1 Ac na tukun ma inge ke mahlwem ahksingucul sie ke yac ahksingucul yuc, ke lwen ahksingucul ke mahlwem sac, un mwet mweun luhn mwet Laman elos liyeyuckyak tuhkuh nuh fin acn lal Ammonihah.

2 Ac liye, siti uh muhsahiyuckyak, ac Moroni el fihliyac sie un mwet mweun ke mahsrol luhn siti uh, ac elos puhkanwack fohk uh raunweack in luhsruhngelosyak liki suhkan pihsr ac yot luhn mwet Laman; tuh liye, elos acnwuck orekmakihn yot ac suhkan pihsr.

3 Liye, nga fahk lah siti lal Ammonihah ah tuh sifilpac muhsahiyuckyak. Nga fahk nuh suwos, ahok, tuh kuhtuh na ip kac ah muhsahiyuckyak; ac ke srihpen mwet Laman ah tuh kuhnahoslah ke sie pacl ah ke srihpen ma koluk luhn mwet uh, elos nuhnkuh muh ma inge ac sifilpac sie ma fihsrwacsr nuh selos in sruokyac.

4 Tuhsruhk liye, fuhkah luhpan yohkiyacn suhpwacrlac lalos; tuh liye, mwet Nephi elos puhkanwack soko inlaf ke fohk uh in raunwelosyak, ma arulacna fuhlwact tuh pwacnwacng mwet Laman elos tiac kuh in tolyuck yot ac pihsrki suhkan pihsr nahtuhlos nuh yohrohlos tuh ma inge in oasr usrwac, elos tiac pac kuh in tuhkuh nuh yohrohlos sahyacn na motonoac in utyak lalos.

5 Inge ke pacl se inge sifen kacptin luhn mwet Laman elos arulacna lut, ke srihpen lahlmwetmwet luhn mwet Nephi in ahkno acn in topang lalos.

6 Inge mwet kol luhn mwet Laman elos nuhnkuh muh, ke srihpen puhsiyaclos, ahok, elos nuhnkuh muh ac wo ohiyaclos in tuhkuh nuh yohrohlos oacna ke elos tuh oruh met ah; ahok, ac elos tuh oacyacpac ahkoeloslac sifacna ke mwe loang, ac ke mwe loeyuck; ac elos tuh oacyacpac ahkoeloslac sifacna ke kulun nuknuk, ahok, nuknuk ma arulacna mahtoltol in afihnyac mahnolos.

7 Ac ke elos ahkolah ohinge elos nuhnkuh muh ac fihsrwacsr elos in kuhtanglah ac sruokyac mwet wiyaclos nuh ke mwe losyac luhn srohoh, kuh uniyac ac onweloslac fal nuh ke engan lalos.

8 Tuhsruhk liye, nuh ke lut na yohk lalos, elos tuh ahkolah nuh selos, ke sie ohiyac ma tiacna etweyuck inmahsrlon tuhlihk nahtuhl Lehi. Inge elos tuh ahkolah nuh sin mwet Laman, in mweun tukun ohiyacn ahkuhtweyac lal Moroni.

9 Ac tukun ma inge mwet Laman, kuh mwet Amalickiah, elos tuh arulacna lut ke ohiyacn ahkolah lalos ke mweun.

10 Inge, tohkohsrah Amalickiah el fin tuhkuh liki acn lal Nephi, us muhta ke un mwet mweun lal, sahp el ac oruh tuh mwet Laman ah in lain mwet Nephi ke siti lal Ammonihah; tuh liye el tiac fosrngahkihn srah luhn mwet lal.

11 Tuhsruhk liye, Amalickiah el tiacna tuhkuh nuh ke mweun ah. Ac liye, sifen kacptin lal elos tiacna puhlaik in som mweuni mwet Nephi ke siti lal Ammonihah, tuh Moroni el ekuhllah karihngihnyen mukwikwi inmahsrlon mwet Nephi, yohkna oruh mwet Laman elos suhpwacrlac na ke nien monglac lalos ac elos tiac kuh in tuhkuh nuh yohrohlos.

12 Ke ma inge elos fohlohk nuh innimac, ac eis lohm nuknuk selos ac mahs som nuh fin acn lal Noah, nuhnkuh muh pa ingacn acn se tohkoh ma ac wo emet nuh selos in tuhkuh lain mwet Nephi.

13 Tuh elos tiac etuh lah Moroni el ahkfokokoyelah, kuh tuh muhsaheack acn in topang, nuh ke siti nuhkwewa fin acn ah nohfohn; ke ma inge, elos mahs som nuh fin acn lal Noah ke nuhnak kuh; ahok, sifen kacptin lalos elos tuhkuh nuh met uh ac eis sie fuhlahk tuh elos ac fah kuhnahoslah mwet in siti sac.

14 Tuhsruhk liye, nuh ke lut lalos, siti lal Noah, suc fahsruh ne ke pacl se inge tuh sie acn muhnahs, ac inge, ke ohiyac lal Moroni, fokokoi, ahok, finne in ahluhkwelah fokokoiyen siti Ammonihah.

15 Ac inge, liye, pa inge lahlmwetmwetiyacl Moroni; tuh el nuhnkuh muh elos ac sahngweng ke siti Ammonihah; ac oacna ke siti lal Noah tuh fahsruh ne inge tuh pa ip se ma muhnahs emet fin acn ah, ke ma inge elos mahs som nuh we in mweun; ac ohinge ma inge fal nuh ke luhngse lal.

16 Ac liye, Moroni el srihsrngilyac Lehi in sifen kacptin luhn mwet in siti sac; ac Lehi sepacna suc acnwuck nuh sin mwet Laman ke infahlfahl nuh kuhtuhlacp ke infacl Sidon.

17 Ac inge liye tukun ma inge, ke mwet Laman elos sokwack lah Lehi el kol siti uh elos tuh sifilpac suhpwacrlac, tuh elos arulacna sahngweng sel Lehi; ne ohinge sifen kacptin lalos elos tuh olwelah ke sie fuhlahk in kuhnahoslah siti sac; ke ma inge, elos us tuhkuh un mwet mweun lalos.

18 Inge liye, mwet Laman elos tiac kuh in utyak nuh ke acn topangiyuck lalos ke kuhtwena acn sahyacn motonoac uh, ke srihpen fuhlwactiyen puhkpuhk ma elos puhkanwack, ac loaliyacn laf soko ma elos puhkanwack raunweack acn ah, sahyacn na motonoac ah.

19 Ac ohinge mwet Nephi elos ahkolah in kuhnahoslah mwet nuhkwewa suc srihke in fanyak in utyak nuh we ke kuhtwena inkacnek sahyac, ke elos tuhngaluhlos ke yot ac puhsrkwelos.

20 Ohinge elos tuh ahkolah, ahok, sie u ke mwet fokoko emet lalos, elos us katlas nahtuhlos ac pihsr nahtuhlos, in onweloslac nuhkwewa suc srihke in utyak nuh ke acn topangiyuck selos ke sisken motonoac uh; ac ohinge elos tuh ahkolah in karuhnguhnuhlosyang sifacna in lain mwet Laman.

21 Ac tukun ma inge kacptin luhn mwet Laman elos us tuhkuh un mwet mweun lalos nuh ke motonoac ah, ac muhtwacwacack in lain mwet Nephi, in utyak nuh ke acn topangiyuck lalos; tuhsruhk liye, elos ukohkyak ke pacl nuh ke pacl, yohkna oruh elos tuh acnwucki ke sie ahkmas na upac.

22 Inge ke elos konwacack tuh elos tiac kuh in eis kuh fin mwet Nephi ke motonoac ah, elos muhtwacwacack in lahfuhslah laf soko ah tuh elos in kuh in oraclah sie inkacnek ah nuh sin un mwet mweun lalos, tuh elos in kuh in acnwuck wo; tuhsruhk liye, ke srihke inge elos acnwucki ke yot ac suhkan pihsr ma tolyuck ac pihsrkiyuck nuh yohrohlos; ac liki na in lahfuhslah laf uh ke puhkpuhk in fohk uh, laf uh nwacnwaclah wi na mwet misac ac mahno kihnet lalos.

23 Ohinge mwet Nephi elos fokoko liki na mwet lokoalok lalos; ac ohinge mwet Laman ah tuh srihke in kuhnahoslah mwet Nephi ne ke na sifen kacptin lalos nuhkwewa elos acnwucki; ahok, ac puhs liki sie tausin sin mwet Laman elos acnwucki; a, ke lwacyacn ngiac, tiac sie fanna mwet luhn mwet Nephi ah acnwucki.

24 Oasr mwet luhmngaul suc kihnetuh, suc tiacna lihsrihngyucki liki suhkan pihsr luhn mwet Laman ke motonoac ah, tuhsruhk elos loangiyucklac ke mwe loang lalos, ac ke mwe loang iniwac lalos, ac susu osra lalos, yohkna oruh kihnet kaclos ah oan ke niyaclos, puhs selos kihnet na upac.

25 Ac tukun ma inge, ke mwet Laman elos liye tuh sifen kacptin lalos elos nohfohn acnwucki elos kahinglac nuh innimac. Ac tukun ma inge elos fohlohklac nuh fin acn lal Nephi, in ahkkahlwemye nuh sel tohkohsrah, Amalickiah, suc el sie mwet Nephi ke el isuslac ah, ke luhpan kuf yohk lalos.

26 Ac tukun ma inge el arulacna kasrkuhsrak sin mwet lal, ke srihpen el tiacna eis luhngse lal fin mwet Nephi; el tiacna oraclah tuh elos in muhta ye kapihr luhn srohoh.

27 Ahok, el arulacna kasrkuhsrak, ac el tuh selngawi God, ac oacyacpac Moroni, fuhlahk ke sie wuhlwelah tuh el ac nihm srah lal; ac ma inge ke srihpen Moroni el liyacacng na masap luhn God in ahkolah nuh ke karihngihnyuck wo luhn mwet lal.

28 Ac tukun ma inge, ke lwacyacn ngiac, mwet lal Nephi elos tuh sang kuloh nuh sin Leum God lalos, ke srihpen kuhlacna Lal suc wacngihn kuh oacna in molweloslac liki poun mwet lokoalok lalos.

29 Ac ohinge sahflah yac ahksingucul yuc ke kolyuck luhn mwet nuhnuhnkuh fin mwet lal Nephi.

30 Ahok, ac fahfahlac in oasr mislac inmahsrlolos, ac arulacna kapwack yohk alu uh ke srihpen lohacng ac oaru lalos ma elos sang nuh ke kahs luhn God, ma fahkyuck nuh selos sel Helaman, ac Shiblon, ac Corianton, ac Ammon ac mwet wiyacl, ahok, ac selos nuhkwewa suc tuh ahkkweyeyucklac ke akwuck muhtahl luhn God, pacptaislac in auliyak, ac suhpweyucklac in luti inmahsrlon mwet uh.