1 Ac tukun ma inge el sifilpac sihm nuh sin kafuhnah luhn acn ah, suc pa Pahoran, ac pa inge kahs ma el suhmuhslah, fahk: Liye, nga sihmihs lwacta se luhk inge nuh sel Pahoran, ke siti lal Zarahemla, suc pa mwet nuhnuhnkuh fuhlwact ac kafuhnah luhn acn uh, ac oacyacpac nuh selos nuhkwewa suc suleyucklac sin mwet inge in kol ac karihngihn mukwikwi luhn mweun inge.

2 Tuh liye, oasr kuhtuh ma ngwac fahk nuh selos ke ohiyacn kaiyuck; tuh liye, kowos sifacna etuh lah kowos tuh srihsrngiyucki in oracni nuh sie kuhtuh mwet, ac sang nuh selos katlas, ac mitmit kuhruh, ac kain in mwe mweun nuhkwewa, ac suhpwacloslac in som lain mwet Laman, ke oacna sie ipin acn suc elos tuhkuh nuh ke acn sesr.

3 Ac inge liye, nga fahk nuh suwos lah nga sifacna, ac oacyacpac mwet luhk, ac oacyacpac Helaman ac mwet lal, arulacna kweok yohk; ahok, finne masrinsrwacl, maluh, ac tohtohlah, ke kain in ma kweok nuhkwewa.

4 Tuhsruhk liye, fuhnuh pa inge nohfohn ma suc kuht kweokkihn luhkuhn kuht tiacna mahmah ac tohrkahskahs.

5 Tuhsruhk liye, upac ahkmas inmahsrlon mwet lasr; ahok, mwet tausin puhtatlac ke katlas, ac tiac ohinge ac fin kowos suhpwacma nuh yurun un mwet mweun lasr in fal mwe ahkkuh ac mwe kahsruh nuh selos. Ahok, yohklac soaru lowos nuh sesr.

6 Ac inge liye, kuht kena etuh srihpac luhn soaru na yohk inge; ahok, kuht kena etuh srihpen suhnuhnkuh lowos an.

7 Yac kowos kuh in nuhnkuh in muhta ke nien muhta fuhlwact lowos an ke ohiyacn suhnuhnkuh soaru, a mwet lokoalok lowos elos raunikowoslac in osrwaclihk orekma luhn misac? Ahok, ke elos ahkmasye tausin tausin sin mwet wiyowos—

8 Ahok, finne elos suc ngwetwack nuh suwos in karuhnguhnuhlos, ahok, elos fihlikowosi ke sie ohiyac tuh kowos in kuh in kahsrelos, ahok, kowos in kuh in suhpwaclah un mwet mweun nuh yohrohlos, in ahkkweyelos, ac in molwelah tausin selos in tiac puhtatlac ke katlas.

9 Tuhsruhk liye, tiac pa inge nohfohn—kowos sruokyacna mwe kahsruh lowos luhkwelos, yohkna oruh puhs selos acnwuck na ac kahklac srahn moul lalos ke srihpen kena yohk lalos suc oasr yohrohlos ke kasrpen mwet lalos; ahok, ac elos oruh ma inge ke elos apkuhran in misac ke masrinsrwacl, ke srihpen soaru yohk lowos nuh selos.

10 Ac inge, mwet sacohk wiyuck—tuh kowos enenuh in luhngseyuck; ahok, ac kowos enenuh in moklekowosyak sifacna in oaru yohk nuh ke kasrpen moul ac sukohsohk luhn mwet inge; tuhsruhk liye, kowos soaru nuh selos yohkna oruh srah luhn tausin tausin fah tuhkuh nuh fin sifowos ke fohlohk sahk; ahok, tuh etweyuck sin God wowoyak lalos nuhkwewa, ac kweok nuhkwewa lalos—

11 Liye, yac kowos nuhnkuh muh kowos kuh in muhta ke nien muhta fuhlwact lowos, ac ke srihpen wolacna yohk luhn God yac wacngihn ma kowos kuh in oruh ac El ac molikowoslac? Liye, fin kowos nuhnkuh ma inge kowos nuhnkuh ke wacngihn srihpac.

12 Yac kowos nuhnkuh muh, ke srihpen puhslac sin mwet wiyowos tuh acnwucki, ma ke srihpen muhnahs lalos? Nga fahk nuh suwos, kowos fin nuhnkuh ma inge kowos nuhnkuh ke wacngihn srihpac; tuh nga fahk nuh suwos, puhslac mwet suc puhtatlac ke katlas; ac liye ma inge nuhnuhnkwekowos;

13 Tuh Leum El lwelah mwet suwohswohs in acnwucki tuh nuhnuhnkuh suwohs ac nuhnuhnkuh Lal in tuhkuh nuh fin mwet koluk; ke ma inge kowos tiac enenuh in nuhnkuh tuh mwet suwohswohs uh tuhlac ke srihpen elos acnwucki; tuhsruhk liye, elos ilyak nuh ke nien monglac luhn Leum God lalos.

14 Ac inge liye, nga fahk nuh suwos, nga fosrngah yohk tuh nuhnuhnkuh luhn God ac tuhkuh nuh fin mwet inge, ke srihpen kohlohkihn yohk lalos, ahok, finne kohlohkihn luhn kafucrmacn lasr, ac soaru yohk lalos nuh sin mwet wiyaclos, ahok, nuh selos suc tuh acnwucki.

15 Tuh fuhnuh tiac ke koluk ma muhtwacwacack emet ke sifacsr, luhkuhn kuht kuh in lain mwet lokoalok lasr tuh elos in tiac kuhtangkuhtlac.

16 Ahok, fuhnuh tiac ke mweun se ma srolah inmahsrlosr sifacna; ahok, fuhnuh tiac ma ke mwet lal tohkohsrah inge, suc oraclah ahkmas yohk inmahsrlosr sifacna; ahok, ke pacl se ma kuht akuhkuhin inmahsrlosr sifacna, fuhnuh kuht toweniyac kuhiyacsr nuh sie oacna ke kuht tuh oruh met ah; ahok, fuhnuh tiac ma ke kena luhn kuh ac wal yohk suc mwet lal tohkohsrah elos sruok facsr; fuhnuh elos pwacye nuh ke srihpac luhn sukohsohk lasr, ac tuhkweni nuh sie wi kuht, ac som lain mwet lokoalok lasr, liki na in sruhkwack katlas nahtuhlos in lain kuht, suc pa srihpen ahkmas yohk inmahsrlosr sifacna; ahok, fuhnuh kuht som lainuhlos ke kuh luhn Leum, luhkuhn kuht ukwacack mwet lokoalok lasr, tuh luhkuhn tuh oreklac, fal nuh ke ahkpwacyeiyucklac luhn kahs Lal.

17 Tuhsruhk liye, inge mwet Laman elos tuhkuh nuh yohrohsr, sruokyac acn sesr, ac elos ahkmasye mwet lasr ke katlas, ahok, muhtwacn lasr ac tuhlihk nahtuhsr, ac oacyacpac usacloslac srohoh, oruh tuh elos in kweok ke kain in mwe ahkkweok nuhkwewa, ac ma inge ke srihpen koluk yohk lalos suc suk kuh ac wal fuhlwact, ahok, finne mwet luhn tohkohsrah ingoh.

18 Tuhsruhk efuh kuh nga in fahk yohk ke ma inge? Tuh kuht tiac etuh tuhsruhk tuh lah meac kowos suk nuh ke wal fuhlwact. Kuht tiac etuh tuhsruhk tuh lah kowos oacyacpac mwet suhlallacl nuh sin acn lowos.

19 Kuh yac kowos soarui kuht ke srihpen kowos muhta infulwen acn lasr ac kowos rauniyucklac ke mwet topang, tuh kowos tiacna oruh tuh mongo in suhpweyuckme nuh yohrohsr, ac oacyacpac mwet in ahkfokokoyelah un mwet mweun lasr?

20 Yac kowos muhlkuhnlah masap luhn Leum God lowos? Ahok, yac kowos muhlkuhnlah srohoh luhn pahpah tomowos? Yac kowos muhlkuhnlah pacl pucspucs ma kuht moliyucklac liki poun mwet lokoalok lasr?

21 Kuh yac kowos nuhnkuh muh Leum El ac srwackna molikuhtlac, ke kuht muhta ke nien muhta fuhlwact lasr ac tiacna orekmakihn ohiyac suc Leum El acse nuh sesr?

22 Ahok, yac kowos ac muhta na tiac mukwikwi ke kowos rauniyucklac sin tausin selos, ahok, ac singucul luhn tausin, suc oacyacpac muhta tiac mukwikwi, a oasr tausin mwet raunweack mahsrol luhn acn uh suc puhtatlac ke katlas, ahok, kihnetuh ac srahsraha?

23 Yac kowos nuhnkuh muh God El ac liye kowos oacna in muh wacngihn mwacta lowos ke kowos muhta tiac mukwikwi ac liye ma inge? Liye nga fahk nuh suwos, Moh. Inge nga kena tuh kowos in esam lah God El fahk lah lun vessel uh ac ahknwacsnwacsyeyucklac met, na fah lihkihn vessel uh ac oacyacpac ahknwacsnwacsyeyucklac.

24 Ac inge, fin kowos tiac auliyak ke ma suc kowos oraclah, ac muhtwacwacack in tuyak ac mukwikwi, ac suhpwacma mongo ac mwet nuh yohrohsr, ac oacyacpac nuh yohrohl Helaman, tuh elan kuh in karuhnguhnwacng ipin acn ma el sifilpac sruokyac, ac tuh kuht in kuh pac in sifilpac eis ma luhlah ke ma lasr ke ipin acn inge, liye ac fal tuh kuht in tiac sifil lain mwet Laman ne ke na kuht ahknwacsnwacsyelah lun vessel lasr, ahok, finne sifac yohk luhn kafucrmacn lasr.

25 Ac fin kowos tiacna oraclah kena luhn lwacta luhk uh, ac tuhkuh ac ahkkahlwemye nuh sihk sie nguhnnguhn pwacye luhn sukohsohk, ac srihke in ahkkweye ac ahkfokokoye un mwet mweun lasr, ac sang nuh selos mongo in kahsrelos, liye nga fah fihliyac sie ip luhn un mwet sukohsohk luhk in karuhnguhnwacng ipin acn se ke acn lasr, ac nga fah fihliyac kuh ac insewowo luhn God faclos, tuh wacngihn kuh sahyac kuh in orekma in lainuhlos—

26 Ac ma inge ke srihpen luhlahlfongi yohk lalos, ac mongfihsrwacsr lalos ke kweok lalos—

27 Ac nga fah tuhkuh nuh yuruwos, ac fin oasr kuhtwena inmahsrlowos suc luhngse sukohsohk, ahok, fin oasr kihtin sukohsohk luhlah, liye nga fah moklweack lainyuck inmahsrlowos, finne ne ke na elos suc kena in sruok kuh ac wal fuhlwact ac fah wacngihnlac.

28 Ahok, liye nga tiacna sahngweng ke kuh lowos kuh ke wal fuhlwact lowos, tuhsruhk God luhk pa El suc nga sahngweng se; ac tuh fal nuh ke masap Lal tuh nga in eis katlas nuhtihk in karihngihn srihpac luhn acn luhk, ac ke srihpen ma koluk lowos oruh kuht kweokkihn misac na yohk.

29 Liye pacl, ahok, pacl uh tuhkuh inge, tuh kowos fin tiac moklekowosyak sifacna nuh ke karihngihnyen acn lowos ac tuhlihk srihsrihk nuhtuwos, katlas luhn nuhnuhnkuh suwohs ac ahtlah lucng liki kowos; ahok, ac ma inge ac fah puhtatlac nuh fowos ac fahsri kowos finne nuh ke kuhnausyucklac yohk lowos.

30 Liye, nga sano kahsruh suwos me; ac, kowos fin tiac oruh akwuck in kahsre kuht, liye, ngwac tuhkuh nuh yuruwos, finne nuh fin acn lal Zarahemla, ac paki kowos ke katlas, yohkna tuh in wacngihnlac kuh lowos in tulokihn kapkapwack luhn mwet inge ke ohiyac luhn sukohsohk lasr.

31 Tuh liye, Leum El fah tiac lwelah tuh kowos in muhta ac upaclah ke ma koluk lowos in kuhnahoslah mwet suwohswohs Lal.

32 Liye, yac kowos nuhnkuh muh Leum El ac fihlikowoslac ac tuhkuh in nuhnuhnkuh lain mwet Laman, ke facsin luhn pahpah tuhmwaclos pa oruh kasrkuhsrak lalos uh, ahok, ac ma inge tuhpuhliyucki selos suc lain kuht, ke ma koluk lowos uh ma ke srihpen luhngse lowos in kaksakihnyuck ac ke ma wacngihn srihpac luhn facluh?

33 Kowos etuh lah kowos ahkkolukye masap luhn God, ac kowos etuh lah kowos longyac ma inge ye niyowos. Liye, Leum El fahk nuh sihk: Elos suc kom srihsrngiyac in kafuhnah lom elos tiacna auliyak ke ma tahfonglac ac ma koluk lalos, kom fah som in mweun lainuhlos.

34 Ac inge liye, nga, Moroni, kolyuck, fal nuh ke wuhlweacng suc nga tuh oraclah in liyacacng masap luhn God luhk; ke ma inge nga kena tuh kowos in fungyang nuh ke kahs luhn God, ac silahklahk suhpwacma nuh yuruk mwe kahsruh lowos ac mwet lowos, ac oacyacpac nuh yohrohl Helaman.

35 Ac liye, kowos fin tiacna oruh ma inge ngwac sa na tuhkuh nuh yuruwos; tuh liye, God El ac tiac lwelah tuh kuht in misac ke masrinsrwacl; ke ma inge El fah use nuh sesr mongo nowos, finne fin ma inge enenuh in orek ke katlas. Inge liye tuh kowos in ahkpwacyeiye kahs luhn God.

36 Liye, nga pa Moroni, sifen kacptin lowos. Nga tiac suk nuh ke kuh, tuhsruhk in kihlyac ma inge nuh ten. Nga tiac suk in kaksakihnyuck, tuhsruhk in kaksakihn God luhk, ac suk ke sukohsohk ac kasrpen acn sihk. Ac ohinge nga kaliyac lwacta luhk.