1 Na tukun ma inge tukun Amulek el ahksahfye kahs inge, elos sifacna som liki un mwet pucspucs sac ac tuhkuh nuh fin acn Jershon.

2 Ahok, ac elos suc luhlah sin mwet wiyacl, tukun elos luti kahs uh nuh sin mwet Zoram, elos oacyacpac tuhkuh nuh fin acn Jershon.

3 Ac tukun ma inge tukun ip se ma pwengpweng kuhtuh sin mwet Zoram elos toweni pwacpa ke kahs ma lutiyuck nuh selos, elos kasrkuhsrakwack ke srihpen kahs uh, tuh ma inge kuhnahoslah kuhtasrihk lalos; ke ma inge elos tiacna porongo kahs uh.

4 Ac elos som ac tuhkweni nuh sie fin acn nuhkwewa luhn mwet nuhkwewa, ac pwacpa nuh selos ke kahs ma sruhmuhnyuck.

5 Inge mwet kol lalos ac mwet tol lalos ac mwet luti lalos tiacna lwelah mwet uh in etuh ke kena lalos; ke ma inge elos konwacack ke lukmac nuhnak luhn mwet ah nohfohn.

6 Ac tukun ma inge elos konwacack nuhnak luhn mwet ah nohfohn, elos suc insese nuh ke kahs ma sruhmuhnyuck sel Alma ac mwet wiyacl elos lihsyucklac liki acn we; ac puhs suhnuhn mwet; ac elos oacyacpac tuhkuh nuh fin acn Jershon.

7 Ac tukun ma inge Alma ac mwet wiyacl elos tuh luti nuh selos.

8 Inge mwet luhn mwet Zoram elos tuh kasrkuhsrak sin mwet lal Ammon suc oasr fin acn Jershon, ac mwet kol fuhlwact luhn mwet Zoram, el sie mwet na koluk, el suhpwaclah nuh yurun mwet lal Ammon in kena selos tuh elos in lihsyucklac liki acn selos elos nuhkwewa suc tuhkuh luhkwelos nuh fin acn selos.

9 Ac el fahklah kahs kohu pucspucs in lainuhlos. Ac inge mwet lal Ammon elos tiacna sahngweng ke kahs lalos; ke ma inge elos tiacna luhsuhltahlwack, tuhsruhk elos eisaclos nuhkwewa mwet suhkahsruhp luhn mwet Zoram ma tuhkuh nuh yohrohlos; ac elos tuh kihtaclos, ac nokomuhlosyang, ac tuh sang nuh selos acn in usru selos; ac elos tuh kahsrelos fal nuh ke luhngse lalos.

10 Inge ma se inge tuh puhrakwack mwet Zoram in kasrkuhsrak sin mwet lal Ammon, ac elos muhtwacwacack in sramsram nuh sin mwet Laman ac in puhrakuhlosyak in kasrkuhsrak selos.

11 Ac ohinge mwet Zoram ac mwet Laman elos muhtwacwacack in ahkolah in mweun lain mwet lal Ammon, ac oacyacpac in lain mwet Nephi.

12 Ac ohinge sahflah yac ahksingucul itkohsr ke kolyuck luhn mwet nuhnuhnkuh fin mwet lal Nephi.

13 Ac mwet lal Ammon elos som liki acn Jershon, ac tuhkuh nuh fin acn Melek, ac sang acn Jershon nuh sin mwet mweun luhn mwet Nephi, tuh elos in kuh in lain mwet mweun luhn mwet Laman ac mwet mweun luhn mwet Zoram; ac ohinge srolah sie mweun inmahsrlon mwet Laman ac mwet Nephi, ke yac ahksingucul alkosr ke kolyuck luhn mwet nuhnuhnkuh; ac sie sramsram fototo ac fah utuckuh ke mweun lalos tukun ma inge.

14 Ac Alma, ac Ammon, ac mwet wiyaclos, ac oacyacpac wen luo nahtuhl Alma elos fohlohk nuh fin acn Zarahemla, tukun elos tuh orekmakihnyuck ke poun God in use mwet Zoram pucspucs in auliyak; ac elos suc utuckuh in auliyak elos lihsyucklac liki acn selos; tuhsruhk oasr acn in usru lalos fin acn Jershon, ac elos sruhkwack kuhfwen mwe mweun in karuhnguhnuhlosyang sifacna, ac muhtwacn kiyaclos, ac tuhlihk, ac acn selos.

15 Inge Alma, el ahsor ke ma koluk luhn mwet lal; ahok ke mweun, ac ahkmas, ac fohs ma oasr inmahsrlolos; ac ke el fahkwack kahs uh, kuh suhpweyucklac in fahkwack kahs uh, inmahsrlon mwet nuhkwewa ke siti nuhkwewa; ac el liye lah insiacn mwet uh muhtwacwacack in upaclah, ac elos muhtwacwacack in ahkkuluk ke srihpen suwohswohs luhn kahs uh, insiacl arulacna ahsor.

16 Ke ma inge, el oruh tuh wen nahtuhl in tuhkweni nuh sie, tuh elan kuh in sang nuh selos nuhkwewa ma kunacl, sie sin sie, ke ma nuh ke suwohswohs. Ac oasr yohrohsr sie sramsram fototo ke masap lal, suc el sang nuh selos fal nuh ke ma sihmlac lal sifacna.