1 Vacami cʼa, can kitzij ninbij chive chi janíla rucʼamon ninicʼoj ronojel reʼ. Kitzij cʼa chi jareʼ jun pixaʼ ninyaʼ chive, tinicʼoj cʼa chi utzil ronojel reʼ. Roma can nim vi ri ruchʼabel ri Isaías.

2 Roma cʼa rijaʼ can xchʼo vi pa ruviʼ ronojel quichin ri nuvinak ri aj rujayul ri Israel. Roma cʼariʼ, cʼatzinel chi rijaʼ xchʼo cʼa chukaʼ quiqʼuin ri Gentiliʼ.

3 Ronojel cʼa ri xubij rijaʼ cʼulvachitajinek chic can, y xticʼulvachitej na apon, can achiʼel vi ri ruchʼabel ri xutzijoj can.

4 Roma cʼariʼ, tiyaʼ cʼa ixiquin che ri nuchʼabel. Queʼitzʼibaj cʼa ri xenbij can chive. Cʼa cʼariʼ, ri chʼabel riʼ xquebe quiquin ri Gentiliʼ xa junan riqʼuin ri nukʼijuj y ri nurayij ri Tataʼixel.

5 Conojel ri nicacʼaxaj cʼa ri nuchʼabel y nitzolin pe quicʼuʼx y yekasex chuxeʼ yaʼ, can xquecolotej vi. Tinicʼoj cʼa ri quibin can ri e yaʼol lokʼolej rutzijol, roma can e cʼo vi qʼuiy ri niquijiquibaʼ ronjel reʼ.

6 Vacami cʼa, tok ri Jesús e rubin chic re chʼabel reʼ, y tok rusolon chic quij ronojel ri lokʼolej tzʼibanic ri cʼo quiqʼuin, jariʼ tok rijaʼ quereʼ xubij chique: Can kitzij nivajoʼ chi nitzʼibaj chʼakaʼ chic lokʼolej tzʼibanic ri manjani titzʼibaj.

7 Xcʼulvachitej cʼa chi quereʼ xubij chire ri Nefi: Tacʼamaʼ cʼa pe ri retal banobel ri itzʼiban rix.

8 Cʼa cʼariʼ, ri Nefi xuqʼuen pe ri retal banobel y xujek chuvech ri Jesús. Jariʼ tok ri Jesús xunicʼoj ruvech y quereʼ xubij:

9 Can kitzij vi ninbij chive chi yin xinbij chire ri nusamajel Samuel, ri aj Lamaniʼ, chi tujiquibaʼ chiquivech re vinakul reʼ chi chupan ri kʼij tok ri Tataʼixel xtuyaʼ rucʼojlemal ri rubiʼ viqʼuin, can jic e cʼo na qʼuiy chojlaxelaʼ ri xquecʼastej cʼa pe chiquicojol ri caminakiʼ. Rijeʼ xtiquicʼut ta quiʼ chiquivech e qʼuiy vinakiʼ y xtiquiben ta lokʼolej samaj pa quiviʼ. Cʼa cʼariʼ, xucʼutuj chique quereʼ: ¿La man que ta cami riʼ xcʼulvachitej can?

10 Cʼariʼ, ri rutijoxelaʼ xechʼo riqʼuin y quereʼ xquibij chire: Jaʼ, Kajaf, ri Samuel xuyaʼ lokʼolej rutzijol achiʼel cʼa ri nabij rat, y can checonojel xekʼajer vi.

11 Cʼariʼ, ri Jesús quereʼ xucʼutuj chique: ¿Achique cami roma tok man itzʼiban ta reʼ, chi e qʼuiy chojlaxelaʼ can xecʼastej vi pe, y xquicʼut quiʼ chiquivech e qʼuiy, y xquiben lokʼolej samaj pa quiviʼ?

12 Xcʼulvachitej cʼa chi xokaʼ cʼa chucʼuʼx ri Nefi chi riʼ xa man tzʼibatajinek ta.

13 Xcʼulvachitej cʼa chi ri Jesús xubij chi titzʼibex cʼa can ri cʼulvachitajic riʼ. Roma cʼariʼ tok can xtzʼibatej vi, achiʼel cʼa xubij can rijaʼ.

14 Xcʼulvachitej cʼa chi tok ri Jesús xusol can quij jumul ri lokʼolej tzʼibanic ri quitzʼiban can, jariʼ tok rijaʼ xubij chi quequitijoj cʼa ri chʼakaʼ chic chire ri xukʼalajirisaj can chiquivech.