1 Inge tukun Alma el sruhmuhn kahs inge, elos suhpwaclah nuh sel kena in etuh lah elos enenuh in luhlahlfongi ke sie God, tuh elos in kuh in eis fahko se inge suc el sruhmuhn kac, kuh elos in ukwiyac fuhkah fihtac uh, kuh kahs suc el sruhmuhn, suc el fahk muh enenuh in ukwiyucki ke insiaclos; kuh ke ohiyac fuhkah ma elos enenuh in muhtwacwacack in mukwikwi ke luhlahlfongi lalos.

2 Ac Alma el fahk nuh selos: Liye, kowos fahk lah kowos tiac kuh in alu nuh sin God lowos ke srihpen kowos lihsyucklac liki iwen lohlngohk. Tuhsruhk liye, nga fahk nuh suwos, kowos fin nuhnkuh tuh kowos tiac kuh in alu nuh sin God, kowos tahfonglac na pwacye, ac kowos enenuh in suk ke ma suhmuhslah; kowos fin nuhnkuh muh elos luti kowos ma inge, kowos tiacna kahlwem selos.

3 Yac kowos esam in riti ma Zenos, mwet pahluh mahtuh, el fahk ke pruhe kuh alu?

4 Tuh el fahk: Kom pahkotwen, O God, tuh Kom lohng pruhe luhk, finne ke nga muhta ke innimac; ahok, Kom pahkotwen ke nga pruhe kaclos suc mwet lokoalok luhk, ac Kom tiac furohkohnohlosme nuh yuruk.

5 Ahok, O God, ac Kom pahkotwen nuh sihk ke nga tuh pruhe nuh Sum ke imac luhk; ke nga tuh wowoyak nuh Sum ke pruhe luhk, ac Kom tuh lohngyuc.

6 Ac sifilpac, O God, ke nga fohlohk nuh lohm sihk Kom tuh lohngyuc ke pruhe luhk.

7 Ac ke nga tuh foracng nuh ke infuhkihl sihk, O Leum, ac pruhe nuh Sum, Kom tuh lohngyuc.

8 Ahok, Kom pahkotwen nuh sin tuhlihk Nuhtum ke elos pruhe nuh Sum, in lohng Sum ac tiac sin mwet, ac Kom fah lohngohlos.

9 Ahok, O God, Kom pahkotwen nuh sihk, ac lohng pruhe luhk ke inmahsrlon un mwet Lom.

10 Ahok, ac Kom oacyacpac lohngyuc ke nga lihsyucklac ac koaseyuck sin mwet lokoalok luhk; ahok, Kom tuh lohng pruhe luhk, ac kasrkuhsrak sin mwet lokoalok luhk, ac Kom tuh fahsrelos ke kasrkuhsrak Lom ke kuhnahoslah sa.

11 Ac Kom tuh lohngyuc ke srihpen kweok luhk ac inse pwacye luhk; ac ma ke srihpen Wen nuhtum tuh Kom pahkotwen ohinge nuh sihk, ke ma inge nga fah pruhe nuh Sum ke mwe kweok luhk nuhkwewa, tuh in Kom pa mwe engan luhk; tuh Kom furohklah nuhnuhnkuh Lom likiyuc, ke srihpen Wen nuhtum.

12 Ac inge Alma el fahk nuh selos: Yac kowos luhlahlfongi ma suhmuhslah ingoh ma sihmlac selos ke pacl met ah?

13 Liye, kowos fin luhlahlfongi, kowos enenuh in luhlahlfongi ma Zenos el fahk; tuh, liye el fahk: Kom furohklah nuhnuhnkuh Lom ke srihpen Wen nuhtum.

14 Inge liye, mwet wiyuck, nga siyuck kowos fin riti tari ma suhmuhslah? Kowos fin riti tari, kowos kuh in suhlahlahlfongi fuhkah ke Wen nuhtin God?

15 Tuh tiacna sihmlac lah Zenos el muhkwena sramsramkihn ma inge, tuhsruhk Zenock el oacyacpac sramsramkihn ma inge—

16 Tuh liye, el fahk: Kom kasrkuhsrak, O Leum, sin mwet inge, ke srihpen elos fah tiacna kahlwem ke pahkotwen Lom ma kom sang nuh selos ke srihpen Wen nuhtum.

17 Ac inge, mwet wiyuck, kowos liye lah mwet pahluh ahkluo ke pacl met ah el fahkwack ke Wen nuhtin God, ac ke srihpen mwet uh tiacna kahlwem ke kahs lal elos tuhngaluhl ne ke na el misac.

18 Tuhsruhk liye, tiac pa inge nohfohn; tiac elos muhkwena pa sruhmuhn ke Wen nuhtin God.

19 Liye, El sruhmuhnyuck sel Moses; ahok, ac liye sie ohiyac kolyuckyak ke innimac, tuh oacna sie suc ngwetwacng nuh kac kuh in moul. Ac mwet pucspucs ngwetwacng liye ac moul.

20 Tuhsruhk puh mwet kahlwem ke kalmeyacn ma ingacn, ac ma ke srihpen kwekweiyen insiaclos. Tuhsruhk oasr mwet pucspucs suc arulacna kwekwe oruh elos tiacna ngwetwacng, ke ma inge elos misac. Inge srihpac se oruh elos tiacna ngwetwacng uh pa ke srihpen elos tiacna luhlahlfongi lah ac unweloslac.

21 O mwet wiyuck, kowos fin kuh in unweyucklac ke ngwetwacng muhkwena ke motowos tuh kowos in kuh in unweyucklac, yac kowos ac tiac silahklahk liye, kuh yac kowos ac ahkkwekweye insiowos ke suhlahlahlfongi, ac tiac mukwikwi, oruh kowos tiacna ngwetwacng ke motowos, tuh kowos in misac?

22 Fin ohinge, we ac fah tuhkuh nuh fowos; tuhsruhk fin tiac ohinge, na ngwetwacng ke motowos ac muhtwacwacack in luhlahlfongi ke Wen nuhtin God, tuh El fah tuhkuh in molwelah mwet Lal, ac tuh El fah kweok ac misac in iwaclah ma koluk lalos; ac tuh El fah sifilpac tuhkahkwek liki misac, suc fah sang sifil moulyak, tuh mwet nuhkwewa fah tu ye muhtahl, in nuhnuhnkweyuck ke lwen sahflah ac ke lwen in nuhnuhnkuh, fal nuh ke orekma lalos.

23 Ac inge, mwet wiyuck, nga kena tuh kowos in fah ukwiyac kahs inge ke insiowos, ac ke ac muhtwacwacack in kapwack finne ohinge ahkmongoi ke luhlahlfongi lowos. Ac liye, ac fah eklac sahk soko, sruhnwack keiwos nuh ke moul ma pahtpaht. Ac na lwelah God Elan acsot nuh suwos tuh ma toasr lowos in kuh in ahkmuhlahlahyeyucklac, ke engan luhn Wen nahtuhl. Ac ma inge nuhkwewa kowos fin kuh in oruh kowos kuh. Amen.