1 Ac inge, tukun ma inge ke yac ahklongoul ac ohnkohsr ke kolyuck luhn mwet nuhnuhnkuh fin mwet lal Nephi, liye, ke mwet Laman elos tuhkahkwek ke litutacng se emet ke mahlwem se emet, liye, elos konwaclwack Amalickiah lah el misac ke lohm nuknuk sel sifacna; ac elos oacyacpac liye lah Teancum el ahkolah in mweun nuh selos ke lwen sac.

2 Ac inge, ke mwet Laman elos liye ma inge elos sahngweng; ac elos tohllah plwacn lalos in mahs som nuh fin acn ma oan nuh acir, ac kahinglac wi un mwet mweun lalos nuhkwewa nuh ke siti lal Mulek, ac soklah karihngihnyuck ke acn in lihsrlihsryak lalos.

3 Ac tukun ma inge tamuhlwel wiyacl Amalickiah el srihsrngiyucki in tohkohsrah luhn mwet ah; ac inel pa Ammoron; ohinge tohkohsrah Ammoron, tamuhlwel wiyacl tohkohsrah Amalickiah, el srihsrngiyucki in kol aholuhl.

4 Ac tukun ma inge el tuh sapkihn tuh mwet lal in karuhnguhnwacng siti ingacn, ma elos eislah ke ahksohrohryeyacn srah; tuh elos tiacna eislah kuhtwena siti sahyacn na yohk srah lalos kahklah.

5 Ac inge, Teancum el liye tuh mwet Laman elos insacnweacng in karuhnguhnwacng na siti suc elos eislah, ac ipin acn ma elos sruokyac ingacn; ac oacyacpac ke el liye puhsiyaclos, Teancum el nuhnkuh tuh tiac wo elan srihke in lainuhlos ke acn in monglac lalos.

6 Tuhsruhk el fihliyac mwet lal in raunweack, sruhluhkihn muh el ahkolah in mweun; ahok, ac pwacyena lah el ahkolah in loangwel sifacna luhkwelos, ke el tulohkohnwack pot in raunwelosyak ac ahkolah inkacnek in kahinglac.

7 Ac tukun ma inge el tahfwelah ohinge in ahkolah in mweun ne ke na Moroni el suhpwaclah sie un mwet pucspucs in ahkfokokoyelah un mwet mweun lal.

8 Ac Moroni el oacyacpac suhpwaclah sapkihn nuh sel tuh elan sruokyac nohfohn mwet srohoh suc puhtatyang nuh in pahol; tuh mwet Laman elos uslah in srohoh mwet pucspucs, tuh elan sruokyac nohfohn mwet srohoh luhn mwet Laman elos in orekmakuhnuhlos in sang molwelah elos suc mwet Laman ah uslah.

9 Ac el oacyacpac sapkihn nuh sel tuh elan ahkfokokoyelah acn Puhs, ac topangi inkacnek ohsrihksrihk ma kohllah nuh fin acn ma oan nuh acir, fin tiac mwet Laman elos ac eislah acn sacn ac kuh in wakrelos ke lacfahl nuhkwewa.

10 Ac Moroni el oacyacpac saplah nuh yohrohl, kena sel tuh elan oaru in karuhnguhnwacng ipin acn sac, ac tuh elan suk pacl wo nuhkwewa in ahkkweokye mwet Laman ke acn sac, ke kuhiyacl kwewa, tuh sahp elan kuh in sifilpac eislah ke ohiyac usrnguck kuh ke kuhtuh ohiyac sahyac siti ma itucklac liki paholos; ac tuh elan oacyacpac ahkfokokoyelah ac ahkkweyelah siti ma raunweack acn we, ma soenna puhtatyang nuh in poun mwet Laman.

11 Ac el oacyacpac fahk nuh sel, ngwac tuhkuh nuh yurum, tuhsruhk liye, mwet Laman elos tuhkuh nuh yohrohsr ke mahsrol luhn acn ma oan sisken meoa rohtoh; ac liye, ngwac som lainuhlos, ke ma inge nga tiac kuh in tuhkuh nuh yurum.

12 Inge, tohkohsrah (Ammoron) el som liki acn lal Zarahemla, ac el ahkkahlwemye nuh sel kasra ke misac luhn tamuhlwel wiyacl, ac el oracni nuh sie sie un mwet puhs, ac mahs som in lain mwet Nephi ke mahsrol sisken meoa rohtoh.

13 Ac ohinge el insacnweacng in lain mwet Nephi, ac in pwacnlah kuhtuh sin un mwet mweun lalos nuh ke ipin acn sac, ac el sapkihn nuh selos suc el fihliyac na in muhta ke siti suc el sruokyac, tuh elos in oacyacpac lain mwet Nephi ke mahsrol sisken meoa kuhtuhlacp, ac in sruokyac acn lalos ke kuhiyaclos, fal nuh ke kuhiyen un mwet mweun lalos.

14 Ac ohinge mwet Nephi elos muhta ke ohiyac sensen ke sahflahiyacn yac ahklongoul ac ohnkohsr ke kolyuck luhn mwet nuhnuhnkuh fin mwet lal Nephi.

15 Tuhsruhk liye, tukun ma inge ke yac ahklongoul ac itkohsr ke kolyuck luhn mwet nuhnuhnkuh, Teancum, ke sap lal Moroni—suc oakiyac un mwet mweun in karuhnguhnwacng mahsrol epang ac rohtoh fin acn ah, el muhtwacwacack in mahs som nuh fin acn Puhs, tuh elan kuh in kahsrel Teancum wi mwet lal in sifilpac eislah siti ma itucklac luhkwelos—

16 Ac tukun ma inge Teancum el eis sap in oruh sie mweun nuh ke siti lal Mulek, ac in sifilpac eislah acn we ac fin kuh.

17 Ac tukun ma inge Teancum el oraclah ahkolah in oruh sie mweun nuh ke siti lal Mulek, ac in mahs som wi un mwet mweun lal in lain mwet Laman; tuhsruhk el liye tuh el tiac kuh in kuhtanguhloslac ke elos muhta ke acn lihsrlihsryak lalos; ke ma inge el tohllah plwacn lal ac sifil fohlohklac nuh ke siti Puhs, in sano tuhkuh lal Moroni, tuh elan kuh in eis kuh ke un mwet mweun lal.

18 Ac tukun ma inge Moroni el tuhkuh wi un mwet mweun lal nuh fin acn Puhs, ke kapihn sahflahiyacn yac ahklongoul ac itkohsr ke kolyuck luhn mwet nuhnuhnkuh fin mwet lal Nephi.

19 Ac ke muhtwacwacackiyacn yac ahklongoul ac alkosr, Moroni ac Teancum ac puhs sin sifen kacptin elos oruh sie miting ke mweun—meac elos enenuh in oruh in oruh mwet Laman elos in tufoklac tuhkuh in mweun lainuhlos; kuh ke kuhtuh ohiyac elos in kuh in ahkluhkuhkyaclos in tufoklac liki pot kuhlacna lalos, tuh elos in kuh in eis kuh faclos ac in sifilpac eislah siti lal Mulek.

20 Ac tukun ma inge elos suhpwaclah mwet aholuhlos in som nuh yurun un mwet mweun luhn mwet Laman, suc karuhnguhnwacng siti lal Mulek, nuh yurun mwet kol lalos, suc inel pa Jacob, kena sel tuh elan tufoklac wi un mwet mweun lal in ohsun nuh selos ke acn tuhpahsrpahsr inmahsrlon siti luo ah. Tuhsruhk liye, Jacob, suc sie mwet Zoram, el tiacna ke tufoklac wi un mwet mweun lal in ohsun nuh selos fin acn tuhpahsrpahsr uh.

21 Ac tukun ma inge Moroni, wacngihn finsrak lal in ohsun nuh selos ke ohiyac fal, ke ma inge, el otwelah ke sie plwacn tuh elan kuh in srihfe mwet Laman ah in tufoklac liki pot kuhlacna lalos.

22 Ke ma inge el oruh tuh Teancum elan eis sie un mwet puh ac mahs som nuh sisken pe acn ah; ac Moroni ac un mwet mweun lal, ke fong ah, elos mahs som nuh ke innimac, ke lacfahl nuh rohtoh ke siti Mulek; ac ohinge, ke lwen tohkoh, ke mwet topang luhn mwet Laman elos konwaclwack Teancum, elos kahsruhsr ac fahk nuh sel Jacob, mwet kol lalos.

23 Ac tukun ma inge un mwet mweun luhn mwet Laman elos tuh mahs som in lainuhl Teancum, nuhnkuh muh ke pihsaclos, elos ac kuhtanguhllah Teancum ke srihpen suhpuhsiyacn un mwet lal. Ac ke Teancum el liye un mwet mweun luhn mwet Laman tifoklac in lainuhl el muhtwacwacack in kahing nuh ten ke sisken pe acn ah, ke lacfahl nuh acir.

24 Ac tukun ma inge ke mwet Laman elos liye tuh el muhtwacwacack in kahing, elos puhlaikyak ac ukwaclos ke kuhiyaclos. Ac ke Teancum el ohinge kohllah mwet Laman suc ukwaclos ke kuhiyaclos, liye, Moroni el sapkihn kuhtuh mwet mweun lal suc weluhl ah in mahs som nuh ke siti sac, ac sruokyac.

25 Ac ohinge elos oruh, ac onweloslac nohfohn suc fihliyucki in karuhnguhnwacng siti sac, ahok, elos nuhkwewa suc tiacna sruhkwack kuhfwen mwe mweun lalos.

26 Ac ohinge Moroni el sruokyac siti Mulek ke kuhtuh sin mwet mweun lal, ke el mahs som wi un mwet mweun luhlah lal in ohsun nuh sin mwet Laman ke elos ac fohlohk liki ukweyacl Teancum.

27 Ac tukun ma inge ke mwet Laman elos ukwacl Teancum ne ke na elos tuhkuh fototoyang nuh ke siti Puhs, ac ke elos tuh ohsun nuh sel Lehi ac sie un mwet mweun srihsrihk, suc fihliyucki in karuhnguhnwacng siti Puhs.

28 Ac inge liye, ke sifen kacptin luhn mwet Laman el liyaclwack Lehi wi un mwet mweun lal tuhkuh in lainuhlos, elos kahing ac fohsack upac, fosrngahlah tuh sahp elos ac tiac sruokyac siti Mulek met liki Lehi el falkweltahluh; tuh elos ullac ke srihpen mahs lalos, ac mwet lal Lehi ah elos kuh na.

29 Inge mwet Laman elos tiacna etuh lah Moroni el ut tohkohlos wi un mwet mweun lal; ac kwewana ma elos sahngweng kac ah pa Lehi ac mwet lal.

30 Inge Lehi el tiacna ke sruohkohltahluh ne ke na elos sonol Moroni ac un mwet mweun lal.

31 Ac tukun ma inge met liki mwet Laman ah elos kahinglac loes elos rauniyuckyak sin mwet Nephi, sin mwet lal Moroni ke sie lwacpo, ac sin mwet lal Lehi ke lwacyacn sahyac, elos nuhkwewa kuh ac arulacna fokoko; tuhsruhk mwet Laman ah elos tohtohlah ke srihpen mahs loeloes lalos.

32 Ac Moroni el sapkihn mwet lal tuh elos in mweun lainuhlos ne ke na elos fuhlweack kuhfwen mwe mweun lalos.

33 Ac tukun ma inge ke Jacob, mwet kol lalos, el oacyacpac sie mwet Zoram, ac nguhnal tiac kena fuhlweack, el kol mwet Laman ah in som mweun ke kasrkuhsrak yohk in lainuhl Moroni.

34 Moroni el srwackna fahsr ke inkacnek uh, ke ma inge Jacob el insacnweacng na in onweltahl ac pakpuck na fahsr nuh ke siti Mulek. Tuhsruhk liye, Moroni ac mwet lal elos fokoko luhkwelos; ke ma inge elos tiacna ikacslah inkacnek uh nuh sin mwet Laman.

35 Ac tukun ma inge elos acnwuck ke lacfahl nuhkwewa ke kasrkuhsrak yohk; ac puhslac mwet acnwucki sin kwewana; ahok, ac Moroni el kihnetuh ac Jacob el acnwucki.

36 Ac Lehi el tuhkuh ut tohkohlos arulacna upac wi mwet fokoko lal, oruh mwet Laman ma oasr tok ah elos fuhlweack kuhfwen mwe mweun lalos; ac elos suc luhlah selos, elos arulacna fohsack, elos tiac etuh lah elos ac som nuh oyac kuh in acnwuck.

37 Inge Moroni el liye fohsack lalos, el fahk nuh selos: Kowos fin use kuhfwen mwe mweun lowos ac fuhlwema kwewa, liye kuht fah tiac ahksohrohryelah srah lowos.

38 Ac tukun ma inge ke mwet Laman elos lohng kahs inge, sifen kacptin lalos, elos nuhkwewa suc tiac acnwucki, elos tuhkuh ac tolyac kuhfwen mwe mweun lalos ke niyacl Moroni, ac oacyacpac sapkihn nuh sin mwet lalos tuh elos in oruh oacna.

39 Tuhsruhk liye, oasr mwet pucspucs suc tiacna; ac elos suc tiacna sang kuhfwen mwe mweun lalos elos utucklac ac srohoh, ac kuhfwen mwe mweun lalos itucklac luhkwelos, ac elos kohslah in fahsr wi mwet wiyaclos nuh fin acn Puhs.

40 Ac inge pihsen mwet srohoh suc utucklac ah puhs liki elos suc acnwucki, ahok, puhs luhkwelos suc acnwucki ke kwewana lacfahl uh.