1 Xcʼulvachitej cʼa chi tok xtaneʼ chubixic re chʼabel reʼ, ri Jesús xerutzuʼ jun bey chic ri nimalej molaj vinakiʼ, y tok xujek chic ri ruchiʼ, quereʼ xubij chique: Can kitzij, kitzij ninbij chive, chi man tikʼet tzij pa quiviʼ ri chʼakaʼ chic, richin queriʼ man cʼa xtikʼat ta tzij pan iviʼ rix.

2 Roma xa riqʼuin ri kʼatoj tzij achojiqʼuin nikʼet vi tzij rix, can riqʼuin vi riʼ xtikʼat cʼa tzij chukaʼ pan iviʼ rix. Y riqʼuin ri etabel achojiqʼuin yixetan vi, can riqʼuin vi chukaʼ riʼ xquixetabex rix.

3 Chukaʼ, ¿achique cʼa roma tok rat natzuʼ apon ri tzʼil cʼo pa runakʼ ruvech ri avachʼalal, y xa man nanaʼ ta ri qʼuim kʼeʼel pa runakʼ avech rat?

4 ¿La yatiquir ta vacami cʼa nabij chire jun avachʼalal; Tayaʼ kʼij chuve richin ninvelesaj ri tzʼil cʼo pa runakʼ avech, y jacʼa rat xa jun qʼuim cʼo pa runakʼ avech rat?

5 ¡Caʼiʼ apalej! Tavelesaj cʼa el nabey ri qʼuim cʼo pa runakʼ avech rat, richin queriʼ yatzuʼun cʼa jebel, richin xtavelesaj cʼa el ri tzʼil cʼo pa runakʼ ruvech ri avachʼalal.

6 Man tiyaʼ cʼa ri e lokʼolej chique ri tzʼiʼ, ni man queʼiyaʼ cʼa ri abej jotol cajel chique ri ak. Riqʼuin cʼa jubaʼ xa xquequipalibelaʼ can riqʼuin caken, y xquetzolin pe chivij, y xquixquisoc.

7 Ticʼutuj cʼa, y xtiyatej chive. Ticanoj cʼa, y xtivil. Ticʼoscʼa pe cʼa, y xtijak chivech.

8 Xa roma cʼariʼ, achique xticʼutun, xtucʼul. Ri xticanon, xtril. Ri xticʼoscʼa pe, xtijak chuvech.

9 O ¿achique cʼa chiʼicojol rix, vi cʼo ta jun ralcʼual y rijaʼ xtucʼutuj ta cʼa jun rucaxlan vay chire, la xtuyaʼ ta cami jun abej chire?

10 O vi xtucʼutuj ta jun quer chire, ¿la xtuyaʼ ta cʼa cami jun cumetz chire?

11 Rix cʼa xa ix itzel, y vi ivetaman yeʼiyaʼ utzilej tak sipanic chique ri ivalcʼual, ¡can icʼovinek chic cʼa ruviʼ nuben ri Itataʼ ri cʼo chilaʼ chicaj, richin xtuyaʼ ri utz chique ri xquecʼutun chire!

12 Roma cʼariʼ, achique xtivajoʼ rix chi ri vinakiʼ niquiben chive, can que cʼa chukaʼ riʼ tibanaʼ rix quiqʼuin rijeʼ. Roma can ja vi reʼ ri pixaʼ y achique ri quibin can ri e yaʼol lokʼolej rutzijol.

13 Quixoc cʼa apon chupan ri ruchiʼ jay ri ti latzʼ oc. Roma nim ruvech ri ruchiʼ jay y nim ruvech ri bey ri nucʼuan pa sachibel, y can e janíla vi ri veʼocyaj chupan.

14 Roma cʼa xa ti latzʼ oc ri ruchiʼ jay y coʼol oc ruvech ri bey ri nucʼuan pa ri cʼaslen, y xa e jubaʼ oc ri yeʼilon richin.

15 Tinaʼ iviʼ chiquivech ri kʼolonel tak yaʼol lokʼolej rutzijol ri yepe iviqʼuin rix. Rijeʼ quicusan pe rutzʼumal carneʼl, y pa quipan xa e achiʼel cʼuxunel tak utivaʼ.

16 Xa roma cʼa ri quibanobal xtivetamaj quivech. ¿La yechʼup cami ri ruvech utzilej kʼayis pa ruviʼ tak xuluquiej, o ruvech ri víquix pa ruviʼ tak qʼuix?

17 Can que cʼa chukaʼ riʼ, ronojel ri utzilej cheʼ nuyaʼ utzilej ruvech. Jacʼa ri itzel cheʼ nuyaʼ itzel tak ruvech.

18 Ri utzilej cheʼ man xtitiquir ta xtuyaʼ itzel tak ruvech, ni ta cʼa ri itzel cheʼ xtuyaʼ ta utzilej tak ruvech.

19 Chenojel cheʼ ri man nuyaʼ ta utzilej ruvech, nichoy el y nitorix ka pa kʼakʼ.

20 Roma cʼariʼ, xa roma ri quibanobal xtivetamaj quivech.

21 Man checonojel ta ri xtiquibij chuve Ajaf, Ajaf, xqueʼoc ta apon pa rajavaren ri caj. Xa can xaxe vi ri xquebanon ri rurayibal ri Nataʼ ri cʼo chilaʼ chicaj.

22 E janíla xtiquibij chuve chupan ri kʼij riʼ: Ajaf, Ajaf, ¿man cami kayaʼon ta lokʼolej rutzijol pan abiʼ rat, y pan abiʼ rat e kelesan el ri aj tzayiʼ, y pan abiʼ rat e kabanon qʼuiy meyel tak banobel?

23 Ja cʼariʼ tok quereʼ xtinbij chique: Manjun bey xinvetamaj ivech rix. Tijechʼej cʼa el iviʼ viqʼuin, xa ix rusamajelaʼ ri itzel.

24 Roma cʼariʼ, achique cʼa xtacʼaxan ronojel re tzij reʼ ri yenbilaʼ, y xquerubanalaʼ, xtinjunumaj cʼa riqʼuin jun novinek achin ri xupabaʼ ri rachoch pa ruviʼ abej.

25 Xkaka cʼa pe ri job, y can nimajob cʼa xpe, y janíla xjumin ri cakʼikʼ, y xquipojalaʼ cʼa qui riqʼuin ri jay, y man xtzak ta, roma xa tiquil ka pa ruviʼ abej.

26 Checonojel cʼa ri xqueʼacʼaxan ronojel re tzij reʼ ri yenbilaʼ, y man xquequibanalaʼ ta, xquejunumex cʼa riqʼuin jun achin ri man ninojin ta, y rijaʼ xupabaʼ ri rachoch pa ruviʼ sanayiʼ.

27 Xkaka cʼa pe ri job, y can nimajob cʼa xpe, y janíla xjumin ri cakʼikʼ, y xquipojalaʼ cʼa riqʼuin ri jay, y xtzak ca ka ri jay, y can nim vi ri rutzakic xbanatej.