1 Xcʼulvachitej cʼa chi ri Jesús xtaneʼ chubixic re chʼabel reʼ chire ri Nefi y chique ri xeʼoyox. Je rieʼ ri cablajuj ri xeʼoyox y xquicʼul ri uchukʼaʼ y ri kʼatbel tzij richin niquiben ri kasanic chuxeʼ yaʼ. Vaveʼ cʼa, rijaʼ xuyuk ri rukʼaʼ pa quichojmil ri nimalej molaj vinakiʼ, xchoʼ quiqʼuin, y quereʼ xubij: Nim ruva ikʼij rix, vi ninimaj ri niquibij chive re cablajuj ri xenchaʼ chiʼicojol rix richin niquiben ri lokʼolej quisamaj pan iviʼ rix, y richin yesamej ivoma rix. Chukaʼ nuyaʼon can ri uchukʼaʼ pa quiviʼ rijeʼ, richin niquiben ri kasanic chuxeʼ yaʼ chive rix. Tok ix kasan cʼa chic chuxeʼ yaʼ, cʼa cʼariʼ, xquixinturusaj riqʼuin kʼakʼ y ri Uxlabixel. Xa roma cʼariʼ tok nim ruva ikʼij rix vi yininimaj y vi yixkasex chuxeʼ yaʼ tok xinitzʼet yan y tok xivetamaj yan chi in cʼo yin.

2 Chukaʼ cʼa, can nim vi ruva quikʼij ri xtiquinimaj ri ichʼabel rix, roma rix xtijquibaʼ chi in itzʼeton yin y chi ivetaman chic chi in cʼo. Kitzij chi can nim vi ruva quikʼij ri xtiquinimaj ri ichʼabel, y xtiquichʼutinirisaj quiʼ janíla, y xquekasex chuxeʼ yaʼ, roma can jic vi xtapon quiqʼuin rijeʼ ri kʼakʼ y ri Uxlabixel, y xtiquicʼul cʼa ri rucuyubel quimac.

3 Jaʼ, can nim vi ruva quikʼij ri mebaʼ tak cuxlabal ri yepe viqʼuin, roma can quichin vi rijeʼ ri rajavaren ri caj.

4 Chukaʼ nim ruva quikʼij checonojel ri yeʼokʼ, roma rijeʼ can jic vi chi xticukirisex quicʼuʼx.

5 Chukaʼ nim ruva quikʼij ri e chʼuchʼuj, roma rijeʼ xtiquichinaj ri ruvachʼulef.

6 Chukaʼ nim ruva quikʼij checonojel ri yevayijan y chakiʼj quichiʼ chirij ri ruchojmilal, roma rijeʼ xquenoj cʼa riqʼuin ri Uxlabixel.

7 Chukaʼ nim ruva quikʼij ri joyovanelaʼ, roma rijeʼ chukaʼ xtijoyovex quivech.

8 Nim ruva quikʼij chukaʼ ri e chʼajchʼoj ri cánima, roma rijeʼ xtibequitzʼetaʼ ruvech ri Dios.

9 Chukaʼ nim ruva quikʼij conojel ri niquisamajij ri uxlanibel cʼuʼx, roma rijeʼ xtiquibiniʼaj cʼa ri ralcʼual ri Dios.

10 Chukaʼ nim ruva quikʼij checonojel ri yeʼokotex roma ri nubiʼ yin, roma can quichin vi rijeʼ ri rajavaren ri caj.

11 Nim ruva ikʼij chukaʼ tok ri vinakiʼ yixquiyokʼolaʼ y yixcokotalaʼ y riqʼuin kʼoloj xtiquibilaʼ ronojel ruvech etzelal chivij rix voma yin.

12 Roma can xtivil vi cʼa nimalej quicoten, can janíla vi xquixquicot, y can nim vi ri ichʼacoj chilaʼ chicaj, roma can ja vi okotanic laʼ ri xbanatej chique ri e yaʼol lokʼolej rutzijol ri xekʼax nabey chivech rix.

13 Can kitzij, y kitzij ninbij chive, chi ja chive rix nuyaʼon vi kʼij richin yixoc achiʼel ri atzʼan richin ri ruvachʼulef. Jacʼa vi ri atzʼan xtiqʼuis ri ratzʼamil, ¿achojiqʼuin cʼa xtatzʼamex vi chic ri ruvachʼulef? Ja cʼariʼ tok ri atzʼan manek chic nicʼatzin, y xaxe chic richin nitorix el y xtipalibelox cʼa coma ri vinakiʼ.

14 Can kitzij, y kitzij ninbij chive chi ninyaʼ kʼij chive richin yixoc rusakil re vinakul reʼ. Jun tinamit ri cʼo pa ruviʼ jun juyuʼ man tiquirel ta revaxic.

15 Que cʼa chukaʼ riʼ, ¿la nitzij ta cami jun kʼakʼ coma ri vinakiʼ richin niquevaj ka chuxeʼ jun etabel? Man que ta riʼ, xa niquiyaʼ pa ruviʼ rucʼojlibel richin queriʼ yerusakirisaj conojel ri e cʼo pa jay.

16 Que cʼa chukaʼ riʼ, tisakirisan cʼa ri isakil rix chiquivech re vinakul reʼ, richin chi tiquitzʼetaʼ cʼa ri utzilej ibanobal, y tiquiyaʼ rukʼij ri Itataʼ ri cʼo chilaʼ chicaj.

17 Man tinojij cʼa chi in petenek richin ninyoj ri pixaʼ o ri e yaʼol lokʼolej rutzijol. Man in petenek ta yin chuyojic, in petenek chubanic chi nikʼajer,

18 Roma can kitzij cʼa ninbij chive, chi manjun ti rucʼaj ni manjun ti chʼap kʼaxinek can chek queriʼ chupan ri pixaʼ, xa viqʼuin yin ronojel xkʼajer.

19 Vacami cʼa, yin xinyaʼ chive ri pixaʼ y chukaʼ ri rupixaʼ ri Nataʼ, richin queriʼ yininimaj, y nitzolin cʼa pe ri icʼuʼx chupan ri imac y yixpe cʼa viquin yin, paxinek cʼa ri ivánima y chʼuchʼuj chic ri ivuxlabal. Vaveʼ cʼa, chivech rix e cʼo vi ri pixaʼ y ri pixaʼ can tzʼaket vi.

20 Roma cʼariʼ, quixámpe cʼa viqʼuin y quixcolotej cʼa. Roma can kitzij vi ninbij chive, chi vi xa man xqueʼitakej ta ri nupixaʼ ri xenyaʼ can chive vacami, xa man xquixtiquir ta xquixoc chupan ri rajavaren ri caj.

21 Rix ivacʼaxan chi ri ojer tak vinakiʼ quibilon reʼ, y chukaʼ tzʼibatajinek can chive rix chi man quixcamisan, y achique ri xticamisan, cʼo pa rukʼaʼ ri rukʼatoj tzij ri Dios.

22 Jacʼa yin ninbij chive chi achique xtoyover chirij jun rachʼalal, reʼ cʼo cʼa pa rukʼaʼ ri rukʼatoj tzij ri Dios. Achique xtubij Raca chire jun rachʼalal, cʼo cʼa chi nrejkalej ri rumac chuvech ri kʼatonic tzij. Ri achique xtibin nacanic chire jun chic, reʼ xa ninakajub ka chupan ri kʼak richin ri xibalbay.

23 Roma cʼariʼ, vi yape viqʼuin yin, o vi navajoʼ yape viqʼuin yin, y nokaʼ chacʼuʼx chi ri avachʼalal man cukul ta rucʼuʼx aviqʼuin,

24 Cabiyin cʼa riqʼuin ri avachʼalal y tacʼutuj cuyubel amac chire. Cʼa cʼariʼ, catámpe cʼa viqʼuin yin riqʼuin ronojel ri tzʼaket rurayibal ri avánima, cʼa cʼariʼ yin xcatincʼul.

25 Tijunumatej cʼa avech junanen riqʼuin ri avetzelanel tok xa cʼa at cʼo na pa bey riqʼuin rija, richin queriʼ man ta cʼa xcaruchop y xcaruyaʼ ta cʼa ka pa cheʼ.

26 Can kitzij, kitzij ninbij chave chi manjun chic banel richin ta xcatel pe chic chiriʼ, xaxe tok atojon chic can, cʼa ri ruqʼuisibel senine. Tok cʼa at tzʼapel na chiriʼ, ¿la yatiquir cami natoj stapeʼ cʼa xa jun oc senine? Can kitzij, kitzij ninbij chave chi mani.

27 Vacami cʼa, ri ojer tak vinakiʼ xquitzʼibaj can chi man quixtzʼiʼin.

28 Jacʼa yin can ninbij vi chive chi achique xaxe nutzuʼ jun ixok y nurayij nimacun riqʼuin, riʼ xa xtzʼiʼin yan pa ránima.

29 Vacami cʼa, ninya can chive jun pixaʼ, chi man tiyaʼ cʼa kʼij richin yeʼoc re naʼoj reʼ pan ivánima.

30 Roma can jebel vi chive rix vi nikʼet iviʼ chupan ronojel reʼ. Queriʼ cʼa xticʼuaj ri paban kʼeban icheʼ, richin man ta cʼa xquixkirirex el pa xibalbay.

31 Quereʼ tzʼiban can chi xabachique ri nuyaʼ can ri rix jayil, tuyaʼ cʼa chire jun ruvujil richin ri jachojriʼil.

32 Can kitzij, kitzij nibij chive chi xabachique ri nuyaʼ can ri rixjayil, vi xa man roma ta ri rutzʼiʼil, xa nuben cʼa chi ri ixok nitzʼiʼin. Cʼariʼ, ri xticʼuleʼ riqʼuin ri ixok ri xa rujachon chic riʼ, rijaʼ nitzʼiʼin chukaʼ.

33 Chukaʼ tzʼiban can chi man tayaʼ ka chave jiquiban tak tzij, xa queʼatakej cʼa ri lokʼolej atzij ayaʼon can riqʼuin ri Ajaf.

34 Can kitzij, kitzij cʼa ninbij chive chi manjun bey tiji quibaʼ ri itzij, ni ta pa ruviʼ ri caj, romariʼ xa can ri nimalej rutzʼuyulibal vi ri Dios.

35 Ni ta chukaʼ pa rubiʼ ri ruvachʼulef, romariʼ xa can ri ruxlanibal vi ri raken rijaʼ.

36 Chukaʼ manjun bey tajiquibaʼ atzij pa rubiʼ ri ajolon, roma can man vi yatiquir ta naben rat jun rusumal aviʼ kʼek o sek.

37 Ja cʼareʼ xtoc ichʼabel: Jaʼ, jaʼ, mani, mani. Roma vi xa nicʼo chic ruviʼ chuvech reʼ, xa riqʼuin ri itzel nel vi pe.

38 Kitzij cʼa chi chukaʼ tzʼiban can, runakʼ vachaj pa ruqʼuexel runakʼ vachaj, chukaʼ eyaj riqʼuin eyaj.

39 Jacʼa yin quereʼ ninbij chive, chi man titoʼ iviʼ chuvech ri itzel niban chive, xa xabachique ri xtupakʼij ri apalej pan avajquikʼaʼ, tayaʼ chic apon ri jucʼan.

40 Achique xtrajoʼ xcarusujuj chuvech ri kʼatoy tzij y xtumej ri atziak, tayaʼ can chukaʼ chire ri akʼubal tziek.

41 Achique nikʼaton chavij chi cabiyin riqʼuin cavinek lajuj raken cʼan, cabiyin jun chic cavinek lajuj raken cʼan riqʼuin.

42 Tayaʼ cʼa chire ri nicʼutun chave, y achique ri xtrajoʼ xtikajon aviqʼuin, man taqʼueqʼuej cʼa chire.

43 Chukaʼ can tzʼiban vi can chi tavajoʼ ri avachʼalal y taxovaj ri avetzelanel.

44 Jacʼa yin quereʼ ninbij chive: Queʼivajoʼ cʼa ri ivetzelanelaʼ. Queʼiturusaj cʼa ri yeʼetzelan ivichin, tibanaʼ utzil chique ri yexovan ivichin, y ticʼutuj utzil pa quiviʼ ri yeyokʼon y yeʼokotan ivichin.

45 Que cʼareʼ, quixoc cʼa ralcʼual ri Itataʼ ri cʼo chilaʼ chicaj, roma rijaʼ can nuben vi chi niyacatej pe ri kʼij pa quiviʼ ri e utz y ri e itzel.

46 Can que vi cʼareʼ, ri e cʼo pe ojer, ri e cʼo chupan ri pixaʼ, ronojel cʼareʼ xekʼajer voma yin.

47 Ronojel cʼa richin ojer xekʼax yan can, y vacami ronojel cʼacʼaʼ.

48 Roma cʼariʼ, ninvajoʼ chi yixoc ta cʼa choj, achiʼel yin, o achiʼel ri Itataʼ ri cʼo chilaʼ chicaj can choj vi.