1 Ac tukun ma inge ke elos tui ac fohlohk nuh tok luhkwelos. Ac Moroni el fahk nuh sel Zerahemnah: Liye, Zerahemnah, kuht tiacna ke tuh kuht in mwet luhngse ahksohrohryelah srah. Kom etuh lah kom oasr in pahosr, tuhsruhk kuht tiacna ke unikowosi.

2 Liye, kuht tiacna tuhkuh in mweun lain kowos tuh kuht in ahksohrohrye srah lowos an ke kuh; kuh kuht tiac pac ke use kuhtwena mwet nuh ke srohoh. Tuhsruhk pa inge srihpac se ma kowos tuhkuh in lain kuht kac uh; ahok, ac kowos kasrkuhsrak sesr ke srihpen alu lasr.

3 Tuhsruhk inge, kom liye lah Leum El wi kuht; ac kom liye lah El us kom me nuh in pahosr. Ac inge nga kena tuh kom in kahlwem kac lah ma inge oreklac nuh sesr ke srihpen alu lasr ac luhlahlfongi lasr in Kraist. Ac inge kom liye lah kom tiacna kuh in kuhnahoslah luhlahlfongi lasr.

4 Inge kom liye lah pa inge luhlahlfongi pwacye luhn God; ahok, kom liye lah God El ac kahsruh, ac liyacacng, ac karihngihn kuht, kuht fin oaru nuh Sel, ac nuh ke luhlahlfongi lasr, ac alu lasr; ac Leum El fah tiac lwelah tuh kuht in kuhnausyucklac sahyacn na kuht puhtatlac nuh ke tahfonglac ac lahfwekihn luhlahlfongi lasr.

5 Ac inge, Zerahemnah, nga sapkihn nuh sum, ke inen God kuhlacna, suc ahkfokokoye un mwet mweun lasr tuh kuht in fokoko liki kowos, ke luhlahlfongi lasr, ke alu lasr, ac ke inkacnek in alu lasr, ac ke acn in alu lasr, ac ke kahsruh muhtahl suc kuht sowemoul kac sin muhtwacn kiyacsr ac tuhlihk nahtuhsr, ke moul sukohsohk sacn suc sruokkuhti nuh ke acn sesr ac facl sesr; ahok, ac oacyacpac ke orekma luhn kahs muhtahl luhn God, suc kuht eis nohfohn engan lasr kac; ac ke ma nuhkwewa ma sacohklacna nuh sesr—

6 Ahok, ac tiac pa inge kwewa; nga sapkihn nuh sum ke kena yohk nuhkwewa lom ma oruh kom in moul, tuh kom in use kuhfwen mwe mweun lowos nuh sesr, ac kuht fah tiac suk in ahksohrohrye srah lowos, tuhsruhk kuht fah sruokyac na moul lowos, kowos fin som ke inkacnek lowos ac tiac sifilpac tuhkuh in mweun lain kuht.

7 Ac na, kowos fin tiac oruh ma inge, liye, kowos oasr in pahosr, ac nga fah sapkihn mwet luhk tuh elos in lainkowos, ac kantweyac kihnet in misac nuh ke monuwos, tuh kowos in wacngihnlac; ac na fah kuht liye lah suc ac oasr kuh la fin mwet inge; ahok, kuht fah liye lah suc fah utucklac nuh ke srohoh.

8 Ac na tukun ma inge ke Zerahemnah el lohng ma fwackyuck inge el tuhkuh nuh met ac sang katlas nahtuhl ac mitmit kuhruh nahtuhl, ac mwe pihsr nahtuhl nuh in pahol Moroni, ac fahk nuh sel: Liye, pa inge kuhfwen mwe mweun lasr; kuht fah usot nuh sum, tuhsruhk kuht fah tiac lwelah kuht sifacna in olwelah nuh sum, suc kuht etuh lah kuht ac kuhnahoslah, ac oacyacpac tuhlihk nahtuhsr; tuhsruhk eislah kuhfwen mwe mweun lasr, ac lwelah tuh kuht in som nuh ke innimac; fin tiac ohinge kuht fah sifil eis katlas nahtuhsr, ac kuht fah misac kuh kuhtanglah.

9 Liye, kuht tiac ma ke luhlahlfongi lowos; kuht tiacna luhlahlfongi lah God pa eiskuhtwot nuh in pouwos; tuhsruhk kuht luhlahlfongi lah ohiyac kuhtasrihk lowos pa molikowoslac liki katlas nahtuhsr. Liye, mwe loang iniwac lowos ac mwe loang lowos pa molikowoslac.

10 Ac inge ke Zerahemnah el ahksahfyelah sramsram lal ke kahs inge, Moroni el fohlohkohnwacng katlas ac kuhfwen mwe mweun, ma el tuh eis, nuh sel Zerahemnah, fahk: Liye, kuht ac fah ahksahfyelah fohs se inge.

11 Inge nga tiacna kuh in esam kahs ma nga sruhmuhn, ke ma inge oacna ke Leum El moul, kowos fah tiac som sahyacn na kowos som ke sie wuhlwelah tuh kowos fah tiacna sifil fohlohk in lain kuht in mweun. Inge ke kowos oasr in pahosr kuht fah ahksohrohryelah srah lowos nuh infohk uh, kuh kowos fah insese nuh ke ohiyac suc nga fahkoht.

12 Ac inge ke Moroni el fahklah kahs inge, Zerahemnah el sifil eis katlas nahtuhl, ac el kasrkuhsrak sel Moroni, ac el yucyang tuh elan kuh in unilyac Moroni; tuhsruhk ke el sralwack katlas nahtuhl, liye, sie sin mwet mweun lal Moroni el pakwelah puhtatlac nuh infohk uh, ac oruh kaptwelihk muhta ah; ac el oacyacpac pakilyac Zerahemnah tuh el suhkwelah kulun sifacl ac kulun sifacl puhtatlac nuh infohk uh. Ac Zerahemnah el kahing luhkwelos ac nuh inmahsrlon mwet mweun lal.

13 Ac tukun ma inge mwet mweun se suc tu siskac, suc suhkwelah kulun sifacl Zerahemnah, el sruhkwack kulun sifac sac liki infohk uh ke aunsucf ah, ac fihliyac ke muhtuhn katlas nahtuhl, ac kohllah nuh yohrohlos, fahk nuh selos ke sie puhsra luhlahp:

14 In oacpacna ke kulun sifac se inge puhtatlac nuh infohk uh, suc pa kulun sifac luhn mwet kol lowos, ohinge kowos fah puhtatlac nuh infohk uh kowos fin tiac use kuhfwen mwe mweun lowos ac som ke sie wuhlweacng in mislac.

15 Inge puhs selos, ke elos lohng kahs inge ac liye kulun sifac se suc oan ke katlas sac, elos sahngweng; ac puhs selos tuhkuh ac tolyac kuhfwen mwe mweun lalos sisken niyacl Moroni, ac ilyak nuh ke sie wuhlweacng in mislac. Ac elos suc ilyak nuh ke sie wuhlweacng elos fihliyucklac in som nuh innimac.

16 Na tukun ma inge Zerahemnah el arulacna kasrkuhsrak, ac el puhrakwack mwet luhlah sin un mwet mweun lal in kasrkuhsrak, in acnwuck fokoko liki met ah in lain mwet Nephi.

17 Ac inge Moroni el kasrkuhsrak, ke srihpen kwekweiyen mwet Laman; ke ma inge el sapkihn mwet lal tuh elos in mweun lainuhlos ac onweltahluh. Ac tukun ma inge ke elos muhtwacwacack in onweloslac; ahok, ac mwet Laman elos lainuhlos ke katlas nahtuhlos ke kuhiyaclos.

18 Tuhsruhk liye, mahno kohflohfohl lalos ac insifaclos tiac loangweyucklac liki katlas kohsroh nuhtin mwet Nephi; ahok, liye elos kantweyucki ac pakpucki, ahok, ac sa na puhtatlac misac ye katlas nuhtin mwet Nephi; ac elos muhtwacwacack in kuhtangyucklac, oacna ke mwet mweun lal Moroni elos tuh palyei.

19 Inge Zerahemnah, ke el liye tuh elos nohfohn ac apkuhran in kuhnausyucklac, el wowoyak ke kuhiyacl nuh sel Moroni, olweacng lah el ac wuhlwelah ac oacyacpac mwet lal weluhl, elos fin molwelah moul luhn mwet luhlah lalos, tuh elos fah tiacna sifil fohlohk in mweun lainuhlos.

20 Ac tukun ma inge Moroni el oruh tuh sikyak luhn misac in sifilpac tui inmahsrlon mwet uh. Ac el eislah kuhfwen mwe mweun liki mwet Laman; ac tukun elos weluhl ilyak nuh ke sie wuhlweacng in mislac elos fihliyucklac in som nuh innimac.

21 Inge pihsen mwet misac lalos tiacna oeyucklac ke srihpen puhslac na pwacye pihsac sac; ahok, pihsen mwet misac arulacna puhslac, kwewana luhn mwet Nephi ac luhn mwet Laman.

22 Ac tukun ma inge elos tuh tohllah mwet misac nuh inkof Sidon, ac elos tuh pahtlah ac tihli nuh yen loal meoa.

23 Ac un mwet mweun luhn mwet Nephi, kuh lal Moroni, elos fohlohklac ac tuhkuh nuh lohm selos ac acn selos.

24 Ac ohinge sahflah yac ahksingucul alkosr ke kolyuck luhn mwet nuhnuhnkuh fin mwet lal Nephi. Ac ohinge sahflah ma sihmlac lal Alma, ma tuh sihmlac fin plwet lal Nephi.