1 O tuh nga fin sie lipufacn, ac kuh in eis finsrak luhn insiuck, tuh ngan kuh in som ac sramsram ke mwe ukuk luhn God, ke sie puhsra in usruk facluh, ac luti nuh sin mwet nuhkwewa in auliyak!

2 Ahok, nga kena fahkwack nuh sin mwet nuhkwewa, oacna ke puhsren puhlahl, ke auliyak ac plwacn in molwelah, tuh elos enenuh in auliyak ac tuhkuh nuh yurun God lasr, tuh in tiac sifilpac oasr ahsor fin facluh nohfohn.

3 Tuhsruhk liye, nga sie mwet, ac oruh ma koluk ke kena luhk; tuh nga enenuh in engan ke ma suc Leum El use nuh sihk.

4 Nga tiac enenuh kena luhk uh in puhkanwack masap fokoko luhn sie God suwohs, tuh nga etuh lah El sang nuh sin mwet fal nuh ke kena lalos, lah ac nuh ke misac kuh nuh ke moul; ahok, nga etuh lah El sang nuh sin mwet, ahok, sang nuh selos masap ma tiac kuh in eklac, in fal nuh ke luhngse lalos, lah ac nuh ke molwelah kuh nuh ke kuhnahoslah.

5 Ahok, ac nga etuh lah ma wo ac ma koluk tuhkuh nuh ye muhtuhn mwet nuhkwewa; el suc tiac etuh ma wo liki ma koluk uh wacngihn mwactwacl; tuhsruhk el suc etuh ma wo ac ma koluk, ituckyang nuh sel fal nuh ke kena lal, lah el luhngse ma wo kuh ma koluk, moul kuh misac, engan kuh ahsor luhn nuhnak.

6 Inge, liye tuh nga etuh ma inge, efuh kuh ngan luhngse yohk liki na in oruh orekma suc nga pahngyak nuh kac?

7 Efuh kuh nga kena tuh nga in sie lipufacn, tuh nga kuh in sramsram nuh sin mwet nuhkwewa fin facluh nohfohn?

8 Tuh liye, Leum El sang nuh sin muhtuhnfacl nuhkwewa, ke muhtuhnfacl ac kahs lalos sifacna, in luti kahs Lal, ahok, ke lahlmwetmwet, ma nuhkwewa El liye fal tuh in oasr lalos; ke ma inge kuht liye lah Leum El kihsen kahsruh ke lahlmwetmwet, fal nuh ke ma suc suwohs ac pwacye.

9 Nga etuh ma suc Leum El sapkihn nuh sihk, ac nga kaksakihn. Nga tiacna kaksakihnyuc sifacna, tuhsruhk nga kaksakihn ma suc Leum El sapkihn nuh sihk; ahok, ac pa inge kaksak luhk, tuh sahp ngan kuh in sie kuhfa in orekmakihnyuck ke poun God in use kuhtuh mwet in auliyak; ac pa inge engan luhk.

10 Ac liye, ke nga liye puhs sin mwet wiyuck elos auli na pwacye, ac tuhkuh nuh yurun Leum God lalos, na nguhnihk sesseslah ke engan; na nga esamwack ma suc Leum El oruh nuh sihk, ahok, finne tuh El lohng pruhe luhk; ahok, na nga esam po pahkotwen Lal suc El kohlma nuh yuruk.

11 Ahok, ac nga oacyacpac esam srohoh luhn pahpah tuhmwacsr; tuh pwacyena nga etuh lah Leum El tuh molweloslac liki srohoh, ac ke ma inge tuh sramtweack alu Lal; ahok, Leum God, God lal Abraham, God lal Isaac, ac God lal Jacob, El tuh molweloslac liki srohoh.

12 Ahok, nga kwacna esam srohoh luhn pahpah tuhmwacsr; ac God sacn pacna suc molweloslac liki poun mwet Egypt El tuh molweloslac liki srohoh.

13 Ahok, ac God sacn pacna tuh sramtweack alu Lal inmahsrlolos; ahok, ac God sacn pacna El tuh pahngonyucyak ke sie pahng muhtahl, in luti kahs uh nuh sin mwet inge, ac El use nuh sihk kuhtanglah yohk, inge engan luhk fohnlah.

14 Tuhsruhk nga tiac engan ke kuhtanglah luhk muhkwena, tuhsruhk engan luhk fohnlah liki met ah ke srihpen kuhtanglah luhn mwet wiyuck, suc tuh som nuh fin acn Nephi.

15 Liye, elos orekma kwemkahtuh, ac elos use fahko yohk; ac fuhkah luhpan yohkiyacn mwe sang lalos!

16 Inge, ke nga nuhnkuh ke kuhtanglah luhn mwet wiyuck inge nguhnihk utucklac, finne nuh ke fahsrelihk luhn nguhna liki mahno, oacna ke tuh sikyak, ohinge yohk engan luhk.

17 Ac inge lwelah God Elan sang nuh selos inge, mwet wiyuck, tuh elos in kuh in muhta ke tohkohsrahi luhn God; ahok, ac oacyacpac elos nuhkwewa suc pa fahko in orekma lalos tuh elos in tiac sifilpac som, tuhsruhk tuh elos in kaksakuhnuhl ne tok ma pahtpaht. Ac lwelah God Elan sang tuh in oreklac fal nuh ke kahs luhk, finne oacna ke nga sruhmuhn. Amen.