1 Pues gaige gi lain Mosiah na todu taotao ni’ ha husga i lai, pat ayu ni’ manma apunta para hues siha, debi di u ma risibi suetdo konsiste gi tiempo ni’ ma fa’cho’chu’i para u ma husga ayu siha i manma konne’ para u fanma husga.

2 Pues yanggen mandidibi un taotao gi otro, ya ti malago’ ha apasi i ha dibidi, debi di u ma konne’ guatu gi hues; ya i hues ha usa aotoridat, ya ha na’fanmatto ufisiat siha para u ma konne’ i taotao gi me’na-ña; ya u husga i taotao konsiste gi lai yan i ibidensia ni’ malaknos kontra guiya, ya i taotao ma afuetsas para u apasi i dibi-ña, sino u ma na’sahnge ya u ma tungo’ na sakke.

3 Ya i hues ha risibi i apas-ña konsiste gi tiempo-ña — un senine oru para un diha, pat un senum plata, ni’ parehu yan un senine oru; ya este konsiste gi lai ni’ ma na’huyong.

4 Ya este na’an-ñiha i difirentes klasen oron-ñiha, yan i platan-ñiha, konsiste gi balen-ñiha. Ya i na’an-ñiha ginen i Nephites, sa’ ti parehu manmangfong taiguihi i Judios ni’ manggaige Jerusalem; yan ti parehu manmanmidi taiguihi i Judios; lao ma tulaika i mangfong-ñiha yan i miden-ñiha, konsiste gi hinasso yan sikomstansian i taotao, gi kada hinirasion, estaki i gubietnan i hues siha, ni’ manma establisa as rai Mosiah.

5 Pues i tinifong taiguini — un senine oru, un seon oru, un shum oru, yan un limnahn oru.

6 Un senum plata, un amnor plata, un ezrom plata, yan un ontin plata.

7 Un senum plata parehu yan un senine oru, pat para un mididan sibada, yan lokkue’ para mididan todu klasen trigu.

8 Pues i seon oru dos biahi baliña ki nu un senine.

9 Ya un shum oru dos biahi baliña ki nu un seon.

10 Ya un limnahn oru balen todu siha.

11 Ya un amnorn plata meggaiña bali-ña ki nu dos senum.

12 Ya un ezrom plata meggaiña bali-ña ki nu kuattro na senum.

13 Ya un onti meggaiña ki nu todu siha.

14 Pues este bali-ña i mas didide’ siha —

15 I shiblon lamita gi senum; entonses, un shiblon para lamita mididan sibada.

16 Ya i shiblum lamita gi shiblon.

17 Ya un leah lamita gi shiblum.

18 Pues este numiron-ñiha, konsiste gi tinifong-ñiha.

19 Pues un antion oru parehu yan tres na shiblon.

20 Pues, i hangain-ñiha para u fanggai ganansia ha’, sa’ ma risibi i apas-ñiha konsiste gi che’cho’-ñiha, entonses, ma na’fanatborotao i taotao nu todu klasen atborotu yan fina’baba, para u fanggai che’cho’ mas, para u fanggai salappe’ mas konsiste gi kaosa ni’ manma hatsa kontra siha; entonses ma na’fanatborotao i taotao kontra as Alma yan Amulek.

21 Ya este as Zeezrom ha kuestiona si Amulek, ilek-ña: Kao un oppe yu’ tatte yanggen hu faisen hao kuestion siha? Este as Zeezrom meyeng gi fina’cho’cho’ i manganiti, ya siña ha destrosa ayu i maolek; entonses, ilek-ña as Amulek: Kao un oppe i kuestion siha ni’ bai hu faisen hao?

22 Ya ilek-ña si Amulek giya guiya: Hunggan, yanggen konsiste gi Espiriton i Asaina, ni’ gaige giya guahu; sa’ ti bai sangan hafa ni’ ha kontra i Espiriton i Saina. Ya ilek-ña si Zeezrom giya guiya: Atan, estague’ sais na ontin plata, ya todu este bai hu na’i hao yanggen un ñega na guaha Yu’os.

23 Pues ilek-ña si Amulek: O hagu ni’ patgon sasalaguan, hafa na un tenta yu? Kao ti un tungo’ na i manhusto ti u ma entrega siha gi taiguennao na tentasion siha?

24 Kao ti un hongge na guaha Yu’os? Hu sangani hao, Ahe’, un tungo’ ha’ na guaha Yu’os, lao mas ya-mu eyu i salappe’ ki nu guiya.

25 Pues pa’go un dagi yu’ gi me’nan Yu’os. Un sangani yu’ — Atan este i sais na onti siha ni’ dangkolo bali-ña, bai na’i hao — lao gi magahet gaige gi kurason-mu para un go’te; ya ayu ha’ diseha-mu i para bai ñega i magahet yan lala’la’ na Yu’os, para guaha rason-mu para un destrosa yu’. Pues ta’lo atan, sa’ put este na fina’baba siempre gai rigalu hao.

26 Ya si Zeezrom ilek-ña giya guiya: Un sangan na guaha magahet yan lala’la’ na Yu’os?

27 Ya si Amulek ilek-ña: Hunggan, guaha magahet yan lala’la’ na Yu’os.

28 Pues si Zeezrom ilek-ña: Kao mas ki unu na Yu’os?

29 Ya ha oppe, Ahe’.

30 Pues si Zeezrom ilek-ña giya guiya: Taimanu na un tungo’ todu este siha?

31 Ya ilek-ña: Un anghet ha na’tungo’ yu’ este siha.

32 Pues si Zeezrom ilek-ña ta’lo: Hayi este i para u fatto? Kao Lahen Yu’os?

33 Ya ilek-ña giya guiya, Hunggan.

34 Ya si Zeezrom ilek-ña ta’lo: Kao para ha na’libre i taotao nu i isao-ñiha? Ya manoppe si Amulek ya ilek-ña: Hu sangani hao na ahe’, sa’ emposipble para ha ñega i fino’-ña.

35 Pues si Zeezrom ilek-ña gi taotao: Atan ya en hasso este siha; sa’ ilek-ña na un Yu’os ha’ guaha; lao ilek-ña na i Lahen Yu’os para u fatto, lao ti para u satba i taotao — kulan mohon guaha aotoridat-ña para u kumanda si Yu’os.

36 Pues si Amulek ilek-ña ta’lo giya guiya: Atan, sa’ mandagi hao, sa’ ilek-mu na kumuentos yu’ kulan mohon guaha aotoridat-hu para bai kumanda si Yu’os sa’ ilek-ku na ti para u satba i taotao-ña gi isao-ñiha.

37 Ya ilek-ku giya hagu ta’lo na ti siña ha satba siha gi isao-ñiha; sa’ ti siña ha ñega i fino’-ña, ya ilek-ña na taya’ applacha’ siña dumoti i rainon i langet; entonses, taimanu hao ma satba, solu un doti i rainon i langet? Entonses ti siña hao ma satba gi isao-mu.

38 Pues si Zeezrom ilek-ña ta’lo giya guiya: Este i Lahen Yu’os, kao guiya i mas Tai Finakpo’ na Tata?

39 Ya si Amulek ilek-ña giya guiya: Hunggan, guiya i Tai Finakpo’ na Tatan i langet yan i tano’, yan todu i guinahan-ñiha, guiya i tutuhon yan guiya i uttemo, i fine’nana yan i uttemo;

40 Ya siempre matto gi tano’ para u ridima i taotao-ña; ya siempre ha katga i kontradiksion ayu siha i manmanhongge gi na’an-ña; ya siha este i para u fanggai lina’la’ tinaichi, ya i satbasion ti u fatto para otro.

41 Entonses, i mambaba mañaga kulan mohon taya’ gineggue, solu i ma na’kallo i ginedden i finatai; sa’ atan, matto siempre i diha ni’ todu siempre u fangahulo’ ginen i matai ya u fanohge gi me’nan Yu’os, ya u fanma hues konsiste gi che’cho’-ñiha.

42 Pues, guaha finatai ni’ ma agang temporat na finatai; ya i finatai i Kristo siempre ha na’kallo i gedden este na temporat na finatai, ya todu u fanma hatsa ginen este na temporat na finatai.

43 I espiritu yan i tataotao siempre dumaña’ ta’lo gi petfekto na tataotao; i addeng yan i kuyontura siempre ma na’na’lo tatte gi kabales, taimanu ha’ hit pa’go; ya siempre manma konne’ hit para ta fanohge gi me’nan Yu’os, ya ta tungo’ todu taimanu ta tungo’ pa’go, ya ta hasso todu i isao-ta.

44 Pues, este na restorasion siempre matto gi amko’ yan hoben, kaotibu yan libre, lahi yan palao’an, i mala yan i husto; ya tanto ni un gapot ulu gi ilon-ñiha u ma na’suha; lao todu siempre u ma atmayi tatte gi petfekto na tataotao, taimanu ha’ pa’go, ya u fanma konne’ gi me’nan i Kristo, yan si Yu’os i Tata, yan i Espiritu Santo, ni’ un Tai Finakpo’ na Yu’os, para u fanma hues konsiste gi che’cho’-ñiha, maseha manmaolek pat mambaba.

45 Pa’go, atan, hu kuentusi hamyo put i finatai i mottat na tataotao, yan put i risureksion i mottat na tataotao. Hu sangan giya hamyo na este na mottat na tataotao ma hatsa para inmottat na tataotao, ginen i finatai, tanto i fine’nana finatai esta i lina’la’, ya ti u fanmatai ni ngai’an; i espiriton-ñiha u daña’ yan i tataotao-ñiha, ni ngai’an na u fanma dibidi; ya i kabales na tataotao espiritu’at yan inmottat, ya ni ngai’an na u ma li’e’ na atborotao.

46 Pa’go, anai monhayan si Amulek ha sangan este siha, manmanman i taotao, ya kontodu si Zeezrom ha tutuhon manlaolao. Ya este na makpo’ i fino’ Amulek pat este ha’ i tinige’-hu.