1 Ac inge, wen nuhtihk, oasr pac kuhtuh ma ngwac fahk nuh sum liki na ma nga fahk nuh sin tamuhlwel wiyom; tuh liye, yac kom tiac tuni mislac luhn tamuhlwel wiyom, luhlahlfongi lal, oaru lal in liyacacng masap luhn God? Liye, yac el tiac oakiyac mwe srihkasrak wo nuh sum?

2 Tuh kom tiacna lohacng nuh ke kahs luhk oacna tamuhlwel wiyom, inmahsrlon mwet luhn mwet Zoram. Na pa inge ma suc nga lain kom kac; tuh kom som tuhngahk ke fokokoiyom ac lahlmwetmwetiyom.

3 Ac tiac pa inge nohfohn, wen nuhtihk. Kom tuh oruh ma suc ahksuhpwacryeyuc; tuh kom tuh pihlesruh orekma lom, ac tuh som nuh fin acn Siron nuh inmahsrlon mahsrol luhn mwet Laman, nuh yurun muhtwacn kosro Isabel.

4 Ahok, el tuh kiyacpwelah insiacn mwet pucspucs; tuhsruhk ma inge tiac tuhlwekomlac, wen nuhtihk. Pwacyeiyac ah kom in muhta na ke orekma ma utuckot nuh sum.

5 Yac kom tiac etuh, wen nuhtihk, lah ma inge ma sruhngwacyuck ye muhtuhn Leum; ahok, sruhngwacyuck emet liki ma koluk nuhkwewa sahyacn ahksohrohrye srah luhn mwet wo kuh in lahfwekihn Nguhn Muhtahl?

6 Tuh liye, kom fin lahfwekihn Nguhn Muhtahl ke ac oasr yurum, ac kom etuh lah kom lahfwekihn, liye, ma se inge sie ma koluk suc wacngihn nuhnakmuhnahs la; ahok, ac el suc ahkmas lain kahlwem ac etwacack luhn God, ac tiac fihsrwacsr nuh sel in eis nuhnakmuhnahs; ahok, nga fahk nuh sum, wen nuhtihk, lah ac tiac fihsrwacsr nuh sel in eis nuhnakmuhnahs.

7 Ac inge, wen nuhtihk, nga siyuck sin God tuh in tiac oasr mwacta koluk na pwacye lom. Nga tiac ke nuhnkuh orekma koluk lom, in ahksuhpwacrye nguhnum, fin ac tiac ma wo se nuh sum.

8 Tuhsruhk liye, kom tiac kuh in okanlah orekma koluk lom nuh sin God; ac kom fin tiac auliyak ma inge fah sang lain kom ke lwen sahflah.

9 Inge wen nuhtihk, nga kena tuh kom in auliyak ac sislah ma koluk lom, ac nikmet sifilpac ukwaclah kena luhn motom, tuhsruhk lahfwekihn kom sifacna ke ma inge nuhkwewa; tuh kom fin tiac oruh ma inge kom tiacna kuh in usrui tohkohsrahi luhn God. O, esam, ac eis nuh fom, ac lain kom sifacna ke ma inge.

10 Ac nga sapkihn kom in eis nuh fom in suk kahsruh sin tamuhlwel mahtuh wiyom ke kunohkohn lom; tuh liye, kom oasr ke pacl in fuhsr lom, ac kom enenuh in kahsreyuck sin tamuhlwel wiyom. Ac porongo kahs in kahsruh lalos.

11 Nikmet lwelah kom in kolyucklac ke ma wacngihn srihpac kuh lahlfon; nikmet lwelah tuh devil elan sifilpac kohllah insiom nuh yurun muhtwacn kosro koluk ingoh. Liye, O wen nuhtihk, fuhkah luhpan ma koluk kom uslah nuh yurun mwet Zoram; tuh ke elos liye mukwikwi lom elos tiacna luhlahlfongi ke kahs lom.

12 Ac inge Nguhn luhn Leum fahk nuh sihk: Sapkihn tuhlihk nuhtum in oruh ma wo, fin tiac elos ac kohllah insiacn mwet pucspucs nuh ke kuhnahoslah; ke ma inge nga sapkihn nuh sum, wen nuhtihk, in sahngweng sin God, tuh kom in kahing liki ma koluk lom;

13 Tuh kom in foracng nuh sin Leum ke nuhnkom, kuhiyom, ac fokokoiyom nohfohn; tuh kom in tiac sifilpac kohllah insiacn mwet in oruh ma koluk; tuhsruhk tuh kom in fohlohklac nuh yohrohlos, ac ahkkahlwemye tahfonglac lom ac ma koluk suc kom oraclah.

14 Nikmet suk kahsruhp kuh ma wacngihn srihpac luhn facl se inge; tuh liye, kom tiac kuh in us ma inge wi kom.

15 Ac inge, wen nuhtihk, nga kena fahk pac kuhtuh ma ah nuh sum ke tuhkuh luhn Kraist. Liye, nga fahk nuh sum, lah pwacyena El ac fah tuhkuh in eislah ma koluk luhn facluh; ahok, El tuhkuh in fahkwack pweng wo luhn molwelah nuh sin mwet Lal.

16 Ac inge, wen nuhtihk, pa inge orekma se suc kom pahngyak nuh kac, in fahkwack pweng wo inge nuh sin mwet inge, in ahkolah nuhnak lalos; kuh tuh molwelah in kuh in tuhkuh nuh yohrohlos, tuh elos in kuh in ahkolah nuhnak luhn tuhlihk nahtuhlos in lohng kahs uh nuh ke pacl in tuhkuh Lal.

17 Ac inge nga fah ahkfihsrwacsryelah kuhtuhsrihk nuhnak lom an ke mwe lutlut se inge. Liye, kom nuhnkuh lah efuh ma inge enenuh in etweyuck ke pacl na loes met liki sikyak. Liye, nga fahk nuh sum, yac tiac sie moul ke pacl se inge sacohk sin God oacna sie moul ke pacl se El ac tuhkuh?

18 Yac tiac enenuh se na tuh plwacn in molwelah enenuh in ahkkahlwemyeyuck nuh sin mwet inge oacpacna nuh sin tuhlihk nahtuhlos?

19 Yac tiac fihsrwacsr pac ke pacl se inge nuh sin Leum in suhpwacma lipufacn Lal in fahkwack pweng wo inge nuh sesr oacpacna nuh sin tuhlihk nahtuhsr, kuh ke tukun pacl se El tuhkuh?