1 Ac na tukun ma inge ke muhtwacwacackiyacn yac ahklongoul ac limekohsr ke kolyuck luhn mwet nuhnuhnkuh fin mwet lal Nephi, elos muhtwacwacack in oakiyac mislac inmahsrlon mwet lal Lehi ac mwet lal Morianton ke acn lalos, ac muhtwacwacack yac ahklongoul ac limekohsr ke mislac;

2 Ne ohinge, elos tiacna sruokyac paht mislac fin acn ah, tuh muhtwacwacack in oasr fohs inmahsrlon mwet ah ke srihpacl mwet nuhnuhnkuh fuhlwact Pahoran; tuh liye, oasr sie un mwet suc kena tuh kuhtuh ip ke masap uh in ikihlyucklac.

3 Tuhsruhk liye, Pahoran el tiacna ke kuh tiacna lwelah masap uh in ikihlyucklac; ke ma inge, el tiacna porongo elos suc suhpwaclah puhsrwaclos ke siyuck lalos in ekuhllah masap uh.

4 Ke ma inge, elos suc kena tuh masap uh enenuh in eklac tuh kasrkuhsrak sel, ac kena tuh elan tilac mwet nuhnuhnkuh fuhlwact fin acn ah; ke ma inge oasr sie fohs sikyak ke ma se inge, tuhsruhk tiacna nuh ke ahkmas.

5 Ac tukun ma inge elos suc kena tuh Pahoran elan itucklac liki siyah in nuhnuhnkuh elos pahngpahng mwet lal tohkohsrah, tuh elos kena tuh masap uh in ikihlyucklac ke sie ohiyac in tohklah kafucrmacn sukohsohk ac in oakiyac sie tohkohsrah fin acn ah.

6 Ac elos suc kena tuh Pahoran elan srwackna mwet nuhnuhnkuh fuhlwact fin acn ah elos eis nuh faclos ine se mwet sukohsohk; ac ohinge maelihk inmahsrlolos, tuh mwet sukohsohk elos fuhlahk kuh olwelah in karuhnguhnwacng suwohs ac kuh lalos ke alu lalos ke sie kafucrmacn sukohsohk.

7 Ac tukun ma inge ohiyacn fohs se lalos inge tuh tulokihnyucki ke puhsren mwet ah. Ac tukun ma inge puhsren mwet ah tuhkuh in tahpuhk mwet sukohsohk, ac Pahoran el muhta na ke siyah in nuhnuhnkuh, ma oruh oasr engan yohk inmahsrlon mwet wiyacl Pahoran ac oacyacpac puhs sin mwet moul sukohsohk, suc oacyacpac ahkmisyelah mwet lal tohkohsrah, oruh elos tiacna ke lain tuhsruhk elos tarilacna in muhta na ke ohiyac luhn sukohsohklah.

8 Inge elos suc luhngse in oasr tohkohsrah elos tuhkuh ke sucu fuhlwact, ac elos suk in tohkohsrahlac; ac elos ahkkweyeyuck selos suc suk kuh ac wal fin mwet ah.

9 Tuhsruhk liye, pa inge sie pacl sensen nuh ke ohiyacn fohs inge in orek inmahsrlon mwet lal Nephi; tuh liye, Amalickiah el sifilpac puhrakwack insiacn mwet luhn mwet Laman in lain mwet lal Nephi, ac el oracni nuh sie mwet mweun ke acn nuhkwewa fin acn lal, ac el sang kuhfwen mwe mweun nuh selos, ac ahkolah in mweun ke kuhiyaclos nohfohn; tuh el tuh olwelah in nihm srah lal Moroni.

10 Tuhsruhk liye, kuht fah liye lah olwelah se lal ma el oraclah ah salaclac; ne ohinge, el tuh ahkoellah sifacna ac un mwet mweun lal in tuhkuh in mweun lain mwet Nephi.

11 Inge un mwet mweun lal elos tiacna puhs oacna elos met ah, ke srihpen tausin pucspucs suc tuh acnwucki ke poun mwet Nephi; tuhsruhk finne puhs mwet misac lalos, Amalickiah el oracni nuh sie pihsac na fal se ke un mwet mweun, puhs na oruh el tiacna sahngweng in tuhkuh nuh fin acn lal Zarahemla.

12 Ahok, finne Amalickiah el sifacna tuhkuh, us muhta luhn mwet Laman. Ac pa inge yac ahklongoul ac limekohsr ke kolyuck luhn mwet nuhnuhnkuh; ac ke pacl sepacna inge elos tuh muhtwacwacack in ahkkweyelah ohiyacn fohs lalos ma ke srihpacl mwet nuhnuhnkuh, Pahoran.

13 Ac tukun ma inge ke mwet suc pahngpahng mwet luhn tohkohsrah elos lohngwack lah mwet Laman elos tuhkuh in mweun lainuhlos, elos engan ke insiaclos; ac elos sruhnga in sruhkwack kuhfwen mwe mweun, tuh elos arulacna kasrkuhsrak sin mwet nuhnuhnkuh fuhlwact, ac oacyacpac sin mwet moul sukohsohk, tuh elos tiacna sruhkwack kuhfwen mwe mweun in karuhnguhnwacng acn selos.

14 Ac tukun ma inge ke Moroni el liye ma inge, ac oacyacpac liye lah mwet Laman elos tuhkuh nuh ke mahsrol luhn acn ah, el arulacna kasrkuhsrak ke srihpen kwekwe luhn mwet suc el tuh arulacna insacnweacng in orekma in karuhnguhnwacng; ahok, el arulacna kasrkuhsrak; nguhnal sesseslah ke kasrkuhsrak selos.

15 Ac tukun ma inge el suhpwaclah sie mwe siyuck, wi puhsren mwet ah, nuh yurun kafuhnah luhn acn ah, kena tuh elan riti, ac sang nuh sel (Moroni) kuh tuh elan oruh mwet lain ingoh in karuhnguhnwacng acn selos kuh fin tiac in acnwucki elos.

16 Tuh fosrngah se emet lal pa in ahksahfyelah fohs ac akuhkuhin inmahsrlon mwet ah; tuh liye, pa inge ne ke pacl se inge sie srihpac luhn kuhnausyucklac lalos. Ac tukun ma inge ahkkweyeyucklac fal nuh ke puhsren mwet ah.

17 Ac tukun ma inge ke Moroni el sapkihn tuh un mwet mweun lal in som lain mwet luhn tohkohsrah, in isyac nuh ten inse fuhlwact lalos ac wal lalos ac isiltahluh nuh infohk uh, kuh elos enenuh in sruhkwack kuhfwen mwe mweun ac tahpuhk srihpac luhn moul sukohsohk.

18 Ac tukun ma inge un mwet mweun elos tuh mahs som lainuhlos; ac elos tuh kihlyac nuh ten inse fuhlwact lalos ac wal lalos, yohkna oruh ke elos tuh sruhkwack kuhfwen mwe mweun lalos in acnwuck lain mwet lal Moroni, elos acnwucki ac oan tuhpahsrpahsrelihk infohk uh.

19 Ac tukun ma inge oasr luhpan tausin ahkosr selos mwet lain suc acnwucki ke katlas; ac selos sin mwet kol lalos suc tiacna acnwucki ke mweun ah elos utucklac ac totoyang nuh ke nien srohoh, tuh wacngihn pacl in nuhnuhnkuh lalos ke pacl se inge.

20 Ac mwet luhlah sin mwet lain ingacn, liki na in pakpucki nuh ten nuh infohk uh ke katlas, elos inseselac nuh ke ohiyac luhn moul sukohsohk, ac elos tuh kohslah in kohlwack sifac luhn moul sukohsohk nuh fin taor lalos, ac ke siti selos, ac in sruhkwack kuhfwen mwe mweun in karuhnguhnwacng acn selos.

21 Ac ohinge Moroni el ahksahfyelah mwet luhn tohkohsrah, tuh wacngihn kuhtwena suc etweyuck ke sifac luhn mwet luhn tohkohsrah; ac ohinge el ahksahfyelah kwekwe ac inse fuhlwact luhn mwet ingacn suc fahkwack ke srah luhn wal fuhlwact; tuhsruhk elos isyucki nuh ten in ahkpuhsisaclyelos sifacna in oacna mwet wiyaclos, ac in acnwuck ke puhlaik nuh ke sukohsohk lalos liki srohoh.

22 Liye, tukun ma inge ke Moroni el tuh tulokihnyac mweun ac fohs inmahsrlon mwet lal sifacna, ac oruh tuh elos in muhta in mislac ac ohiyacn moul wo, ac orek masap in ahkolah in mweun lain mwet Laman, liye, mwet Laman elos tuhkuh nuh fin acn lal Moroni, ma oasr ke mahsrol sisken pe acn ah.

23 Ac tukun ma inge mwet Nephi elos tiacna arulacna fokoko ke siti lal Moroni; ke ma inge Amalickiah el tuh ukwaclosyak, uniyac mwet pucspucs. Ac tukun ma inge Amalickiah el sruokyac siti sac, ahok, sruokyac nohfohn acn lihsrlihsryak selos.

24 Ac elos suc kahinglac liki siti lal Moroni elos tuhkuh nuh ke siti lal Nephihah; ac oacyacpac mwet ke siti lal Lehi elos tuhkweni toweni nuh sie, ac oruh ahkoeyuck ac ahkolah in eis mwet Laman in mweun.

25 Tuhsruhk tukun ma inge Amalickiah el tiacna lwelah mwet Laman in som lain siti lal Nephihah in mweun, tuhsruhk fihliltahluh na sisken pe acn ah, fihliyac mwet ke siti nuhkwewa in liyacacng ac karuhnguhnwacng.

26 Ac ohinge el som, sruokyac siti pucspucs, siti lal Nephihah, ac siti lal Lehi, ac siti lal Morianton, ac siti lal Omner, ac siti lal Gid, ac siti lal Mulek, nohfohnna oan ke mahsrol nuh kuhtuhlacp ke sisken pe acn ah.

27 Ac ohinge mwet Laman elos sruokyac, ke ohiyac kuhtasrihk lal Amalickiah, siti na pucspucs, ke un mwet mweun pucspucs lalos, nohfohn suc ahkkweyeyuck fokoko oacna ohiyac in luhsruhngwack lal Moroni; nohfohn pot kuhlacna inge ituckyang nuh sin mwet Laman.

28 Ac tukun ma inge elos mahs som nuh ke mahsrol luhn acn Puhs, ukwacack mwet Nephi luhkwelos ac uniyac mwet pucspucs.

29 Tuhsruhk tukun ma inge elos ohsun nuh sel Teancum, suc tuh unilyac Morianton ac suc tuh kohsrwaclah mwet lal ke kahing lal.

30 Ac tukun ma inge el oacyacpac kohsrwacllah Amalickiah, ke el mahs som wi un mwet mweun pucspucs lal tuh elan kuh in sruokyac acn Puhs, ac oacyacpac acn ma oan nuh acir.

31 Tuhsruhk liye el ohsun tuh suhpwacrlac ke el lainyuckyak sel Teancum ac mwet lal, tuh elos mwet mweun fokoko; tuh mwet nuhkwewa lal Teancum ah elos ahluhkwelah mwet Laman ke fokoko ac ke suhmaht lalos ke ohiyacn mweun, yohkna oruh elos tuh eis wokihnyac liki na mwet Laman.

32 Ac tukun ma inge elos tuh ahkfosrngahyelos, yohkna oruh elos tuh onweltahl ne ke na lohsrwacni. Ac tukun ma inge Teancum ac mwet lal tuh tulohkohnwack lohm nuknuk selos ke mahsrol luhn acn Puhs; ac Amalickiah el tuh tulohkohnwack lohm nuknuk sel ke mahsrol ke lihkihnpot sisken pe acn ah, ac ke ohiyac se inge elos ukweyuckyak.

33 Ac tukun ma inge ke fong uh tuhkuh, Teancum ac mwet kuhlwacnsap lal elos wihklac som ke fong ah, ac som nuh ke nien monglac lal Amalickiah; ac liye, mutul uh kuhtanguhloslac ke srihpen tohtohlah yohk lalos, suc ma ke srihpen orekma ac fol ke lwen ah.

34 Ac tukun ma inge ke Teancum el wihklac som nuh ke lohm nuknuk sel tohkohsrah, ac fakihsilyac ke sie mwe fakfuhk; ac el oraclah misac lal tohkohsrah in sa tuh elan tiac okaswack mwet kuhlwacnsap lal.

35 Ac el sifilpac wihklac fohlohklac nuh ke nien monglac lal sifacna, ac liye, mwet lal elos mutul, ac el okasuhltahlwack ac fahk nuh selos ma nuhkwewa ma el oraclah.

36 Ac el oruh tuh un mwet mweun lal in tuyak ahkolah, fin mwet Laman ah tuhkahkwek ac tuhkuh nuh yohrohlos.

37 Ac ohinge sahflah yac ahklongoul ac limekohsr ke kolyuck luhn mwet nuhnuhnkuh fin mwet lal Nephi; ac ohinge sahflah pacl lal Amalickiah.