1 Xcʼulvachitej cʼa chi tok ri Jesús xtaneʼ ka chire ri rutzij, xerutzuʼ apon ri nimalej molaj vinakiʼ. Quereʼ cʼa xubij chique: Vacami cʼa, xivacʼaxaj ronojel ri nutijonic xinben tok cʼa manjani quijoteʼ riqʼuin ri Nataʼ. Roma cʼariʼ, achique cʼa ri xtokaʼ chucʼuʼx re nuchʼabel yin, y xtutakej, jareʼ cʼa xtinnimirisaj chupan ri ruqʼuisibel kʼij.

2 Xcʼulvachitej cʼa chi tok ri Jesús xubij re chʼabel reʼ, xunabej chi e cʼo jujun chiquicojol rijeʼ niquimey y niquicʼutulaʼ cʼa chiquivech rijeʼ ri achique xtuben rijaʼ chire ri rupixaʼ ri Moisés. Xquiben queriʼ roma man xkʼax ta chiquivech ri chʼabel ri nubij chi ronojel richin ojer e kʼaxinek chic y ronojel xeʼoc cʼacʼaʼ.

3 Rijaʼ quereʼ cʼa xubij chique: Man timey re xinbij chive chi ronojel richin ojer e kʼaxinek chic y ronojel xeʼoc cʼacʼaʼ.

4 Vacami cʼa ninbij chive chi ri pixaʼ ri xyatej chire ri Moisés can xkʼajer vi.

5 Vacami cʼa, xa can ja vi yin xiyaʼon pe ri pixaʼ y ja chukaʼ yin ri xibanon ri cʼulanen tzij quiqʼuin ri nuvinak quibiniʼan Israel. Roma cʼariʼ, ri pixaʼ xkʼajer viqʼuin yin, roma yin xipe cʼa richin ninben chi xkʼajer ri pixaʼ y romariʼ, vacami xtaneʼ cʼa can chiriʼ.

6 Kitzij cʼa, chi yin man in petenek ta richin ninyoj ri quibin can ri e yaʼol lokʼolej rutzijol. Roma can jampeʼ vi cʼa ri man xekʼajer ta viqʼuin yin can kitzij ninbij chive chi cʼo chi xquekʼajer na.

7 Tok xinbij chive chi ronojel ri richin ojer xekʼax can, yin xa man ninvulaj ta ri bitajinek can chirij ri cʼa cʼo na chi yebecʼulvachitej.

8 Vacami cʼa, manjani tikʼajer ri cʼulanen tzij nubanon can chique ri nuvinak. Jacʼa ri pixaʼ ri xyatej chire ri Moisés, jariʼ xtaneʼ can viqʼuin yin.

9 Can kitzij vi cʼa chi xa ja yin ri in pixaʼ y ri sakil. Quinitzuʼ cʼa pe y ticochʼoʼ, cʼa pa ruqʼuisibel kʼij, richin queriʼ yixcʼaseʼ. Roma can achique vi ri xticochʼon, cʼa pa ruqʼuisibel kʼij, xtinyaʼ cʼa chire ri cʼaslen richin jumul.

10 Vacami cʼa, nuyaʼon chic pe chive ri pixaʼ. Queʼitakej cʼa ri nupixaʼ. Jareʼ cʼa ri pixaʼ y chukaʼ ri quibin can ri e yaʼol lokʼolej rutzijol, roma rijeʼ can xejiquiban vi chuvij yin.

11 Xcʼulvachitej cʼa chi tok ri Jesús xubij ka re chʼabel reʼ, quereʼ xubij chique ri e cablajuj ri e ruchaʼon can:

12 Ja rix ix nutijoxelaʼ. Rix ix jun sakil richin re vinakul reʼ, y re vinakul reʼ xa can rutzʼakat vi ri rujayul ri José.

13 Vaveʼ cʼa, ja re ruvachʼulef reʼ ri ivichinan can rix, y ri Tataʼixel ruyaʼon can chive.

14 Manjun bey in rutakon ta cʼa ri Tataʼixel richin ta ninkʼalajirisaj reʼ chiquivech ri ivachʼalal chiriʼ pa Jerusalem.

15 Chukaʼ manjun bey in rutakon ta ri Tataʼixel richin ta yitzijon chique rijeʼ chiquij ri chʼakaʼ chic rijaʼtzul ri rujayul ri Israel, ri e rucʼuan el nej ri Tataʼixel.

16 Jareʼ ri xirutek ri Tataʼixel richin ninbij chique:

17 E cʼo chukaʼ chʼakaʼ chic nucarneʼl ri man e aj re kʼataj ta reʼ. Cʼa cʼo chukaʼ chi yebencʼamaʼ pe rijeʼ. Riqʼuin cʼariʼ xticacʼaxaj cʼa ri nuchʼabel, y xa xticʼojeʼ cʼa xaxe jun kʼataj y xaxe jun yukʼunel.

18 Y roma cʼa man xcajoʼ ta, ni man xquinimaj ta, xa man xkʼax ta cʼa chiquivech rijeʼ ri nuchʼabel. Xa romariʼ, ri Tataʼixel xubij chuve chi manjun chic tinbij chique chirij re naʼoj reʼ.

19 Man riqʼuin vi riʼ, kitzij ninbij chive chi ja ri Tataʼixel biyon pe chuve. Roma cʼariʼ tok ninbij chive chi rix xixchʼar el quiqʼuin rijeʼ xa roma ri quetzelal. Roma cʼariʼ tok rijeʼ manjun quetaman chivij rix xa roma cʼa ri quetzelal.

20 Can kitzij vi ninbij cʼa chukaʼ chive, chi ri Tataʼixel e relesan el quiqʼuin rijeʼ ri chʼakaʼ chic ijaʼtzul. Rijeʼ xa man quetaman ta chukaʼ chiquij ri ijaʼtzul riʼ, xa roma cʼa ri quetzelal.

21 Kitzij ninbij chive chi ja rix riʼ achojchij xinbij vi can quereʼ: E cʼo chukaʼ chʼakaʼ chic nucarneʼl ri man e aj re kʼataj ta reʼ. Cʼa cʼo chuka, chi yebencʼamaʼ pe rijeʼ. Riqʼuin cʼariʼ xticacʼaxaj cʼa ri nuchʼabel, y xa xticʼojeʼ cʼa xaxe jun kʼataj y xaxe jun yukʼunel.

22 Riʼ xa man xkʼax ta cʼa chiquivech rijeʼ, roma rijeʼ xquinojij chi xichʼo cʼa chiquij ri Gentiliʼ. Man xkʼax ta cʼa chiquivech chi xa roma cʼa ri quichʼabalinic rijeʼ tok xtiquipachkʼomij cʼa pe quiʼ ri Gentiliʼ.

23 Xa man xkʼax ta chiquivech tok xinbij chique chi ja ri chʼakaʼ chic carneʼl, jeriʼ ri xqueʼacʼaxan cʼa ri nuchʼabel. Chukaʼ man xkʼax ta chiquivech chi ri Gentiliʼ manjun bey xticacʼaxaj ri nuchʼabel, o chi man xtincʼut ta viʼ chiquivech rijeʼ, xaxe vi roma ri Uxlabixel.

24 Vacami cʼa, kitzij chi ivacʼaxan chic ri nuchʼabel y chukaʼ in itzʼeton chic y rix ix nucarneʼl, y natan ri ibiʼ chiquicojol ri e ruyaʼon ri Tataʼixel chuve.