1 Ac inge, pa inge kahs lal Ammon nuh sin mwet wiyacl, suc fahk ohinge: Tamuhlwel wiyuck ac mwet wiyuck, liye nga fahk nuh suwos, fuhkah srihpac yohk lasr in engan; tuh yac kuht kuh in nuhnkuh na muh ke kuht muhtwacwacack liki acn Zarahemla lah God El ac use nuh sesr mwe insewowo yohk inge?

2 Ac inge, nga siyuck, mwe insewowo yohk fuhkah El use nuh sesr? Kowos kuh in fahk?

3 Liye, nga fahk nuh suwos; tuh mwet wiyacsr, mwet Laman, elos muhta in lohsr, ahok, finne ke luhf lohsr se emet ah, tuhsruhk liye, ekahsr selos utuckuh in liye kahlwem wolacna luhn God! Ac pa inge mwe insewowo se ma utuckuh nuh sesr, tuh kuht oreklac in kuhfa in orekmakihnyuck ke poun God in ahkfahsrye orekma yohk se inge.

4 Liye, tausin tausin selos engan, ac utuckuh nuh ke un mwet luhn God.

5 Liye, imac uh mwesrlah, ac kowos insewowo, tuh kowos orekmakihn mitmit, ac kosrwacni ke kuhiyowos nohfohn, ahok, lwen fohn kowos orekma; ac liye luhpan kahp in wheat lowos! Ac elos fah orekweni nuh ke nien fihl fokin imac, tuh ma inge in tiac koluklac.

6 Ahok, elos fah tiac ikorinyucki ke pahkah ke lwen sahflah; ahok, kuh elos fah tiac pac ulyuckyak ke eng for; tuhsruhk ke pahkah ac tuhkuh elos fah toweni nuh sie ke acn selos, tuh pahkah in tiac kuh in sahsacng nuh yohrohlos; ahok, kuh elos fah tiac pac ukuklac ke eng upac nuh ke oacna sie acn ma mwet lokoalok el sulaclah in usaclos we.

7 Tuhsruhk liye, elos oasr in poun Leum luhn kosrwacni, ac elos ma Lal; ac El fah ahkmoulyelosyak ke lwen sahflah.

8 Insewowo inen God lasr; lwelah kuht in on kaksakuhnuhl, ahok, lwelah kuht in sang kuloh nuh ke ine muhtahl Lal, tuh El oruh orekma suwohswohs ne tok ma pahtpaht.

9 Tuh fuhnuh kuht tiac tuhkuh liki acn Zarahemla, mwet sacohklacna wiyacsr inge, suc arulacna luhngse kuht, luhkuhn elos srwackna sesseslah ke kasrkuhsrak nuh sesr, ahok, ac luhkuhn elos oacyacpac mwet sac nuh sin God.

10 Ac tukun ma inge ke Ammon el fahklah kahs inge, tamuhlwel wiyacl Aaron el kalyeiluhl, fahk: Ammon, nga fosrngah tuh engan lom uskomlac in kohnkihn.

11 Tuhsruhk Ammon el fahk nuh sel: Nga tiac kohnkihn ke kuh luhk sifacna, kuh ke lahlmwetmwet luhk sifacna; tuhsruhk liye, engan luhk fohnlah, ahok, insiuck sesseslah ke engan, ac nga fah engan ke God luhk.

12 Ahok, nga etuh lah nga tiac oacwac; nuh ke kuh luhk nga muhnahs; ke ma inge nga fah tiac kohnkihn keik sifacna, tuhsruhk nga fah kohnkihn God luhk, tuh ke kuh Lal nga kuh in oruh ma nuhkwewa; ahok, liye, ma usrnguck pucspucs kuht oraclah fin acn se inge, suc kuht fah kaksakihn Inel ne tok ma pahtpaht.

13 Liye, tausin pucspucs ekahsr sin mwet wiyacsr El tuhlahlah liki mwe kweok luhn hell; ac elos utuckuh in onkihn luhngse molwelah, ac ohinge ke srihpen kuh luhn kahs Lal ma oasr yohrohsr, ke ma inge yac tiac oasr srihpac yohk lasr in engan?

14 Ahok, oasr srihpac lasr in kaksakuhnuhl ne tok ma pahtpaht, tuh El pa God Fuhlwactlacna, ac El tuhlahlah mwet wiyacsr liki mwe kapihr luhn hell.

15 Ahok, elos tuh rauniyucklac ke lohsr ac kuhnahoslah ma pahtpaht; tuhsruhk liye, El usaclosme nuh ke kahlwem ma pahtpaht Lal, ahok, nuh ke molwelah ma pahtpaht; ac elos apihnyucklac ke luhngse yohk Lal ma wacngihn ma oacna; ahok, ac kuht kuhfa in orekmakihnyuck ke pahol in oruh orekma yohk ac wolacna se inge.

16 Ke ma inge, lwelah kuht in kaksak, ahok, kuht fah kaksakihn Leum; ahok, kuht fah engan, tuh engan lasr fohnlah; ahok, kuht fah kaksakihn God lasr ne tok ma pahtpaht. Liye, suc kuh in arulacna kaksak yohk in Leum? Ahok, suc kuh in fahk upac ke kuh yohk Lal, ac ke pahkotwen Lal, ac ke mongfihsrwacsr Lal nuh sin tuhlihk nuhtin mwet? Liye, nga fahk nuh suwos, nga tiac kuh in fahk kihtinmac se emet ke ma nga puhlakihn.

17 Suc kuh in nuhnkuh muh God lasr El ac pahkotwen na pwacye in eiskuhtlac liki ohiyac suhfal, koluk, ac fohkfohk lasr?

18 Liye, kuht som finne ke kasrkuhsrak, ke kohu yohk in kuhnahoslah alu Lal.

19 O na, efuh El tiacna uskuhtlac nuh ke sie kuhnahoslah koluk, ahok, efuh El tiac lwelah katlas in nuhnuhnkuh suwohs Lal in puhtatyang nuh facsr, ac sruokkuhti nuh ke ahsor ma pahtpaht?

20 O, nguhnihk, apkuhran in oacna met ah, kahinglac ke nuhnkweyac. Liye, El tiacna oruh nuhnuhnkuh suwohs Lal nuh sesr, tuhsruhk pahkotwen yohk Lal uskuhtlac liki luhf in misac ac ahsor ma pahtpaht sac, finne nuh ke molwelah luhn nguhnasr.

21 Ac inge liye, mwet wiyuck, yac oasr mwet luhngse ma luhn facluh suc etuh ma inge? Nga fahk nuh suwos, wacngihn kuhtwena mwet suc etuh ma inge, sahyacn el suc auliyak.

22 Ahok, el suc auliyak ac orekmakihn luhlahlfongi, ac sang orekma wo, ac pruhe pacl nuhkwewa tiac tui—ituckyang nuh sel in etuh ke ma lukmac luhn God; ahok, ac fah ituckyang nuh sel in ahkkahlwemye ma suc soenna ahkkahlwemyeyuck; ahok, ac e fah ituckyang nuh sel in use tausin nguhna in auliyak, finne oacna ke utuckuh nuh sesr in use mwet wiyacsr inge in auliyak.

23 Inge yac kowos esam, mwet wiyuck, lah kuht fahk nuh sin mwet wiyacsr fin acn Zarahemla, kuht som nuh fin acn Nephi, in luti nuh sin mwet wiyacsr, mwet Laman, ac elos ahksruhksruhk isruhn kuht?

24 Tuh elos fahk nuh sesr: Yac kowos nuhnkuh muh kowos kuh in use mwet Laman in etwacack ma pwacye? Yac kowos nuhnkuh muh kowos kuh in ahkkahlwemye nuh sin mwet Laman ke suhtuhelac luhn facsin luhn pahpah tuhmwaclos, oacna sie un mwet lihkkeke oacna elos; suc insiaclos engan ke ahksohrohrye srah; suc sislah pacl lalos in oruh ma koluk emet; suc ohiyaclos oacna ohiyac luhn mwet tahfonglac e ke na muhtwacwacackiyac ah? Inge mwet wiyuck, kowos esam lah pa inge kahs lalos.

25 Ac yohkna elos tuh fahk: Lwelah kuht in mweun lainuhlos, tuh kuht in kuhnaosuhloslac ac ma koluk lalos liki acn uh, fin tiac elos ac puhseni liki kuht ac kuhnauskuhtlac.

26 Tuhsruhk liye, mwet sacohk wiyuck, kuht tuhkuh nuh innimac tiac ke srihpac in tuh kuhnahoslah mwet wiyacsr, tuhsruhk ke srihpac ma sahp kuht kuh in molwelah kuhtuh nguhna puh selos.

27 Inge ke insiacsr suhpwacr, ac kuht apkuhran in fohlohk, liye, Leum El ahkinsewowoye kuht, ac fahk: Som nuh inmahsrlon mwet wiyowos, mwet Laman, ac muhtweng ke mongfihsrwacsr ke kweok lowos, ac Nga fah acsot nuh suwos kuhtanglah.

28 Ac inge liye, kuht tuhkuh, ac wi inmahsrlolos; ac kuht mongfihsrwacsr ke kweok lasr, ac kuht kweokkihn ma upac nuhkwewa; ahok, kuht forfor nuh ke lohm nuh ke lohm, fuhrkihn pahkotwen luhn facluh—tiac ke pahkotwen luhn facluh muhkwena tuhsruhk ke pahkotwen luhn God.

29 Ac kuht ilyak nuh in lohm selos ac lotwelos, ac kuht lotwelos ke inkacnek lalos; ahok, ac kuht lotwelos fin inging lalos; ac kuht oacyacpac ilyak nuh lun tempuhl lalos ac iwen lohlngohk lalos ac lotwelos; ac kuht lihsyuckyak, ac isruhnyuck, ac acniyuck, ac puokyuck lihkihn tuhpahsr; ac kuht tuhngalyuck, ac utucklac ac kapriyucki ke mwe kapihr fokoko, ac tolyuckyang nuh ke nien srohoh; ac ke kuh ac lahlmwetmwet luhn God kuht sifilpac moliyucklac.

30 Ac kuht kweokkihn kain in kweok nuhkwewa, ac ma inge nuhkwewa, tuh sahp kuht in kuh in orekmakihnyuck in molwelah kuhtuh nguhna; ac kuht nuhnkuh muh engan lasr fah fohnlah fin sahp kuht kuh in orekmakihnyuck in molwelah kuhtuh.

31 Inge liye, kuht kuh in ngwetlah ac liye fahko in orekma lasr; ac yac elos puh? Nga fahk nuh suwos, Moh, elos puhs; ahok, ac kuht kuh in loh ke inse pwacye lalos, ke srihpen luhngse lalos nuh sin mwet wiyaclos ac oacyacpac nuh sesr.

32 Tuh liye, elos ac fuhlweack moul lalos liki na in eislah moul luhn mwet lokoalok lalos; ac elos pihkihnyac loal kuhfwen mwe mweun nahtuhlos nuh infohk uh, ke srihpen luhngse lalos nuh sin mwet wiyaclos.

33 Ac inge liye nga fahk nuh suwos, yac nuh oasr luhngse yohk ohinge fin acn uh nohfohn? Liye, nga fahk nuh suwos, Moh, wacngihn, finne inmahsrlon mwet Nephi.

34 Tuh liye, elos ac sruhkwack mwe mweun in lain mwet wiyaclos; elos tiac lwelah elos sifacna in acnwucki. Tuhsruhk liye mwet ekahsr inge suc fihliyac moul lalos; ac kuht etuh lah elos som nuh yurun God lalos, ke srihpen luhngse lalos ac ke sruhnga lalos nuh ke ma koluk.

35 Inge yac tiac oasr srihpac lasr in engan? Ahok, nga fahk nuh suwos, wacngihn kuhtwena mwet suc oasr srihpac yohk la in engan oacna kuht, e ke muhtwacwacackiyacn facluh me; ahok, ac engan luhk utucklac, finne in kohnkihn ke God luhk; tuh oasr yohrohl kuh nuhkwewa, lahlmwetmwet nuhkwewa, ac etatwen nuhkwewa; El etuh ma nuhkwewa, ac El sie God pahkotwen, finne nuh ke molwelah, nuh selos suc fah auliyak ac luhlahlfongi ke Inel.

36 Inge fin ma inge kohnkihn, na nga fah kohnkihn; tuh pa inge moul luhk ac kahlwem luhk, engan luhk ac molwelah luhk, ac molwelah liki ma koluk luhk liki ahsor ma pahtpaht. Ahok, insewowo inen God luhk, suc nuhnkuh mwet Lal, suc sie lah ke sahk luhn Israel, ac suc tuhlac liki mahno la ke sie acn sac; ahok, nga fahk, insewowo inen God luhk, suc nuhnkwe kuht, mwet forfor ke sie acn sac.

37 Inge mwet wiyuck, kuht liye lah God El nuhnkuh mwet nuhkwewa, ke oacna sie acn elos oasr we; ahok, El oacklah mwet Lal, ac inse pahkotwen Lal afuhnlah facluh nohfohn. Inge pa inge engan luhk, ac sang kuloh yohk luhk; ahok, ac nga fah sang kuloh nuh sin God luhk ne tok ma pahtpaht. Amen.