1 Ac inge, wen nuhtihk, nga nuhnkuh tuh oasr kuhtuh pac ma suc wakre nuhnak lom an, ma kom tiac kahlwem kac—ma ke nuhnuhnkuh suwohs luhn God ke kalyeiyuck luhn mwet koluk; tuh kom srihke in nuhnkuh lah ma sesuwohs se tuh mwet koluk enenuh in suhpweyucklac nuh ke sie ohiyac ahsor.

2 Inge liye, wen nuhtihk, nga fah ahkuhtweyac ma inge nuh sum. Tuh liye, tukun Leum God El suhpwaclah pahpah tuhmwacsr ac ninac kiyacsr omeet ah liki imac Eden, in pihkihn fohk uh, suc elos oreklac kac—ahok, El eislah mwet liki imac sac, ac El likiyac kuhtuhlacp ke imac Eden, cherubim, ac sie katlas fihrihr ma pihtuckoht pihtuckme nuh yen nuhkwewa, in karuhnguhnwacng sahk in moul—

3 Inge, kuht liye lah mwet sac eklac oacna God, etuh ma wo ac ma koluk; tuh elan tiac kohllah pahol, ac oacyacpac eis ke sahk in moul, ac kang ac moul ne tok ma pahtpaht, tuh Leum God El likiyac cherubim ac katlas fihrihr, tuh elan tiac ipeis ke fukun sahk—

4 Ac ohinge kuht liye, tuh oasr sie pacl ituckyang nuh sin mwet uh in auliyak, ahok, sie puhlan pacl in srihkeyuck, sie pacl in auliyak ac kuhlwacnsapuh God.

5 Tuh liye, Adam el fin silahklahk kohllah pahol, ac ipeis ke sahk in moul, el ac fah moul ne tok ma pahtpaht, fal nuh ke kahs luhn God, wacngihn acn nuh ke auliyak; ahok, ac oacyacpac kahs luhn God luhkuhn wacngihn, ac plwacn wolacna luhn molwelah luhkuhn foslac.

6 Tuhsruhk liye, pakpucki nuh sin mwet uh in misac—ke ma inge, ke elos lihsyucklac liki sahk in moul elos enenuh in lihsyucklac liki facluh—ac mwet uh tuhlac ne tok ma pahtpaht, ahok, elos eklac mwet puhtatlac.

7 Ac inge, kom liye ke ma inge lah ninac kiyacsr ac pahpah tuhmwacsr omeet ah elos tuh lihsyucklac kwewana ke moul in mahno ac nguhn liki ye muhtuhn Leum; ac ohinge kuht liye elos muhta ye kuh in ukwe luhngse lalos sifacna.

8 Inge liye, tiacna fal tuh mwet uh enenuh in fohlohkihnyucklac liki misac luhn mahno se inge, tuh ac fah kuhnahoslah plwacn wolacna luhn engan.

9 Ke ma inge, oacna ke nguhn uh tiac kuh in misac, ac puhtatlac sac tuh sang nuh fin mwet nuhkwewa sie misac luhn nguhn ac oacyacpac luhn mahno, tuh, elos lihsyucklac liki ye muhtuhn Leum, ac fal tuh mwet uh enenuh in fohlohkihnyuckme liki misac luhn nguhn se inge.

10 Ke ma inge, ke elos eklac nuh ke ikoac, luhngse koluk, ac koluk, ke ohiyac luhn facluh, puhlan pacl in srihkeyuck se inge eklac sie puhlan pacl nuh selos in ahkolah; eklac sie puhlan pacl in ahkolah.

11 Ac inge esam, wen nuhtihk, fin tiac ke plwacn in molwelah, (sriyucklac nuh sahyac) ke na pacl se elos misac nguhnalos ahsor, lihsyucklac liki ye muhtuhn Leum.

12 Ac inge, wacngihn inkacnek in fohlohkohnma mwet uh liki ohiyacn puhtatlac se inge, suc mwet uh sang nuh sel sifacna ke srihpen seahkostwen lal sifacna;

13 Ke ma inge, in fal nuh ke nuhnuhnkuh suwohs, plwacn in molwelah uh tiac kuh in utuckuh, utuckuh muhkwena ke auliyak luhn mwet uh ke puhlan pacl in srihkeyuck se inge, ahok, puhlan pacl in srihkeyuck se inge; tuh fin tiac ke ohiyac inge, pahkotwen tiac kuh in ahkfahsryeyuck sahyacn na ac enenuh in kuhnahoslah orekma luhn nuhnuhnkuh suwohs. Inge orekma luhn nuhnuhnkuh suwohs tiac kuh in kuhnausyucklac; fin ohinge, God El ac tilac God.

14 Ac ohinge kuht liye lah mwet nuhkwewa puhtatlac, ac elos oasr ye srohoh luhn nuhnuhnkuh suwohs; ahok, nuhnuhnkuh suwohs luhn God, suc suhpwacloslac ne tok ma pahtpaht in lihsyucklac liki ye muhtahl.

15 Ac inge, plwacn luhn pahkotwen tiac kuh in utuckuh sahyacn sie iwaclah enenuh in oreklac; ke ma inge God El sifacna iwaclah nuh ke ma koluk luhn facluh, in ahkfahsrye plwacn luhn pahkotwen, in ahkfihsrwacsryelah ma enenweyuck luhn nuhnuhnkuh suwohs, tuh God Elan kuh in sie God suwohs, God wo, ac oacyacpac sie God pahkotwen.

16 Inge, auliyak tiac kuh in tuhkuh nuh fin mwet uh sahyacn fin oasr sie kaiyuck, suc oacyacpac ma ne tok ma pahtpaht oacna moul luhn nguhn uh, fihliyucki oan ke lacyacn ngiac siena liki plwacn in engan, suc oacyacpac ma ne tok ma pahtpaht oacna moul luhn nguhn uh.

17 Inge, sie mwet kuh in auliyak fuhkah el fin tiac oruh ma koluk? El kuh in oruh fuhkah ma koluk fin wacngihn masap? Ac fuhkah in oasr sie masap sahyacn oasr sie kalyeiyuck?

18 Inge, oasr sie kalyei akwucki, ac sie masap suwohs ituckyang, ma sang inse ahsor nuh sin mwet uh.

19 Inge, fin wacngihn masap ituckyang—mwet se el fin ahkmas el enenuh in misac—yac el ac sahngweng tuh el ac misac el fin ahkmas?

20 Ac oacyacpac, fin wacngihn masap utuckuh in lain ma koluk na mwet uh ac tiac sahngweng in oruh ma koluk.

21 Ac fin wacngihn masap utuckuh, fin mwet uh oruh ma koluk na meac nuhnuhnkuh suwohs ac oruh, kuh pahkotwen, tuh ma inge ac wacngihn ma in usaclwack kac?

22 Tuhsruhk sie masap utuckuh, ac sie kalyei akwucki, ac sie auliyak utuckuh; suc auliyak, pahkotwen fahkwack kac; fin tiac ohinge, nuhnuhnkuh suwohs uh eis mwet uh ac otwelah masap uh, ac masap uh oruh kalyeiyuck la; fin tiac, na orekma luhn nuhnuhnkuh suwohs ac kuhnausyucklac, ac God El ac tilac God.

23 Tuhsruhk God El tiac tui in God, ac pahkotwen eis mwet auliyak, ac pahkotwen tuhkuh ke srihpen iwaclah; ac iwaclah ahkfahsrye sifil moulyak luhn mwet misac; ac sifil auliyak luhn mwet misac fohlohkohnma mwet uh nuh ye muhtuhn God; ac ohinge elos sifil fohlohk nuh Yohrohl, in nuhnuhnkweyuck fal nuh ke orekma lalos, fal nuh ke masap ac nuhnuhnkuh suwohs.

24 Tuh liye, nuhnuhnkuh suwohs uh oruh ma nuhkwewa ma el sapkihn, ac pahkotwen uh oacyacpac eis ma nuhkwewa ma tuhkuh kac; ac ohinge, wacngihn mwet sahyaclos suc auliyak na pwacye ac moliyucklac.

25 Meac, yac kom nuhnkuh muh pahkotwen uh kuh in eislah nuhnuhnkuh suwohs? Nga fahk nuh sum, Moh; tiacna kuhtuhsrihsrihk. Fin ohinge, God El ac tilac God.

26 Ac ohinge God El use srihpac wolacna ac ma pahtpaht Lal, suc tuh ahkoeyucklac e ke na pwelucng luhn facluh. Ac ohinge molwelah ac moliyucklac luhn mwet uh tuhkuh, ac oacyacpac kuhnausyucklac ac ahsor lalos.

27 Ke ma inge, O wen nuhtihk, el suc fah tuhkuh kuh in tuhkuh ac ipeis ke kof in moul ma wacngihn molo; ac el suc fah tiac tuhkuh mwet sacn pacna el tiac kalyeiyuck in tuhkuh; tuhsruhk ke lwen sahflah ac fah fohlohkihnyuckyang nuh sel fal nuh ke orekma lal.

28 El fin luhngse oruh ma koluk, ac tiacna auliyak ke lusen moul lal, liye, ma koluk fah orek nuh sel, fal nuh ke fohlohkohnwack luhn God.

29 Ac inge, wen nuhtihk, nga kena tuh kom in lwelah ma inge in tiac sifil ahkfohsye kom, ac lwelah tuh ma koluk lom muhkwena in ahkfohsye kom, tuh mwe ahkfohs ingacn fah iskowi nuh ten nuh ke auliyak.

30 O wen nuhtihk, nga kena tuh kom in tiac sifil lahfwekihn nuhnuhnkuh suwohs luhn God. Nikmet srihke in ahkmwesahsye kom sifacna ke srihpen ma koluk lom, ke lahfwekihn nuhnuhnkuh suwohs luhn God; tuhsruhk yac kom lwelah suwohs luhn God, ac pahkotwen Lal, ac mongfihsrwacsr Lal in mokle yohk insiom; ac lwelah tuh in iskowi nuh ten nuh infohk uh ke puhsisacl.

31 Ac inge, O wen nuhtihk, kom pahngyak sin God in luti kahs uh nuh sin mwet inge. Ac inge, wen nuhtihk, som ke inkacnek lom, fahkwack kahs uh ke pwacye ac ke kuhiyom, tuh kom in kuh in use nguhn uh nuh ke auliyak, tuh plwacn wolacna luhn pahkotwen in kuh in eisaclos. Ac lwelah tuh God Elan usot nuh sum finne in fal nuh ke kahs luhk. Amen.