1 Ac inge, wen nuhtihk, oasr kuhtuh ma ngwac fahk ke sifil fohlohkyak ma sruhmuhnyuck; tuh liye, kuhtuh mwet uh ekuhllah ma suhmuhslah, ac elos tuhlac ke srihpen ma se inge. Ac nga motko tuh nuhnak lom an elyah pac ke ma se inge. Tuhsruhk liye, nga fah ahkuhtweyac ma inge nuh sum.

2 Nga fahk nuh sum, wen nuhtihk, lah plwacn luhn sifil fohlohkihnyuckyak uh enenuh in tuhkuh met liki nuhnuhnkuh suwohs luhn God; tuh enenuh ma nuhkwewa in sifil fohlohkyak nuh ke ohiyac fal la. Liye, ma inge enenuh in sikyak ac suwohs, fal nuh ke kuh ac sifil moulyak luhn Kraist, tuh nguhn luhn mwet uh enenuh in sifil fohlohkyang nuh ke mahno la, ac tuh ip nuhkwewa ke mahno enenuh in sifil fohlohkyang nuh ke mahno la sifacna.

3 Ac ma inge enenuh in tuhkuh met liki nuhnuhnkuh suwohs luhn God tuh mwet uh fah nuhnuhnkweyuck fal nuh ke orekma lalos; ac orekma lalos fin wo ke moul se inge, ac kena luhn insiaclos wo, tuh elos oacyacpac enenuh, ke lwen sahflah, in sifil fohlohkyak nuh ke ma wo.

4 Ac orekma lalos fin koluk elos fah sifil fohlohkihnyuckyak nuh ke ma koluk. Ke ma inge, ma nuhkwewa fah fohlohkihnyuckyak nuh ke ohiyac fal la, ma nuhkwewa nuh ke ohiyac la—moul suhkawihl moulyak nuh ke moul kawihl, ohiyac koluk nuh ke ohiyac wo—moulyak nuh ke engan ma wacngihn sahflahiyac in usrui tohkohsrahi luhn God, kuh nuh ke ahsor ma wacngihn sahflahiyac in usrui tohkohsrahi luhn devil, sie ke lwacpo, sie ke lwacpo se sahyac—

5 Sie moulyak nuh ke engan fal nuh ke kena in engan lal, kuh wo in fal nuh ke kena in wo lal; ac ma se sahyac ah nuh ke ma koluk fal nuh ke kena koluk lal; tuh oacna ke el kena in oruh ma koluk lwen fohn se finne ohinge el fah eis usru luhn ma koluk lal ke fong uh tuhkuh.

6 Ac ohinge pac ke lwacpo se sahyac uh. El fuhnuh auliyak ke ma koluk lal, ac kena in suwohswohs ne ke na sahflahiyacn moul lal, ohinge luhkuhn el eis mwe insewowo ke suwohswohs.

7 Pa inge elos suc moliyucklac sin Leum; ahok, pa inge elos suc utucklac nuh lihk uh, elos suc moliyucklac liki fong luhn lohsr wacngihn sahflahiyac; ac ohinge elos tu kuh puhtatlac; tuh liye, elos pa mwet nuhnuhnkuh lalos sifacna, lah in oruh ma wo kuh in oruh ma koluk.

8 Inge, masap luhn God tiac kuh in eklac; ke ma inge, inkacnek uh ahkoeyucklac tuh el suc fah kuh in ilyak nuh we ac fah moliyucklac.

9 Ac inge liye, wen nuhtihk, nikmet oruh kuhtwena mwe sensen in lain God lom ke ip yohk luhn mwe luti ingacn, suc ne inge kom sisensen in oruh ma koluk.

10 Nikmet nuhnkuh, mweyen sruhmuhnyuck sifil fohlohkihnyuckyak uh, lah kom fah sifilpac fohlohkihnyucklac liki ma koluk lom nuh ke engan. Liye, nga fahk nuh sum, ma koluk tiacna pa engan.

11 Ac inge, wen nuhtihk, mwet nuhkwewa suc oasr ke sie moul suhkawihl, kuh nga kuh in fahk, ke ohiyac luhn ikoac, elos oasr ke mwen luhn sruhnga ac mwe kapihr luhn ma koluk; God El wacngihn yohrohlos fin facluh, ac elos tuhlac liki ohiyac luhn God; ke ma inge, elos oasr ke sie ohiyac ma fahsr liki ohiyac luhn engan.

12 Ac na liye, yac kalmeyacn kahs se inge sifil fohlohkihnyuckyak uh in eis sie ma ke ohiyac na pwacye la ac fihliyac nuh ke sie ohiyac sahyac, kuh in fihliyac ke sie ohiyac ma siena liki ohiyac na pwacye la?

13 O, wen nuhtihk, tiac pa inge ohiyac uh; tuhsruhk kalmeyacn kahs se fohlohkihnyuckyak uh pa in sifil fohlohkohnwacng ma koluk nuh ke ma koluk, kuh ikoac nuh ke ikoac, kuh ohiyac koluk nuh ke ohiyac koluk—ma wo nuh ke ma wo; suwohswohs nuh ke ma suc suwohswohs; suwohs nuh ke ma suwohs; pahkotwen nuh ke ma pahkotwen.

14 Ke ma inge, wen nuhtihk, liye tuh kom in pahkotwen nuh sin tamuhlwel wiyom; oruh ma suwohs, nuhnuhnkuh in suwohs, ac oruh ma wo pacl nuhkwewa; ac kom fin oruh ma inge nuhkwewa na kom fah eis usru kac; ac pahkotwen ac fah sifilpac fohlohkihnyuckwot nuh sum; ac fah oasr nuhnuhnkuh suwohs sifil fohlohkihnyuckwot nuh sum; ac fah oasr sie nuhnuhnkuh suwohswohs sifilpac fohlohkihnyuckywot nuh sum; ac kom fah sifilpac eis mwe usru wo.

15 Tuh ke ma suc kom suhpwaclah ac fah sifil fohlohk nuh yurum, ac fohlohkihnyuckyak; ke ma inge, kahs se fohlohkohnwack uh ac ahkkolukye mwet koluk, ac tiac ahkkweiyacl.