1 Ac tukun ma inge tukun el ahksahfyelah sramsram lal nuh sin mwet ah puhs selos tuh luhlahlfongi kahs lal, ac muhtwacwacack in auliyak, ac in suk ma suhmuhslah.

2 Tuhsruhk puhs selos kena tuh elos in kuh in kuhnahosuhllah Alma ac Amulek; tuh elos kasrkuhsrak sel Alma, ke srihpen kahlwemiyacn kahs lal nuh sel Zeezrom; ac elos oacyacpac fahk lah Amulek el kikiacp nuh selos, ac elos lain masap lalos ac oacyacpac lain mwet mukwikwi ke loh ac mwet nuhnuhnkuh lalos.

3 Ac elos oacyacpac kasrkuhsrak sel Alma ac Amulek; ac ke srihpen elos fahkwack arulacna kahlwem in lain ma koluk lalos, elos suk in usacloslac in srohoh.

4 Tuhsruhk tukun ma inge elos tiacna; tuhsruhk elos usacloslac ac kapriltahluh ke mwe kapihr fokoko, ac usacloslac nuh ye muhtuhn mwet nuhnuhnkuh fuhlwact luhn acn ah.

5 Ac mwet ah som ac orek loh lainuhlos—fahkwack lah elos lain masap uh, ac mwet mukwikwi ke masap ac mwet nuhnuhnkuh lalos fin acn ah, ac oacyacpac sin mwet nuhkwewa fin acn sac; ac oacyacpac fahkwack lah oasr God sefanna, ac lah El enenuh in suhpwacma Wen nahtuhl inmahsrlon mwet ah, tuhsruhk El tiac enenuh in molweloslac; ac mwet ah fahkwack ma pucspucs in lainuhl Alma ac Amulek. Inge ma inge orek ye muhtuhn mwet nuhnuhnkuh fuhlwact fin acn ah.

6 Ac tukun ma inge Zeezrom el lut ke kahs ma sramsramkihnyuck ah; ac el oacyacpac etuh ke lohsr luhn nuhnak uh, suc el oraclah inmahsrlon mwet ah ke kahs kikiacp lal; ac nguhnal muhtwacwacack in muhsahllah ke etuh lal ke mwacta koluk lal; ahok, el muhtwacwacack in rauniyucklac ke kweok luhn hell.

7 Ac tukun ma inge el muhtwacwacack in wowoyak nuh sin mwet uh, fahk: Liye, nga koluk, ac mwet inge nwacsnwacs ye muhtuhn God. Ac el muhtwacwacack in taltal kaclos ke pacl sac fahlac; tuhsruhk elos lainuhl, fahk: Yac kom oacyacpac mihsen devil? Ac elos acni nuh facl, ac luhsuhllah luhkwelos, ac oacyacpac elos nuhkwewa suc luhlahlfongi ke kahs ma sruhmuhnyuck sel Alma ac Amulek; ac elos luhsuhltahlwack, ac suhpwaclah mwet in tuhngaluhlos ke yot.

8 Ac elos usacni muhtwacn kiyaclos ac tuhlihk srihsrihk nahtuhlos nuh sie, ac kuhtwena mwet suc luhlahlfongi ac lutiyuck in luhlahlfongi ke kahs luhn God elos oruh tuh elos in totoyang nuh ke e; ac elos oacyacpac sang ma sihmlac lalos suc nein ma suhmuhslah muhtahl, ac oacyacpac tohlwacng ma inge nuh ke e, tuh ma inge in fihrihryak ac kuhnausyucklac ke e.

9 Ac tukun ma inge elos usacl Alma ac Amulek, ac usacloslac nuh ke acn in acnwucki, tuh elos in kuh in liye kuhnausyucklac lalos suc isihkyuckyak ke e.

10 Ac ke Amulek el liye kweok luhn muhtwacn ac tuhlihk srihsrihk suc isihkyuckyak ke e, el oacyacpac kweoklacna; ac el fahk nuh sel Alma: Kuht kuh in liye fuhkah ma arulacna koluk sikyak inge? Ke ma inge lwelah kuht in kohllah pahosr, ac orekmakihn kuh luhn God suc oasr yohrohsr, ac molweloslac liki e uh.

11 Tuhsruhk Alma el fahk nuh sel: Nguhn sapkihnyuc tuh nga in tiac kohllah pouk; tuh liye Leum El eisaclos nuh lucng nuh yohrohl sifacna, ke wolacna; ac El lwelah tuh elos in oruh ma se inge, kuh tuh mwet uh in oruh ma se inge nuh selos, in fal nuh ke kwekweiyen insiaclos, tuh nuhnuhnkuh ma El fah oruh nuh faclos ke kasrkuhsrak Lal ac suwohs; ac srahn mwet wo fah tuyak in mwe loh in lainuhlos, ahok, ac wowoyak upac in lainuhlos ke lwen sahflah.

12 Inge Amulek el fahk nuh sel Alma: Liye, sahp elos ac isihkkuhtyak pac.

13 Ac Alma el fahk: Lwelah in fal nuh ke luhngse luhn Leum. Tuhsruhk, liye, orekma lasr uh soenna sahflah; ke ma inge elos ac tiac isihkkuhtyak.

14 Na tukun ma inge ke monun mwet suc totoyang nuh ke e ah fihrihryak, ac oacyacpac ma sihmlac ma weluhlos totoyang ah, mwet nuhnuhnkuh fuhlwact fin acn sac tuhkuh ac tu ye muhtahl Alma ac Amulek, ke elos kapriyucki ah; ac el sruhngluhlos ke pahol ke lihkihn tuhpahlos, ac fahk nuh selos: Tukun ma kowos liye ah, yac kowos ac sifilpac luti nuh sin mwet inge, lah elos fah totoyang nuh ke sie luhluh in e ac sulfur?

15 Liye, kowos liye lah wacngihn kuh lowos in molwelah elos suc totoyang nuh ke e; God El tiacpac na molweloslac ke srihpen elos wi luhlahlfongi lowos. Ac mwet nuhnuhnkuh sac sifilpac sruhngluhlos ke lihkihn tuhpahlos, ac siyuck: Meac kowos ac fahk keimtacl sifacna?

16 Inge mwet nuhnuhnkuh se inge el wi akwuck ac luhlahlfongi lal Nehor, suc tuh unilyac Gideon.

17 Ac tukun ma inge Alma ac Amulek tiac na tohpohkohl; ac el sifilpac sruhngluhlos, ac usaclosyang nuh sin mwet liyacacng masap in totoyang nuh ke nien srohoh.

18 Ac ke elos totoyang nuh ke nien srohoh ke lusen lwen tolu, mwet mukwikwi ke loh, ac mwet nuhnuhnkuh, ac mwet tol, ac mwet luti pucspucs tuhkuh, suc oruh orekma se pac na lal Nehor ah; ac elos ilyak nuh nien srohoh in liyaclos, ac elos kihsen siyuck selos ke kahs pucspucs; tuhsruhk elos tiacna tohpohkohlos.

19 Ac tukun ma inge mwet nuhnuhnkuh sac tu ye muhtahlos, ac fahk: Efuh kowos tiac topuk kahs luhn mwet inge? Yac kowos tiac etuh lah oasr kuh luhk in uskowoslac nuh ke e fihrihr uh? Ac el sapkihn nuh selos in sramsram; tuhsruhk elos tiacna topuk.

20 Ac tukun ma inge elos som ac som ke inkacnek lalos, tuhsruhk sifilpac tuhkuh ke lwen tok ah; ac mwet nuhnuhnkuh sac sifilpac sruhngluhlos ke lihkihn tuhpahlos. Ac mwet pucspucs oacyacpac tuhkuh, ac sruhngluhlos, fahk: Yac kowos ac sifilpac tuyak ac nuhnuhnkuh mwet inge, ac lain masap lasr uh? Fin oasr kuh yohk lowos efuh kowos tiac sifacna molikowoslac?

21 Ac kain ma pucspucs inge elos tuh fahk nuh selos, ngalis inwihselos nuh selos, ac acni nuh faclos, fahk: Ac fuhkah luhmahsr ke kuht e lihsyucklac uh?

22 Ac kain in ma pucspucs, ahok, kain in ma pucspucs nuhkwewa elos tuh fahk nuh selos; ac ohinge elos isruhnuhlos ke lusen lwen pucspucs. Ac elos tiacna sang mongo nuh selos tuh elos in masrinsrwacl, ac kof tuh elos in malu; ac elos oacyacpac eislah luhkwelos nuknuk lalos tuh elos kohflohfohl; ac ohinge elos kapriyucki ke mwe kapihr fokoko, ac srohoh ke nien srohoh.

23 Ac tukun ma inge elos tuh kweok ke lusen lwen pucspucs, (ac ke lwen ahksingucul luo, ke mahlwem ahksingucul, ke yac ahksingucul ke kolyuck luhn mwet nuhnuhnkuh nuh fin mwet lal Nephi) tuh mwet nuhnuhnkuh fuhlwact fin acn Ammonihah ac puhs sin mwet luti lalos ac mwet mukwikwi ke loh lalos elos ilyak nuh ke nien srohoh se ma Alma ac Amulek kapriyucki ke mwe kapihr.

24 Ac mwet nuhnuhnkuh fuhlwact sac tu ye muhtahlos, ac sifilpac sruhngluhlos, ac fahk nuh selos: Fin oasr kuh luhn God yuruwos sifacna tuhlwekowoslac liki mwe kapihr inge, ac na kuht fah luhlahlfongi lah Leum El fah kuhnahoslah mwet inge fal nuh ke kahs lowos.

25 Ac tukun ma inge elos nohfohn som ac sruhngluhlos, fahk kahs sac pac na, finne ne ke na sun mwet sahflah sac; ac ke mwet sahflah sac sramsram tari nuh selos ah kuh luhn God tuhkuh nuh facl Alma ac Amulek, ac elos tuhkahkwek ac tuyak ke niyaclos.

26 Ac Alma el wowoyak, fahk: Lusac kac kuht ac kweokkihn mwe kweok yohk inge, O Leum? O Leum, use nuh sesr kuh ma fal nuh ke luhlahlfongi lasr suc oasr in Kraist, finne nuh ke molwelah. Ac elos kuhnahoslah mwe kapihr ma elos kapriyucki kac; ac ke mwet ah liye ma inge, elos muhtwacwacack in kahing, tuh sahngweng in kuhnausyucklac tuhkuh nuh faclos.

27 Ac tukun ma inge arulacna yohk sahngweng lalos oruh elos puhtatlac nuh infohk uh, ac tiacna sun lihkihn sruhnguhl ke nien srohoh; ac facluh kusrusryak upac, ac pihsinkacn nien srohoh sac ipwelihk nuh ke ip luo, pwacnwacng ma inge puhtatlac nuh infohk uh; ac mwet nuhnuhnkuh fuhlwact, ac mwet mukwikwi ke loh, ac mwet tol, ac mwet luti, suc sruhngluhl Alma ac Amulek, elos acnwucki ke ikori luhn ma inge.

28 Ac Alma ac Amulek tuhkuh liki nien srohoh, ac elos tiacna ngalyak; tuh Leum El sang nuh selos kuh, fal nuh ke luhlahlfongi lalos ma oasr in Kraist. Ac elos silahklahk na som liki nien srohoh; ac elos tuhlweyucklac liki mwe kapihr lalos; ac nien srohoh sac ikori nuh infohk uh, ac mwet nuhkwewa loac ah, sahyacl Alma ac Amulek, acnwucki; ac elos silahklahk na tuhkuh nuh in siti sac.

29 Inge mwet ma lohngwack puhsra na luhlahp sac tuhkweni ulac kahsruhsr tuhkuh in etuh lah meac oraclah uh; ac ke elos liyaclwack Alma ac Amulek tuhkuh liki nien srohoh, ac pihsinkac ah ikori nuh infohk uh, elos arulacna sahngweng yohk, ac kahing liki ye muhtahl Alma ac Amulek oacna ke sie nacni uh kahing wi nacni fuhsr nahtuh liki lion luo; ac ohinge elos tuh kahing liki ye muhtahl Alma ac Amulek.