1 Ac na tukun ma inge ke muhtwacwacackiyacn yac ahktolngoul ke kolyuck luhn mwet nuhnuhnkuh, ke lwen ahkluo ke mahlwem se emet, Moroni el eis sie lwacta sel Helaman, fahk ke ohiyac luhn mwet ah ke ipin acn sac fin acn ah.

2 Ac pa inge kahs ma el suhmuhslah, fahk: Tamuhlwel sacohklacna wiyuck, Moroni, oacna in Leum ac oacpacna ke fosrngah luhn mweun lasr uh; liye, tamuhlwel sacohk wiyuck, oasr kuhtuh ma nga ke fahk nuh sum ke mweun se lasr ke ipin acn se fin acn uh inge.

3 Liye, tausin luo sin wen nuhtin mwet suc Ammon el tuh us tuhkuh liki acn lal Nephi—inge kom etuh lah elos tuhkuh ke fihl in mwet lal Laman, suc pa wen mahtuh se emet nuhtin pahpah tuhmwacsr Lehi;

4 Inge nga tiac enenuh in ahkuhtweyac nuh sum ke facsin lalos kuh suhlahlahlfongi lalos, tuh kom etuh ke ma inge nuhkwewa—

5 Ke ma inge fal nuh sihk tuh nga in fahk nuh sum lah tausin luo sin mukul fuhsr inge sruhkwack kuhfwen mwe mweun lalos, ac kena tuh nga in mwet kol lalos; ac kuht tuhkuh in karuhnguhnwacng acn lasr.

6 Ac inge kom oacyacpac etuh ke wuhlweacng se suc pahpah tuhmwaclos tuh oraclah, tuh elos in tiacna sruhkwack kuhfwen mwe mweun lalos in lain mwet wiyaclos in ahksohrohryelah srah.

7 Tuhsruhk ke yac ahklongoul ac ohnkohsr, ke elos liye kweok lasr ac fosrngah lasr kaclos, elos kuhracnna kuhnahoslah wuhlweacng ma elos tuh oraclah ac sruhkwack kuhfwen mwe mweun in karihngihn kuht.

8 Tuhsruhk nga tiacna lwelah elos in kuhnahoslah wuhlweacng se ma elos tuh oraclah inge, nga nuhnkuh tuh God El ac ahkkweye kuht, yohkna oruh kuht tiacna sifil kweok ke srihpen ahkpwacyeiyucklac luhn olwelah se ma elos tuh oraclah ah.

9 Tuhsruhk liye, pa inge sie ma suc kuht kuh in engan yohk kac. Tuh liye, ke yac ahklongoul ac ohnkohsr, nga, Helaman, tuh mahs us muhta luhn mwet fuhsr tausin luo nuh ke siti lal Judea, in kahsrel Antipus, suc kom tuh srihsrngiyac in sie mwet kol fin mwet ke ipin acn sac.

10 Ac nga tuh sang wen tausin luo nuhtihk inge in weacng, (tuh elos fal in pahngonyuck wen) un mwet mweun lal Antipus, suc fokokoiyac oruh Antipus el arulacna engan; tuh liye, un mwet mweun lal ahksuhpuhsyeyucklac sin mwet Laman ke srihpen un mwet mweun lalos tuh uniyac pihsac yohk se ke mwet lasr, tuh ke srihpac se inge kuht ahsor.

11 Ne ohinge, kuht kuh in ahkkweye kuht sifacna ke pacl se inge, tuh elos misac ke srihpen acn selos ac ke God lalos, ahok, ac elos engan.

12 Ac mwet Laman elos oacyacpac sruokyac mwet srohoh pucspucs, elos nuhkwewa sifen kacptin, tuh wacngihn mwet sahyac elos fuhlwelah in moul. Ac kuht nuhnkuh tuh elos ke pacl se inge elos oasr fin acn lal Nephi; ac ohinge elos fin tiac acnwucki.

13 Ac inge pa inge siti ma mwet Laman elos sruokyac ke ahksohrohryeyacn srah luhn mwet puhlaik pucspucs lasr:

14 Acn lal Manti, kuh siti lal Manti, ac siti lal Zeezrom, ac siti lal Cumeni, ac siti lal Antiparah.

15 Ac pa inge siti ma elos muhta we ke nga tuhkuh nuh ke siti lal Judea; ac nga konwaclwack Antipus ac mwet lal ke elos orekma ke kuhiyaclos in ahkfokokoye siti uh.

16 Ahok, ac elos muhnahs in mahno ac oacyacpac in nguhn, tuh elos acnwuck puhlaiklacna ke lwen uh ac orekma ke fong uh in karuhnguhnwacng siti lalos; ac ohinge elos tuh puhlakihn kain in kweok yohk nuhkwewa.

17 Ac inge elos tuh insacnweacng in kuhtanglah acn se inge kuh misac; ke ma inge kom kuh in nuhnkuh muh un mwet mweun srihsrihk se suc nga us wiyuc, ahok, wen nuhtihk ingacn, elos sang nuh selos finsrak yohk ac engan yohk.

18 Ac na tukun ma inge ke mwet Laman elos liye lah Antipus el eis sie u in ahkfokokoyelah un mwet mweun lal, elos ukwe na sap lal Ammoron in tiac tuhkuh lain siti lal Judea, kuh in lain kuht, in mweun.

19 Ac ohinge kuht luhngseyuck sin Leum; tuh fuhnuh elos tuhkuh nuh yohrohsr ke muhnahs lasr sahp elos luhkuhn kuhnahoslah un mwet mweun srihsrihk lasr; tuhsruhk ohinge kuht painmoullac.

20 Elos sapkihnyuck sel Ammoron in karuhnguhnwacng siti lalos ma elos tuh eislah. Ac ohinge sahflah yac ahklongoul ac ohnkohsr. Ac ke muhtwacwacackiyacn yac ahklongoul ac itkohsr kuht tuh ahkolah siti lasr ac ahkoekuhtlac sifacna in loango.

21 Inge kuht kena tuh mwet Laman in tuhkuh nuh yohrohsr; tuh kuht tiacna ke som orek acnwuck nuh selos ke pot kuhlacna lalos.

22 Ac tukun ma inge kuht fihliyac mwet kalngeyuck in raunweack acn we, in tuni mukwikwi luhn mwet Laman, tuh elos in tiac ahlikikuhtlac ke fong uh kuh ke lwen in orek acnwuck nuh ke siti sahyac lasr ma oan nuh acir.

23 Tuh kuht etuh lah ke siti ingacn elos tiacna fokoko fal in ohsun nuh selos; ke ma inge kuht kena, elos fin ahlikikuhtlac, in ut tok tuhkuh mweun lainuhlos, ac ohinge in ut tok ohsun nuh selos ac ke pacl sacpacna elos in ohsun ke muhta ah. Kuht nuhnkuh tuh kuht kuh in kuhtanguhloslac; tuhsruhk liye, kuht suhpwacrlac ke kena se lasr inge.

24 Elos tiacna kuh in ahlikikuht wi un mwet mweun lalos nuhkwewa, elos tiac pac kuh ke u srihsrihk, finte elos ac tiac fokoko fal na ac elos ac kuhtangyucklac.

25 Elos tiac pac mahs tuhkuh in lain siti lal Zarahemla; elos tiac pac fahsr tuhpal muhtuhn acn lal Sidon, in som nuh ke siti lal Nephihah.

26 Ac ohinge, ke un mwet mweun lalos, elos insacnweacng in karuhnguhnwacng siti lalos ma elos tuh eislah.

27 Ac na tukun ma inge ke mahlwem ahkluo ke yac se inge, tuh utuckuh nuh yohrohsr mwe kahsruh pucspucs sin pahpah tuhmwacn wen tausin luo nuhtihk ingacn.

28 Ac oacyacpac suhpweyuckme mwet tausin luo nuh yohrohsr liki acn lal Zarahemla. Ac ohinge kuht tuh ahkolah ke pihsen mwet tausin singucul, ac mwe kahsruh nuh selos, ac oacyacpac nuh sin muhtwacn kiyaclos ac tuhlihk nahtuhlos.

29 Ac mwet Laman, ohinge elos liye ke un mwet mweun lasr kapkapwack lwen nuhkwewa, ac mwe kahsruh tuhkuh in kahsre kuht, elos muhtwacwacack in sahngweng, ac muhtwacwacack in tufoklac tuhkuh, in siyuck fin ac kuh in tulokihnyac eisyacn mwe kahsruh ac mwe ahkkuh lasr.

30 Inge ke kuht liye lah mwet Laman elos muhtwacwacack in tuhfalwack ke ma inge, kuht kena in us sie plwacn usrnguck nuh yohrohlos; ke ma inge Antipus el sapkihn tuh nga in mahs som us wen srihsrihk nuhtihk nuh ke sie siti atuhlani, in nuhmuh kuht utuck mwe kahsruh nuh ke sie siti atuhlani.

31 Ac kuht fahsr sisken siti lal Antiparah, oacna in muh kuht ac som nuh ke siti se tohkoh ah, ke mahsrol sisken pe acn ah.

32 Ac tukun ma inge ke kuht tuh fahsr som, oacna in muh kuht us mwe kahsruh lasr, in som nuh ke siti sac.

33 Ac tukun ma inge ke Antipus el fahsr som wi sie un mwet mweun lal, fihliyac mwet luhlah ah in karuhnguhnwacng siti uh. Tuhsruhk el tiacna fahsr som ne ke na nga som na met wi un mwet mweun srihsrihk luhk, ac tuhkuh nuh sisken siti Antiparah.

34 Ac inge, ke siti Antiparah un mwet mweun ma fokoko emet luhn mwet Laman elos muhta we; ahok, ma puhslac emet.

35 Ac tukun ma inge ke elos tuh etwacack sin mwet kalngeyuck lalos, elos tuhkuh wi un mwet mweun lalos ac tuhkuh in lain kuht.

36 Ac tukun ma inge kuht tuh kahing luhkwelos, nuh acir. Ac ohinge kuht tuh kohllah un mwet mweun fokoko emet luhn mwet Laman;

37 Ahok, finne nuh ke sie lusac loesuhlah, yohkna oruh ke elos liye un mwet lal Antipus elos ukwaclos, ke kuhiyaclos, elos tiacna forlah nuh lacyot kuh nuh lacsac, tuhsruhk tahfwelah na fahsr lalos ke sie inkacnek suwohs tohkohsr; ac, oacna ke kuht nuhnkuh ah, plwacn lalos pa in unikuhti met liki Antipus el falkweltahluh, ac ohinge tuh elos in tiac rauniyucklac sin mwet lasr.

38 Ac inge Antipus, ke el liye kuht sensen, el salkweack fahsr luhn un mwet mweun lal. Tuhsruhk liye, fongweni; ke ma inge elos tiacna falkwekuhti, Antipus el tiac pacna falkweltahluh; ke ma inge kuht tuh monglac ke fong ah.

39 Ac tukun ma inge met liki kahlmwelihk luhn lututacng, liye, mwet Laman ah elos ukwe kuht. Inge kuht tiacna fokoko fal in lainuhlos; ahok, nga tiacna lwelah tuh wen srihsrihk nuhtihk in puhtatyang nuh in paholos; ke ma inge kuht tuh tahfwelah fahsr lasr, ac kuht som fahsr nuh innimac.

40 Inge elos tiacna forlah nuh lacyot kuh nuh lacsac fin ohinge elos ac rauniyucklac; nga tiac pac forlah nuh lacyot kuh nuh lacsac fin ohinge elos ac falkweyucwi, ac kuht tiac kuh in tu lainuhlos, tuhsruhk ac acnwucki, ac elos ac oruh kahinglac lalos; ac ohinge kuht tuh kahing lwen na fohn sac nuh ke innimac, finne ne ke na lohsrwacni.

41 Ac tukun ma inge lah sifilpac, ke kahlwem luhn lututacng tuhkuh kuht liye mwet Laman elos ukwe kuht, ac kuht tuh kahing luhkwelos.

42 Tuhsruhk tukun ma inge elos tiac ukwe kuht paht met liki elos tui; ac pa inge lututacng ke lwen ahktolu ke mahlwem ahkitkohsr.

43 Ac inge, lah elos falkweyucki sel Antipus kuht tiacna etuh, tuhsruhk nga fahk nuh sin mwet luhk: Liye, kuht tiac etuh tuhsruhk elos tui ke srihpac se tuh kuht in som lainuhlos, tuh elos in kuh in sruokkuhti ke inkacnek in sruhf lalos;

44 Ke ma inge meac kowos ac fahk, wen nuhtihk, yac kowos ac som lainuhlos in mweun?

45 Ac inge nga fahk nuh sum, Moroni tamuhlwel sacohk wiyuck, lah nga soenna in liye puhlaik yohk, moh, tiac inmahsrlon mwet Nephi nuhkwewa.

46 Tuh ke nga nuh pahnglolos wen nuhtihk (tuh elos nuhkwewa arulacna fuhsr) finne ohinge elos fahk nuh sihk: Pahpah, liye God lasr El wi kuht, ac El ac tiac lwelah tuh kuht in kuhtangyucklac; na lwelah kuht in som; kuht ac tiac uniyac mwet wiyacsr elos fin fihlikuhtlac; ke ma inge lwelah kuht in som, fin ohinge elos ac kuhtanglah un mwet mweun lal Antipus.

47 Inge elos soenna wi acnwuck, tuhsruhk elos tiacna sahngweng in misac; ac elos nuhnkuh yohk ke moul sukohsohk luhn pahpah tuhmwaclos liki na elos in nuhnkuh ke moul lalos; ahok, elos tuh lutiyuck sin ninac kiyaclos, lah elos fin tiac ahlohloh, God El ac molweloslac.

48 Ac elos kalweni nuh sihk kahs luhn ninac kiyaclos, fahk: Kuht tiacna ahlohloh tuh ninac kiyacsr etuh.

49 Ac tukun ma inge nga tuh fohlohklac wi tausin luo luhk in lain mwet Laman suc tuh ukwe kuht ah. Ac inge liye, un mwet mweun lal Antipus elos falkweltahluh, ac sie mweun na upac tuh srolah.

50 Un mwet mweun lal Antipus elos tohtohlah, ke srihpen fahsr loeloes lalos ke lusen pacl na fototo se, elos apkuhran in puhtatyang nuh in poun mwet Laman; ac fuhnuh nga tiac fohlohk us tausin luo luhk ah luhkuhn elos oraclah srihpac lalos.

51 Tuh Antipus el acnwucki ke katlas, ac puhs sin mwet kol lal, ke srihpen tohtohlah lalos, ma ke srihpen pihsrpihsriyen fahsr lalos—ke ma inge mwet lal Antipus, elos fohsack ke srihpen puhtatlac luhn mwet kol lalos, elos muhtwacwacack in muhnahslah ye muhtuhn mwet Laman.

52 Ac tukun ma inge ke mwet Laman elos puhlaikyak, ac muhtwacwacack in ukwaclos; ac ohinge mwet Laman ah elos ukwaclos ke kuhiyaclos ke Helaman el ut tok tuhkuh wi tausin luo lal, ac muhtwacwacack in arulacna onweloslac, yohkna oruh un mwet mweun luhn mwet Laman ah tui ac foracng nuh sel Helaman.

53 Inge ke mwet lal Antipus elos liye lah mwet Laman elos forlah, elos oracni nuh sie mwet lalos ac sifilpac ut tok tuhkuh nuh yurun mwet Laman.

54 Ac na tukun ma inge kuht, mwet lal Nephi, mwet lal Antipus, ac nga weacng tausin luo, tuh raunwelah mwet Laman, ac tuh onweloslac; ahok, yohkna oruh elos tuh kohslah na use kuhfwen mwe mweun lalos ac oacyacpac eltahl sifacna in mwet srohoh ke mweun.

55 Ac na tukun ma inge ke elos tuh sifacna fuhlwelosyak nuh sesr, liye, nga oacklah pihsen mwet fuhsr suc tuh wiyuc acnwuck, fosrngah tuh puhs selos acnwucki.

56 Tuhsruhk liye, ke engan yohk luhk, tiac sie fanna selos puhtatlac nuh infohk uh; ahok, ac elos tuh acnwuck oacna in muh ke kuh luhn God; ahok, wacngihn mwet etweyuck in acnwuck ke kuh usrnguck; ac ke kuh na fokoko elos mweun lain mwet Laman, oruh elos ahksahngwengyaclosyak; ac ke srihpac se inge mwet Laman ah sifacna fuhlwelosyak in mwet srohoh ke mweun.

57 Ac ke wacngihn acn nuh sin mwet srohoh lasr, tuh kuht in kuh in topangwelos liki un mwet mweun luhn mwet Laman, ke ma inge kuht suhpwacloslac nuh fin acn lal Zarahemla, ac sie u luhn mwet suc tiac acnwucki lal Antipus, weluhlos; ac mwet luhlah ah nga eisaclos elos in weacng mwet fuhsr luhk luhn mwet Ammon, ac fahsr fohlohk nuh ke siti lal Judea.