1 Xcʼulvachitej cʼa chi rijaʼ xubij chique ri nimalej molaj vinakiʼ chi tiquitanabaʼ cʼa ri lokʼolej quichʼoven. Que cʼa chukaʼ riʼ xubij cʼa chique ri rutijoxelaʼ. Chukaʼ xubij chique chi xa man tiquitanabaʼ ri lokʼolej quichʼoven pa cánima.

2 Cʼa cʼariʼ, rijaʼ xubij chique chi queyacatej y quepaʼeʼ. Que cʼariʼ, can xeyacatej vi y xepaʼeʼ chiriʼ.

3 Xcʼulvachitej cʼa chi rijaʼ xuper ri caxlan vey jun bey chic y xuturusaj. Cʼariʼ xuyaʼ chique ri rutijoxelaʼ richin xquitij.

4 Tok rijeʼ quitijon chic, rijaʼ xerutek richin tiquiperaʼ cʼa ri caxlan vey, y tiquiyaʼ cʼa chique ri nimalej molaj vinakiʼ.

5 Cʼa cʼariʼ, tok rijeʼ quiyaʼon chic chique ri nimalej molaj vinakiʼ, rijaʼ xuyaʼ chukaʼ chique ri ruyaʼal ruvech utzilej kʼayis richin xquikum. Cʼariʼ, xubij chique chi tiquiyaʼ cʼa chique ri nimalej molaj vinakiʼ.

6 Manjun cʼa caxlan vey ni ruyaʼal ruvech utzilej kʼayis xeʼucʼuex ta el chiriʼ coma ri tijoxelaʼ, ni ta chukaʼ coma ri nimalej molaj vinakiʼ.

7 Man riqʼuin vi riʼ, rijaʼ can kitzij vi chi xuyaʼ caxlan vey chique richin xquitij, chukaʼ ruyaʼal ruvech utzilej kʼayis richin xquikum.

8 Chukaʼ quereʼ xubij cʼa chique: Ri nitijon re caxlan vey reʼ, can nutij vi ri nuchʼacul richin ri ránima. Chukaʼ ri nukum re ruyaʼal ruvech utzilej kʼayis reʼ, can nukum vi ri nuquiqʼuel richin ri ránima. Ri ránima manek chic xtinum cʼa ni man chic xtichaker ta ruchiʼ, xa can xtinoj vi.

9 Vacami cʼa, tok checonojel ri nimalej molaj vinakiʼ quitijon y quikumun chic, can xenoj vi riqʼuin ri Uxlabixel. Cʼariʼ, xesiqʼuin cʼa riqʼuin xaxe jun quichʼabel y xquiyaʼ rukʼij ri Jesús ri can xquitzʼet vi y xcacʼaxaj.

10 Xcʼulvachitej cʼa chi tok checonojel rijeʼ quiyaʼon chic rukʼij ri Jesús, rijaʼ quereʼ xubij chique: Vaveʼ cʼa, yin nintakej can ri pixaʼ ri xuyaʼ ri Tataʼixel chuve yin chirij re vinakul reʼ, ri can jun rutzʼakat vi ri rujayul ri Israel.

11 Nokaʼ cʼa chiʼicʼuʼx chi xichʼo iviqʼuin. Xinbij cʼa chive chi xtikʼajer na vi ri chʼabel richin ri Isaías, y can kitzij vi cʼa chi e tzʼiban can y e cʼo chivech rix. Roma cʼariʼ tinicʼoj cʼa rupan ri e tzʼibatajinek can.

12 Can kitzij, kitzij ninbij chive chi tok xtikʼajer ronojel riʼ, ja cʼariʼ tok can xquekʼajer vi ri cʼulanen tzij ri rubanon ri Tataʼixel quiqʼuin ri ruvinak, ri e rujayul ri Israel.

13 Ja cʼariʼ tok ri rutzʼakat ri e quiratajinek el chuvech chijun re ruvachʼulef, xquemolotej pe chic pa relebal kʼij, y rukajibal kʼij, y pa rajxocon, y pa rajquikʼaʼ kʼij. Can xquetijox vi cʼa chirij ri Ajaf qui Dios ri elesayon pe quichin.

14 Chukaʼ ri Tataʼixel can rubin vi chuve chi tinyaʼ re ruvachʼulef reʼ chive rix richin nivichinaj.

15 Ninbij cʼa chi vi ri Gentiliʼ man nitzolin ta pe quicʼuʼxʼ, tok quicʼulun chic ri turusanic ri can xtiquicʼul vi, y tok e quiquiran chic el ri nuvinak,

16 Ja cʼariʼ tok rix, ri ix rutzʼakat ri rujayul ri Jacob, xquixbe cʼa chiquicojol. Xquixcʼojeʼ cʼa pa quinicʼajal rijeʼ ri can e qʼuiy vi. Xquixoc cʼa achiʼel jun coj chiquicojol ri aj qʼuechelaj chicopiʼ, y achiʼel cʼa jun cʼajol coj chiquicojol ri molaj carneʼl. Ri cʼajol coj riʼ vi nibe chiquicojol ri molaj carneʼl, yerupalibej y yeruxil, y manjun nitiquir ta cʼa yerucol ri carneʼl riʼ.

17 Ri akʼaʼ xtiyac chiquij ri yecʼulaʼan avichin y conojel ri yeʼetzelan avichin xquecʼuk el.

18 Xquenmol cʼa ri nuvinak, achiʼel jun achin tok numol ri ruchiʼ ri ruticoʼn chupan ri chʼeybel.

19 Ri Tataʼixel xuben jun cʼulanen tzij iviqʼuin rix ri ix nuvinak. Yin xtinben cʼa chive chi chʼichʼ ri ivucʼaʼ, y ri ivaken xa cʼakoʼj chʼichʼ. Xqueʼicʼajij cʼa e qʼuiy vinakiʼ. Cʼariʼ, xtinyaʼ ri quichʼacoj chire ri Ajaf y xtinyaʼ ri cʼo quiqʼuin rijeʼ chire ri Rajaf chijun re ruvachʼulef. Can kitzij vi cʼa chi ja yin ri yibanon richin.

20 Xticʼulvachitej cʼa, nichaʼ ri Tataʼixel, chi ri rutzaqʼuibal ri nukʼatoj tzij xtijequeʼ ka pa quiviʼ chupan ri kʼij riʼ. Cʼa cʼariʼ, xtikaka ka pa quiviʼ can conojel vi ri tinamit quichin ri Gentiliʼ, nichaʼ ri Tataʼixel, vi xa man nitzolin ta pe quicʼuʼx.

21 Cʼariʼ, xticʼulvachitej chi xquentiquibaʼ ri nuvinak, ri rujayul cʼa ri Israel.

22 Can kitzij vi cʼa chi xquentiquibaʼ ri nuvinak chupan re ruvachʼulef reʼ richin chi nikʼajer ri cʼulanen tzij ri xinben quiqʼuin ri Jacob, ri itataʼ, y ri vaveʼ xtoc cʼa jun Cʼacʼaʼ Jerusalem. Chiriʼ cʼa ri tak ruchukʼaʼ ri caj xquecʼojeʼ pa quinicʼajal re vinakul reʼ. Kitzij cʼa chi ja yin ri xquicʼojeʼ pan inicʼajal.

23 Vaveʼ cʼa, ja yin riʼ achojchij xchʼo vi ri Moisés tok quereʼ xubij: Ri Ajaf i Dios xtuyec pe jun yaʼol lokʼolej rutzijol ivichin rix, chiquicojol ri ivachʼalal, junan viqʼuin yin. Can ja vi cʼa rijaʼ ri xtivacʼaxaj riqʼuin ronojel ri xtubij chive. Cʼariʼ xticʼulvachitej chi conojel ri man xticacʼaxaj ta ri yaʼol lokʼolej rutzijol riʼ, can xquecʼuk vi el chiquicojol ri vinakiʼ riʼ.

24 Can kitzij vi ninbij chive chi conojel ri e yaʼol lokʼolej rutzijol, xtiquiribex pe riqʼuin ri Samuel, y can conojel vi ri quitzekelben pe rijaʼ, jampeʼ ri e chʼovinek cʼa, can quijiquiban vi chuvij yin.

25 Can kitzij vi chi ja rix ri ix calcʼual ri e yaʼol lokʼolej rutzijol, y rix ix aj rujayul ri Israel. Ja rix ix richin ri cʼulanen tzij ri xuben ri Tataʼixel quiqʼuin ri itataʼ ojer. Quereʼ cʼa xubij chire ri Abraham: Riqʼuin cʼa ri avijaʼtzul rat, can conojel vi ri ijaʼtzul chuvech re ruvachʼulef xqueturusex vi.

26 Ri Tataʼixel xiruyec richin yipe iviqʼuin rix nabey, y xirutek pe richin chi yixinturusaj, richin queriʼ chiʼijujunal xtijechʼej cʼa el iviʼ chiquicojol ri imac. Reʼ xbanatej xa roma rix ix ralcʼual ri cʼulanen tzij rubanon can.

27 Que cʼariʼ, tok ix turusan chic, jariʼ tok ri Tataʼixel rubanon chi xkʼajer ri cʼulanen tzij ri xuben riqʼuin ri Abraham tok quereʼ xubij chire: Riqʼuin cʼa ri avijaʼtzul rat, conojel ri ijaʼtzul chuvech re ruvachʼulef xqueturusex vi. Riqʼuin cʼa chukaʼ riʼ, ri Uxlabixel xtikʼejtej pa quiviʼ ri Gentiliʼ voma yin. Roma ri turusanic riʼ pa quiviʼ ri Gentiliʼ, rijeʼ can nicʼo vi ruviʼ xquenimirisex chiquivech conojel chʼakaʼ chic. Riqʼuin cʼariʼ, xquequiquiraj cʼa ri nuvinak, ri e rujayul ri Israel.

28 Rijeʼ xqueʼoc cʼa jun nakonbel quichin ri vinakiʼ chuvech re ruvachʼulef reʼ. Man riqʼuin vi riʼ, vi rijeʼ niquicovirisaj ri cánima chuvij yin, tok quicʼulun chic ri tzʼakatisanic richin ri utzilej nutzijol, jariʼ tok xtintzolij ka chiquij rijeʼ ri itzel quibanobal, nichaʼ ri Tataʼixel.

29 Cʼa cʼariʼ, xtokaʼ cʼa chinucʼuʼx ri cʼulanen tzij ri nubanon quiqʼuin ri nuvinak. Xucʼul ka riʼ ri katzij quiqʼuin rijeʼ, richin xquenmol chic jun bey pa ri kʼij ri ninbij yin, y richin xtinyaʼ chique jun bey chic ri ruvachʼulef quichin can ri ojer catiʼt quimamaʼ, richin chi niquichinaj. Ri ruvachʼulef riʼ can ja vi ri Jerusalem ri sujun can chique rijeʼ benek ruvech, nichaʼ ri Tataʼixel.

30 Xticʼulvachitej cʼa chi xtapon ri kʼij tok ri tzʼakatisanic richin ri utzilej nutzijol xtichʼabalix chique.

31 Cʼa cʼariʼ, rijeʼ can xquinquinimaj cʼa yin, y xtiquinimaj chi can ja vi yin ri Jesucristo, ri Rucʼajol ri Dios, y xquechʼo akʼanij riqʼuin ri Tataʼixel pa nubiʼ yin.

32 Ja cʼariʼ tok ri quichajinelaʼ xtiquiyec ri quichʼabel, y riqʼuin jun chʼabel, xquebixan cʼa rijeʼ, roma can xtiquitzulaʼ cʼa quiʼ chiquivech.

33 Ja cʼariʼ tok ri Tataʼixel xquerumol chic jun bey, y xtuyaʼ ri Jerusalem chique rijeʼ richin niquichinaj ri ruvachʼulef riʼ.

34 Cʼa cʼariʼ, can janíla vi xquequicot rijeʼ. Quixbixan cʼa junan, rix ri ix tolan tak cʼojlibel richin ri Jerusalem, roma ri Tataʼixel e rubochiʼin chic ri ruvinak, y relesan pe chic ri Jerusalem.

35 Ri Tataʼixel ruchʼanaban chijun ri lokʼolej rukʼaʼ chiquivech checonojel tinamit. Chironojel ri ruchiʼ re ruvachʼulef xtiquitzʼet ri colotajic xtuben ri Tataʼixel, y ri Tataʼixel y yin xa oj junan.

36 Cʼa cʼariʼ, xticʼulvachitej achique ri tzʼiban can. Cacʼastej cʼa, cacʼastej jun bey chic, y ticʼojeʼ avuchukʼaʼ, rat Sión. Tavikaʼ cʼa aviʼ riqʼuin ri jebelilej atziak, rat Jerusalem, ri at lokʼolej tinamit, roma vacami manek cʼa chic xqueʼoc ta aviqʼuin ri man e chʼuchʼuj ta ni ta ri e tzʼil.

37 Tatotaj cʼa el ri pokolaj chavij. Cayacatej cʼa, catzʼuyeʼ cʼa rat Jerusalem. Tasoloʼ el ri ruximibal akul, rat ri at rumiʼal ri Sión ri at chapatajinek can.

38 Roma quereʼ cʼa nubij ri Ajaf: Rix icʼayin iviʼ y manek ivajel xicʼul, y can xquixelesex vi pe y xa man roma ta puek.

39 Can kitzij, kitzij ninbij chive chi ri nuvinak xtiquetamaj ri nubiʼ. Kitzij cʼa chi chupan ri kʼij riʼ, can xtiquetamaj vi chi ja yin ri yichʼo pe.

40 Cʼa cʼariʼ, xtiquibij quereʼ: Can jebel vi oc pa ruviʼ ri tak juyuʼ ri raken ri vinek ri nicʼamon pe ri utzilej rutzijol, ri nichʼabalin ri uxlanibel cʼuʼx. Xtuqʼuen pe cʼa chique rijeʼ utzilej rutijol richin ri utz, y xtuchʼabalij ri colotajic, y xtubij quereʼ chire ri Sión: Ri i Dios nukʼet tzij.

41 Cʼa cʼariʼ xtacʼaxatej ri rutzijol quereʼ: Tijechʼej, tijechʼej cʼa iviʼ y quixel pe chiriʼ, y man tichop ri tzʼil. Quixel pe pa runicʼajal. Quixoc chʼajchʼoj rix ri ix cʼuayon quichin ri lokʼolej sispanic richin ri Ajaf.

42 Roma rix xa man xquixel ta el aninek y xa man xquixanimej ta el. Roma xa ja ri Ajaf xtinabiyej chivech y ri Dios richin Israel xquixrutzekelbej el.

43 Can kitzij vi chi ri nusamajel xtisamej riqʼuin utz runojibal. Xtinimirisex cʼa, y xtiyaʼox rukʼij, y xtijotobex.

44 Can e qʼuiy vi xemeyon avichin. Rijaʼ, janíla nicʼo ruviʼ yojotajinek nitzuʼun cʼa chuvech xabachique chic achin, y chukaʼ janíla yojotajinek ri rubaniquil chiquivech ri quicʼajol ri achiʼaʼ.

45 Que cʼa chukaʼ riʼ, rijaʼ xtuquiraj cʼa pa quiviʼ e qʼuiy tinamit. Ri tak rutataʼal ri tinamit xtiquikʼil cʼa quichiʼ, roma can xtiquitzʼet vi ri manjun bey tzijon ta can chique. Chukaʼ xtiquichʼob rij ri manjun bey xcacʼaxaj ta can.

46 Can kitzij kitzij ninbij chive chi can xquecʼulvachitej vi conojel reʼ, achiʼel cʼa rubin can ri Tataʼixel chuve. Cʼa cʼariʼ, cʼo chi xtikʼajer re cʼulanen tzij reʼ ri rubanon ri Tataʼixel quiqʼuin ri ruvinak. Ja cʼari tok xa ja ri nuvinak yin ri xquecʼojeʼ can pa Jerusalem. Can ja vi cʼariʼ ri ruvachʼulef ri xtiquichinaj rijeʼ.