1 Wen nuhtihk, porongo kahs luhk, tuh nga fahk nuh sum, oacna ke nga fahk nuh sel Helaman, tuh kom fin liyacacng masap luhn God kom fah kapkapwack fin acn uh; ac kom fin tiac liyacacng masap luhn God kom fah lihsyucklac liki ye muhtahl.

2 Ac inge, wen nuhtihk, nga luhlahlfongi muh nga fah engan yohk sum, ke srihpen mislac lom ac luhlahlfongi lom nuh sin God; tuh ke kom sro nuh ke fuhsr lom in ngwet nuh sin Leum God lom, ohinge nga finsrak tuh kom fah ahkwot in liyacacng masap Lal; tuh insewowo el suc muhtweng ne ke sahflah.

3 Nga fahk nuh sum, wen nuhtihk, lah nga engan yohk sum tari, ke srihpen luhlahlfongi lom ac oaru lom, ac muhtweng lom ac mongfihsrwacsr lom inmahsrlon mwet luhn mwet Zoram.

4 Tuh nga etuh lah kom tuh kapihri; ahok, ac nga oacyacpac etuh lah kom tuh tuhngalyuck ke srihpen kahs uh; ac kom tuh muhtwacnglah ma inge nuhkwewa ke mongfihsrwacsr ke srihpen Leum El wi kom; ac inge kom etuh lah Leum El tuh molikomlac.

5 Ac inge wen nuhtihk, Shiblon, nga kena tuh kom in esam, lah kom fin fihliyac luhlahlfongi lom ke God in yohk tuh kom fah moliyucklac liki ma upac lom, ac ongaiyac lom, ac mwe kweok lom, ac kom fah moliyucklac ke lwen sahflah.

6 Inge, wen nuhtihk, nga tiac ke tuh kom in nuhnkuh lah nga sifacna etuh ma inge, tuhsruhk Nguhn luhn God suc oasr yuruk oruh ma inge nga in etuh; tuh nga fuhnuh tiac isuslac sin God luhkuhn nga tiac etuh ma inge.

7 Tuhsruhk liye, ke pahkotwen yohk luhn Leum El suhpwacma lipufacn Lal in fahk nuh sihk lah nga enenuh in tulokihnyac orekma in kuhnahostwen inmahsrlon mwet Lal; ahok, ac nga ngwetwacng na liye sie lipufacn, ac el sramsram nuh sihk, ac puhsrwacl oacna puhlahl, ac osrokwack infohk uh nohfohn.

8 Ac tukun ma inge lwen tolu ac fong tolu nga kweok upac ac fosrngah luhlahp luhn nguhnihk; ac tiacna, ne ke na nga pruhe nuh sin Leum Jisus Kraist nuh ke pahkotwen, nga tuh eis iyucklac luhn ma koluk luhk. Tuhsruhk liye, nga tuh pruhe nuh Sel ac nga tuh konwacack mislac nuh ke nguhnihk.

9 Ac inge, wen nuhtihk, nga tuh fahk nuh sum ma se inge tuh kom in kuh in etuh in lahlmwetmwet, tuh kom in kuh in etuh sihk lah wacngihn kuhtwena inkacnek kuh ohiyac suc sie mwet kuh in moliyucklac, tuh ke Kraist muhkwena. Liye, El pa moul ac kahlwem luhn facluh. Liye, El pa kahs luhn pwacye ac suwohswohs.

10 Ac inge, ke kom muhtwacwacack in luti kahs uh finne ohinge nga kena tuh kom in tahfwelah na in luti; ac nga kena tuh kom in oaru ac sifacna karihngihn ohiyom ke ma nuhkwewa.

11 Liyacacng tuh kom in tiac fuhlwactwack ke inse fuhlwact; ahok, liyacacng tuh kom in tiac fihlacng ke lahlmwetmwet lom sifacna, kuh ke kuhiyom sifacna.

12 Orekmakihn puhlaik, tuhsruhk tiac fuhnmwet; ac oacyacpac liyacacng tuh kom in kutongyac nohfohn kena lom, tuh kom in kuh in sesseslah ke luhngse; liyacacng tuh kom in kahing liki alsruhngwesr.

13 Nikmet pruhe oacna mwet Zoram elos oruh, tuh kom liye lah elos pruhe in lohngyuck sin mwet uh, ac in kaksakihnyuck ke lahlmwetmwet lalos.

14 Nikmet fahk: O God, nga kuloh nuh Sum tuh kuht wo liki mwet wiyacsr; tuhsruhk fahk: O Leum, nuhnakmuhnahs ke suhfallac luhk, ac esam mwet wiyuck ke pahkotwen—ahok, akihlen suhfallac lom ye muhtuhn God ke pacl nuhkwewa.

15 Ac lwelah Leum Elan ahkinsewowoye nguhnum, ac eis kom ke lwen sahflah nuh ke tohkohsrahi Lal, in muhta in mislac. Inge som, wen nuhtihk, ac luti kahs uh nuh sin mwet inge. Okak. Wen nuhtihk, liyekomyang.