1 Inge, ke Ammon el tuh luti mwet lal Lamoni fahfahlac na, kuht fah fohlohklac nuh ke sramsram fototo kacl Aaron ac mwet wiyacl; tuh tukun el som liki acn Middoni el tuh kolyuck ke Nguhn nuh fin acn Nephi, finne nuh ke lohm sel tohkohsrah suc oasr fin acn ah nohfohn sahyacn na acn Ishmael; ac el pa pahpah tuhmwacl Lamoni.

2 Ac tukun ma inge ke el som nuh yohrohl nuh ke lohm luhlahp sel tohkohsrah, wi mwet wiyacl, ac sifacna epahsrlah ye muhtahl tohkohsrah, ac fahk nuh sel: Liye, O tohkohsrah, kuht mwet wiyacl Ammon, suc kom molwelah liki nien srohoh.

3 Ac inge, O tohkohsrah, kom fin fuhlwema moul lasr, kuht fah mwet kuhlwacnsap lom. Ac tohkohsrah el fahk nuh selos: Tuyak, tuh nga fah acsot nuh suwos moul lowos an, ac nga fah tiac lwelah tuh kowos in mwet kuhlwacnsap luhk; tuhsruhk nga fah kwacfe tuh kowos in karihngihnyuc; tuh nga luhman fosrngah ke nuhnak ke srihpen kuhlwacng ac wolacna luhn kahs lal Ammon mwet wiyowos; ac nga kena in etuh srihpac se oruh el tiac tuhkuh liki acn Middoni wi kowos.

4 Ac Aaron el fahk nuh sel tohkohsrah: Liye, Nguhn luhn Leum pahnglol nuh ke siepacna inkacnek; el som nuh fin acn Ishmael, in luti mwet lal Lamoni.

5 Inge tohkohsrah el fahk nuh selos: Meac ma se inge ma kowos fahk ke Nguhn luhn Leum? Liye, pa inge ma se suc ahkkolukyeyuc.

6 Ac oacyacpac, meac ma se inge ma Ammon el fahk—Kowos fin auliyak kowos fah moliyucklac, ac kowos fin tiac auliyak, kowos fah lihsyucklac ke lwen sahflah?

7 Ac Aaron el tohpohkohl ac fahk nuh sel: Yac kom luhlahlfongi lah oasr sie God? Ac tohkohsrah el fahk: Nga etuh lah mwet Amalek elos fahk lah oasr sie God, ac nga lwelah nuh selos tuh elos in muhsaheack nien muhtahl, tuh elos in kuh in sifacna toweni nuh sie in alu nuh Sel. Ac inge kom fin fahk lah oasr sie God, liye nga fah luhlahlfongi.

8 Ac inge ke Aaron el lohng ma inge, insiacl muhtwacwacack in engan, ac el fahk: Liye, pwacyena oacna ke kom moul, O tohkohsrah, oasr sie God.

9 Ac tohkohsrah el fahk: Yac God pa Nguhn Fuhlwact sac suc use pahpah tuhmwacsr liki acn Jerusalem?

10 Ac Aaron el fahk nuh sel: Ahok, El pa Nguhn Fuhlwact sac, ac El oraclah ma nuhkwewa kwewana inkuhsrao ac facluh. Kom luhlahlfongi ma inge?

11 Ac el fahk: Ahok, nga luhlahlfongi lah Nguhn Fuhlwact oraclah ma nuhkwewa, ac nga kena tuh kom in fahk nuh sihk ke ma inge nuhkwewa, ac nga fah luhlahlfongi kahs lom an.

12 Ac tukun ma inge ke Aaron el liye tuh tohkohsrah el ac luhlahlfongi kahs lal, el muhtwacwacack e ke oreklac lal Adam, riti ma suhmuhslah nuh sel tohkohsrah—God El oraclah fuhkah mwet uh tukun luhmahl sifacna, ac lah God El sang nuh sel masap, ac tuh ke srihpen tahfonglac, mwet uh puhtatlac.

13 Ac Aaron el tuh ahkuhtweyac nuh sel ma suhmuhslah e ke oreklac lal Adam, sruhmuhn puhtatlac luhn mwet uh ye muhtahl, ac moul in mahno ac oacyacpac plwacn in molwelah, suc tuh ahkoeyucklac liki pwelucng luhn facluh, kacn Kraist, nuh selos nuhkwewa suc fah luhlahlfongi ke Inel.

14 Ac ke mwet uh puhtatlac el tiac kuh in eis kuhtwena ma wo kacl sifacna; tuhsruhk kweok ac misac luhn Kraist iwaclah ma koluk lalos, ke luhlahlfongi ac auliyak, ac fahfahlac na; ac lah El kuhnahoslah mwe kapihr luhn misac, tuh kuclyuck uh fah tiac kuhtanglah, ac tuh ahsor yohk luhn misac fah ukumyucklac ke finsrak luhn wolacna; ac Aaron el ahkuhtweyac ma inge nuhkwewa nuh sel tohkohsrah.

15 Ac tukun ma inge tukun Aaron el ahkuhtweyac ma inge nuh sel, tohkohsrah el fahk: Meac nga enenuh in oruh tuh ngan kuh in eis moul ma pahtpaht ma kom sramsramkihn inge? Ahok, meac nga enenuh in oruh tuh ngan kuh in isuslac ke God, tuh nguhn koluk se inge in eisyucklac liki iniwuck, ac eis Nguhn Lal, tuh nga in kuh in sesseslah ke engan, tuh ngan kuh in tiac lihsyucklac ke lwen sahflah? Liye, el fahk, nga fah fuhlweack nohfohn ma luhk, ahok, nga fah fuhlweack tohkohsrahi luhk, tuh ngan kuh in eis engan yohk se inge.

16 Tuhsruhk Aaron el fahk nuh sel: Kom fin kena ma se inge, kom fin epahsrlah ye muhtuhn God, ahok, kom fin auliyak ke ma koluk lom nuhkwewa, ac fah epahsrlah ye muhtuhn God, ac pahngon Inel ke luhlahlfongi, luhlahlfongi lah kom fah eis, na fah kom eis finsrak se suc kom kena an.

17 Ac tukun ma inge ke Aaron el fahklah kahs inge, tohkohsrah el epahsrlah ye muhtuhn Leum, sikuckmuhtuhnte; ahok, finne el tuh sifacna ona fin fohk uh, ac lihksreni wowoyak, fahk:

18 O God, Aaron el fahk nuh sihk lah oasr sie God; ac fin oasr sie God, ac Kom fin pa God, yac Kom kuh in oruh Kom sifacna in etweyuck nuh sihk, ac nga fah tohllah nohfohn ma koluk luhk in etwekom, ac tuh nga in kuh in moulyak liki misac, ac moliyucklac ke lwen sahflah. Ac inge ke tohkohsrah el fahklah kahs inge, oacna in muh el misac.

19 Ac tukun ma inge ke mwet kuhlwacnsap lal kahsruhsr ac fahk nuh sel kasra ma nuhkwewa ma sikyak nuh sel tohkohsrah. Ac el ilyak nuh yohrohl tohkohsrah; ac ke el liyacl ona oacna in muh el misac, ac oacyacpac Aaron ac mwet wiyacl elos tu oacna in muh elos pa oruh el puhtatlac, el kasrkuhsrakwack selos, ac sapkihn tuh mwet kuhlwacnsap lal, kuh mwet kuhlwacnsap lal tohkohsrah, in eisaclos ac onweltahluh.

20 Inge mwet kuhlwacnsap ah liye srihpac se oruh tohkohsrah el puhtatlac ah, ke ma inge elos tiac ke fihliyac paholos facl Aaron ac mwet wiyacl; ac elos kwacfe sel kasra fahk: Efuh kom sapkihn tuh kuht in uniyac mwet inge, liye sie selos fokoko liki kuht nohfohn? Ke ma inge kuht fah misac ye muhtahlos.

21 Inge ke kasra el liye sahngweng luhn mwet kuhlwacnsap el oacyacpac muhtwacwacack in arulacna sahngweng, fin ac oasr ma koluk ac tuhkuh nuh facl. Ac el sapkihn mwet kuhlwacnsap lal tuh elos in som ac pahngon mwet uh, tuh elos in kuh in unilyac Aaron ac mwet wiyacl.

22 Inge ke Aaron el liye insacnweacng lal kasra, el, oacyacpac etuh kwekweiyen insiacn mwet ah, sahngweng tuh fin un mwet sac elos toweni nuh sie, ac oasr sie fohs luhlahp ac sie fohsack inmahsrlolos; ke ma inge el ahsroelah pahol ac oluhlwack tohkohsrah liki infohk uh, ac fahk nuh sel: Tu. Ac el tu ke niyacl, eis kuh lal.

23 Inge ma se inge oreklac ye muhtahl kasra ac mwet kuhlwacnsap puhs. Ac ke elos liye ma inge elos arulacna lut, ac muhtwacwacack in sahngweng. Ac tohkohsrah el tulac, ac muhtwacwacack in luti nuh selos. Ac el tuh luti nuh selos, yohkna oruh mwet lal nuhkwewa elos eklac forlah nuh sin Leum.

24 Inge oasr sie un mwet toweni nuh sie ke srihpen masap lal kasra, ac muhtwacwacack in yohk tohrkahskahs inmahsrlolos ke srihpacl Aaron ac mwet wiyacl.

25 Tuhsruhk tohkohsrah el tulac inmahsrlolos ac karuhnguhnuhlos. Ac elos ami nuh sel Aaron ac elos suc weluhl.

26 Ac tukun ma inge ke tohkohsrah el liye tuh mwet ah ami, el oruh tuh Aaron ac mwet wiyacl in tuyak infulwen un mwet ah, ac tuh elos in luti kahs uh nuh selos.

27 Ac tukun ma inge tohkohsrah el suhpwaclah sie mwe fahkwack nuh fin acn ah nohfohn, inmahsrlon mwet suc muhta fin acn lal nuhkwewa, suc muhta ke acn raunweack acn we, ma oasr sisken mahsrol finne nuh meoa ah, nuh kuhtuhlacp ac nuh rohtoh, ac ma sriyucklac liki acn Zarahemla ke sie inkacnek ohsrihksrihk ke innimac, ma tuhkuh na e ke meoa kuhtuhlacp nuh ke meoa rohtoh, ac raunweack mahsrol sisken inkof ah, ac mahsrol ke innimac ma oan nuh acir sisken acn Zarahemla, sahslah ke mahsrol Manti, sisken muhtuhn infacl Sidon, tuhkuh kuhtuhlacp me nuh rohtoh—ac ohinge mwet Laman ac mwet Nephi maelihk.

28 Inge, mwet alsruhngwesr luhn mwet Laman elos muhta ke innimac, ac muhta ke lohm nuknuk; ac elos osrwaclihk innimac ke lacfahl rohtoh, fin acn Nephi; ahok, ac oacyacpac ke lacfahl rohtoh fin acn Zarahemla, ke mahsrol sisken pe acn ah, ac nuh rohtoh fin acn Nephi, ke acn in usru se emet luhn pahpah tuhmwaclos, ac ohinge oan sisken pe acn ah.

29 Ac oacyacpac oasr mwet Laman pucspucs muhta kuhtuhlacp sisken inkof ah, yen ma mwet Nephi elos ukwaclosyak nuh we. Ac ohinge mwet Nephi elos tuh apkuhran in rauniyucklac sin mwet Laman; ne ohinge mwet Nephi elos tuh sruokyac nohfohn ip nuh acir ke mahsrol sisken innimac, ke muhtuhn infacl Sidon, kuhtuhlacp me nuh rohtoh, raunweack sisken innimac; ke lacfahl acir, finne ne ke na elos tuhkuh nuh acn se suc elos pahngon Puhs.

30 Ac oan sisken acn suc elos pahngon Ahsor, ma oan loesuhllah nuh acir tuh oruh acn se inge tuhkuh sun acn ma mwet tuh muhta we met ac kuhnausyucklac, suc sri lalos kuht sramsramkihn, suc sukokyak sin mwet lal Zarahemla, acn se inge pa acn se ma elos muhta we emet.

31 Ac elos tuhkuh liki acn we nuh ke lacyacn epang ke innimac. Ohinge acn ke lacfahl acir ah pahngpahng Ahsor, ac acn nuh lacfahl epang ah pahngpahng Puhs, sie innimac ma sesseslah ke kain in kosro lwemnak nuhkwewa, sie ip kac ah tuhkuh ke acn ma oan nuh acir in suk mongo.

32 Ac inge, lusac ah pa fuhfahsryucsr lwen se tahfuh nuh sin sie mwet Nephi, inmahsrlon acn Puhs ac acn Ahsor, ke meoa kuhtuhlacp me nuh rohtoh; ac ohinge acn Nephi ac acn Zarahemla apkuhran in rauniyucklac ke kof, tuh oasr sie ipin acn ohsrihksrihk inmahsrlon acn nuh acir ac ke acn nuh epang.

33 Ac tukun ma inge mwet Nephi elos muhta fin acn Puhs, finne meoa kuhtuhlacp me nuh rohtoh, ac ohinge mwet Nephi ke lahlmwetmwet lalos, wi mwet topang lalos ac mwet mweun lalos, tuh raunweack mwet Laman ke lacfahl epang, tuh ohinge elos in tiac sifilpac sruokyac acn acir, tuh elos in tiac kuh in nwacklah acn oan nuh acir.

34 Ke ma inge mwet Laman elos tiac kuh in sruokyac kuhtwena ma fin acn Nephi, ac ke innimac ma raunweack acn we. Inge pa inge lahlmwetmwet luhn mwet Nephi—oacna ke mwet Laman elos sie un mwet lokoalok nuh selos, elos tiac lwelah mwe kweok lalos ke pacl nuhkwewa, ac oacyacpac tuh in kuh in oasr sie acn ma elos kuh in kahing nuh we, fal nuh ke kena lalos.

35 Ac inge nga, tukun fahklah ma inge, sifilpac fohlohk nuh ke sramsram fototo lal Ammon ac Aaron, Omner ac Himni, ac mwet wiyaclos.