1 Ac tukun ma inge ke yac ahksingucul sie ke kolyuck luhn mwet nuhnuhnkuh fin mwet lal Nephi, ke lwen ahklimekohsr ke mahlwem ahkluo, oasr mihs yohk fin acn Zarahemla, wacngihn mweun kuh lokoalok ke lusen yac ekahsr, finne ne ke na lwen ahklimekohsr ke mahlwem ahkluo ke yac ahksingucul sie, oasr sie pweng in mweun lohngyuck fin acn uh.

2 Tuh liye, mwet mweun luhn mwet Laman elos tuhkuh nuh ke lacfahl ke innimac, nuh ke inmahsrol luhn acn ah, finne nuh ke siti Ammonihah, ac muhtwacwacack in uniyac mwet ah ac kuhnahoslah siti sac.

3 Ac na tukun ma inge, met liki mwet Nephi ah kuh in oracni sie luhpah fal ke mwet mweun in ukwaclosyak liki acn ah, elos kuhnahoslah mwet suc muhta ke siti Ammonihah, ac oacyacpac kuhtuh pac mwet ma muhta raunweack inmahsrol nuh Noah, ac eis mwet sahyac in srohoh utucklac nuh innimac.

4 Na tukun ma inge mwet Nephi elos kena in eisaclos suc srohoh utucklac nuh innimac.

5 Ke ma inge, el suc srihsrngiyucki in mwet in sifen kacptin luhn mwet mweun luhn mwet Nephi, (ac inel pa Zoram, ac wen luo nahtuhl, Lehi ac Aha)—inge Zoram ac wen luo nahtuhl, elos etuh lah Alma el pa mwet tol fuhlwact luhn alu ah, ac elos lohngwack lah oasr yohrohl nguhn luhn pahluh, ke ma inge elos som nuh yohrohl ac kena sel in etuh lah Leum El kena tuh elos in som nuh innimac in suk mwet wiyaclos, suc srohoh utucklac sin mwet Laman.

6 Ac tukun ma inge Alma el siyuck sin Leum ke ma inge. Ac Alma el fohlohk ac fahk nuh selos: Liye, mwet Laman elos fah tuhpallah infacl Sidon ke lacfahl nuh epang ke innimac, nuh lucngah ahluhkwelah inmahsrol fin acn lal Manti. Ac liye kom fah sonolos we, ke lacfahl kuhtuhlacp ke infacl Sidon, ac Leum El fah usot nuh sum mwet wiyom suc tuh utucklac srohoh sin mwet Laman.

7 Ac tukun ma inge Zoram ac wen nahtuhl elos som tuhpallah infacl Sidon, wi mwet mweun lalos, ac fahsr ahluhkwelah liki inmahsrol Manti ke lacfahl epang ke innimac, ma oasr ke lacfahl kuhtuhlacp ke infacl Sidon.

8 Ac elos tuhkuh sun mwet mweun luhn mwet Laman, ac mwet Laman elos fahsrelihk ac ukohkyak nuh ke innimac; ac elos us mwet wiyaclos suc tuh utucklac srohoh sin mwet Laman, ac wacngihn sie nguhna selos suc tuhlac suc tuh utucklac srohoh. Ac elos tuh utuckuh sin mwet wiyaclos in muhta fin acn selos sifacna.

9 Ac ohinge sahflah yac ahksingucul sie luhn mwet nuhnuhnkuh, mwet Laman elos lihsyucklac liki acn ah, ac mwet lal Ammonihah elos kuhnausyucklac; ahok, mwet nuhkwewa sin mwet Ammonihah elos kuhnausyucklac, ac oacyacpac siti luhlahp lalos, suc elos tuh fahk muh God El tiac kuh in kuhnahoslah, ke srihpen yohk na pwacye.

10 Tuhsruhk liye, ke lwen se na acn sac pihsaclah; ac mahno misac ah ngalngucluh sin kosro ac kosro lwemnak suhlallacl ke innimac.

11 Ne ohinge, tukun lwen pucspucs mahno misac lalos ah tohktohkyak fin acn ah, ac elos afihnyucklac ke sie mwe afyucf mihnini. Ac inge arulacna upac fohloh ah oruh mwet ah tuh tiacna som nuh we in muhta fin acn lal Ammonihah ke lusen yac pucspucs. Ac acn sac pahngpahng Ahsor luhn Nehor; tuh elos ma ke u lal Nehor, suc tuh acnwucki; ac acn selos pihsaclah.

12 Ac mwet Laman elos tiacna sifilpac tuhkuh in mweun lain mwet Nephi ne ke na yac ahksingucul ahkosr ke kolyuck luhn mwet nuhnuhnkuh fin mwet lal Nephi. Ac ohinge ke lusen yac tolu mwet lal Nephi ah muhta in mihs fin acn ah nohfohn.

13 Ac Alma ac Amulek elos som luti auliyak nuh sin mwet ah ke tempuhl lalos, ac ke nien monglac selos, ac oacyacpac ke iwen lohlngohk lalos, ma tuh muhsahiyucklac tukun ohiyac luhn mwet Jew.

14 Ac elos nuhkwewa suc lohng kahs lalos, elos sang nuh selos kahs luhn God, tiac sol mwet, pacl nuhkwewa.

15 Ac ohinge Alma ac Amulek elos som, ac oacyacpac mwet puhs suc suleyucklac nuh ke orekma se inge, in luti kahs uh fin acn ah nohfohn. Ac akwucki luhn alu sac etweyuckyak fin acn ah, ke acn nuhkwewa raunwelah, inmahsrlon mwet Nephi nuhkwewa.

16 Ac oacna sie inmahsrlolos nuhkwewa; Leum El okwaclah Nguhnal nuh fin acn ah nohfohn in ahkno nuhnak luhn tuhlihk nuhtin mwet, kuh in ahkno insiaclos in eis kahs ma enenuh in lutiyuck inmahsrlolos ke pacl in tuhkuh Lal—

17 Tuh elos in tiac kwekweelihk lain kahs uh, tuh elos in tiac suhlahlahlfongi, ac som nuh ke kuhnausyucklac, tuhsruhk tuh elos in kuh in eis kahs uh ke engan, ac oacna soko lah ma taflweyuckyang nuh ke sahk na pwacye uh, tuh elos in kuh in ilyak nuh ke nien monglac luhn Leum God lalos.

18 Inge mwet tol suc tuh som nuh inmahsrlon mwet ah tuh luti lain kikiacp nuhkwewa, ac kuhtasrihk, ac sok, ac fohs, ac suhlallacl, ac lokoalok, ac muhtuhnpo, pihsrapasr, fuhnmweti, ahkmas, orek kosro, ac kain in ohiyac suhfal nuhkwewa, wowoyak lah ma inge enenuh in tiac orek—

19 Luti ma suc fah enenuh in tuhkuh ke pacl na sa; ahok, luti ke met tuhkuh luhn Wen nuhtin God, kweok ac misac Lal, ac oacyacpac sifilpac moulyak luhn mwet misac.

20 Ac mwet pucspucs elos siyuck lah piyac acn se ma Wen nuhtin God El ac fah tuhkuh; ac elos tuh lutiyuck lah El fah sikyak nuh selos tukun El sifilpac moulyak; ac ma se inge mwet ah lohng ke engan ac pwacr yohk.

21 Ac inge tukun alu sac akwucki fin acn ah nohfohn—eis kuhtanglah sin devil, ac kahs luhn God lutiyuck ke nwacsnwacs fin acn ah nohfohn, ac Leum El okwaclah mwe insewowo Lal nuh fin mwet ah—ohinge sahflah yac ahksingucul ahkosr ke kolyuck luhn mwet nuhnuhnkuh fin mwet lal Nephi.