1 Ac na tukun ma inge wen nahtuhl Alma elos tuh som nuh inmahsrlon mwet ah, in fahkwack kahs uh nuh selos. Ac Alma, pac, el sifacna, tiac kuh in monglac, ac el oacyacpac som.

2 Inge kuht fah tiac sifil fahk kuhtwena ma ke luti lalos, sahyacn na elos luti kahs uh, ac ma pwacye, fal nuh ke nguhn in pahluh ac fwackyuck; ac elos luti tukun akwuck muhtahl luhn God suc elos tuh pahngyak nuh kac.

3 Ac inge nga fohlohklac nuh ke sie sramsram fototo ke mweun inmahsrlon mwet Nephi ac mwet Laman, ke yac ahksingucul alkosr ke kolyuck luhn mwet nuhnuhnkuh.

4 Tuh liye, tukun ma inge mwet Zoram elos eklac mwet Laman; ke ma inge, ke muhtwacwacackiyacn yac ahksingucul alkosr mwet luhn mwet Nephi elos liye tuh mwet Laman elos tuhkuh nuh yohrohlos; ke ma inge elos oruh ahkoeyuck nuh ke mweun; ahok, elos oracni nuh sie un mwet mweun lalos fin acn Jershon.

5 Ac tukun ma inge mwet Laman elos tuhkuh ke tausin mwet lalos; ac elos tuhkuh nuh fin acn Antionum, suc pa acn luhn mwet Zoram; ac sie mwet suc inel pa Zerahemnah el pa mwet kol lalos.

6 Ac inge, mwet Amalek elos koluk liki na ac ahkmas liki na mwet Laman, ke ac yohrohlos sifacna, ke ma inge, Zerahemnah el srihsrngiyac sifen kacptin in karihngihn mwet Laman, ac elos nohfohn mwet Amalek ac mwet Zoram.

7 Na ma inge el oruh tuh elan kuh in sruokyac na kasrkuhsrak lalos nuh sin mwet Nephi, tuh elan kuh in usacloslac nuh ye kuh lal tuh elan kuh in oruh plwacn lal.

8 Tuh liye, plwacn lal pa in puhrakwack mwet Laman in kasrkuhsrak lain mwet Nephi; el oruh ma inge tuh elan oruh kuh yohk lal faclos, ac oacyacpac tuh elan kuh in eis kuh nuh fin mwet Nephi ke el usaclosme nuh ke srohoh.

9 Ac inge plwacn luhn mwet Nephi pa in karuhnguhnwacng acn lalos, lohm selos, ac muhtwacn kiyaclos, ac tuhlihk nahtuhlos, tuh elos in kuh in loangwelah ma inge liki poun mwet lokoalok lalos; ac oacyacpac tuh elos in kuh in loangwelah kuh lalos ac ma wo lalos, ahok, ac oacyacpac moul sukohsohk lalos, tuh elos in kuh in alu nuh sin God fal nuh ke luhngse lalos.

10 Tuh elos etuh tuh elos fin puhtatyang nuh in poun mwet Laman, tuh el suc fah alu nuh sin God ke nguhn ac ke pwacye, God pwacye ac moul, mwet Laman elos ac kuhnahoslah.

11 Ahok, ac elos oacyacpac etuh ke kasrkuhsrak upac luhn mwet Laman nuh sin mwet wiyaclos, suc pa mwet luhn mwet Anti-Nephi-Lehi, suc tuh pahngpahng mwet lal Ammon—ac elos tiac sruhkwack kuhfwen mwe mweun, ahok, elos ilyak nuh ke sie wuhlweacng ac elos tiacna kuhnahoslah—ke ma inge, elos fin puhtatyang nuh in poun mwet Laman elos ac kuhnausyucklac.

12 Ac mwet Nephi elos tiacna lwelah tuh elos in kuhnausyucklac; ke ma inge elos sang nuh selos acn in usru lalos.

13 Ac mwet lal Ammon elos sang nuh sin mwet Nephi sie ip yohk ke mwe kahsruh lalos in sang kahsruh mwet mweun lalos; ac ohinge mwet Nephi elos eis kunaclos, sifacna, in tuyak lain mwet Laman, suc toweniiyac u lal Laman ac Lemuel, ac wen nahtuhl Ishmael, ac elos nuhkwewa suc lain mwet Nephi, suc pa mwet Amalek ac mwet Zoram, ac fihlin mwet luhn mwet tol lal Noah.

14 Inge fihlin mwet ingacn arulacna puhs, apkuhran in, oacna mwet Nephi; ac ohinge mwet Nephi elos eis kunaclos in tuyak lain mwet wiyaclos, finne in ahkmas.

15 Ac tukun ma inge ke mwet mweun luhn mwet Laman elos tuhkweni nuh sie nuh fin acn Antionum, liye, mwet mweun luhn mwet Nephi elos ahkolah in sonolos fin acn Jershon.

16 Inge, mwet kol luhn mwet Nephi, kuh mwet se suc srihsrngiyucki in sifen kacptin luhn mwet Nephi—inge sifen kacptin sac el kol nohfohn mwet mweun luhn mwet Nephi—ac inel pa Moroni;

17 Ac Moroni el karihngihn ma nuhkwewa, ac usyen karihngihnyuck ke mweun lalos. Ac el matwac yac longoul ac limekohsr ke el tuh srihsrngiyucki sifen kacptin fin mwet mweun luhn mwet Nephi.

18 Ac tukun ma inge el ohsun sin mwet Laman ke inmahsrol Jershon, ac mwet lal elos utuck katlas, ac mitmit kuhruh, ac kain in kuhfwen mwe mweun nuhkwewa.

19 Ac ke mwet mweun luhn mwet Laman elos liye tuh mwet lal Nephi, kuh lal Moroni, el ahkolah mwet lal ke mwe loang iniwac ac mwe loang ke paho, ahok, ac oacyacpac mwe loang in karuhnguhnwacng insifaclos, ac oacyacpac elos nukum nuknuk mahtoltol—

20 Inge mwet mweun lal Zerahemnah elos tiacna ahkolah ke kuhtwena ma inge; elos us muhkwena katlas nahtuhlos ac mitmit kuhruh nahtuhlos, ac mwe pihsr nahtuhlos ac suhkan pihsr nahtuhlos, yot lalos ac foht nahtuhlos; ac elos kohflohfohl, sahyacn na sie kulun kosro ma elos losyac infulwaclos kac; ahok, elos nohfohn kohflohfohl, sahyacn mwet Zoram ac mwet Amalek.

21 Tuhsruhk elos tiacna loangweyucklac ke mwe loang iniwac, kuh mwe loang—ke ma inge, elos arulacna sahngweng sin un mwet mweun luhn mwet Nephi ke srihpen mwe loang lalos, finne elos arulacna puhs liki mwet Nephi.

22 Liye, na tukun ma inge elos tiacna ke tuhkuh lain mwet Nephi ke inmahsrol luhn acn Jershon; ke ma inge elos som liki acn Antionum nuh ke innimac, ac eis fuhfahsryucsr lalos ut raun ke innimac, muhtwacwacack fahlac na e ke muhtuhn infacl Sidon, tuh elos in kuh in tuhkuh nuh fin acn Manti ac sruokyac acn we; tuh elos tiacna nuhnkuh muh mwet mweun lal Moroni ac etuh acn elos som nuh we.

23 Tuhsruhk tukun ma inge, ke pacl se na elos som nuh ke innimac Moroni el suhpwaclah mwet kalngeyuck nuh ke innimac in tuni nien monglac lalos; ac Moroni, pac, el etuh ke kahs in pahluh lal Alma, el suhpwaclah kuhtuh mwet nuh yohrohl, kena sel tuh elan siyuck sin Leum lah mwet mweun luhn mwet Nephi enenuh in som nuh oyac in karuhnguhnuhlosyang sifacna in lain mwet Laman.

24 Ac tukun ma inge kahs luhn Leum tuhkuh nuh facl Alma, ac Alma el fahk nuh sin mwet utuck kahs lal Moroni, lah mwet mweun luhn mwet Laman elos forfor raun ke innimac, tuh elos in kuh in som nuh fin acn Manti, tuh elos in kuh in muhtwacwacack mweuni yen ma muhnahs luhn mwet uh. Ac mwet utuck kahs ingacn som ac tahfweacng sap soko ah nuh sel Moroni.

25 Inge Moroni, el likiyac sie u srihsrihk ke mwet mweun lal fin acn Jershon, fin te ke kuhtuh srihpac sie un mwet Laman ac tuhkuh nuh we ac sruokyac siti uh, el eis u luhlah sin mwet mweun lal ac mahs som nuh fin acn Manti.

26 Ac el oruh tuh mwet nuhkwewa ke ipin acn sac in tuhkweni nuh sie in mweun lain mwet Laman, in karuhnguhnwacng acn lalos ac facl selos, ac kuh lalos ac sukohsohk lalos; ke ma inge elos tuh ahkolah in lain ke pacl se mwet Laman elos ac tuhkuh.

27 Ac tukun ma inge Moroni el oruh tuh un mwet mweun lal in wihklac ke infahlfahl ma oan sisken infacl Sidon, ma oan nuh rohtoh ke infacl Sidon ke innimac.

28 Ac Moroni el likiyac mwet kalngeyuck in raunweack, tuh elan kuh in etuh lah ngac mwet mweun luhn mwet Laman ac fah tuhkuh.

29 Ac inge, Moroni el etuh plwacn luhn mwet Laman, tuh plwacn lalos pa in kuhnahoslah mwet wiyaclos, kuh in oruh elos in muhta ye kuh ac usacloslac nuh ke srohoh tuh elos in kuh in oakiyac sie tohkohsrahi nuh selos sifacna fin acn ah nohfohn;

30 Ac el oacyacpac etuh lah luhngse sefanna luhn mwet Nephi pa in sruokyacna acn selos, ac moul sukohsohk lalos, ac alu lalos, ke ma inge el nuhnkuh tuh tiac ma koluk se elan karuhnguhnuhlosyang ke ohiyac in ahkluhkuhk; ke ma inge, el etwacack sin mwet kalngeyuck lal lah oyac kac inkacnek ma mwet Laman elos ac tuhkuh kac.

31 Ke ma inge, el srwaclihk un mwet mweun lal ac us sie u ah nuh ke infahlfahl uh, ac elos wihklac ke lacfahl nuh kuhtuhlacp, ac nuh epang ke inging Riplah;

32 Ac mwet mweun luhlah ah el okanlah ke infahlfahl nuh rohtoh, ke lacfahl rohtoh ke infacl Sidon, ac nuh tenah nuh ke inmahsrol luhn acn Manti.

33 Ac ohinge el fihliyac un mwet mweun lal fal nuh ke luhngse lal, el ahkolah in sonolos.

34 Ac tukun ma inge mwet Laman elos tuhkuh ke lacfahl acir ke inging uh, ke sie acn ma un mwet mweun lal Moroni ah wihklac we.

35 Ac ke mwet Laman elos ahluhkwelah inging Riplah, ac tuhkuh nuh ke infahlfahl uh, ac muhtwacwacack in sahslah ke infacl Sidon, un mwet mweun ma wihklac ke lacfahl epang ke inging uh, suc kolyuck sin sie mwet suc inel pa Lehi, ac el kol un mwet mweun lal nuh met ah ac raunweack mwet Laman ke lacfahl nuh kuhtuhlacp nuh tohkohlos.

36 Ac tukun ma inge mwet Laman, ke elos liye mwet Nephi ut tok tuhkuh nuh yohrohlos, elos forlah ac muhtwacwacack in mweun lain un mwet mweun lal Lehi.

37 Ac sikyak luhn misac uh muhtwacwacack ke kwewana lacfahl uh, tuhsruhk koluk kuhtuh liki nuh sin u luhn mwet Laman, tuh kohflohfohl lalos ikacklah na nuh ke pakpuck upac luhn mwet Nephi ke katlas nahtuhlos ac mitmit kuhruh nahtuhlos, ma sang misac apkuhran nuh ke pakpuck nuhkwewa.

38 Ke lwacyacn ngiac, ke kais kuhtuh pacl sie mwet ac misac inmahsrlon mwet Nephi, ke katlas nahtuhlos ac ke kahklah luhn srah, elos lihsrihngyucki liki ip yohk srihpac ke mahnolos, kuh ip yohk srihpac ke mahno uh lihsrihngyucki liki pakpuck luhn mwet Laman, ke mwe loang luhn iniwaclos, ac mwe loang luhn paholos, ac mwe loango insifaclos; ac ohinge mwet Nephi elos tuh ahkfahsrye sikyak luhn misac uh nuh inmahsrlon mwet Laman.

39 Ac tukun ma inge mwet Laman elos sahngweng, ke srihpen kuhnausyucklac yohk inmahsrlolos, finne ne ke na elos muhtwacwacack in kahing nuh ke infacl Sidon.

40 Ac elos ukweyuck sel Lehi ac mwet lal; ac elos lihsyuckyak sel Lehi nuh ke kof Sidon, ac elos tuhpallah kof Sidon. Ac Lehi el tulokihnyac un mwet mweun lal ke sisken infacl Sidon tuh elos in tiac tuhpallah.

41 Ac tukun ma inge Moroni ac un mwet mweun lal ohsun nuh sin mwet Laman ke infahlfahl uh, ke lacfahl se sahyac ke infacl Sidon, ac muhtwacwacack in mweun lainuhlos in onweloslac.

42 Ac mwet Laman elos sifilpac kahing luhkwelos, nuh fin acn Manti; ac elos sifilpac ohsun sin un mwet mweun lal Moroni.

43 Na ke ohiyac se inge mwet Laman elos tuh mweun upac; ahok, wacngihn pacl se etweyuck ke mwet Laman elos acnwuck arulacna ahluhkwelah fokoko ac puhlaik, moh, tiacna finne ke muhtwacwacackiyac ah me.

44 Ac elos mokleyuckyak sin mwet Zoram ac mwet Amalek, suc pa sifen kacptin ac mwet kol lalos, ac sel Zerahemnah, suc pa sifen kacptin lalos, kuh mwet kol fuhlwact lalos; ahok, elos tuh acnwuck oacna dragon uh, ac puhs sin mwet Nephi misac ke paholos, ahok, tuh elos tuh fuhluhngyac nuh ke ip luo mwe loang insifac pucspucs lalos, ac elos tuh kantweyac mwe loang iniwac pucspucs lalos, ac elos tuh pakwelah puhs paholos; ac ohinge mwet Laman elos tuh acnwuck ke kasrkuhsrak upac lalos.

45 Ne ohinge, mwet Nephi elos mokleyuck ke sie srihpac wo, tuh elos tiac acnwuck nuh ke usyen tohkohsrahi kuh ke kuh tuhsruhk elos acnwuck ke srihpen lohm selos ac sukohsohk lalos, ac muhtwacn kiyaclos ac tuhlihk nahtuhlos, ac ma nuhkwewa lalos, ahok, nuh ke inkacnek in alu lalos ac alu lalos.

46 Ac elos oruh ma suc elos puhlakihn muh ma kunaclos suc elos misac sin God lalos; tuh Leum El fahk nuh selos, ac oacyacpac nuh sin pahpah tuhmwaclos, lah: Ke wacngihn mwacta koluk lowos ke tahfonglac se met, kuh ahkluo, kowos fah tiac lwelah kowos sifacna in misac ke poun mwet lokoalok lowos.

47 Ac sifilpac, Leum El fahk lah: Kowos fah karuhnguhnwacng sucu lowos finne nuh ke ahkmas. Ke ma inge ke srihpac se inge mwet Nephi elos lain mwet Laman, in loangweloslac sifacna, ac sucu lalos, ac acn selos, ac facl selos, ac kuh lalos, ac alu lalos.

48 Ac tukun ma inge ke mwet lal Moroni elos liye fokokoiyen ac kasrkuhsrak luhn mwet Laman, elos tuh apkuhran in molokweni ac kahing luhkwelos. Ac Moroni, el etwacack plwacn lalos, suhpwaclah ac moklweack insiaclos ke nuhnak inge—ahok, in nuhnkuh acn selos, moul sukohsohk lalos, ahok, sukohsohklah lalos liki srohoh.

49 Ac tukun ma inge elos foracng nuh sin mwet Laman, ac elos pruhe kwacfe ke sie puhsra nuh sin Leum God lalos, nuh ke moul sukohsohk lalos ac sukohsohklah lalos liki srohoh.

50 Ac elos muhtwacwacack in tuyak lain mwet Laman ke kuh; ac ke ao sacpacna elos wowoyak nuh sin Leum nuh ke sukohsohk lalos, mwet Laman elos muhtwacwacack in kahing liki ye muhtahlos; ac elos kahing finne nuh ke kof Sidon.

51 Inge, mwet Laman elos puhslac, ahok, pihsaclos puhs pacl luo liki na mwet Nephi; ne ohinge, elos ukohkyak oruh elos tuhkweni nuh sie in oraclah u se ke infahlfahl uh, ke sisken infacl Sidon.

52 Ke ma inge mwet mweun lal Moroni elos raunweloslac, ahok, finne ke kwewana lacfahl ke infacl uh, tuh liye, mwet lal Lehi oasr ke lacfahl nuh kuhtuhlacp.

53 Ke ma inge ke Zerahemnah el liye mwet lal Lehi ke lacfahl nuh kuhtuhlacp ke infacl Sidon, ac un mwet mweun lal Moroni nuh ke lacfahl nuh rohtoh ke infacl Sidon, tuh elos rauniyucklac sin mwet Nephi, elos sahngweng na upac.

54 Inge Moroni, ke el liye sahngweng lalos, el sapkihn mwet lal tuh elos in tui tiac ahksohrohrye srah lalos.