1 Wen nuhtihk, porongo kahs luhk; tuh nga fuhlahk nuh sum, lah ke kom fah liyacacng masap luhn God kom fah kapwack fin acn uh.

2 Nga kena tuh kom in oruh oacna ke nga tuh oruh, in esam srohoh luhn pahpah tuhmwacsr; tuh elos tuh muhta in srohoh, ac wacngihn mwet kuh in molweloslac sahyacn God lal Abraham, ac God lal Isaac, ac God lal Jacob; ac pwacyena El molweloslac liki ma kweok lalos.

3 Ac inge, O Helaman wen nuhtihk, liye, kom oasr in fuhsr lom, ac ke ma inge, nga kwacfe sum tuh kom in lohng kahs luhk ac luti sihk; tuh nga etuh lah elos suc fihliyac luhlahlfongi lalos ke God fah kahsreyuck ke ongaiyac lalos, ac fosrngah lalos, ac mwe kweok lalos, ac fah sruhkyuckyak ke lwen sahflah.

4 Ac nga tiac ke tuh kom in nuhnkuh muh nga etuh keik sifacna—tiac ke ma suhkawihl tuhsruhk ke ma luhn nguhn, tiac ke nuhnak in ikwoac tuhsruhk ke God.

5 Inge, liye, nga fahk nuh sum, nga fuhnuh tiac isuslac sin God, luhkuhn nga tiac etuh ke ma inge; tuhsruhk God El etuh, ke oalin lipufacn muhtahl Lal, El oruh ma inge nga in etuh, tiac ke wo luhk sifacna;

6 Tuh nga forfor wi wen nahtuhl Mosiah, suk in kuhnahoslah alu luhn God; tuhsruhk liye, God El suhpwacma lipufacn muhtahl Lal in tulokihnkuhti ke inkacnek uh.

7 Ac liye, el sramsram nuh sesr, oacna puhsren puhlahl, ac infohk uh nohfohn tuh kusrusr ye niyacsr; ac kuht nohfohn puhtatlac nuh infohk uh, tuh sahngweng sin Leum tuhkuh nuh facsr.

8 Tuhsruhk liye, puhsra sac fahk nuh sihk: Tuyak. Ac nga tuyak ac tu, ac liye lipufacn sac.

9 Ac el fahk nuh sihk: Kom fin kena tuh kom in sifacna kuhnausyucklac, nikmet sifilpac suk in kuhnahoslah alu luhn God.

10 Ac tukun ma inge nga puhtatlac nuh infohk uh; ac ke lusen lwen tolu ac fong tolu nga tiac kuh in ikacslah oaclihk, kuh nga tiac pac kuh in orekmakihn niyuck kuh pouk.

11 Ac lipufacn sac sruhmuhn ma pucspucs nuh sihk, ma tuh lohngyuck sin mwet wiyuck, tuhsruhk nga tiacna lohng; tuh ke nga lohng kahs uh—Kom fin ke kuhnauskomlac sifacna, nikmet sifilpac suk in kuhnahoslah alu luhn God—Nga sahngweng ac lut yohk tuh sahp ngwac kuhnausyucklac, oruh nga puhtatlac nuh infohk uh ac tiac sifilpac lohng.

12 Tuhsruhk nga puhlakihn kweok ma pahtpaht, tuh nguhnihk sowack nuh ke sie luhpah yohk na pwacye ac puhlakihn ma koluk nuhkwewa luhk.

13 Ahok, nga tuh esam nohfohn tahfonglac ac ma koluk luhk, suc nga kweokkihn ke waek luhn hell; ahok, nga liye tuh nga lain God luhk, ac tuh nga tiacna liyacacng masap muhtahl Lal.

14 Ahok, ac nga tuh ahkmasye tuhlihk puhs nahtuhl, kuh kohlohloslac nuh ke kuhnahoslah; ahok, ac in ahkkahlwemye arulacna yohk ma koluk luhk, tuh in nuhnkuh na in tuhkuh nuh ye muhtuhn God ahkkweokye nguhnihk ke sahngweng yohk ma tiac kuh in ahkuhtweyucki.

15 O, nga nuhnkuh, tuh nga kuh in lihsyucklac ac in wacngihnlac kwewana ke nguhn ac mahno, tuh nga in kuh in tiac utucklac in tu ye muhtuhn God, in nuhnuhnkweyuck ke orekma luhk.

16 Ac inge, ke lwen tolu ac fong tolu nga ahkkweokyeyuck, finne ke kweok luhn sie nguhn tuhlac.

17 Ac tukun ma inge ke nga tuh toasrlacna ke kweok, ke nga sowack ke mwe acsmakihn luhn ma koluk pucspucs luhk, liye, nga oacyacpac esam in lohng kahs in pahluh luhn pahpah tuhmuhk nuh sin mwet uh ke tuhkuh luhn sie Jisus Kraist, Wen nuhtin God, in iwaclah ma koluk luhn facluh.

18 Inge, ke nuhnak luhk sruokyac na nuhnak se inge, nga pruhe ke insiuck: O Jisus, Kom Wen nuhtin God, pahkotwen nuh sihk, suc oasr in mwen luhn sruhnga, ac rauniyucklac ke mwe kapihr luhn misac ma pahtpaht.

19 Ac inge, liye, ke nga nuhnkuh ma inge, nga tiac sifilpac esam kweok luhk; ahok, nga tiac sifilpac sowack ke mwe acsmakihn luhn ma koluk luhk.

20 Ac o, fuhkah luhpan engan, ac fuhkah luhpan wolacna luhn kahlwem ma nga liye; ahok, nguhnihk sesseslah ke engan yohk liki na kweok luhk!

21 Ahok, nga fahk nuh sum, wen nuhtihk, lah wacngihn ma arulacna upac ac koluk oacna kweok luhk. Ahok, ac nga sifilpac fahk nuh sum, wen nuhtihk, lah ke lwacyacn sahyac an, wacngihn ma arulacna upac ac wo oacna engan luhk.

22 Ahok, nga nuhnkuh muh nga liye, finne oacna ke pahpah tuhmwacsr Lehi el liye, God El muhta fin tron Lal, rauniyucklac ke un lipufacn pucspucs, ke ohiyacn on ac kaksakihn God lalos; ahok, ac nguhnihk tuh sruhnfuhsr nuh we.

23 Tuhsruhk liye, pouk ac niyuck tuh sifilpac eis kuhiyac, ac nga tuyak ke niyuck, ac tuh ahkkahlwemye nuh sin mwet ah lah nga isuslac sin God.

24 Ahok, ac ke pacl sac fahlac finne ne inge, nga orekma tiac tui, tuh nga in kuh in use mwet in auliyak; tuh nga in kuh in usaclosme in ipeis engan yohk suc nga tuh ipeis; tuh elos in oacyacpac kuh in isuslac sin God, ac sesseslah ke Nguhn Muhtahl.

25 Ahok, ac inge liye, O wen nuhtihk, Leum El use nuh sihk engan yohk na pwacye ke fukun orekma luhk;

26 Tuh ke srihpen kahs uh suc El use nuh sihk, liye, mwet pucspucs isuslac in God, ac elos ipeis oacna ke nga tuh ipeis, ac liye in ngwet sefanna oacna ke nga tuh liye; ke ma inge elos etuh ke ma suc nga sramsramkihn inge, oacna etuh luhk, ac etwacack ma oasr sihk uh ma sin God.

27 Ac nga tuh karihngihnyuck ke nga sun ma upac ac kain in ongaiyac nuhkwewa, ahok, ac kain in mwe kweok nuhkwewa; ahok, God El moliyuclac liki nien srohoh, ac liki kapihr, ac liki misac; ahok, ac nga fihliyac luhlahlfongi luhk in El, ac El fah srwackna moliyuclac.

28 Ac nga etuh lah El fah ahkmoulyeyucyak ke lwen sahflah, in muhta Yohrohl ke wolacna; ahok, ac nga fah kaksakuhnuhl ne tok ma pahtpaht, tuh El uslah pahpah tuhmwacsr liki acn Egypt, ac El afuhnlah mwet Egypt ke Meoa Sruhsrah; ac El kohlohlos ke kuh Lal nuh ke acn wihlwihl; ahok, ac El molweloslac liki kapihr ac srohoh ke pacl nuh ke pacl.

29 Ahok, ac El oacyacpac use pahpah tuhmwacsr liki acn Jerusalem; ac El oacyacpac, ke kuh ma pahtpaht Lal, molweloslac liki kapihr ac srohoh, ke pacl nuh ke pacl finne ke pacl inge, ac nga sruokyacna pacl nuhkwewa in esam ke srohoh lalos; ahok, ac kowos oacyacpac enenuh in sruokyacna in esam, oacna ke nga oruh, ke srohoh lalos.

30 Tuhsruhk liye, wen nuhtihk, tiac pa inge nohfohn; tuh kom enenuh in etuh oacna ke nga etuh, lah ke kom fah liyacacng masap luhn God kom fah kapkapwack fin acn uh; ac kom enenuh in etuh pac, lah kom fin tiac liyacacng masap luhn God kom fah lihsyucklac liki ye muhtahl. Na ma inge fal nuh ke kahs Lal.