1 Inge Alma, ke el liye tuh kahs lal Amulek ahkmisyellah Zeezrom, tuh el liye lah Amulek el sruokilyac ke kikiacp ac kuhtasrihk lal in kuhnahosuhllah, ac liye lah el muhtwacwacack in rarrar ke kahlwem luhn koluk lal, el ikacslah oacluhl ac muhtwacwacack in sramsram nuh sel, ac in oakiyac kahs lal Amulek, ac in tahfwelah in ahkuhtweyac ma uh, kuh in ikacslah ma sihmlac in tahfwelah ma Amulek el oruh.

2 Inge kahs ma Alma el sruhmuhn nuh sel Zeezrom tuh lohngyuck sin mwet ma tu raunwellah ah; tuh un mwet ah puh, ac el sramsram ke lahlmwetmwet:

3 Inge Zeezrom, nga liye tuh kom eisyucki ke kikiacp ac kuhtasrihk lom, tuh kom tiacna kikiacp nuh sin mwet muhkwena tuhsruhk kom kikiacp nuh sin God; tuh liye, El etuh nuhnak lom nuhkwewa, ac kom liye tuh nuhnak lom ahkkahlwemyeyuck nuh sesr ke Nguhn Lal;

4 Ac kom liye tuh kuht etuh lah plwacn lom an plwacn na kuhtasrihk se, oacna nuh ke kuhtasrihk luhn devil, tuh in kikiacp ac in kiyacpwelah mwet inge tuh kom in kuh in oruh elos in lain kuht, in kasrkuhsrak sesr ac in lihskuhtlac—

5 Inge plwacn se inge ma luhn mwet lokoalok lom, ac el orekmakihn kuh lal keim. Inge nga kena tuh kom in esam lah ma nga fahk nuh sum nga fahk nuh sin mwet nuhkwewa.

6 Ac liye nga fahk nuh suwos kwewa lah pa inge sie mwe sruhf luhn mwet lokoalok, ma el likiyac in sruokyac mwet inge, tuh elan kuh in eiskowoslac in muhta ye kohkoh lal, tuh elan kuh in raunikowoslac ke sein in kapihr lal, tuh elan kuh in kaprikowosi nuh ten nuh ke kuhnahoslah ma pahtpaht, fal nuh ke kuh luhn srohoh lal.

7 Inge ke Alma el sruhmuhn kahs inge, Zeezrom el muhtwacwacack in rarrar na upac, tuh el luhmahack yohk liki na met ah ke kuh luhn God; ac el oacyacpac luhmahack lah Alma ac Amulek etuh kacl, tuh el luhmahack lah elos etuh nuhnak ac plwacn luhn insiacl; tuh kuh uh ituckyang nuh selos tuh elos in kuh in etuh ma inge fal nuh ke nguhn in pahluh.

8 Ac Zeezrom el muhtwacwacack in insacnweacng in kihsen siyuck selos, tuh elan kuh in etuh yohk ke tohkohsrahi luhn God. Ac el fahk nuh sel Alma: Meac kalmeyacn ma se inge suc Amulek el sramsramkihn ke sifilpac moulyak luhn mwet misac, tuh mwet nuhkwewa fah moulyak liki misac, kwewana mwet suwohs ac mwet sesuwohs, ac utucklac in tu ye muhtuhn God in nuhnuhnkweyuck fal nuh ke orekma lalos?

9 Ac inge Alma el muhtwacwacack in ahkuhtweyac ma inge nuh sel, fahk: Ma inge ituckyang nuh sin mwet pucspucs in etuh ke ma lukmac luhn God; ne ohinge ma inge likiyucki ye sap fokoko tuh elos in tiac fahkwelihk muhkwena fal nuh ke ip ke kahs Lal suc El sang nuh sin tuhlihk nuhtin mwet, fal nuh ke lohacng ac oaru elos sang nuh Sel.

10 Ac ke ma inge, el suc fah ahkkwekweye insiacl, mwet sacn pac na ac eis ip srihsrihk ke kahs uh; ac el suc fah tiac ahkkwekweye insiacl, ituckyang nuh sel ip yohk ke kahs uh, ne ke na ituckyang nuh sel in etuh ke ma lukmac luhn God ne ke na el etuh nohfohn ma inge.

11 Ac elos suc fah ahkkwekweye insiaclos, ituckyang nuh selos ip srihsrihk ke kahs uh ne ke na wacngihnlac ma elos etuh ke ma lukmac Lal; ac na elos utucklac srohoh sin devil, ac kolyucklac ke luhngse lal nuh ten nuh ke kuhnausyucklac. Inge pa inge kalmeyacn mwe kapihr luhn hell.

12 Ac Amulek el sramsram kahlwem ke misac, ac in moulyak liki moul suhkawihl se inge nuh ke moul kawihl, ac in utucklac nuh ye nien nuhnuhnkuh luhn God, in nuhnuhnkweyuck fal nuh ke orekma lalos.

13 Na insiacsr fin kwekweelihk, ahok, kuht fin ahkkwekweye insiacsr in lain kahs uh, yohkna oruh tiacna sukokyak ma inge yohrohsr, na fah ohiyacsr koluk na pwacye, tuh ke pacl sacn kuht fah nuhnuhnkweyuck.

14 Tuh kahs lasr fah nuhnuhnkwe kuht, ahok, orekma lasr fah nuhnuhnkwe kuht; kuht fah tiac sukokyak in nwacsnwacs; ac nuhnak lasr uh ac fah oacyacpac nuhnuhnkwe kuht; ac ke ohiyac koluk se inge kuht fah tiac kuh in ngwetwack nuh sin God lasr; na kuht ac luhngse liki na fin kuht kuh in sapkihn yot ac finohl uh in puhtatlac nuh facsr in okankuhtlac liki ye Muhtahl.

15 Tuhsruhk ma inge tiacna kuh; kuht enenuh in tuhkuh nuh met ac tu ye Muhtahl ke wolacna Lal, ac ke kuh Lal, ac ke kuhlacna, wal, ac kolyuck Lal, ac akihlen ke mwekihn ma pahtpaht lasr lah nuhnuhnkuh nuhkwewa Lal suwohs; tuh El suwohs ke orekma Lal nuhkwewa, ac tuh El pahkotwen nuh sin tuhlihk nuhtin mwet, ac oasr kuh nuhkwewa Sel in molwelah mwet nuhkwewa suc luhlahlfongi ke Inel ac sang fahko ma fal nuh ke auliyak.

16 Ac inge liye, nga fahk nuh suwos na misac tuhkuh, finne misac ahkluo, suc pa misac in nguhn; na pa sie pacl tuh elos suc misac ke ma koluk lal, oacna nuh ke misac luhn mahno, fah oacyacpac misac ke misac in nguhn; ahok, el fah misac oacna ke ma luhn suwohswohs.

17 Na pacl sacn pa ke kweok lalos fah oacna sie luhluh in e ac sulfur, ma e mayak ne lucng ne tok ma pahtpaht; ac na pa inge pacl ma elos fah kapriyucki nuh ten nuh ke kuhnausyucklac ma pahtpaht, fal nuh ke kuh ac srohoh lal Setuhn, el sruohkohltahluh in oruh fal nuh ke luhngse lal.

18 Na, nga fahk nuh suwos, elos fah oacna in muh wacngihn molwelah oreklac; tuh elos tiacna kuh in moliyucklac fal nuh ke nuhnuhnkuh suwohs luhn God; ac elos tiacna kuh in misac, liye lah wacngihnlac ma koluk.

19 Na tukun ma inge ke Alma el ahksahfye in sruhmuhn kahs inge, mwet ah muhtwacwacack in lut liki na met ah;

20 Tuhsruhk oasr sie Antionah, suc pa mwet kol fuhlwact inmahsrlolos, el tuhkuh nuh met ac fahk nuh sel: Meac ma se kom fahk inge, tuh mwet uh enenuh in moulyak liki misac ac eklac liki ohiyac luhn moul suhkawihl nuh ke moul kawihl, tuh nguhna uh tiac kuh in misac?

21 Meac kalmeyacn ma suhmuhslah, ma fahk lah God El likiyac cherubim ac sie katlas fihrihr ke lacyacn kuhtuhlacp ke imac Eden, fin muh ninac se met kiyacsr ac pahpah se met tuhmwacsr ah ac utyak ac ipeis fukun sahk ke sahk in moul, ac moul ne tok ma pahtpaht? Ac ohinge kuht liye lah wacngihn inkacnek ma elos kuh in moul ne tok ma pahtpaht.

22 Inge Alma el fahk nuh sel: Pa inge ma se suc nga oruh ngan ahkuhtweyac. Inge kuht liye lah Adam el tuh puhtatlac ke el ipeis fukun sahk oal sac, fal nuh ke kahs luhn God; ac ohinge kuht liye, lah ke puhtatlac lal, muhtuhnfacl nuhkwewa eklac sie un mwet tuhlac ac puhtatlac.

23 Ac inge liye, nga fahk nuh suwos lah ac fin ma kuh se nuh sel Adam in ipeis ke fukun sahk ke sahk in moul ke pacl sac, luhkuhn wacngihn misac, ac luhkuhn wacngihn kahs uh, oruh God Elan sie mwet kikiacp, tuh El fahk: Kowos fin mongo pwacyena kowos fah misac.

24 Ac kuht liye lah misac uh tuhkuh nuh fin mwet uh, ahok, misac se ma tuh sruhmuhnyuck sel Amulek, suc pa misac luhn mahno; ne ohinge oasr sie acn ituckyang nuh sin mwet uh tuh elan kuh in auliyak; ke ma inge moul se inge eklac nuh ke sie puhlan pacl in srihkeyuck; sie pacl in ahkolah in ohsun nuh sin God; sie pacl in ahkolah nuh ke ohiyac ma wacngihn sahflahiyac ma tuh sruhmuhnyuck sesr, suc pa ke tukun sifilpac moulyak luhn mwet misac.

25 Inge, fuhnuh tiac ma ke plwacn in molwelah, ma tuh akwucki e ke pwelucng luhn facluh, luhkuhn wacngihn sifilpac moulyak luhn mwet misac; tuhsruhk oasr sie plwacn in molwelah akwucki, suc fah ahkfahsrye sifilpac moulyak luhn mwet misac, ke ma suc sramsramkihnyuck ah.

26 Ac inge liye, fin ma kuh se tuh ninac se met kiyacsr ac pahpah se met tuhmwacsr kuh in som ac ipeis ke sahk in moul elos fuhnuh suhpwacr ne tok ma pahtpaht, wacngihn acn in ahkolah; ac ohinge plwacn in molwelah uh luhkuhn foslac, ac kahs luhn God luhkuhn wacngihn, ac wacngihn usrwac.

27 Tuhsruhk liye, tiacna ohinge; tuhsruhk tuh ituckyang nuh sin mwet uh tuh elos enenuh in misac; ac tukun misac, elos enenuh in tuhkuh nuh ke nuhnuhnkuh, finne nuhnuhnkuh se pac na ma kuht sramsramkihn ah, suc pa sahflahiyac.

28 Ac tukun God El srihsrngiyac tuh ma inge enenuh in tuhkuh nuh yurun mwet uh, liye, na El liye tuh ma inge fal tuh mwet uh enenuh in etuh ke ma suc El sang nuh faclos;

29 Ke ma inge El suhpwacma lipufacn in sramsram nuh selos, suc oruh mwet uh in liye wolacna Lal.

30 Ac elos muhtwacwacack e ke pacl sac me in pahngon Inel; ke ma inge God El sramsram nuh sin mwet uh, ac oruh in etweyuck nuh selos ke plwacn in molwelah, ma tuh ahkoeyucklac e ke pwelucng luhn facluh; ac ma se inge El oruh in etweyuck nuh selos fal nuh ke luhlahlfongi ac auliyak lalos ac orekma muhtahl lalos.

31 Ohinge, El sang masap nuh sin mwet uh, elos tahfonglac met ke masap se met oacna nuh ke ma luhn facluh, ac eklac oacna god uh, etuh ma wo liki ma koluk, likiltahluh sifacna ke sie ohiyac in mukwikwi, kuh fihliyucki ke sie ohiyac in mukwikwi fal nuh ke kena ac pwacr lalos, lah in oruh ma koluk kuh in oruh ma wo—

32 Ke ma inge God El sang nuh selos masap, tukun El oruh in etweyuck nuh selos ke plwacn in molwelah, tuh elos enenuh in tiac oruh ma koluk, mwacta ke ma inge pa misac ahkluo, suc pa misac ma pahtpaht in oacna nuh ke ma luhn suwohswohs; tuh ke ma inge wacngihn kuh luhn plwacn in molwelah, tuh orekma luhn nuhnuhnkuh suwohs tiacna kuh in kuhnausyucklac, fal nuh ke wolacna yohk luhn God.

33 Tuhsruhk God El pahngon mwet uh, ke inen Wen nahtuhl, (pa inge plwacn in molwelah ma tuh akwucki) fahk: Kowos fin auliyak, ac tiac ahkkwekweye insiowos, na fah Nga pahkotwen nuh suwos, kacn Wen Kuloh Sefanna nuhtihk;

34 Ke ma inge, el suc auliyak, ac tiac ahkkwekweyelah insiacl, el fah eis pahkotwen kacn Wen Kuloh Sefanna nuhtihk, nuh ke iyucklac luhn ma koluk lal; ac elos inge fah utyak nuh in nien monglac Luhk.

35 Ac el suc fah ahkkwekweye insiacl ac fah oruh ma koluk, liye, Nga fuhlahk ke kasrkuhsrak Luhk lah el fah tiacna utyak nuh in nien monglac Luhk.

36 Ac inge, mwet wiyuck, liye nga fahk nuh suwos, lah kowos fin ahkkwekweye insiowos kowos fah tiac utyak nuh in nien monglac luhn Leum; ke ma inge ma koluk lowos mokluhlwack tuh Elan suhpwacma nuh ten kasrkuhsrak Lal nuh fowos oacna ke mokleyuck se emet ah, ahok, fal nuh ke kahs Lal ke mokleyuck sahflah sac ac oacyacpac ma se emet ah, nuh ke kuhnahoslah ma pahtpaht luhn nguhnuwos; ke ma inge, in fal nuh ke kahs Lal, ne ke misac sahflah uh, ac oacyacpac misac se emet ah.

37 Ac inge, mwet wiyuck, liye tuh kuht etuh ma inge, ac ma inge pwacye, lwelah kuht in auliyak, ac tiac ahkkwekweye insiacsr, tuh kuht in tiac mokle Leum God lasr in isyac kasrkuhsrak Lal nuh facsr ke masap ahkluo Lal inge suc El use nuh sesr; tuhsruhk lwelah kuht in ilyak nuh in nien monglac luhn God, ma ahkoeyucklac fal nuh ke kahs Lal.