1 Na tukun ma inge ke Moroni el eis lwacta se inge el kasrkuhsrakwack liki met ah, ke srihpen el etuh lah Ammoron el etuh suwohs ke kuhtasrihkiyacl; ahok, el etuh lah Ammoron el etuh lah tiac srihpac suwohswohs se pa oruh elan srokackuhnlah sie mweun in lain mwet lal Nephi.

2 Ac el fahk: Liye, nga fah tiacna ayaol mwet srohoh sel Ammoron sahyacn na elan sislah srihpac lal, oacna ke nga fahk ke lwacta luhk; tuh nga fah tiac sang nuh sel kuhtwena kuh yohk liki na kuh suc oasr yohrohl tari.

3 Liye, nga etuh acn se ma mwet Laman elos topangi mwet luhk suc utucklac srohoh; ac ke Ammoron el ac tiac insese nuh sihk ke lwacta luhk, liye, nga fah sang nuh sel fal nuh ke kahs luhk; ahok, nga fah suk misac inmahsrlolos ne ke na elos fah uswack nuh ke nien nuhnuhnkuh fuhlwact in suk mislac.

4 Ac na tukun ma inge ke Moroni el fahklah kahs inge, el oruh tuh sukok se in orek inmahsrlon mwet lal, tuh sahp elan kuh in sokwack sie mwet suc tuhkuh ke fihlin mwet lal Laman inmahsrlolos.

5 Ac tukun ma inge elos sokwack sie, suc inel pa Laman; ac el pa sie sin mwet kuhlwacnsap luhn tohkohsrah se suc tuh acnwucki sel Amalickiah.

6 Inge Moroni el oruh tuh Laman ac sie u srihsrihk luhn mwet lal in som nuh yurun mwet topang suc topangi mwet Nephi.

7 Inge mwet Nephi elos topangiyuck ke siti lal Gid; ke ma inge Moroni el srihsrngilyac Laman ac oruh tuh sie un mwet puh in weluhl som.

8 Ac ke ekwelac Laman el som nuh yurun mwet topang suc topangi mwet Nephi, ac liye, elos liye ke el tuhkuh ac elos tulokihnilyac; tuhsruhk el fahk nuh selos: Nikmet sahngweng; liye, nga sie mwet Laman. Liye, kuht kahinglac liki mwet Nephi, ac elos mutul; ac liye kuht eis wine nimaclos ac us tuhkuh wi kuht.

9 Inge ke mwet Laman elos lohng kahs inge elos eisaclos ke engan; ac elos fahk nuh sel: Use wine nimowos, tuh kuht in nihm; kuht engan tuh kowos us tuhkuh wine wi kowos tuh kuht tohtohlah.

10 Tuhsruhk Laman el fahk nuh selos: Lwelah kuht in sruokyac na wine nimacsr uh ne ke na kuht som lain mwet Nephi in mweun. Tuhsruhk fahk se inge oruh elos kena yohk liki met ah in nihm wine uh;

11 Tuh, elos fahk: Kuht tohtohlah, ke ma inge lwelah kuht in eis wine an, ac lutu kuht fah eis wine wi mongo nwacsr, ma fah ahkkweye kuht in som lain mwet Nephi.

12 Ac Laman el fahk nuh selos: Kowos kuh in oruh in fal nuh ke luhngse lowos an.

13 Ac tukun ma inge ke elos tuh sukohsohk in eis wine uh; ac ma inge yuc nuh ke ema lalos, ke ma inge elos sukohsohk in eis liki met ah; ac wine uh fokoko, oreklac in fokoko.

14 Ac tukun ma inge elos tuh nihmnihm ac pwacr, ac ke lwen tok ah elos nohfohn sruhilac.

15 Ac inge ke Laman ac mwet lal liye tuh elos nohfohn sruhilac, ac elos mutul luhlahp, elos fohlohklac nuh yohrohl Moroni ac fahk nuh sel ma nuhkwewa ma sikyak ah.

16 Ac inge ma inge fal nuh ke plwacn lal Moroni. Ac Moroni el ahkolah mwet lal ac kuhfwen mwe mweun; ac el som nuh ke siti Gid, ke mwet Laman elos mutul luhlahp ac sruhilac, ac tohlwacng kuhfwen mwe mweun nuh yurun mwet srohoh, yohkna oruh elos nohfohn sruok kuhfwen mwe mweun;

17 Ahok, finne nuh sin muhtwacn, ac nohfohn tuhlihk nahtuhlos, elos nuhkwewa suc kuh in orekmakihn kuhfwen mwe mweun, ke Moroni el sang kuhfwen mwe mweun nuh sin mwet srohoh nuhkwewa ingacn; ac ma ingacn nuhkwewa orek ke mihslac yohk.

18 Tuhsruhk fuhnuh elos okaswack mwet Laman ah, liye elos sruhilac ac mwet Nephi ah luhkuhn kuh in uniltahluh.

19 Tuhsruhk liye, tiac pa inge kena lal Moroni ah; el tiacna engan in ahkmas kuh ahksohrohrye srah, tuhsruhk el engan in molwelah mwet lal liki kuhnahoslah; ac ke srihpac se inge elan tiac sang nuh facl sesuwohs, el tiacna som mweun lain mwet Laman ac kuhnaosuhloslac ke elos sruhilac.

20 Tuhsruhk el oraclah luhngse lal; tuh el sang kuhfwen mwe mweun nuh sin mwet srohoh luhn mwet Nephi ingacn suc oasr lun pot luhn siti uh, ac sang nuh selos kuh in sruokyac kuhtuh acn ma oasr lun pot uh.

21 Ac na el oruh tuh mwet suc weluhl ah in fohlohki kuhtuh luhkwelos, ac in raunweack un mwet mweun luhn mwet Laman.

22 Inge liye ma inge orek ke fong ah, oruh ke mwet Laman elos tuhkahkwek ke lututacng ah elos liye lah elos rauniyucklac sin mwet Nephi sahyac, ac lah mwet srohoh lalos elos sruok kuhfwen mwe mweun.

23 Ac ohinge elos liye lah mwet Nephi elos kuh luhkwelos; ac ke ohiyac inge elos konwacack lah tiac wo tuh elos in acnwuck nuh sin mwet Nephi; ke ma inge sifen kacptin lalos el sapkihn elos in fuhlweack kuhfwen mwe mweun lalos, ac elos use ma inge nuh met uh ac tolyac ma inge sisken nien mwet Nephi, siyuck ke pahkotwen.

24 Inge liye, pa inge luhngse lal Moroni. El eisaclos mwet srohoh luhn mweun, ac sruokyac siti sac, ac oruh tuh mwet srohoh nuhkwewa in ahksukohsohkyeyucklac, elos suc mwet Nephi; ac elos tuh welah un mwet mweun lal Moroni, ac elos ahkfokokoyelah un mwet mweun lal.

25 Ac tukun ma inge el oruh tuh mwet Laman, suc el uslah srohoh, tuh elos in muhtwacwacack oruh sie orekma in ahkfokokoye acn lihsrlihsr uh in raunweack siti Gid.

26 Ac tukun ma inge ke el ahkfokokoyelah siti Gid, fal nuh ke luhngse lal, el oruh tuh mwet srohoh lal in utucklac nuh ke siti Puhs; ac el oacyacpac topangi siti sacn ke sie un mwet mweun na fokoko.

27 Ac tukun ma inge elos tuh, finne ke plwacn kuhtasrihk nuhkwewa luhn mwet Laman, liyacacng ac karuhnguhnwacng nohfohn mwet srohoh suc elos uslah, ac oacyacpac karuhnguhnwacng nohfohn acn ah ac ohiyac wo ma elos sifilpac eislah.

28 Ac tukun ma inge ke mwet Nephi elos sifilpac muhtwacwacack in kuhtanglah, ac in sifilpac eis suwohs lalos ac ohiyac wo lalos.

29 Pacl pucspucs mwet Laman ah srihke in raunweloslac ke fong ah, tuhsruhk ke srihke inge mwet srohoh pucspucs lalos misac.

30 Ac pacl pucspucs elos srihke in kihte wine lalos nuh sin mwet Nephi, tuh elos in kuh in kuhnaosuhloslac ke pwacsin kuh ke sruhi.

31 Tuhsruhk liye, mwet Nephi elos tiac sihpihsrpihsr in esam Leum God lalos ke pacl in kweok lalos inge. Elos tiacna kuh in srihfeyuck ke mwe sruhf lalos; ahok, elos tiacna ipeis ke wine lalos, sahyacn na elos in sang met nuh sin kuhtuh mwet srohoh luhn mwet Laman.

32 Ac elos tuh sensenkackihn tuh in wacngihn pwacsin ituckyang nuh inmahsrlolos; tuh fin wine nimaclos pwacsinelah sie mwet Laman ma inge ac oacyacpac pwacsinelah sie mwet Nephi; ac ohinge elos tuh srihke nohfohn mwe nihmnihm nimaclos.

33 Ac na tukun ma inge fal nuh sel Moroni in oruh ahkolah lal in som mweuni siti Morianton; tuh liye, mwet Laman elos, ke orekma lalos, ahkfokokoyelah siti Morianton ne ke na arulacna sie pot kuhlacna na pwacye.

34 Ac elos tahfwelah na in use un mwet mweun sasuc nuh ke siti sac, ac oacyacpac kuhfa sasuc in mwe kahsruh.

35 Ac ohinge sahflah yac ahklongoul ac yuc ke kolyuck luhn mwet nuhnuhnkuh fin mwet lal Nephi.