1 Can kitzij vi cʼa, petenek ri kʼij ri xtibecʼat achiʼel jun porobel. Checonojel cʼa ri niquinimirisaj quiʼ y ri niquiben ri itzel, xqueʼoc achiʼel chakirinek raken aven. Ri kʼij ri petenek xqueruporoj cʼa rijeʼ, nichaʼ ri Ajaf quichin ri E Janíla. Man xtiyaʼox ta can manjun quixeʼ, ni manjun quikʼaʼ.

2 Man riqʼuin vi riʼ, ri Rucʼajol ri Ruchojmilal xtiyacatej cʼa pe riqʼuin akʼomanic chive rix ri nixibij iviʼ chuvech ri nubiʼ. Cʼa cʼariʼ, xquixbe cʼa y xquixqʼuiyer, achiʼel jun ti alaj váquix pa jun xoral.

3 Xqueʼipalibej cʼa ka ri e itzel. Rijeʼ xa xqueʼoc chaj chuxeʼ ri ivaken, chupan ri kʼij tok xtinben ronojel reʼ, nichaʼ ri Ajaf quichin ri E Janíla.

4 Man cʼa timestaj ri rupixaʼ ri Moisés, ri nusamajel, riqʼuin ronojel ri rupixabanic y rukʼatoj tzij ri xinyaʼ chire rijaʼ chupan Oreb, roma chijun ri Israel.

5 Kitzij chi xtintek cʼa iviqʼuin rix ri Elías ri yaʼol lokʼolej rutzijol, tok cʼa manjani nokaʼ ri nimalej y cʼayevilej kʼij richin ri Ajaf.

6 Rijaʼ xtutzolij ri quicʼuʼx ri teʼej tataʼaj, cʼa quiqʼuin ri alcʼualaʼ. Chukaʼ xtutzolij ri quicʼuʼx ri alcʼualaʼ quiqʼuin ri teʼej tataʼaj, richin queriʼ man ta cʼa xtinsoc re ruvachʼulef riqʼuin jun etzelanic.