvech ri xtibanon queriʼ, y xtubij chi ri Jesucristo xa man nitiquir ta chic nuben manjun nimalej samaj. ¡Roma ri xa queriʼ nuben, xtoc cʼa junan riqʼuin jun ralcʼual ri sachel, achojcheʼ man niyaʼox ta manjun joyovabel, achiʼel cʼa rubin can ri Cristo!

8 Kitzij cʼa chi man rucʼamon ta chi chek cʼa yeʼiyokʼ na, y yeʼixovaj, y yeʼitzeʼej ri e aj Judá, ni ta chukaʼ xabachique chic rutzʼakat ri rujayul ri Israel. Roma can kitzij vi, chi ri Ajaf man rumestan ta ri cʼulanen tzij ri xuben can quiqʼuin, y rijaʼ can xtuben vi quiqʼuin rijeʼ, achiʼel cʼa ri rujiquiban can.

9 Roma cʼariʼ, man rucʼamon ta ninojij chic chi yixtiquir nijechʼej el ri rajquikʼaʼ ri Ajaf, cʼa pa ri rajxocon, richin queriʼ man ta nusamajij chic ri kʼatoj tzij, y man ta nuben chi nikʼajer ri cʼulanen tzij ri xuben can, riqʼuin ri rujayul ri Israel.