1 Ac inge, Helaman wen nuhtihk, nga sapkihn kom tuh kom in eis ma sihmlac ma luhlahlfongiyuck in utuckuh nuh sihk;

2 Ac nga oacyacpac sapkihn kom tuh kom in karuhnguhnwacng sie ma sihmlac ke mwet inge, in oacna ke nga tuh oruh, ke plwet lal Nephi, ac karunguhngwacng ma inge nuhkwewa in muhtahl suc nga tuh karihngihn, finne in oacna ke nga tuh karuhnguhnwacng ah; tuh ma nuh ke sie srihpac lahlmwetmwet tuh ma inge in karihngihnyuckyang.

3 Ac plwet prahs inge, suc nein ma taflweyucklac inge, suc ma sihmlac luhn ma suhmuhslah muhtahl oasr kac, suc nein tahk in sucu luhn pahpah tuhmwacsr met ah, finne ke na muhtwacwacackiyac ah me—

4 Liye, tuh palyeiyuck sin pahpah tuhmwacsr, lah elos enenuh in liyacacng ac tuhtahflah nuh ke sie fihl nuh ke siepac, ac in karihngihnyuckyang ac sruhkyuckyak ke poun Leum ne ke na ma inge som nuh ke muhtuhnfacl, kain in mwet, kahs, ac mwet nuhkwewa, tuh elos in fah etuh ke ma lukmac ma oasr kac.

5 Ac inge liye, fin ma inge karihngihnyuckyang ma inge enenuh in sruokyacna sahromrom la; ahok, ac ma inge fah sruokyacna sahromrom la; ahok, ac oacyacpac nohfohn plwet ma tiacna nein ma sihmlac muhtahl.

6 Inge kowos kuh in nuhnkuh muh ma se inge ma lahlfon se nuh sihk; tuhsruhk liye nga fahk nuh suwos, lah ke ma srihsrihk ac fihsrwacsr, ma yohk tuhkuh kac; ac ohiyac srihsrihk ke pacl pucspucs ahkmisyelah mwet lahlmwetmwet.

7 Ac Leum God El oruh orekma ke inkacnek in use srihpac yohk ac ma pahtpaht Lal; ac ke inkacnek srihsrihk Leum El ahkmisyelah mwet lahlmwetmwet ac use molwelah luhn moul pucspucs.

8 Ac inge, ne ke pacl se inge ma lahlmwetmwet luhn God tuh ma inge enenuh in sruhkyuckyak; tuh liye, ma inge ahkyohkye mwe acsmakihn luhn mwet inge, ahok, ac ahksuwohsyelah tahfonglac puhs ke ohiyac lalos, ac usaclosme nuh ke etwacack ke God lalos in molwelah nguhnalos.

9 Ahok, nga fahk nuh suwos, fin tiac ke ma inge suc ma sihmlac inge nwacnwack, suc oasr ke plwet inge, Ammon ac mwet wiyacl elos luhkuhn tiacna kuh in ekuhllah mwet Laman tausin pucspucs ke ohiyac suhtuhuh luhn pahpah tuhmwaclos; ahok, ma sihmlac inge ac kahs luhn ma inge usaclosme nuh ke auliyak; tuh, ma inge usaclosme in etwacack ke Leum God lalos, ac in kaksakihn Jisus Kraist Mwet in Molwelah lalos.

10 Ac suc etuh sahyacn na lah ma sihmlac inge ac pa inkacnek in use tausin pucspucs selos, ahok, ac oacyacpac tausin pucspucs sin mwet lihkkeke wiyacsr, mwet Nephi, suc inge elos ahkkwekweye insiaclos ke tahfonglac ac ma koluk, nuh ke etwacack luhn Mwet in Molwelah lalos?

11 Inge ma lukmac inge soenna ahkkahlwemyeyuck nohfohn nuh sihk; ke ma inge nga fah tiac fahkwack kac.

12 Ac sahp fal fin nga fahk muhkwena lah ma inge sruhkyuckyak nuh ke sie srihpac lahlmwetmwet, suc srihpac uh etweyuck sin God; tuh El sang kahsruh ke lahlmwetmwet ke orekma Lal nuhkwewa, ac inkacnek Lal suwohs, ac inkacnek Lal ac tiac kuh in eklac.

13 O esam, esam, Helaman wen nuhtihk, fuhkah luhpan suwohs luhn masap luhn God. Ac El fahk: Kom fin liyacacng masap Luhk kom fah kapkapwack fin acn uh—tuhsruhk kom fin tiacna liyacacng masap Lal kom fah lihsyucklac liki ye muhtahl.

14 Ac inge esam, wen nuhtihk, lah God El luhlahlfongi kom ke ma inge, suc muhtahl, suc El karuhnguhnwacng in muhtahl, ac oacyacpac suc El liyacacng ac sruhkwack nuh ke sie srihpac lahlmwetmwet Lal, tuh Elan kuh in ahkkahlwemye kuh Lal nuh sin fihl ke pacl fahsruh uh.

15 Ac inge liye, nga fahk nuh sum lah ke nguhn in pahluh, lah kom fin ahkkolukye masap luhn God, liye, ma inge suc muhtahl ac fah eisyucklac liki kom ke kuh luhn God, ac kom fah utucklac nuh yohrohl Setuhn, tuh Elan kuh in srekomlac oacna loa ma eng uh oklah.

16 Tuhsruhk kom fin liyacacng masap luhn God, ac oruh ma inge suc muhtahl fal nuh ke ma suc Leum El sapkihn kom nuh kac, (tuh kom enenuh in siyuck sin Leum ke ma nuhkwewa kom enenuh in oruh nuh ke ma inge) liye, wacngihn kuh fin facluh ke hell kuh in eislah ma inge liki kom, tuh God El kuhlacna in ahkpwacyeiye kahs nuhkwewa Lal.

17 Tuh El fah ahkpwacyeiye nohfohn wuhlweacng Lal suc El fah oruh nuh sum, tuh El ahkpwacyelah nohfohn wuhlweacng suc El oraclah nuh sin pahpah tuhmwacsr.

18 Tuh El olwelah nuh selos lah El fah sruhkwack ma inge nuh ke sie srihpac lahlmwetmwet Lal, tuh Elan kuh in ahkkahlwemye kuh Lal nuh sin fihl ke pacl fahsruh uh.

19 Ac inge liye, sie srihpac uh ahkpwacyeiyucklac, finne nuh ke fohlohkihnyuckme luhn tausin pucspucs sin mwet Laman in etuh ke ma pwacye; ac El ahkkahlwemye kuh Lal kaclos, ac El fah oacyacpac ahkkahlwemye kuh Lal kaclos nuh sin fihl ke pacl fahsruh uh; ke ma inge elos fah painmoullac.

20 Ke ma inge nga sapkihn nuh sum, Helaman wen nuhtihk, tuh kom in oaru in ahkpwacyeiye nohfohn kahs luhk, ac tuh kom in oaru in liyacacng masap luhn God oacna ke sihmlac.

21 Ac inge, nga fah sramsram nuh sum ke plwet longoul ahkosr, tuh kom in liyacacng ma inge, tuh ma lukmac ac orekma luhn lohsr, ac orekma lukmac lalos, kuh orekma lukmac lalos mwet suc kuhnausyucklac, in kuh in ahkkahlwemyeyuck nuh sin mwet inge; ahok, ahkmas nuhkwewa lalos, ac pihsrapasr, ac fuhnmwet lalos, ac ma koluk ac ma sruhngwacyuck nuhkwewa lalos, in kuh in ahkkahlwemyeyuck nuh sin mwet inge; ahok, ac tuh kom in molwelah mwet lweng inge.

22 Tuh liye, Leum El liye tuh mwet Lal muhtwacwacack in orekma in lohsr, ahok, oruh ahkmas ke lukmac ac ma sruhngwacyuck; ke ma inge Leum El fahk, elos fin tiac auliyak elos ac kuhnausyucklac liki fin facluh.

23 Ac Leum El fahk: Nga fah ahkolah nuh sin mwet kuhlwacnsap luhk Gazelem, sie yot, ma fah tohlwack lohsr uh in kahlwem, tuh Nga in kuh in ahkkahlwemye nuh sin mwet Luhk suc kuhlwacnsuhpweyuc, tuh nga in kuh in ahkkahlwemye nuh selos orekma luhn mwet wiyaclos, ahok, orekma in lukmac lalos, orekma in lohsr lalos, ac ma koluk ac ma sruhngwacyuck lalos.

24 Ac inge, wen nuhtihk, mwet lweng inge tuh ahkolah tuh kahs luhn God in kuh in ahkpwacyeiyuck, suc El sramsram, fahk:

25 Nga fah use liki lohsr uh nuh ke kahlwem orekma lukmac lalos ac ma sruhngwacyuck lalos nuhkwewa; ac elos fin tiac auliyak Nga fah kuhnaosuhloslac liki fin facluh; ac Nga fah ahkkahlwemye ma lukmac ac ma sruhngwacyuck lalos nuhkwewa, nuh sin muhtuhnfacl nuhkwewa ma fah inge fahlac ac muhta fin acn uh.

26 Ac inge, wen nuhtihk, kuht liye tuh elos tiacna auliyak; ke ma inge elos kuhnausyucklac, ac ohinge kahs luhn God ahkpwacyeiyucklac; ahok, ma sruhngwacyuck lukmac lalos utuckuh liki lohsr uh ac ahkkahlwemyeyuck nuh sesr.

27 Ac inge, wen nuhtihk, nga sapkihn nuh sum tuh kom in sruokyac olweacng lalos nuhkwewa, ac wuhlweacng lalos, ac insese lalos ke ma sruhngwacyuck lukmac lalos; ahok, ac akucl nuhkwewa lalos ac ma usrnguck lalos kom fah karuhnguhnwacng liki mwet inge, tuh elos in tiac etuh ke ma inge, tuh elos fin suk in oruh ma inge elos fah oacyacpac puhtatlac nuh in lohsr uh ac kuhnausyucklac.

28 Tuh liye, oasr sie selngawi fin acn se inge nohfohn, tuh kuhnahoslah fah tuhkuh nuh faclos mwet orekma nuhkwewa luhn lohsr, fal nuh ke kuh luhn God, ke elos koluklac na pwacye; ke ma inge nga kena tuh mwet inge in tiac kuhnausyucklac.

29 Ke ma inge kom fah liyacacng plwacn lukmac lalos inge ke olweacng lalos ac wuhlweacng lalos sin mwet inge, ac koluk lalos ac ahkmas lalos ac ma sruhngwacyuck lalos muhkwena pa kom fah oruh in etweyuck nuh selos; ac kom fah lotwelos in sruhnga ma koluk ac ma sruhngwacyuck ac ahkmas; ac kom fah oacyacpac lotwelos lah mwet inge kuhnausyucklac ke srihpen ma koluk ac ma sruhngwacyuck lalos ac ahkmas lalos.

30 Tuh liye, elos uniyac nohfohn mwet pahluh luhn Leum suc tuhkuh nuh inmahsrlolos in fahkwack nuh selos ke ma koluk lalos; ac srah lalos suc elos uniyac tuh wowoyak nuh sin Leum God lalos in fohlohkohnwacng nuh selos suc onweltahluh; ac ohinge nuhnuhnkuh luhn God tuh tuhkuh nuh fin mwet orekma luhn lohsr ac u lukmac.

31 Ahok, ac selngawi acn uh ne tok ma pahtpaht nuh selos mwet orekma luhn lohsr ac u lukmac, finne nuh ke kuhnahoslah, elos fin tiac auliyak met liki elos koluklac na pwacye.

32 Ac inge, wen nuhtihk, esam kahs ma nga sruhmuhn nuh sum inge; nikmet luhlahlfongi plwacn lukmac ingacn nuh sin mwet inge, tuhsruhk lotwelos in sruhnga orekma koluk ac ma koluk ne tok ma pahtpaht.

33 Lotwelos ke auliyak, ac luhlahlfongi ke Leum Jisus Kraist; lotwelos in sifacna mongfihsrwacsr ac in fakpacp ac inse puhsisacl; lotwelos in tu na kuh ke mwe sruhf nuhkwewa luhn devil, ke luhlahlfongi lalos ke Leum Jisus Kraist.

34 Lotwelos in tiacna ullac ke orekma wo, tuhsruhk in fakpacp ac inse puhsisacl; tuh ma inge fah konwacack monglac nuh ke nguhnalos.

35 O, esam, wen nuhtihk, ac lotwelah lahlmwetmwet ke pacl fuhsr lom; ahok, lotwelah ke pacl fuhsr lom in liyacacng masap luhn God.

36 Ahok, ac pruhe nuh sin God ke mwe kahsruh nuhkwewa lom; ahok, lwelah orekma lom nuhkwewa in ma nuh sin Leum, ac oacna sie acn kom som nuh we lwelah in ma ke Leum; ahok, lwelah nuhnak lom nuhkwewa in som na nuh sin Leum; ahok, lwelah luhngse luhn insiom in fihliyucki fin Leum ne tok ma pahtpaht.

37 Suk kahsruh sin Leum ke orekma nuhkwewa lom, ac El fah kol kom ke wo; ahok, ke kom ona ke fong uh ona nuh ten nuh sin Leum, tuh Elan kuh in karihngihn kom ke mutul lom; ac ke kom tuhkahkwek ke litutacng lwelah insiom in sesseslah ke kuloh nuh sin God; ac kom fin oruh ma inge, kom fah sruhkyuckyak ke lwen sahflah.

38 Ac inge, wen nuhtihk, oasr kuhtuh ma ngwac fahk ke ma se ma pahpah tuhmwacsr pahngon pohl se, kuh sie mwe kol—kuh pahpah tuhmwacsr ah pahngon ma se inge Liahona, ma fin, luhngasyucklac, kampahs se; ac Leum El ahkolah ma se inge.

39 Ac liye, wacngihn kuhtwena mwet kuh in oruh orekma oacna usrnguckiyacn orekma in sroasr inge. Ac liye, ma inge ahkoeyucklac in ahkkahlwemyeyuck nuh sin pahpah tuhmwacsr ke inkacnek ma elos enenuh in fuhfahsryucsr kac ke innimac.

40 Ac ma inge orekma nuh selos fal nuh ke luhlahlfongi lalos ke God; ke ma inge, fin oasr luhlahlfongi lalos in luhlahlfongi lah God El kuh in oruh tuh ninucl kac ah in srihsrngiyac inkacnek elos in som nuh we, liye, oreklac; ke ma inge oasr ma usrnguck se inge yohrohlos, ac oacyacpac ma usrnguck pucspucs sahyac oreklac ke kuh luhn God, lwen nuh ke lwen.

41 Ne ohinge, ke srihpen ma usrnguck ingacn oreklac ke ohiyac srihsrihk ma inge ahkkahlwemye nuh selos ke orekma wolacna. Elos alsruhngwesr, ac muhlkuhnlah in oruh luhlahlfongi ac oaru lalos ac orekma wo ingacn tui, ac elos tuh tiacna oraclah ke fuhfahsryucsr lalos;

42 Ke ma inge, elos muhta ke innimac, kuh tiacna fuhfahsryucsr ke inkacnek suwohs, ac elos ahkkweokyeyuck ke masrinsrwacl ac maluh, ke srihpen tahfonglac lalos.

43 Ac inge, wen nuhtihk, nga kena tuh kom in kahlwem kac lah ma inge tiac wacngihn mwacta; tuh oacna ke pahpah tuhmwacsr tuh soaru in lohacng nuh ke kampahs se inge (na ma inge suhkawihl) elos tiacna kapkapwack; finne ohinge pac nuh ke ma luhn nguhn.

44 Tuh liye, fihsrwacsr in lohacng nuh ke kahs luhn Kraist, ma fah srihsrngi nuh sum soko inkacnek suwohs nuh ke engan ma pahtpaht, oacna ke pahpah tuhmwacsr lohacng nuh ke kampahs se inge, ma fah srihsrngi nuh selos soko inkacnek suwohs nuh ke acn wihlwihl.

45 Ac inge nga fahk, yac tiac oasr sie ohiyac luhn ma se inge? Tuh pwacyena oacna ke mwe kol se inge tuh use pahpah tuhmwacsr, ke ukweyacn kolyuck la, nuh ke acn wihlwihl, na kahs luhn Kraist fah, us kuht fin kuht ukwe kolyuck la, ac us kuht ahluhkwelah mwe lihsrlihsr luhn ahsor nuh ke sie acn wolacna luhn wuhlwelah.

46 O wen nuhtihk, nikmet lwelah kuht in soaru ke srihpen fihsrwacsr luhn inkacnek uh; tuh oacpacna inge nuh sin pahpah tuhmwacsr; tuh ahkoeyucklac nuh selos, tuh elos fin ngwetwacng elos ac kuh in moul; finne oacpacna inge nuh sesr. Inkacnek uh ahkoeyucklac, ac kuht fin ac ngwetwacng kuht kuh in moul ne tok ma pahtpaht.

47 Ac inge, wen nuhtihk, liye tuh kom in karuhnguhnwacng ma muhtahl inge, ahok, liye tuh kom in ngwet nuh sin God ac moul. Som nuh yurun mwet inge ac fahkwack kahs uh, ac okak. Wen nuhtihk, liyekomyang.