1 Jariʼ tok xticʼulvachitej ri tzʼiban can: Cabixan cʼa rat ri man yatalan ta. Ja rat ri man xcʼojeʼ ta aval. Cabixan cʼa y tarakaʼ cʼa achiʼ, rat ri man xatij ta rukʼaxomal ri alanic. Janíla cʼa qʼuiy ri ral ri man xalan ta, chuvech ri ral ri cʼulan ixjayilal, nichaʼ ri Ajaf.

2 Tanimirisaj cʼa ri rucʼojlibal ri amoʼc. Tiyukuʼ cʼa el ri tziakilej cuchbel ri cʼo pa ruchiʼ ri avachoch. Man tayec cʼa can chic. Tanimirisaj cʼa ri raken ri cʼan ri niximon y tachʼiquibaʼ cof ri chapayon tak cheʼel.

3 Rat xtaquiraj cʼa aviʼ pa rajquikʼaʼ y pa rajxocon. Ri avijaʼtzul xtiquichinaj cʼa acuchi e cʼo vi ri Gentiliʼ. Xtiquiben cʼa chi yecʼojeʼ vinakiʼ jun bey chic chupan ri tinamit ri e malin can.

4 Man cʼa taxibij aviʼ. Rat man xcaqʼuix ta. Chukaʼ man cʼa tisach acʼuʼx. Man xticʼojeʼ cʼa ri aqʼuixibal. Rat xtamestaj cʼa ri aqʼuixibal xacʼovisaj chupan ri achʼutinal. Xtamestaj cʼa ri chʼolinic xacʼul chupan ri achʼutinal. Man tokaʼ cʼa chic chacʼuʼx ri chʼolinic xacʼul tok rat at malcaʼn ixok.

5 Ri atzʼucunel rat, ri avachijil, rubiniʼan cʼa ri Ajaf quichin ri E Janíla. Ja rijaʼ ri Lokʼolej Avelesanel y ri Lokʼolaxel richin ri Israel. Xtubiniʼaj cʼa rijaʼ ri ru Dios chijun re ruvachʼulef.

6 Ri Ajaf at royon cʼa achiʼel vi ta noyox vi pe jun ixok malin can, ri nibison ri ruxlabal. Reʼ xa achiʼel vi ta noyox pe chic jun cʼacʼaʼ ixjayilal tok xa xilkʼotin chic can, nichaʼ ri Ajaf.

7 At nuxilkʼotin cʼa can jubaʼ. Man riqʼuin vi riʼ, xa xcatincʼol cʼa pe chic riqʼuin nimlej nujoyovabal.

8 Chupan cʼa ri voyoval, xinvevaj cʼa jubaʼ viʼ chavech rat. Man riqʼuin vi riʼ, xa riqʼuin junelic ajovabel, xtinjoyovaj chic avech, nichaʼ ri Ajaf, ri Lokʼolej Avelesanel.

9 Reʼ junan riqʼuin ri nimalej job chupan ri rukʼij ri Noé. Yin nujiquiban cʼa can chi ri nimalej yaʼ riʼ man xtucuch ta chic ruviʼ re ruvachʼulef. Can que vi cʼareʼ nujiquiban pe chukaʼ, chi man xtipe ta chic ri voyoval chavij.

10 Ri tzuputzuc tak juyuʼ xqueʼel el. Ri loman tak juyuʼ xqueʼelesex cʼa el chukaʼ. Man riqʼuin vi riʼ, ri vajovabal yin man xtel ta chic el aviqʼuin. Chukaʼ ri cʼulanen tzij ri nubanon can quiqʼuin ri nuvinak, man xtelesex ta cʼa el. Queriʼ cʼa nubij ri Ajaf ri nujoyovaj avech.

11 Pokon cʼa acʼuʼx rat. Rat at pojin roma ri cakʼikʼ job y man at bochiʼin ta. Can kitzij vi cʼa, xtinnucʼ ri abej pan abey riqʼuin jebelilej kʼolinbel. Xtinnucʼ cʼa ri apalibel riqʼuin jebel tak rex abej.

12 Ri mayjabel tak jay pa ruviʼ atzʼak xquenben riqʼuin covilej tak quiek abej. Ri ruchiʼ atzʼak xtinben riqʼuin jun chic ruvech covilej quiek abej. Chukaʼ xtinben ri acʼulbaʼt riqʼuin jebelilej tak abej.

13 Checonojel cʼa ri aval xquetijox roma ri Ajaf. Nim xtuben ri uxlanibel cʼuʼx quichin ri aval.

14 Xcapabex cʼa pa chojmilal. Cʼanej xcacʼojeʼ vi riqʼuin ri kasanibel kʼij, roma man xtaxibij ta chic aviʼ. Xcacʼojeʼ cʼanej chukaʼ riqʼuin ri xinbinriʼil, roma ri riʼ xa man xtijel ta apon aviqʼuin.

15 Kitzij cʼa chi xtiquimol cʼa quiʼ chavij. Man riqʼuin vi riʼ, xa man viqʼuin ta cʼa yin e elenek vi pe. Xabachique cʼa ri niquimol quiʼ chavij rat, xa xquetzak cʼa avoma.

16 Can kitzij vi chi yin in tzʼucuyon ri banoy samajibel. Ja rijaʼ ri nixupun richin ri kʼakʼ y ri nibanon chire ri samajibel chi cʼo ricʼaʼtz. Yin nutzʼucun cʼa chukaʼ ri turunel richin chi niturun.

17 Manjun rusamajibel ri oyoval xtiban chavij xcaruchʼec ta. Rat xqueʼavetzelaj can checonojel rakʼ vinek ri xquetzijon chavij richin yatquixovaj. Ja cʼareʼ ri niquichinaj ri rusamajelaʼ ri Ajaf. Ri quichojmilal rijeʼ xa elenek cʼa el viqʼuin, nichaʼ ri Ajaf.