1 Ac tukun ma inge ke muhtwacwacackiyacn yac ahklimekohsr ke kolyuck lalos muhtwacwacack in oasr fohs inmahsrlon mwet ah; tuh sie mwet, suc pahngpahng Amlici, el sie mwet na kuhtasrihk, ahok, sie mwet lahlmwetmwet oacna lahlmwetmwet luhn facluh, el ukwe ohiyac luhn el suc unilyac Gideon ke katlas, suc acnwucki fal nuh ke masap—

2 Inge Amlici se inge, ke kuhtasrihk lal, el pwacnlah mwet pucspucs in ukwacl; finne arulacna puhs tuh elos muhtwacwacack in arulacna fokoko; ac elos muhtwacwacack in srihke in oraclah Amlici elan sie tohkohsrah luhn mwet ah.

3 Inge ma se inge mwe ahklut se nuh sin mwet ke alu uh, ac oacyacpac nuh selos nuhkwewa suc tiacna kolyucklac tukun pwacpa lal Amlici; tuh elos etuh lah in fal nuh ke masap lalos lah ma inge enenuh in akwucki ke puhsren mwet ah.

4 Ke ma inge, fin ac kuh tuh Amlici el sruokyac puhsren mwet ah, el, sie mwet na koluk, ac eislah luhkwelos pwacye ac mwe insewowo lalos ke alu uh; tuh finsrak se lal in kuhnahoslah alu luhn God.

5 Ac tukun ma inge mwet ah toweni nuh sie fin acn ah nohfohn, mwet nuhkwewa fal nuh ke nuhnak lal, yac in weluhl kuh lainuhl Amlici, ke kain in u, oasr lokoalok yohk ac fohs upac sin sie sin sie.

6 Ac ohinge elos tuh toweni nuh sie in srakwack puhsrwaclos ke ma inge; ac ma fihliyucki ye muhtuhn mwet nuhnuhnkuh.

7 Ac tukun ma inge ke puhsren mwet uh tuhkuh in lainuhl Amlici, tuh el tiacna oreklac in tohkohsrah luhn mwet ah.

8 Inge ma se inge tuh oruh yohk engan ke insiaclos suc lainuhl; tuhsruhk Amlici el puhrakuhlosyak suc weluhl lac in kasrkuhsrak selos suc tiac weluhl lac.

9 Ac tukun ma inge ke elos toweni nuh sie, elos tuh akmuhsraellah Amlici in tohkohsrah lalos.

10 Inge ke Amlici el oreklac tohkohsrah lalos el sapkihn nuh selos tuh elos in eis mwe mweun lain mwet wiyaclos; ac ma inge el oruh tuh elan kuh in oruh elos in muhta ye kohkoh lal.

11 Inge mwet lal Amlici etweyuck ke inel Amlici, elos pahngpahng mwet Amlici; ac mwet sahyac ah pahngpahng mwet Nephi, kuh mwet luhn God.

12 Ke ma inge mwet luhn mwet Nephi ah etuh pwacpa luhn mwet Amlici, ac ke ma inge elos tuh ahkolah in ohsun nuh selos; ahok, elos sifacna sruhkwack mwe mweun ke katlas, ac ke mitmit kuhruh, ac ke mwe pihsr, ac ke suhkan pihsr, ac ke yot, ac ke foht, ac ke ohiyacn mwe mweun nuhkwewa, ke kain nuhkwewa.

13 Ac ohinge elos ahkolah in ohsun nuh sin mwet Amlici ke pacl se elos ac tuhkuh. Ac oasr kacptin srihsrngiyucki, ac kacptin fuhlwact kuhtuh, ac kacptin kol, in fal nuh ke pihsaclos.

14 Ac tukun ma inge Amlici el sang kuhfwen mwe mweun nuh sin mwet lal ke ohiyacn kuhfwen mwe mweun nuhkwewa ke kain nuhkwewa; ac el oacyacpac srihsrngiyac mwet in us sifac ac mwet kol luhn mwet inge, in kohlohlos nuh ke mweun in lain mwet wiyaclos.

15 Ac tukun ma inge ke mwet Amlici elos tuhkuh nuh fin inging Amnihu, ma oan nuh kuhtuhlacp ke infacl Sidon, ma oan sisken acn Zarahemla, ac elos muhtwacwacack in mweun we nuh sin mwet Nephi.

16 Inge Alma, suc pa mwet nuhnuhnkuh fuhlwact ac kafuhnah luhn mwet lal Nephi, ke ma inge el som wi mwet lal, ahok, wi kacptin lal, ac sifen kacptin, ahok, el us sifac ke un mwet mweun lal, in lain mwet Amlici in mweun.

17 Ac elos muhtwacwacack in uniyac mwet Amlici fin inging ma oan kuhtuhlacp nuh Sidon. Ac mwet Amlici elos tuh lain mwet Nephi ke kuh yohk, yohkna oruh puhs sin mwet Nephi ah puhtatlac misac ye muhtuhn mwet Amlici.

18 Ne ohinge Leum El ahkfokokoyelah poun mwet Nephi, tuh elos uniyac mwet Amlici ke acnwuck na upac, tuh elos muhtwacwacack in kahing luhkwelos.

19 Ac tukun ma inge mwet Nephi elos tuh ukwe mwet Amlici ke lwen na fohn sac, ac tuh uniltahluh ke acnwuck na yohk, yohkna oruh uniyucki mwet Amlici sun mwet singucul luo tausin luhmfoko tolngoul ac luo; ac uniyucki mwet ohnkohsr tausin luhmfoko onngoul ac luo sin mwet Nephi.

20 Ac tukun ma inge ke Alma el tilac kuh in ukwe mwet Amlici el oruh tuh mwet lal in tulohkohnwack lohm nuknuk selos ke infahlfahl Gideon, infahlfahl se inge pahngpahng tukun Gideon suc tuh uniyucki ke pahol Nehor ke katlas; ac ke infahlfahl se inge mwet Nephi tuh tulohkohnwack lohm nuknuk selos ke fong ah.

21 Ac Alma el suhpwaclah mwet kalngeyuck in ukwe mwet luhlah sin mwet Amlici, tuh elan kuh in etuh ke plwacn lalos ac pwacpa lalos, tuh elan kuh in liyaclwacng sifacna in lainuhlos, tuh elan kuh in karihngihn mwet lal in tiac kuhnausyucklac.

22 Inge elos suc el suhpwaclah in tuni acn in monglac luhn mwet Amlici ah elos pahngpahng Zeram, ac Amnor, ac Manti, ac Limher; elos inge pa elos suc som wi mwet lalos in tuni acn in monglac luhn mwet Amlici.

23 Ac tukun ma inge ke lwen litu elos arulacna silahklahk fohlohk nuh ke acn in monglac luhn mwet Nephi, elos arulacna lut, ac arulacna sahngweng yohk, fahk:

24 Liye, kuht ukwaclah nuh ke acn in monglac luhn mwet Amlici, ac nuh ke lut yohk lasr, fin acn Minon, suc lucng liki acn Zarahemla, nuh ke inkacnek nuh ke acn Nephi, kuht liye un mwet Laman pucspucs; ac liye, mwet Amlici elos weluhlosyang;

25 Ac elos sun mwet wiyacsr ke acn sac; ac elos kahing ye muhtahlos wi un sip nahtuhlos, ac muhtwacn kiyaclos, ac tuhlihk nahtuhlos, nuh ke siti lasr; ac kuht fin tiac silahklahk elos ac sruokyac siti lasr, ac pahpah tuhmwacsr, ac muhtwacn kiyacsr, ac tuhlihk nahtuhsr ac acnwucki.

26 Ac tukun ma inge mwet lal Nephi ah us lohm nuknuk selos, ac som liki infahlfahl Gideon nuh ke siti lalos, suc pa siti Zarahemla.

27 Ac liye, ke elos sahslah ke infacl Sidon, mwet Laman ac mwet Amlici, elos puhs apkuhran, in oacna, puhkpuhk in meoa uh, elos tuhkuh nuh yohrohlos in kuhnaosuhloslac.

28 Ne ohinge, mwet Nephi elos ahkfokokoyeyucklac ke poun Leum, tuh elos pruhe yohk nuh Sel tuh Elan molweloslac liki poun mwet lokoalok lalos, ke ma inge Leum El porongo pruhe lalos, ac ahkfokokoyelos, ac mwet Laman ac mwet Amlici elos puhtatlac misac ye muhtahlos.

29 Ac tukun ma inge Alma el acnwuck nuh sel Amlici ke katlas, aforacni; ac elos acnwuck na upac, sie nuh sin sie.

30 Ac tukun ma inge Alma, el sie mwet luhn God, el suc orekmakihn luhlahlfongi yohk, wowoyak, fahk: O Leum, pahkotwen ac molwelah moul luhk uh, tuh nga in kuh in sie kuhfa nuh in poum in molwelah ac karuhnguhnwacng mwet inge.

31 Inge ke Alma el fahklah kahs inge el sifilpac lainuhl Amlici; ac el fokokoi, yohkna oruh el unilyac Amlici ke katlas.

32 Ac el oacyacpac lain tohkohsrah luhn mwet Laman; tuhsruhk tohkohsrah luhn mwet Laman el kahing fohlohk luhkwel Alma ac suhpwaclah mwet topang lal in lainuhl Alma.

33 Tuhsruhk Alma, wi mwet topang lal, lain mwet topang luhn tohkohsrah luhn mwet Laman ne ke na el uniyac ac ukwaclosyak in fohlohk.

34 Ac ohinge el sackuhnlah infohk ah, kuh sisken infacl ah, ma oan nuh rohtoh ke infacl Sidon, sislah mahnon mwet Laman suc acnwucki oan ke kof Sidon, tuh ohinge in sackuhnlah in oasr acn suc mwet lal in sahslah ac lain mwet Laman ac mwet Amlici ke lacfahl rohtoh ke infacl Sidon.

35 Ac tukun ma inge ke elos nohfohn sahslah ke infacl Sidon mwet Laman ac mwet Amlici elos muhtwacwacack in kahing luhkwelos, finne elos arulacna puhslac tuh elos tiac kuh in oacwaclah.

36 Ac elos kahinglac liki mwet Nephi nuh ke acn mwesis ma oan nuh rohtoh ac acir, ahluhkwelah liki mahsrol luhn acn ah; ac mwet Nephi elos tuh ukwaclos ke kuhiyaclos, ac onweltahluh.

37 Ahok, elos ohsun nuh ke paho nuhkwewa, ac acnwucki ac ukohkyak, ne ke na elos fahsrelihk nuh rohtoh, ac nuh acir, ne ke na elos sun innimac, ma pahngpahng Hermounts; ac ipin acn se inge ke innimac pa nwacnwaclah ke kosro lwemnak ac masrinsrwacl.

38 Ac tukun ma inge mwet pucspucs misac innimac ke kihnet lalos, ac elos mongolac sin kosro koluk ah ac oacyacpac won yen engyeng uh; ac sri kaclos sukokyak, ac tohktohkwack fin facl sac.