1 Xcʼulvachitej cʼa chi tok ri Jesús xubij re chʼabel reʼ, jariʼ tok xchʼo quiqʼuin ri rutijoxelaʼ chiquijujunal, y quereʼ cʼa xubij chique: ¿Achique cʼa nicʼatzin chive richin yixintoʼ pe tok in benek chic riqʼuin ri Nataʼ?

2 Belejeʼ chique rijeʼ xechʼo, y quereʼ cʼa xquibij chire: Roj nikarayij chi tok oj qʼues, cʼa tok xtitzʼaket ri kajunaʼ vaveʼ, xtiqʼuis cʼa ri lokʼolej kasamaj achojche oj avoyon vi, y xkojbe cʼa aviqʼuin chaʼnin chupan ri avajavaren.

3 Cʼa cʼariʼ, rijaʼ quereʼ xubij chique: Nim ruva ikʼij rix roma ri irayin viqʼuin. Roma cʼariʼ, tok cʼo chic oxcʼal cablajuj ijunaʼ, can xquixpe vi viqʼuin chupan ri vajavaren. Chiriʼ cʼa, xquixuxlan ka viqʼuin yin.

4 Tok rijaʼ xchʼo yan can quiqʼuin rijeʼ, xerutzuʼ apon ri oxiʼ chic, y quereʼ cʼa xubij chique: ¿Achique cʼa nivajoʼ chi yin ninben pe ivoma rix, tok in benek chic el riqʼuin ri Tataʼixel?

5 Ja cʼariʼ tok xebison pa cánima, roma xquixibij quiʼ y man xetiquir ta xquibij chire rijaʼ ri xquirayij rijeʼ.

6 Jariʼ tok quereʼ xubij rijaʼ chique: Can kitzij vi chi yin vetaman ri inojibal, y rix irayin ri can xurayij cʼa chukaʼ ri Juan viqʼuin yin. Ja ri Juan riʼ, ri nulokʼokʼen, ri cʼo viqʼuin chupan ri lokʼolej nusamaj, tok cʼa manjani quibajix akʼanij coma ri e aj Jadá.

7 Roma cʼariʼ, can janíla vi nim ruva ikʼij rix, roma manjun bey xtixʼovisaj ri camic. Xa xquixcʼaseʼ cʼa richin yeʼitzʼet ronojel ri rubanobal ri Tataʼixel quiqʼuin ri calcʼual ri achiʼaʼ. Queriʼ cʼa ibanon, cʼa tok can ronojel xquekʼajer, achiʼel cʼa nrajoʼ ri Tataʼixel. Ja cʼariʼ tok xquipe cʼa riqʼuin ri nucʼojlemal y riqʼuin ri ruchukʼaʼ ri caj.

8 Manjun bey xticʼovisaj ri rupokonal ri camic. Xa tok xquipe cʼa yin riqʼuin ri nucʼojlemal, jariʼ tok xquixjalatej cʼa pe riqʼuin ri camel, cʼa chupan ri man camel ta chic, achiʼel cʼa rumer ri runakʼ ivech. Ja cʼariʼ tok can xquixturusex vi chupan ri rajavaren ri Tataʼixel.

9 Ninbij cʼa chukaʼ chive chi man xtitij ta manjun kʼaxoʼn tok cʼa ix qʼues na riqʼuin ri ichʼacul. Chukaʼ man xquixbison ta, xaxe cʼa roma ri quimac ri vinakiʼ chuvachʼulef. Ronojel cʼareʼ, xtinyaʼ can chive roma ri irayin pe viqʼuin. Rix irayin cʼa chi yeʼiqʼuen pe viqʼuin ri quicʼaslemal ri vinakiʼ tok cʼa cʼo na re ruvachʼulef.

10 Roma cʼariʼ, can xtitzʼaket vi ri iquicoten, y xquixtzʼuyeʼ cʼa chupan ri rajavaren ri Nataʼ. Kitzij cʼa chi ri iquicoten rix can xtitzʼaket vi, achiʼel cʼa ri tzʼaket nuquicoten ri ruyaʼon pe chuve ri Tataʼixel. Xquixoc cʼa achiʼel yin, y yin xa in junan cʼa achiʼel yin, y yin xa in junan cʼa riqʼuin ri Tataʼixel, y ri Tataʼixel, y yin xa oj junan.

11 Ri Uxlabixel nijiquiban cʼa chirij ri Tataʼixel, y chukaʼ chuvij yin. Ri Tataʼixel, y chukaʼ chuvij yin. Ri Tataʼixel nuyaʼ ri Uxlabixel chique ri calcʼual ri achiʼaʼ xa voma yin.

12 Xcʼulvachitej cʼa chi tok ri Jesús xubij can chique rije re chʼabel reʼ, xeruchop cʼa rijeʼ chiquijujunal riqʼuin ri ruviʼ rukʼaʼ. Xaxe cʼa man xeruchop ta ri oxiʼ ri cʼa xquecʼojeʼ na can. Cʼa cʼariʼ, xel el chiquicojol.

13 Can kitzij vi cʼa chi xejakatej ri caj. Cʼariʼ, ri oxiʼ riʼ xeʼucʼuex akʼanij chicaj, y xequitzʼet y xecacʼaxaj achique ri xa manek banel richin yetzijox.

14 Can chʼaʼoj vi rij richin yequitzijoj ri xequitzʼet y ri xecacʼaxaj. Chukaʼ, xa man xyaʼox ta kʼij chique richin yequitzijoj.

15 Man xquinaʼ ta cʼa vi e cʼo riqʼuin ri quichʼacul, o xa manek. Xquinaʼ cʼa rijeʼ chi xjalatej ri quibaniquil, o chi xjalatej riqʼuin ri quichʼacul richin tiojil, cʼa pa jun baniquil ri man camel ta chic, richin queriʼ xetiquir cʼa xequitzʼet ronojel ri richin ri Dios.

16 Xcʼulvachitej cʼa chi rijeʼ xquiben jun bey chic ri lokʼolej quisamaj chuvachʼulef. Man riqʼuin vi riʼ, man xequitzijoj ta ri xequitzʼet y ri xecacʼaxaj, roma can que vi riʼ ri pixaʼ xyaʼox chique rijeʼ chilaʼ chicaj.

17 Vacami cʼa, yin man vetaman ta vi rijeʼ man chic e camel ta pe chupan ri kʼij tok xjalatej ri quibaniquil, o xa man que ta riʼ.

18 Xaxe oc vetaman achiʼel ri nutzijoj ri retal banobel ri yaʼon can. Xebe cʼa rijeʼ chuvachʼulef, y xquiben lokʼolej samaj pa quiviʼ conojel ri vinakiʼ, y xequiqʼuen pe chupan ri kʼataj e jampeʼ cʼa ri xquinimaj ri xquichʼabalij rijeʼ. Xequikasaj cʼa chuxeʼ yaʼ, y checonojel ri xekasex chuxeʼ yaʼ can xquicʼul vi ri Uxlabixel.

19 Rijeʼ xetzʼapix cʼa can pa cheʼ, coma ri man e cʼo ta chupan ri kʼataj. Ri tak cheʼ riʼ, man xetiquir ta cʼa xequitzʼapij, roma xa xekʼajalan ka pa nicʼaj.

20 Chukaʼ xemukutej ka chuxeʼ ri ulef. Cʼa cʼariʼ, xquisoc cʼa ri ruvachʼulef riqʼuin ri ruchʼabel ri Dios. Riqʼuin cʼariʼ, xetiquir xejachatej pe chic, cʼanej ka chuxeʼ ri ulef, roma ri ruchukʼaʼ rijaʼ. Roma cʼariʼ, manek banel chi ri jul ri xequicʼot ri vinakiʼ xequichop ta can jumul.

21 Oxiʼ mul xeyaʼox can chupan jun porobel y manjun xquicʼulvachij.

22 Chukaʼ xeyaʼox caʼiʼ mul chupan quicʼojlibel cʼuxunelaʼ tak chicopiʼ. Chiriʼ cʼa, rijeʼ, xa xeʼetzan quiqʼuin ri chicopiʼ riʼ, achiʼel nuben jun alcʼual tok netzan riqʼuin jun alaj carneʼl, y can manjun vi xban chique.

23 Xcʼulvachitej cʼa chi queriʼ cʼa xebe chiquicojol ri vinakul Nefiʼiʼ. Xquichʼabalij cʼa ri utzilej rutzijol ri Cristo chique conojel ri vinakiʼ chuvech re ruvachʼulef reʼ. Cʼa cʼariʼ, ri vinakiʼ xetzolin cʼa pe riqʼuin ri Ajaf y xeʼoc chupan ri Rukʼataj ri Cristo. Can que vi cʼariʼ, xeturusex cʼa ri vinakiʼ chupan ri iyaj mamaj ijaʼtzul riʼ, achiʼel cʼa ri chʼabel xubij ri Jesús.

24 Vacami cʼa, yin Mormon, nintanabaʼ ri nutzijonen chiquij re naʼoj reʼ.

25 Can kitzij vi chi xa jubaʼ chic man xentzʼibaj ri quibiʼ ri manjun bey xtiquicʼovisaj ri camic. Xa ja cʼariʼ tok ri Ajaf xirukʼet. Roma cʼariʼ, man yentzʼibaj ta can, roma xa e evan chiquivech ri vinakiʼ chuvachʼulef.

26 Can kitzij vi cʼa chi yin e nutzʼeton chic. Rijeʼ quibanon lokʼolej samaj pa nuviʼ.

27 Kitzij chukaʼ chi rijeʼ xquecʼoje chiquicojol ri Gentiliʼ, y ri Gentiliʼ man xtiquetamaj ta quivech.

28 Chukaʼ xquecʼojeʼ chiquicojol ri e aj Judá, y rijeʼ man xtiquetamaj ta quivech chukaʼ.

29 Xticʼulvachitej cʼa chukaʼ chi rijeʼ xtiquiben lokʼolej samaj pa quiviʼ conojel ri rijaʼtzul ri Israel ri e quiran el. Jariʼ, xa tok ri Ajaf, riqʼuin ri utzilej runojibal, nukʼijuj chi rucʼamon chic chubanic. Chukaʼ xtiquiben lokʼolej samaj pa quiviʼconojel ri tinamit, ri ijaʼtzul, ri chʼabel, y ri vinakul. Xquequiqʼuen cʼa pe riqʼuin ri Jesús e qʼuiy cʼaslemal chiquicojol rijeʼ. Jariʼ, roma ri yukenel ruchukʼaʼ ri Dios ri cʼo quiqʼuin. Riqʼuin cʼariʼ, can xtikʼajer vi ri quirayibal ri oxiʼ tijoxelaʼ riʼ.

30 Rijeʼ e junan cʼa quiqʼuin ri takonaxelaʼ richin ri Dios. Vi niquicʼutuj cʼa akʼanij chire ri Tataʼixel pa rubiʼ ri Jesús, can yetiquir vi niquicʼut quiʼ chuvech xabachique achin ri nicajoʼ rijeʼ.

31 Roma cʼariʼ, xquebanatej nimalej y meyel tak samaj coma rijeʼ. Jariʼ, xa tok cʼa manjani napon ri nimalej kʼij ri petenek tok conojel ri vinakiʼ cʼo chi yecʼojeʼ apon chuvech ri rukʼatbel tzij ri Cristo.

32 Kitzij chukaʼ chi rijeʼ xquequiben nimalej y meyel tak banobel chiquicojol ri Gentiliʼ, tok cʼa manjani napon ri kʼij riʼ richin ri kʼatonic tzij.

33 E cʼo e qʼuiy lokʼolej tzʼibanic ri yequitzijoj ronojel ri nimalej tak banobel richin ri Cristo. Vi ta e cʼo iviqʼuin rix ronojel ri lokʼolej tzʼibanic riʼ xtivetamaj ta chi xquebecʼulvachitej cʼa ronojel reʼ, achiʼel cʼa rubin can ri Cristo.

34 Joʼoc ruvech ri man nunimaj ta ri ruchʼabel ri Jesús, chukaʼ ri quichʼabel ri e ruchaʼon, y ri e rutakon can chiquicojol. Roma ri xa man nucʼul ta ri ruchʼabel ri Jesús, ni ta chukaʼ man yerucʼul ta ri e rutakon pe, man cʼa chukaʼ xtucʼul ta rijaʼ. Roma cʼariʼ, chupan ri ruqʼuisibel kʼij, rijaʼ can man xquerucʼul ta vi rijeʼ.

35 Xa can janíla ta utz chique rijeʼ vi man ta xeʼalex pe. Ri achiʼaʼ e macuvinek chirij ri Dios, achiʼel vi ta niquipalibej rijaʼ. ¿La ninojij cami cʼa chi yixtiquir nivelesaj el ri kʼatoj tzij richin ri Dios, richin queriʼ cʼa nipe na ta ri colotajic?

36 Vaveʼ cʼa, xichʼo jubaʼ chiquij ri xeruchaʼ can ri Ajaf. Jaʼ, ri oxiʼ ri xeʼucʼuex chilaʼ chicaj. Xinbij cʼa chi man vetaman ta vi rijeʼ xejalatej el chuvech ri camel, cʼa chupan ri man camel ta.

37 Vaveʼ cʼa, jubaʼ chirij tok xintzʼibaj riʼ, jariʼ tok, xincʼutuj cʼa chire ri Ajaf. Rijaʼ rukʼalajirisan cʼa pe chinuvech chi can cʼo vi chi xjalatej ri quichʼacul, o cʼo ta chi xecom.

38 Roma cʼariʼ, xa can xjalatej vi ri quichʼacul, richin queriʼ man yecom ta, y richin man niquitij ta kʼaxoʼn, y man yebison ta, xaxe cʼa roma ri quimac ri e aj re ruvachʼulef.

39 Re jalatajic reʼ man junan ta cʼa riqʼuin ri jalatajic ri xtibanatej pa ri ruqʼuisibel kʼij. Man riqʼuin vi cʼariʼ, cʼo chi xjalatej ri quibaniquil rijeʼ. Riqʼuin cʼariʼ, ri Satanás man cʼo ta ruchukʼaʼ pa quiviʼ, y man nitiquir ta cʼa yerutejtobej pa ri itzel. Rijeʼ xechʼajchʼojirisex riqʼuin ri quichʼacul, richin queriʼ can e lokʼolej vi. Riqʼuin cʼariʼ, ri ruchukʼaʼ ri ruvachʼulef manek banel richin xeruchop.

40 Can que vi cʼariʼ yecanej can, cʼa chupan ri kʼij richin ri rukʼatonic tzij ri Cristo. Chupan ri kʼij riʼ, xtiquicʼulvachij jun chic jalatajic, janíla nim chuvech ri rubanon can. Cʼa cʼariʼ, xquecʼul cʼa chupan ri rajavaren ri Tataʼixel, man xqueʼel ta chic, xa xquecʼaseʼ cʼa benek ruvech riqʼuin ri Dios chilaʼ chicaj.